Хуыцауы Ныхас хуыздӕр базон
Цымӕ нӕ бон у ӕнустӕм цӕрын?
Ацы статьяйы ӕвзӕрст цӕуынц, ӕвӕццӕгӕн, ды дӕр кӕуыл хъуыды кодтай, ахӕм фарстатӕ. Йегъовӕйы Ӕвдисӕнтӕ демӕ ӕхсызгонӕй аныхас кӕндзысты, уыцы фарстатӕй алкӕцыйӕн дӕр Библи цы дзуапп дӕтты, ууыл.
1. Нӕ цард ахӕм цыбыр цӕмӕн у?
Иуӕй-иу уӕртджын хӕфсытӕ цӕрынц 150 азы бӕрц, иуӕй-иу бӕлӕстӕ та – 3 000 азы бӕрц. Уыдонимӕ абаргӕйӕ адӕймаджы цард бирӕ цыбырдӕр у. Фӕлӕ адӕймагӕн уӕртджын хӕфсытӕй ӕмӕ бӕлӕстӕй уӕлдай йӕ бон у цардыл хъуыды кӕнын. Йегъовӕ адӕймаджы афтӕ сфӕлдыста, цӕмӕй йын алцыдӕр циндзинад хӕсса, зӕгъӕм, музыкӕ, спорт, хӕринаг, ахуыр кӕнын, балцы цӕуын ӕмӕ алыхуызон адӕмимӕ зонгӕ кӕнын. Хуыцау нӕ афтӕ скодта, ӕмӕ нӕ мӕлын нӕ фӕнды, фӕнды нӕ ӕнустӕм цӕрын. (Бакӕс Екклесиаст 3:11.)
2. Нӕ бон ӕцӕгдӕр у ӕнустӕм цӕрын?
Йегъовӕ алкӕддӕр уыди ӕмӕ уыдзӕн, никуы амӕлдзӕн. Йегъовӕ у Царддӕттӕг, ӕмӕ йӕ бон у, цӕмӕй нӕ ӕнусон цардӕй схайджын кӕна (Псалом 36:9; Аввакум 1:12). Уымӕй уӕлдай Йегъовӕ зӕрдӕ бавӕрдта, йӕ коммӕ чи кӕсы, уыдон ӕнустӕм кӕй цӕрдзысты. Ацӕргӕ адӕмы тыххӕй та загъта, зӕгъгӕ, фӕстӕмӕ се ’рыгон бонтӕм раздӕхдзысты. (Бакӕс Иов 33:24, 25; Исайы 25:8; 33:24.)
Хуыцау зӕрдӕ бавӕрдта, ӕнустӕм кӕй цӕрдзыстӕм ӕмӕ, низ цы у, уый зонгӕ дӕр кӕй нал кӕндзыстӕм. Ууыл фидарӕй ӕууӕндӕн кӕй ис, уый бӕрӕг у, Чырысти цы диссӕгтӕ арӕзта, уыдонӕй, зӕгъӕм, алыхуызон низтӕ дзӕбӕх кодта ӕмӕ ма суанг мӕрдты дӕр ӕгас кодта. (Бакӕс Лукайы 7:11–15, 18, 19, 22.)
3. Адӕм ӕнустӕм кӕд цӕрдзысты?
Хуыцауы фӕнды, цӕмӕй ӕнустӕм цӕрӕм, ӕцӕг, ӕфхӕрд ӕмӕ фыддзинадӕй йедзаг дунейы нӕ, фӕлӕ зӕххыл дзӕнӕты. Фӕнды йӕ, цӕмӕй амондджын уӕм ӕмӕ мацӕмӕй тӕрсӕм (Псалом 37:9, 29; Исай 65:21, 22). Зӕхх та дзӕнӕт куы суа, уӕд милуангай адӕм райгас уыдзысты. Чи райгас уа, уыдонӕй Хуыцауы коммӕ чи кӕса ӕмӕ йын чи лӕггад кӕна, уыдон ӕнустӕм дзӕнӕты цӕрдзысты. (Бакӕс Лукайы 23:42, 43; Иоанны 5:28, 29.)
4. Цы хъӕуы аразын, цӕмӕй ӕнустӕм цӕрӕм?
Хуыцауы ӕмбал суай, уый йӕ фыдӕбоны аргъ у
Ӕрмӕстдӕр Хуыцауӕн у йӕ бон адӕмӕн ӕнусон цард раттын. Уымӕ гӕсгӕ раст уаид, Хуыцауы тыххӕй фылдӕр базоныныл куы архаиккам ӕмӕ йе ’ввахс ӕмбӕлттӕ куы суаиккам. Хуыцауы тыххӕй цы базонӕм, уый Библи бары хӕринагимӕ (Матфейы 4:4). Адӕймагӕн хӕринаг хӕрын ӕхсызгон вӕййы, фӕлӕ цӕмӕй хӕринаг самал кӕнай кӕнӕ йӕ ӕрцӕттӕ кӕнай, уый тыххӕй бафыдӕбон кӕнын хъӕуы. Уӕдӕ цӕмӕй Хуыцауы тыххӕй фылдӕр базонӕм, уый тыххӕй дӕр хъӕуы бафыдӕбон кӕнын. Фӕлӕ Хуыцауы ӕмбал суай ӕмӕ ӕнусон цардӕй схайджын уай, уымӕй хуыздӕр ма цы хъуамӕ уа? (Бакӕс Лукайы 13:23, 24; Иоанны 6:27; 17:3.)