КӔСДЖЫТЫ ФАРСТАТӔ

Хотӕ ӕмӕ ӕфсымӕртӕй парфюмеримӕ аллергийӕ кӕмӕн ис, уыдонӕн куыд ис баххуыс кӕнӕн?

Парфюмерийы тӕфтӕн чи нӕ фӕразы, уыдон тынг фӕтыхсынц, уымӕн ӕмӕ алы бон дӕр ӕмбӕлынц, парфюмерийӕ чи пайда кӕны, ахӕм адӕмыл, ӕмӕ сӕ бон ницы вӕййы бакӕнын, цӕмӕй уыцы тӕфтӕй сӕхи бахизой. Фӕлӕ иуӕй-иутӕ фӕфӕрсынц, зӕгъгӕ, хотӕ ӕмӕ ӕфсымӕртӕн нӕй зӕгъӕн, цӕмӕй ӕмбырдтӕм ӕмӕ конгресстӕм цӕугӕйӕ парфюмерийӕ ма пайда кӕной.

Кӕй зӕгъын ӕй хъӕуы, чырыстон зонгӕ-зонын ахӕмӕй ницы араздзӕн, цӕмӕй искӕмӕн ӕмбырдтӕм цӕуын зын уа. Ӕмбырдты фидар кӕнӕм нӕ уырнындзинад, ӕмӕ уый та махӕй алкӕй дӕр хъӕуы (Дзут. 10:24, 25). Уымӕ гӕсгӕ, парфюмерийы тӕфтӕй тынг чи тыхсы ӕмӕ уый тыххӕй ӕмбырдтӕм цӕуын зын кӕмӕн у, ахӕм адӕймаджы, чи зоны, бафӕнда уыцы фарстайыл хистӕр нӕлгоймӕгтимӕ аныхас кӕнын. Фыстадмӕ гӕсгӕ дӕр ӕмӕ ӕнӕуи дӕр раст нӕ уыдзӕн, хистӕр нӕлгоймӕгтӕ сӕхи закъӕттӕ куы ’вӕрой, ӕмбырдтӕм чи цӕуы, уыдон парфюмерийӕ куыд хъуамӕ пайда кӕной, уый фӕдыл. Фӕлӕ сӕ бон у ӕмбырдӕн бамбарын кӕнын, чидӕртӕ парфюмерийы тӕфтӕй тынг кӕй тыхсынц. Хистӕр нӕлгоймӕгтӕн сӕ бон у уый фӕдыл нӕ публикациты ӕрмӕг бацагурын ӕмӕ уыцы фарстайыл аныхас кӕнын, зӕгъӕм, хъусын кӕныны фембӕлды «Ӕркӕсинаг фарстатӕ» ӕвзӕрст куы цӕуой, уӕд, йе та сӕ бон у уый тыххӕй ӕндӕр хъусинӕгты рӕстӕг уӕзданӕй зӕгъынa. Фӕлӕ хистӕр нӕлгоймӕгтӕн сӕ бон нӕу ӕдзухдӕр ахӕм хъусинӕгтӕ хъусын кӕнын. Не ’мбырдтӕм алы хатт дӕр ногтӕ ӕмӕ уазджытӕ ӕрбацӕуынц, ӕмӕ уыдон нӕ фӕзонынц, кӕмӕндӕрты дзы тӕфтӕм аллергийӕ кӕй ис. Мах та фӕнды, цӕмӕй-иу не ’мбырды алчидӕр райгондӕй баззайа. Ӕмбырды хъуамӕ мачи фӕтыхса, парфюмерийӕ кӕй пайда кӕны, уый тыххӕй.

Парфюмеримӕ аллергийӕ кӕмӕн ис, ахӕмтӕ ӕмбырды куы уа, уӕд хистӕр нӕлгоймӕгты советӕн йӕ бон у уынаффӕ рахӕссын, цӕмӕй-иу Паддзахады залы хибар ран сбадой, кӕд уавӕртӕм гӕсгӕ уый гӕнӕн ис, уӕд. Зӕгъӕм, ӕмбырды рӕстӕг сӕ бон у гыццыл залы кӕнӕ, программӕ кӕм хъуысы, ӕндӕр ахӕм ран сбадын. Кӕд уыцы фарста афтӕ аскъуыддзаг кӕнӕн нӕй, уӕд ӕмбырды бацархайдзысты, цӕмӕй сын фембӕлдты программӕ фыссой кӕнӕ та йӕм сӕ бон уа хӕдзары телефонӕй хъусын, хӕдзарӕй рацӕуын йӕ бон кӕнӕм нӕу, уыдон ӕм куыд фӕхъусынц, афтӕ.

Фӕстаг азты «Нӕ хъусын кӕныны хъуыддаджы» хотӕ ӕмӕ ’фсымӕрты фӕразӕнгард кӕнынц, цӕмӕй регионалон конгресстӕм цӕугӕйӕ ацы хъуыддаг ма рох кӕной. Конгресстӕн сӕ фылдӕр фӕцӕуынц ӕхгӕд бынӕтты, ӕмӕ дзы сыгъдӕг уӕлдӕф вӕййы ӕрмӕстдӕр вентиляцийы руаджы. Парфюмерийы тӕфтӕн чи нӕ фӕразы, уыдон хибарӕй кӕм сбадой, ахӕм бынӕттӕ дӕр дзы нӕ вӕййы. Уымӕ гӕсгӕ уарзондзинадыл дзурӕг уаид, конгресмӕ цӕугӕйӕ нӕхиуыл куы нӕ пырх кӕниккам, тынг чи тӕф кӕны, ахӕм парфюмери. Фӕлӕ ацы уынаффӕтӕ вӕййынц ӕрмӕстдӕр конгрессты фӕдыл ӕмӕ ӕнӕуи ӕмбырдтӕм нӕ хауынц.

Ацы дунейы цӕргӕйӕ не ’ппӕт дӕр хъизӕмар кӕнӕм, уымӕн ӕмӕ стӕм ӕнӕххӕст. Ӕмӕ нын иннӕтӕ нӕ уаргъ фӕрог кӕныныл куы фӕархайынц, уӕд сӕ тынг бузныг вӕййӕм. Чи зоны, кӕмӕндӕрты зын у, парфюмерийӕ ма пайда кӕна, уый. Фӕлӕ нӕ хоты ӕмӕ не ’фсымӕрты куы уарзӕм, уӕд, ӕвӕццӕгӕн, афтӕ бакӕндзыстӕм, цӕмӕй сын ӕмбырды бадын ӕнцон уа.

Цымӕ ахуыргӕндтӕ разы сты, Понтий Пилат ӕцӕгдӕр кӕй цард, уыимӕ?

Понтий Пилаты тыххӕй хорз зонынц, Библи чи кӕсы, уыцы адӕм, уымӕн ӕмӕ йӕ ном ӕмбӕлы, Чырыстийӕн куыд тӕрхон кодтой ӕмӕ йӕ куыд амардтой, уый кой кӕм цӕуы, уым (Матф. 27:1, 2, 24–26). Фӕлӕ ма Пилаты ном ӕмбӕлы, уыцы рӕстӕджы цы историктӕ цард, уыдоны фыстыты дӕр. Иу дзырдуаты куыд фыст ис, афтӕмӕй историктӕ, «Иудейӕйы цы ромаг хицӕуттӕ уыд, уыдонӕй иуы тыххӕй дӕр афтӕ бирӕ ӕмӕ афтӕ бӕстон нӕ ныффыстой» (The Anchor Bible Dictionary).

Пилаты ном арӕхдӕр ӕмбӕлы дзуттаг историк Иосиф Флавийы фыстыты. Уый ныффыста ӕртӕ хабары, Пилат Иудейӕйы хицау куы уыд, уӕд цы зындзинӕдтыл ӕмбӕлд, уый фӕдыл. Цыппӕрӕм хабары тыххӕй та ныффыста дзуттаг историк Филон. Ромы паддзӕхты истори чи фыста, уыцы ромаг фыссӕг Тацит дӕр ныффыста, Тиберийы хицаудзинады рӕстӕг Понтий Пилат бардзырд кӕй радта, цӕмӕй Йесойы амардтаиккой.

1961 азы Израилы, горӕт Кесарийы, рагон ромаг театры археологтӕ ссардтой стыр къӕйдур ӕмӕ йыл латинагау фыст уыд Пилаты ном. Уыцы фыст (кӕс нывмӕ) у ӕрмӕстдӕр скъуыддзаг, фӕлӕ, куыд зӕгъынц, афтӕмӕй дзы фыст уыд: «Кадджын хуыцӕуттӕн (ацы) Тибериум снывонд кодта Понтий Пилат, Иудейӕйы хицау». Цы агъуысты кой дзы ис, уый, ӕвӕццӕгӕн, уыди Ромы паддзах Тиберийы номыл арӕзт кувӕндон.

Хо искӕимӕ Библи куы ахуыр кӕна ӕмӕ сӕ разы ӕфсымӕр куы уа, уӕд хо йӕ сӕрыл хъуамӕ исты ныккӕна ӕви нӕ?

2002 азы 15 июлы журналы «Сторожевая башня», рубрикӕйы «Вопросы читателей», фыст уыди, зӕгъгӕ, хо искӕимӕ Библи куы ахуыр кӕна ӕмӕ сӕ разы ӕфсымӕр куы уа, уӕд хъуамӕ йӕ сӕрыл исты ныккӕна, ӕфсымӕр донаргъуыд куы нӕ уа, уӕддӕр. Фӕлӕ ацы хъуыддагмӕ ноджы лӕмбынӕгдӕр ӕркастыстӕм, ӕмӕ бамбӕрстам, фӕбӕлвырддӕр кӕнын ӕй кӕй хъӕуы.

Хо искӕимӕ Библи куы ахуыр кӕна ӕмӕ йемӕ донаргъуыд ӕфсымӕр куы уа, уӕд хо, кӕй зӕгъын ӕй хъӕуы, йӕ сӕрыл исты ныккӕндзӕн. Афтӕмӕй хо равдисдзӕн, Йегъовӕ чырыстон ӕмбырды цы ӕгъдау сӕвӕрдта, уымӕн кӕй аргъ кӕны, ӕмӕ кӕй ӕмбары, иннӕты ахуыр кӕнын ӕфсымӕрты хӕс кӕй у (1 Кор. 11:5, 6, 10). Кӕнӕ та хойӕн йӕ бон у ӕфсымӕрӕн зӕгъын, цӕмӕй Библийы ахуыр уый ауадза, кӕд ӕфсымӕрӕн йӕ бон у ӕмӕ хорз арӕхсы, уӕд.

Фӕлӕ хо искӕимӕ Библи куы ахуыр кӕна ӕмӕ йемӕ, йӕ сӕрыхицау чи нӕу, ахӕм ӕнӕаргъуыд ӕфсымӕр куы уа, уӕд ӕй Фыстадмӕ гӕсгӕ йӕ сӕрыл ницы хъӕуы кӕнын. Фӕлӕ уӕддӕр, чи зоны, иуӕй-иу хоты ахӕм уавӕры дӕр бафӕнда сӕ сӕрыл исты ныккӕнын.