Хайджын уӕм ацы дунейы зондӕй нӕ, фӕлӕ Хуыцауы сыгъдӕг тыхӕй
«Мах та ацы дунейы зондӕй не схайджын стӕм, фӕлӕ, Хуыцауӕй чи цӕуы, уыцы сыгъдӕг тыхӕй, цӕмӕй ӕмбарӕм, Хуыцау нын цӕстуарзонӕй цы радта, уыдӕттӕ» (1 КОР. 2:12).
1, 2. а) Ӕцӕг чырыстӕттӕ кӕимӕ хӕцынц? ӕ) Цавӕр фарстатӕм ӕркӕсдзыстӕм?
ӔЦӔГ чырыстӕттӕ иууылдӕр сты тохы быдыры! Се знаг у тыхджын, хинӕйдзаг ӕмӕ фӕлтӕрдджын. Уымӕ ис ахӕм хӕцӕнгарз, ӕмӕ йӕ дӕлбар бакодта адӕмӕн сӕ фылдӕры. Фӕлӕ мах хъуамӕ афтӕ ма хъуыды кӕнӕм, ӕмӕ стӕм ӕдых кӕнӕ ныл фӕуӕлахиз уыдзӕн (Ис. 41:10). Уымӕн ӕмӕ нӕ цы хъахъхъӕны, ууыл ничи ӕмӕ ницы фӕтых уыдзӕн.
2 Мах хӕцӕм ӕнӕуынгӕ тыхтимӕ. Не знаг у Сайтан Хӕйрӕг, ӕмӕ уӕлдай тынгдӕр кӕмӕй пайда кӕны, уыцы хӕцӕнгарз у «ацы дунейы зонд» (1 Кор. 2:12). Хӕйрӕгӕй нӕ цы хъахъхъӕны, уый у Хуыцауы сыгъдӕг тых. Цӕмӕй ныл тохы быдыры мацы ӕрцӕуа ӕмӕ нӕ уырнындзинад ма фӕцуда, уый тыххӕй хъуамӕ Хуыцауӕй йӕ сыгъдӕг тых курӕм ӕмӕ, сыгъдӕг тых цы дыргъ дӕтты, уый нӕ царды ӕвдисӕм (Гал. 5:22, 23). Фӕлӕ ацы дунейы зонд кӕмӕй цӕуы? Адӕмы зондыл афтӕ тынг цӕмӕн ӕндавы? Куыд ис базонӕн, махыл дӕр ӕндавы ӕви нӕ? Йесо Хуыцауы сыгъдӕг тых куыд райста ӕмӕ ацы дунейы зонды ныхмӕ фидар куыд лӕууыд, уымӕй цӕуыл ахуыр кӕнӕм?
Ацы дунейы зонд тыхджын цӕмӕн у?
3. Ацы дунейы зонд кӕмӕй цӕуы ӕмӕ адӕмыл куыд ӕндавы?
3 Ацы дунейы зонд цӕуы Сайтанӕй, «ацы дунейы хицауӕй». Ӕмӕ уыцы зонд у Хуыцауы сыгъдӕг тыхы ныхмӕ (Иоан. 12:31; 14:30; 1 Иоан. 5:19). Уыцы зондахаст адӕмы кӕны Хуыцауы фӕндоны ныхмӕ.
4, 5. Сайтаны зонд адӕмыл ӕндавын куыд райдыдта?
4 Сайтаны зонд адӕмыл ӕндавын куыд райдыдта? Ӕппӕты фыццаг Сайтан хинӕй рацыд Евӕйыл. Хӕйрӕг ӕй баууӕндын кодта, зӕгъгӕ, ӕнӕ Хуыцауӕй амондджындӕр уыдзынӕ (Райд. 3:13). Ӕвӕдза, куыд хинӕйдзаг уыди! (Иоан. 8:44). Уый фӕстӕ Евӕйы уылты Сайтан бахъавыд Адаммӕ дӕр, ӕмӕ йӕ Йегъовӕйы ныхмӕ скодта. Адамы тыххӕй адӕм иууылдӕр тӕригъӕды къухмӕ лӕвӕрд ӕрцыдысты, ӕмӕ Хӕйрӕджы зондыл цӕуынц ӕмӕ уыйау сты ӕгоммӕгӕс. (Бакӕс Ефесӕгтӕм 2:1–3.)
5 Сайтан ма йӕ зондыл акодта бирӕ зӕдты дӕр. Хуыцауы ныхмӕ сӕ рацӕуын кодта, ӕмӕ систы дӕлимонтӕ (Рарг. 12:3, 4). Уыцы хабар ӕрцыд Нойы рӕстӕджы, Доны хъаймӕты размӕ. Уыцы зӕдтӕ баууӕндыдысты, уӕлӕрвты сӕ цӕрӕнбынат куы ныууадзой ӕмӕ зӕххыл сӕ зӕрдӕйы чъизи фӕндты фӕдыл куы ацӕуой, уӕд амондджындӕр кӕй уыдзысты (Иуд. 6). Ныр Сайтан уыцы дӕлимонты фӕрцы «зӕххыл ӕппӕт адӕмы дӕр... сайы» (Рарг. 12:9). Хъыгагӕн, адӕмӕн сӕ фылдӕр сты куырм, ӕмӕ йӕ не ’мбарынц, Хӕйрӕджы зонд сыл кӕй ӕндавы, уый (2 Кор. 4:4).
Ацы дунейы зонд дыл ӕндавы?
6. Ацы дунейы зонд ныл кӕд бандавдзӕн?
6 Бирӕтӕ сты куырм, ӕмӕ Сайтанӕн йӕ хин митӕ нӕ уынынц. Ӕцӕг чырыстӕттӕ та йын йӕ хин митӕ зонынц (2 Кор. 2:11). Ацы дунейы зонд ныл не ’ндавдзӕн, нӕхӕдӕг ын уый бар куы нӕ раттӕм, уӕд. Ӕркӕсӕм цыппар фарстамӕ, ӕмӕ йӕ базонӕм, Хуыцауы сыгъдӕг тых ныл ӕндавы ӕви ацы дунейы зонд.
7. Сайтан куыд архайы, цӕмӕй нӕ Хуыцауӕй адард кӕна?
7 Цы ирхӕфсӕнтӕ ӕвзарын, уымӕй куыд у бӕрӕг, цавӕр адӕймаг дӕн, уый? (Бакӕс Иаковы 3:14–18.) Сайтан архайы, цӕмӕй нын фыддзинад бауарзын кӕна, ӕмӕ нӕ афтӕмӕй Хуыцауӕй адард кӕна. Хӕйрӕг хорз зоны, Йегъовӕ йе сӕфт кӕй уыны, фыддзинад чи уарзы, уыдонӕй (Пс. 11:5). Уымӕ гӕсгӕ архайы, чъизи ӕмӕ ӕгъатыр хъуыддӕгтӕм чи разӕнгард кӕны, ахӕм чингуытӕ, журналтӕ, кинотӕ, музыкӕ ӕмӕ компьютерон хъӕзтыты уылты, цӕмӕй нын нӕ буары монцтӕ цырен кӕна. Сайтан тынг фӕцин кӕны, цы ӕвзӕр хъуыддӕгтӕм нӕ разӕнгард кӕны, уыдон куы фӕуарзӕм, кӕд, раст цы у, уый дӕр уарзӕм, уӕддӕр (Пс. 97:10).
8, 9. Ирхӕфсӕнты тыххӕй цӕуыл хъуамӕ ахъуыды кӕнӕм?
8 Хуыцауы сыгъдӕг тых адӕймагӕн ӕххуыс кӕны, цӕмӕй уа сыгъдӕг, фарнуарзаг ӕмӕ фӕлмӕнзӕрдӕ. Ӕмӕ нӕ уый тыххӕй хъӕуы нӕхи бафӕрсын: «Цы ирхӕфсӕнтӕ ӕвзарын, уыдоны фӕрцы мӕ удыхъӕды хорз миниуджытӕ фылдӕр кӕнынц?» Уӕлейӕ ӕрцӕугӕ зондмӕ нӕй «цӕстмӕ митӕ». Хуыцауы сыгъдӕг тыхӕй хайджын чи у, уыдон афтӕ нӕ фӕкӕнынц, ӕмӕ адӕмӕн сыгъдӕгдзинады ӕмӕ фарн уарзыны тыххӕй фӕдзурынц, сӕхӕдӕг та, хӕдзары иунӕгӕй куы вӕййынц, уӕд тыхми ӕмӕ ӕнӕгъдаудзинад кӕм ис, ахӕм цӕмӕдӕртӕм фӕкӕсынц.
9 Йегъовӕйы фӕнды, цӕмӕй ӕрмӕстдӕр ууыл уӕм иузӕрдион. Сайтанӕн та фаг вӕййы, иу хатт дӕр йӕ коммӕ куы бакӕсӕм, уый. Йесойы дӕр уымӕ разӕнгард кодта, фӕндыд ӕй, цӕмӕй йын иу хатт уӕддӕр бакуывтаид (Лук. 4:7, 8). Ӕмӕ нӕ хъӕуы ахъуыды кӕнын: «Цы ирхӕфсӕнтӕ ӕвзарын, уыдонӕй бӕрӕг у, Хуыцауыл иузӕрдион кӕй дӕн? Уый фӕрцы мын зындӕр у ӕви ӕнцондӕр у ацы дунейы зонды ныхмӕ фидар фӕлӕууын? Мыййаг мӕ цыдӕр ирхӕфсӕнтыл мӕ къух сисын нӕ хъӕуы?»
10, 11. а) Ацы дунейы зонд адӕмы хъӕздыгдзинады ’рдӕм куыд здахы? ӕ) Хуыцауы Ныхас нын цы дзуры?
10 Мулкмӕ цы цӕстӕй кӕсын? (Бакӕс Лукайы 18:24–30.) Ацы дунейы зонд сцырен кӕны «цӕстыты монцтӕ», ӕмӕ адӕймаг ӕнӕфсис ӕмӕ мулкуарзаг свӕййы (1 Иоан. 2:16). Бирӕты ахӕм зондыл скӕны, цӕмӕй хъӕздыгдзинадмӕ тырной (1 Тим. 6:9, 10). Ацы дунейы зонд, гӕнӕн ис, мах дӕр ахӕм хъуыдыйыл скӕна, зӕгъгӕ, дӕ рӕбынтӕ алцӕмӕй йедзаг куы уой, уӕд цӕрӕнбонты ӕнӕмӕт ӕмӕ ӕдыхст уыдзынӕ (Ӕмб. 18:11). Фӕлӕ ӕхца Хуыцауӕй фылдӕр куы уарзӕм, уӕд ныл Сайтан фӕуӕлахиз уыдзӕн. Хъуамӕ нӕхи бафӕрсӕм: «Мыййаг мын царды сӕйрагдӕр мулк ӕмӕ ирхӕфсӕнтӕ нӕ систы?»
11 Хуыцауы Ныхас нын дзуры, цӕмӕй раст цӕстӕй кӕсӕм ӕхцамӕ, афтӕ ма нӕ нӕхи ӕмӕ нӕ бинонты фӕдарыны тыххӕй фыдӕбон кӕнын кӕй хъӕуы, уымӕ дӕр (1 Тим. 5:8). Хуыцауы сыгъдӕг тыхӕй хайджын чи у, уыдонӕн уыцы сыгъдӕг тых ӕххуыс кӕны, цӕмӕй Хуыцауы рӕдаудзинад фӕзмой. Ӕмӕ сӕ иннӕтӕ зонынц, рӕдау кӕй сты, уымӕй. Уыдон фылдӕр аргъ кӕнынц адӕмӕн, цыдӕр дзауматӕн нӕ фӕлӕ. Ӕмӕ сӕ къухы цы вӕййы, уый иннӕтӕн никуы бахӕлӕг кӕнынц (Ӕмб. 3:27, 28). Уыдон ӕхцайӕн уый бар никуы раттынц, цӕмӕй сӕ Хуыцауӕн лӕггад кӕнын хъыгдара.
12, 13. Хуыцауы сыгъдӕг тых нӕ хуыздӕрырдӕм куыд ивы?
12 Фылдӕр мыл ацы дунейы зонд ӕндавы ӕви Хуыцауы сыгъдӕг тых? (Бакӕс Колоссӕгтӕм 3:8–10, 13.) Ацы дунейы зонд адӕмы разӕнгард кӕны тӕригъӕдджын буары хъуыддӕгтӕм (Гал. 5:19–21). Адӕймаг кӕй зондыл цӕуы, уый рабӕрӕг вӕййы, алцыдӕр хорз куы вӕййы, уӕд нӕ, фӕлӕ зындзинӕдтыл куы сӕмбӕлы, уӕд. Зӕгъӕм, нӕ хо кӕнӕ нӕ не ’фсымӕр куы ницӕмӕ фӕдары, куы нӕ фӕхъыг кӕны кӕнӕ нын нӕ зӕрдӕ куы скъахы, уӕд. Стӕй ма, кӕй зондыл цӕуӕм, уый рабӕрӕг вӕййы, хӕдзары иунӕгӕй куы вӕййӕм, уӕд дӕр. Хорз уаид, нӕ зӕрдӕмӕ-иу куы ныккӕсиккам ӕмӕ нӕхи куы бафӕрсиккам: «Фӕстаг ӕхсӕз мӕйы мӕ удыхъӕд фылдӕр Чырыстийы удыхъӕды хуызӕн сси? Ӕви мӕ дзыхыныхас ӕмӕ мӕ хъуыддӕгтӕ раздӕры хуызӕн систы?»
13 Хуыцауы сыгъдӕг тых нын ӕххуыс кӕндзӕн, цӕмӕй нӕ «зӕронд удыхъӕд йӕ митимӕ ныууадзӕм» ӕмӕ нӕ «удыхъӕд ногмӕ раивӕм». Уый фӕрцы нӕ уарзондзинад тыхджындӕр кӕндзӕн ӕмӕ уыдзыстӕм хӕларзӕрдӕдӕр. Уӕд нын ӕнцондӕр уыдзӕн иннӕтӕн хатыр кӕнын, кӕд нын мӕсты кӕнынӕн ӕфсон уа, уӕддӕр. Исты ӕнӕраст хъуыддаг куы фенӕм, уӕд «фыдӕх, маст, знӕт, хъӕр-хъӕлӕба, ӕфхӕрӕн ныхас» нал кӕндзыстӕм. Фӕлӕ архайдзыстӕм, цӕмӕй «кӕрӕдзийы зын ӕмбарӕм» (Еф. 4:31, 32).
14. Ацы дунейы бирӕтӕ Хуыцауы Ныхасмӕ цы цӕстӕй кӕсынц?
14 Библийы хӕрзӕгъдаудзинады тыххӕй цы уагӕвӕрдтӕ ис, уыдон уарзын ӕмӕ сын аргъ кӕнын? (Бакӕс Ӕмбисӕндтӕ 3:5, 6.) Ацы дунейы зонд адӕмы ардауы Хуыцауы Ныхасы ныхмӕ. Уыцы зондыл хӕст чи у, уыдонмӕ Библийы фӕдзӕхстытӕй адӕмы ӕгъдӕуттӕ ӕмӕ философитӕ бирӕ хуыздӕр кӕсынц (2 Тим. 4:3, 4). Иннӕтӕ та Хуыцауы Ныхас ӕппындӕр ницӕуыл нымайынц. Уыдон сӕхимӕ кӕсынц зондджын ӕмӕ зӕгъынц, зӕгъгӕ, Библи базӕронд ӕмӕ дзы аргъӕуттӕ йеддӕмӕ ницы ис. Библи хӕтындзинад, гомосексуализм ӕмӕ хицӕн кӕныны тыххӕй цы зӕгъы, уый сӕ къӕхты бынмӕ ӕрӕппӕрстой. Уыдон «хорз ӕвзӕр... хонынц, ӕвзӕр та – хорз» (Ис. 5:20). Махыл дӕр, мыййаг, уыцы зонд ӕндавы? Исты зын уавӕры куы бахауӕм, уӕд адӕмы зондыл фӕцӕуӕм, нӕхи зондӕй фӕархайӕм ӕви уынаффӕ Библийы фӕагурӕм?
15. Нӕхи зондыл цӕуылнӕ хъуамӕ цӕуӕм?
15 Хуыцауы сыгъдӕг тых нӕ ахӕм зондыл аразы, цӕмӕй Библийӕн аргъ кӕнӕм. Псаломзарӕггӕнӕгӕн Хуыцауы ныхас йӕ къӕхтӕн уыд цырагъ, йӕ фӕндагӕн та – рухс, ӕмӕ махӕн дӕр афтӕ хъуамӕ уа (Пс. 119:105). Цӕмӕй хорз ӕвзӕрӕй иртасӕм, уый тыххӕй нӕхи зондӕй нӕ архайӕм, фӕлӕ Хуыцауы Ныхасы цы фыст ис, ӕрмӕстдӕр уымӕ гӕсгӕ. Стӕй ма хъуамӕ ахуыр кӕнӕм, Библийӕн канд аргъ кӕнын нӕ, фӕлӕ ма йӕ уарзын дӕр (Пс. 119:97).
Чырыстийӕ ахуыр кӕнӕм
16. Цӕмӕй «Чырыстийы хуызӕн... хъуыды кӕнӕм», уый тыххӕй цы хъуамӕ зонӕм ӕмӕ цы хъуамӕ аразӕм?
16 Цӕмӕй нӕм Хуыцауы сыгъдӕг тых уа, уый тыххӕй хъуамӕ хъуыды кӕнӕм, «Чырысти куыд хъуыды кодта», афтӕ (1 Кор. 2:16). Цӕмӕй «Чырыстийы хуызӕн... хъуыды кӕнӕм», уый тыххӕй хъуамӕ зонӕм, куыд хъуыды кодта ӕмӕ куыд архайдта, уый ӕмӕ йӕ фӕзмӕм (Ром. 15:5; 1 Пет. 2:21). Нӕ бон ӕй фӕзмын куыд у, уый тыххӕй ӕркӕсӕм цалдӕр хъуыддагмӕ.
17, 18. а) Кувыны тыххӕй Йесойӕ цӕуыл ахуыр кӕнӕм? ӕ) Ӕдзух цӕмӕн хъуамӕ кувӕм?
17 Хуыцауӕй сыгъдӕг тых курӕм. Йесо-иу фӕлварӕнты размӕ алы хатт дӕр Хуыцауӕй сыгъдӕг тых куырдта, цӕмӕй йын баххуыс кодтаид (Лук. 22:40, 41). Мах дӕр хъуамӕ Хуыцауӕй йӕ сыгъдӕг тых курӕм. Йегъовӕйӕ йӕ сыгъдӕг тых зӕрдиагӕй чи фӕкуры, уыдонӕн ӕй ӕнӕхӕлӕгӕй ӕмӕ рӕдауӕй ратты (Лук. 11:13). Йесо афтӕ загъта: «Курут, ӕмӕ уын ратдзысты. Агурут, ӕмӕ ссардзыстут. Хойут, ӕмӕ уын бакӕндзысты. Уымӕн ӕмӕ, чи куры, уымӕн раттынц, чи агуры, уый ссары, ӕмӕ чи хойы, уымӕн бакӕнынц» (Матф. 7:7, 8).
18 Цӕмӕй нын Йегъовӕ йӕ сыгъдӕг тыхӕй бахай кӕна ӕмӕ нын ӕххуыс кӕна, уый тыххӕй йӕм хъуамӕ ӕдзух ӕмӕ бирӕ кувӕм. Хатт Йегъовӕйы фӕфӕнды базонын, адӕймаг ӕм цӕй тыххӕй фӕкувы, уый йӕ ӕцӕгдӕр хъӕуы ӕви нӕ, ӕмӕ зӕрдиагӕй ӕууӕнды, йӕ куывдтытӕн ын дзуапп кӕй ратдзӕн, ууыл.
19. Йесо алы хатт дӕр цы арӕзта, ӕмӕ йӕ цӕмӕн хъуамӕ фӕзмӕм?
19 Алы хъуыддаджы дӕр Йегъовӕйы коммӕ кӕсӕм. Йесо алы хатт дӕр арӕзта, Йегъовӕйы зӕрдӕмӕ цы цыд, уый. Ӕрмӕстдӕр ӕй иу хатт фӕндыд бакӕнын, Йегъовӕйы куыд нӕ фӕндыд, афтӕ. Фӕлӕ уӕддӕр йӕ Фыдӕн загъта: «Мӕн куыд фӕнды, афтӕ нӕ, фӕлӕ дӕу куыд фӕнды, афтӕ уӕд» (Лук. 22:42). Дӕхимӕ-ма ахӕм фарста ратт: «Хуыцауы коммӕ фӕкӕсын, ӕнцон мын куы нӕ вӕййы, уӕд дӕр»? Хуыцауы коммӕ кӕсын ӕнӕмӕнг хъуыддаг у. Йегъовӕ не Скӕнӕг ӕмӕ нӕ Царддӕттӕг кӕй у, уымӕ гӕсгӕ хъуамӕ йӕ коммӕ кӕсӕм (Пс. 95:6, 7). Хуыцауы коммӕ ма кӕсӕм, ӕмӕ йын афтӕмӕй йӕ хорзӕх ссарӕм, уымӕн гӕнӕн нӕй.
20. Йесо хорз цы зыдта, ӕмӕ йӕ нӕ бон куыд у фӕзмын?
20 Библи хорз базонӕм. Сайтан Йесойы куы рӕдийын кодта, уӕд ын дзуапп Фыстадӕй лӕвӕрдта (Лук. 4:1–13). Дины разамонджытӕ йӕ ныхмӕ куы цыдысты, уӕд дӕр Йесо Хуыцауы Ныхасӕй пайда кодта (Матф. 15:3–6). Йесо Хуыцауы закъон хорз зыдта ӕмӕ йӕ алкӕддӕр ӕххӕст кодта (Матф. 5:17). Мах дӕр фӕнды нӕ зонд Хуыцауы Ныхасӕй дзаг кӕнын, ӕмӕ уӕд нӕ уырнындзинад уыдзӕн фидар (Фил. 4:8, 9). Фӕлӕ нын хатт зын вӕййы Библи ахуыр кӕнынӕн ӕмӕ бинонты ахуырӕн рӕстӕг ссарын. Хорз уаид, рӕстӕг-иу куы нӕ ариккам, фӕлӕ-иу ӕй куы рахицӕн кӕниккам, уӕд (Еф. 5:15–17).
21. Цӕмӕй Хуыцауы Ныхас хуыздӕр базонӕм ӕмӕ дзы царды пайда кӕнӕм, уый тыххӕй цы хъуамӕ аразӕм?
21 «Ӕууӕнкджын ӕмӕ зондджын цагъар» уынаффӕ рахаста, цӕмӕй алы къуыри алкӕмӕндӕр уа бинонты ахуыры изӕр. Уыцы ахуыры рӕстӕджы нӕхӕдӕг дӕр, стӕй нӕ бинонтимӕ дӕр фӕахуыр кӕнӕм Библи (Матф. 24:45). Уыцы хъуыддагмӕ цы цӕстӕй кӕсыс? Цӕмӕй Чырыстийау хъуыды кӕнӕм, уый тыххӕй-иу, Библи куы ахуыр кӕнай, уӕд-иу алы хатт дӕр рӕстӕг рахицӕн кӕн, цӕмӕй-иу цы ӕрмӕг ӕвзарыс, уый фӕдыл Йесойы хъуыды дӕр базонай. Уый тыххӕй дын стыр ӕххуыс фӕуыдзӕн «Хъахъхъӕнӕн Мӕсыджы уагъд литературӕйы индекс». Зӕгъӕм, 2008 азӕй 2010 азмӕ парахат кӕнынӕн цы журналтӕ рацыд, уым кӕцыдӕр номырты ис рубрикӕ «Цы нын дзуры Чырысти». Ӕмӕ сӕ дӕ бон у равзарын. 2006 азӕй фӕстӕмӕ «Райхъал ут»-ы цӕуы рубрикӕ, «Викторина», зӕгъгӕ. Уыдоны фӕрцы Хуыцауы Ныхасы тыххӕй нӕ зонындзинӕдтӕ фӕфылдӕр уыдзысты. Дӕ бон у бинонты ахуыры рӕстӕджы уыцы ӕрмӕгӕй пайда кӕнын.
Нӕ бон у, цӕмӕй дунейыл фӕуӕлахиз уӕм
22, 23. Цӕмӕй ацы дунейыл фӕуӕлахиз уӕм, уый тыххӕй цы хъуамӕ аразӕм?
22 Цӕмӕй нын Хуыцауы сыгъдӕг тых разамынд дӕтта, уый тыххӕй хъуамӕ ацы дунейы зондыл ма цӕуӕм. Фӕлӕ уый, кӕй зӕгъын ӕй хъӕуы, ӕнцон нӕу. Уый тыххӕй хъазуатонӕй тох кӕнын хъӕуы (Иуд. 3). Фӕлӕ нӕ бон у, цӕмӕй фӕуӕлахиз уӕм! Йесо йӕ ахуыргӕнинӕгтӕн загъта: «Ацы дунейы уӕм ӕнхъӕлмӕ кӕсы зындзинӕдтӕ, фӕлӕ фидар лӕуут! Ӕз фӕуӕлахиз дӕн ацы дунейыл» (Иоан. 16:33).
23 Мах дӕр ацы дунейыл фӕуӕлахиз уыдзыстӕм, йӕ зондыл куы нӕ цӕуӕм ӕмӕ Хуыцауы сыгъдӕг тых райсыны тыххӕй алцыдӕр куы аразӕм, уӕд. Ӕмӕ, ӕцӕгдӕр, «кӕд Хуыцау немӕ ис, уӕд нӕ ныхмӕ чи уыдзӕн?» (Ром. 8:31). Хуыцауы сыгъдӕг тых нӕм куы уа ӕмӕ Библийы уагӕвӕрдтӕм гӕсгӕ куы архайӕм, уӕд нӕ цардӕй нӕ зӕрдӕ райдзӕн, уыдзыстӕм фӕрнджын, амондджын ӕмӕ нӕ фидар ныфс уыдзӕн, тагъд ӕнусон цардӕй кӕй схайджын уыдзыстӕм, уымӕй.
Бахъуыды кодтай?
• Ацы дунейы зонд тыхджын цӕмӕн у?
• Нӕхимӕ цавӕр цыппар фарстайы хъуамӕ раттӕм?
• Цӕмӕй нӕм Хуыцауы сыгъдӕг тых уа, уый тыххӕй Йесойӕ цавӕр ӕртӕ хъуыддагыл ахуыр кӕнӕм?
[Ныв 8 фарсыл]
Зӕдтӕй иуӕй-иутӕ дӕлимонтӕ куыд систы?
[Ныв 10 фарсыл]
Сайтан ацы дунейы зонды фӕрцы адӕмыл ӕндавы, фӕлӕ дзы махӕн нӕ бон у нӕхи ратонын