Чи хъуамӕ ахуыр кӕна сывӕллӕтты Хуыцауы тыххӕй?
«Ахуыргӕнинаг йӕ ахуыргӕнӕгӕй уӕлдӕр нӕ вӕййы, фӕлӕ, алцыдӕр кӕмӕн бацамоной, уый суыдзӕн йӕ ахуыргӕнӕджы хуызӕн» (ЛУКАЙЫ 6:40).
ИУӔЙ-ИУ ныййарджытӕм афтӕ фӕкӕсы, ӕмӕ сӕ сывӕллӕтты Хуыцауы тыххӕй ахуыр кӕнын сӕ бон нӕ бауыдзӕн. Ахӕм ныййарджытӕ фӕхъуыды кӕнынц, зӕгъгӕ сӕм уыцы хъуыддагӕн фаг ахуырад нӕй ӕмӕ дины тыххӕй уыйбӕрц нӕ зонынц. Уымӕ гӕсгӕ сын ӕнцондӕр вӕййы уыцы ахсджиаг хъуыддаг ӕндӕр кӕйдӕр бар бакӕнын, зӕгъӕм, сӕ хӕстӕджыты кӕнӕ дины разамонджыты бар.
Уӕдӕ, динимӕ баст хъуыддӕгтӕ сывӕллӕттӕн чи хъуамӕ амона, стӕй сӕ уаг ӕмӕ ӕгъдауыл чи хъуамӕ ахуыр кӕна? Ӕркӕсӕм, уый тыххӕй Библийы цы фыст ис, уымӕ ӕмӕ уый абарӕм, ахуыргӕндтӕ цы сбӕрӕг кодтой, уыимӕ.
Фыдыл цавӕр хӕстӕ ис?
Библийы фыст ис: «Фыдӕлтӕ, сымах та уӕ сывӕллӕтты ма мӕсты кӕнут, фӕлӕ сӕ хъомыл кӕнут, Йегъовӕ куыд амоны, афтӕ, ӕмӕ сӕ йӕ зондыл аразут» (Ефесӕгтӕм 6:4).
Ахуыргӕндтӕ цы сбӕрӕг кодтой? Цы пайда у, нӕлгоймӕгтӕ диныл хӕст куы уой ӕмӕ фидарӕй цӕуылдӕр куы ӕууӕндой, уый? Ацы хъуыддаджы фӕдыл 2009 азы иу статьяйы фыст уыд: «Диныл хӕст нӕлгоймаг хуыздӕр феххӕст кӕны, фыдыл цы хӕстӕ ис, уыдон. Ахӕм адӕймаг вӕййы хъӕлдзӕгдӕр, уымӕн ӕмӕ йӕ фарсмӕ вӕййынц, иу зондыл хӕст кӕимӕ у, уыцы адӕм. Вӕййы хӕрзӕгъдау, ӕмӕ фӕзоны, йӕ цард куыд араза, уый» (Fathers’ Religious Involvement and Early Childhood Behavior).
Библимӕ гӕсгӕ тынг ахсджиаг у, цӕмӕй цоты ӕрмӕст мад нӕ, фӕлӕ фыд дӕр хъомыл кӕна ӕмӕ сын зонд амона (Ӕмбисӕндтӕ 4:1; Колоссӕгтӕм 3:21; Дзуттӕгтӕм 12:9). Фӕлӕ цымӕ уыцы уынаффӕ абон дӕр ахады? 2009 азы Флоридӕйы университет мыхуыры рауагъта статья, фыд йӕ сывӕллӕтты куы фӕхъомыл кӕны, уӕд сыл уый куыд фӕзыны, уый фӕдыл. Ахуыргӕндтӕ куыд сбӕрӕг кодтой, афтӕмӕй, ӕрмӕст мады бар чи нӕ уыд, уыцы сывӕллӕттӕ-иу адӕмы рыст хуыздӕр ӕмбӕрстой ӕмӕ-иу сӕхицӕн дӕр аргъ кӕнын зыдтой. Лӕппутӕ сӕхи хорз дардтой, чызджытӕ та уыдысты уӕззаузонд ӕмӕ хиуылхӕцгӕ. Уӕдӕ бӕрӕг у, Библийы уынаффӕтӕ нӕ рӕстӕджы дӕр кӕй ахадынц.
Мадыл цавӕр хӕстӕ ис?
Библийы фыст ис: «Дӕ мад [дын] цы закъон амоны, уый ма рох кӕн» (Ӕмбисӕндтӕ 1:8).
Ахуыргӕндтӕ цы сбӕрӕг кодтой? Сывӕллӕтты психологийы фӕдыл 2006 азы цы чиныг рауагътой, уым фыст уыд, зӕгъгӕ, бирӕ бӕстӕты сылгоймӕгтӕ нӕлгоймӕгтимӕ абаргӕйӕ сӕ сывӕллӕттимӕ фылдӕр рӕстӕг фӕныхас кӕнынц, стӕй ӕнӕуи дӕр фылдӕр рӕстӕг вӕййынц иумӕ (Handbook of Child Psychology). Сывӕллон мадимӕ бирӕ рӕстӕг кӕй вӕййы, уымӕ гӕсгӕ сывӕллоныл тынг фӕзыны мады ныхасыуаг, йӕ зондахаст ӕмӕ, цы фӕкусы, уый.
Мад ӕмӕ фыд сӕ сывӕллӕтты Хуыцауы тыххӕй иумӕ куы фӕахуыр кӕнынц, уӕд сын, ӕппынкъаддӕр, ӕххуыс кӕнынц дыууӕ ахсджиаг хъуыддаджы. Фыццаг: сывӕллӕттӕ фенгомдӕр вӕййынц Хуыцауимӕ ӕмӕ сын уый сӕ дарддӕры царды дӕр стыр ӕххуыс вӕййы. Дыккаг: сӕ ныййарджытӕм кӕсгӕйӕ сывӕллӕттӕ базонынц, лӕг ӕмӕ ус ӕмвӕндӕй куыд хъуамӕ архайой, цӕмӕй сӕ цы ахсджиаг хъуыддӕгтӕ саразын фӕнды, уыдон сӕ къухы бафтой (Колоссӕгтӕм 3:18–20). Кӕд иннӕтӕн дӕр сӕ бон у ныййарджытӕн ӕххуыс кӕнын, уӕддӕр сӕйраджыдӕр ныййарджыты хӕс у, цӕмӕй сӕ цотӕн Хуыцауы тыххӕй дзурой, стӕй, Хуыцау бинонтӕн цы ’гъдау ӕрӕвӕрдта, ууыл сӕ ахуыр кӕной.
Фӕлӕ куыд хъуамӕ ахуыр кӕной ныййарджытӕ сӕ цоты? Сывӕллӕтты ахуыр кӕнынӕн цавӕр мадзӕлттӕ сты хуыздӕр?