Дӕ зӕрдӕйы зынг ӕрмынӕг кӕнын ма бауадз!

АБОН зӕххыл хорз хабар хъусын кӕнынӕй ахсджиагдӕр хъуыддаг нӕй. Йегъовӕйы номӕй кӕй дзурӕм ӕмӕ адӕмӕн рӕстдзинад кӕй амонӕм, уый, кӕй зӕгъын ӕй хъӕуы, стыр кад у. Фӕлӕ иуӕй-иу хатт пионертӕн дӕр ӕмӕ иннӕ хъусынгӕнджытӕн дӕр уыцы хъуыддаг зынгзӕрдӕйӕ аразын ӕнцон нӕ вӕййы. Цӕуылнӕ?

Иуӕй-иу хъусынгӕнджытӕ хӕдзарӕй-хӕдзармӕ лӕггад кӕнгӕйӕ стӕмтимӕ аныхас кӕнынц, уымӕн ӕмӕ адӕмӕн сӕ фылдӕр хӕдзары нӕ вӕййынц. Ӕмӕ хӕдзары куы вӕййынц, уӕд дӕр сӕ арӕх немӕ ныхас кӕнын нӕ фӕфӕнды кӕнӕ та нӕм суанг мӕсты дӕр равӕййынц. Хъусынгӕнджытӕй чидӕртӕ та лӕггад кӕнынц, адӕм хорз хабармӕ зӕрдиагӕй кӕм хъусынц, фӕлӕ дард рӕттӕм цӕуын кӕм фӕхъӕуы, ахӕм ран, ӕмӕ тыхсынц, алкӕуыл дӕр дзы куы нӕ аххӕссой. Иннӕтӕ та хорз хабар хъусын кӕнынц бирӕ азты дӕргъы, ӕмӕ, ацы дунейӕн йӕ кӕрон нырма дӕр кӕй не ’рцыд, уый тыххӕй сӕ ныфс асаст.

Фӕлӕ цавӕрдӕр зындзинӕдтыл кӕй ӕмбӕлӕм ӕмӕ нын уыцы зындзинӕдты тыххӕй зынгзӕрдӕйӕ хъусын кӕнын ӕнцон кӕй нӕ вӕййы, уый нӕм хъуамӕ диссаг ма кӕса. Цы дунейы цӕрӕм, уый ис Хӕйрӕджы къухы, ӕмӕ нын ахӕм дунейы Хуыцауы хорз хабар хъусын кӕнын ӕнцон куыд хъуамӕ уа! (1 Иоан. 5:19).

Хъусын кӕнгӕйӕ цавӕрфӕнды зындзинӕдтыл ма ӕмбӕлай, уӕддӕр дӕ бон у фидарӕй ӕууӕндын, Йегъовӕ дын сӕ сӕрты хизынӕн кӕй баххуыс кӕндзӕн. Фӕлӕ цымӕ дӕ бон цы у аразын, цӕмӕй уацамынды ноджы зӕрдиагдӕрӕй архайай? Цӕй ӕмӕ цалдӕр хъуыддагмӕ ӕркӕсӕм.

НОГ ХЪУСЫНГӔНДЖЫТӔН ӔХХУЫС КӔН

Алы аз дӕр мингай адӕм донаргъуыд райсынц ӕмӕ Йегъовӕйы Ӕвдисӕнтӕ свӕййынц. Кӕд ды дӕр донаргъуыд ӕрӕджы райстай, уӕд бирӕ цӕуылдӕрты сахуыр уыдзынӕ, рагӕй чи хъусын кӕны, уыдонӕй. Кӕд хорз хабар бирӕ азты дӕргъы хъусын кӕныс, уӕд, мыййаг, дӕ бон нӕ уаид ногтӕн ӕххуыс кӕнын? Уыцы хъуыддаг дын стыр цины хос уыдзӕн.

Йесо зыдта, йӕ ахуыргӕнинӕгты ӕххуыс кӕй хъӕуы, цӕмӕй хорз ахуыргӕнджытӕ суой, ӕмӕ сын бацамыдта, хъусын кӕнын куыд хъӕуы, уый (Лук. 8:1). Абон дӕр ног хъусынгӕнджыты хъӕуы ӕххуыс, цӕмӕй ӕнтыстджын лӕггадгӕнджытӕ суой.

Хъуамӕ афтӕ ма хъуыды кӕнӕм, ӕмӕ, цӕмӕй ногтӕ хъусын кӕнын сахуыр уой, уый тыххӕй сӕ уацамынды цӕуын йеддӕмӕ ницы хъӕуы. Ног хъусынгӕнӕджы хъӕуы, цӕмӕй йӕ фарсмӕ уа хӕларзӕрдӕ ӕмӕ уарзӕгой ахуыргӕнӕг. Фӕлтӕрдджын хъусынгӕнӕг ын хъуамӕ бацамона, куыд хъӕуы, 1) йӕ ныхас цӕмӕй райдайдзӕн, уый бацӕттӕ кӕнын, 2) адӕймагимӕ ныхас кӕнын, 3) литературӕ дӕттын, 4) фылдӕр базонын кӕй фӕнды, уыдоны ногӕй бӕрӕг кӕнын ӕмӕ семӕ ныхас кӕнын ӕмӕ 5) адӕймагимӕ Библи ахуыр кӕнын райдайын. Ног хъусынгӕнӕг бирӕ цӕуылдӕрты сахуыр уыдзӕн, фӕлтӕрдджын хъусынгӕнӕг куыд архайы, уымӕ куы кӕса ӕмӕ йӕ куы фӕзма, уӕд (Лук. 6:40). Куы йӕ зона, ӕмӕ йӕ фарсмӕ ис, бахъуаджы сахат ын чи баххуыс кӕндзӕн, ахӕм адӕймаг, уӕд ныфсджындӕр уыдзӕн. Фӕлтӕрдджын хъусынгӕнӕг-иу дзы куы раппӕла ӕмӕ-иу ын хорз уынаффӕтӕ куы ратта, уӕд ын уый дӕр стыр ӕххуыс фӕуыдзӕн (Еккл. 4:9, 10).

КӔИМӔ ХЪУСЫН КӔНАЙ, УЫИМӔ-ИУ НЫХАС КӔН

Кӕй зӕгъын ӕй хъӕуы, хъусын кӕнгӕйӕ нӕ сӕйраг нысан у адӕмимӕ аныхас кӕнын. Фӕлӕ нын иуӕй-иу хатт хорз ныхас рауайы, хъусын кӕнынмӕ кӕимӕ вӕййӕм, ӕрмӕстдӕр уыцы хо кӕнӕ ӕфсымӕримӕ. Дӕ зӕрдыл-ма ӕрлӕууын кӕн, Йесо йӕ ахуыргӕнинӕгты хъусын кӕнынмӕ «дыгӕйттӕй» кӕй арвыста (Лук. 10:1). Афтӕмӕй сӕ бон уыди сӕ кӕрӕдзийы ныфсыл ныфс ӕфтауын ӕмӕ кӕрӕдзи хъусын кӕнынмӕ разӕнгард кӕнын. Не ’фсымӕртимӕ ӕмӕ нӕ хотимӕ уацамынды куы вӕййӕм, уӕд махӕн дӕр вӕййы хорз фадат, цӕмӕй «кӕрӕдзийы уырнындзинадӕй бафидар уӕм» (Ром. 1:12).

Уӕ бон цӕуыл уаид аныхас кӕнын? Мыййаг уӕ искӕуыл ӕрӕджы уацамынды исты цымыдисаг цау ӕрцыд? Кӕнӕ та, чи зоны, дӕ бинонтимӕ кӕнӕ дӕхӕдӕг Библи куы ахуыр кодтай, уӕд цавӕрдӕр ног хъуыды базыдтай. Йе та дӕ, чи зоны, бафидар кодта, ӕмбырды цы фехъуыстай, уый. Хорз кӕй нӕ зоныс, ахӕм хо кӕнӕ ӕфсымӕримӕ куы хъусын кӕнай, уӕд ӕй дӕ бон у бафӕрсын, рӕстдзинад куыд базыдта, уымӕй. Йегъовӕйы Ӕвдисӕнтӕ ӕцӕгдӕр Хуыцауы организаци кӕй сты, уый йӕ цӕй фӕрцы бауырныдта? Йӕ бӕрны цавӕр кадджын хӕстӕ уыд кӕнӕ йыл цавӕр цымыдисаг цаутӕ ӕрцыд? Дӕ бон ын у дӕхи хабӕрттӕй дӕр исты радзурын. Уӕдӕ уӕм адӕм хъусой ӕви нӕ, уӕддӕр уын хорз фадат вӕййы, цӕмӕй «кӕрӕдзийы фидар кӕнат» (1 Фес. 5:11).

БИБЛИ ЛӔМБЫНӔГ АХУЫР КӔН

Цӕмӕй дарддӕр дӕр зынгзӕрдӕйӕ хъусын кӕнӕм, уый тыххӕй ӕнӕмӕнг у Библи лӕмбынӕг ахуыр кӕнын. «Ӕууӕнкджын ӕмӕ зондджын цагъары» уагъд литературӕйы дзырд фӕцӕуы бирӕ алыхуызон фарстатыл ӕмӕ сӕ нӕ бон у иртасын (Матф. 24:45). Цӕй ӕмӕ ӕркӕсӕм иу ахӕм фарстамӕ: хорз хабар хъусын кӕнын афтӕ ахсджиаг цӕмӕн у? Ацы статьяйы цы рамкӕ ис, «Зынгзӕрдӕйӕ цӕмӕн хъуамӕ хъусын кӕнӕм?», зӕгъгӕ, уым ис цалдӕр хъуыддаджы кой.

Рамкӕйы цы хъуыддӕгты кой ис, уыдоныл арф куы ахъуыды кӕнай, уӕд дын уый баххуыс кӕндзӕн, цӕмӕй дарддӕр дӕр зынгзӕрдӕйӕ хъусын кӕнай. Иннӕ хатт Библи куы ахуыр кӕнай, уӕд-иу дӕхӕдӕг дӕр бафӕлвар, зынгзӕрдӕйӕ цӕмӕн хъуамӕ хъусын кӕнӕм, уый фӕдыл ма ноджыдӕр ӕндӕр хъуыдытӕ ссарын. Уыцы хъуыдытыл ӕмӕ сӕ Библийӕ цы стихтӕ бӕлвырд кӕнынц, уыдоныл-иу лӕмбынӕг ахъуыды кӕн. Афтӕ куы архайай, уӕд ноджы зӕрдиагдӕрӕй хъусын кӕндзынӕ.

НОГ МАДЗӔЛТТӔЙ ПАЙДА КӔНЫНӔЙ МА ТӔРС

Йегъовӕйы организаци нын фӕамоны, цавӕр мадзӕлттӕй у нӕ бон пайда кӕнын, цӕмӕй нын хъусын кӕныны хъуыддаджы фылдӕр ӕнтыса. Зӕгъӕм, хӕдзарӕй-хӕдзармӕ хъусын кӕнынӕй дарддӕр ма нӕ бон у писмотӕ фыссын, телефонӕй хъусын кӕнын, стӕй куыстуӕтты, уынджы кӕнӕ, бирӕ адӕм кӕм вӕййы, ахӕм рӕтты хъусын кӕнын. Нӕ бон ма у адӕмимӕ ныхас кӕнын, фадат нын куы фӕзыны, уӕд дӕр. Уымӕй уӕлдай ма, чи зоны, нӕ бон уа, хъусынгӕнджытӕ кӕм нӕ фаг кӕны йе та Ӕвдисӕнтӕ ӕппындӕр кӕм нӕй, ахӕм ранмӕ хъусын кӕнынмӕ ацӕуын дӕр.

Ног мадзӕлттӕй фӕпайда кӕныс? Хотӕ ӕмӕ ’фсымӕртӕй бирӕтӕ спайда кодтой, Хуыцауы организаци нын цы уынаффӕтӕ дӕтты, уыдонӕй, ӕмӕ тынг райгонд сты. Ӕркӕсӕм ӕртӕ цӕвиттонмӕ.

Иу хо, Эйприл, зӕгъгӕ, сфӕнд кодта спайда кӕнын, искӕимӕ Библи ахуыр кӕнын райдайӕн куыд ис, уый фӕдыл «Нӕ хъусын кӕныны хъуыддаджы» цы уынаффӕ уыди, уымӕй. Ӕмӕ йе ’мкусджытӕй ӕртӕйӕн загъта Библи ахуыр кӕныны тыххӕй. Эйприлы дисӕн кӕрон дӕр нӕ уыд, се ’ртӕ дӕр куы сразы сты ӕмӕ ма ӕмбырдтӕм цӕуын дӕр куы райдыдтой, уӕд.

Нӕ организаци ма нӕ разӕнгард кодта, нӕ брошюрӕтӕй цавӕрдӕр статьятӕ кӕй бацымыдис кӕндзысты, ахӕм адӕмы агурын. Иу хатт журналы «Пробудитесь!» уыди статья машинӕйы цӕлхыты тыххӕй. Ӕмӕ Америкӕйы Иугонд Штатты иу районон цӕстдарӕг сфӕнд кодта, цӕлхытӕ кӕм уӕй кӕнынц, уыцы дуканиты хицӕуттӕн се ’ппӕтӕн дӕр уыцы журналӕй фӕйнӕ раттын. Стӕй ма йӕ бинойнагимӕ 100 дохтырӕй фылдӕрӕн байуӕрстой, «Цените труд врачей», зӕгъгӕ, чи хуынди, уыцы журнал «Пробудитесь!». Ӕфсымӕр загъта, зӕгъгӕ, уый руаджы фылдӕр адӕм базыдтой Йегъовӕйы Ӕвдисӕнты тыххӕй, стӕй нӕ литературӕйы тыххӕй дӕр. Ацы бинонтӕ, журналтӕ кӕмӕн радтой, уыдонимӕ хуыздӕр кӕй базонгӕ сты, уый фӕрцы ссардтой, ногӕй бацӕуӕн кӕмӕ уыд, бирӕ ахӕм адӕмы.

Нӕ хо Джуди Йегъовӕйы Ӕвдисӕнты сӕйраг хайадмӕ ныффыста писмо ӕмӕ дзы ӕфсымӕртӕн раарфӕ кодта, телефонӕй хъусын кӕнынмӕ нӕ кӕй разӕнгард кодтой, уый тыххӕй. Йӕ писмойы ныффыста, йӕ мадыл 86 азы кӕй цӕуы ӕмӕ бирӕ цӕмӕйдӕрты кӕй хъӕрзы, фӕлӕ ӕдзухдӕр телефонӕй кӕй фӕхъусын кӕны. Ӕмӕ уый фӕрцы Библи ахуыр кӕнын райдыдта, 92 азы кӕуыл цыди, ахӕм сылгоймагимӕ!

Ӕцӕгдӕр, нӕ публикациты цы уынаффӕтӕ вӕййы, уыдон не ’ппӕтӕн дӕр стыр ӕххуыс сты. Уӕдӕ сӕ пайда кӕн! Уыцы уынаффӕтӕ дын баххуыс кӕндзысты, цӕмӕй дарддӕр дӕр зынгзӕрдӕйӕ ӕмӕ цингӕнгӕйӕ хъусын кӕнай.

ДӔ РАЗЫ ӔВӔР, ДӔ КЪУХЫ ЧИ БАФТА, АХӔМ НЫСӔНТТӔ

Ӕнтыстджын хъусынгӕнджытӕ стӕм ӕви нӕ, уый, цас литературӕ апарахат кӕнӕм, Библи цал адӕймагимӕ ахуыр кӕнӕм кӕнӕ донаргъуыд райсынӕн цал адӕймагӕн баххуыс кодтам, уымӕй кӕнгӕ нӕу. Ахъуыды-ма кӕн Нойы хабарыл. Йӕ бинонтӕй дарддӕр ма цал адӕймагӕн баххуыс кодта Йегъовӕйӕн лӕггад кӕнын райдайынӕн? Иуӕн дӕр нӕ. Фӕлӕ уӕддӕр Ной уыд ӕнтыстджын хъусынгӕнӕг. Ацы хъуыддаджы ахсджиагдӕр у, Йегъовӕйӕн иузӕрдионӕй кӕй лӕггад кӕнӕм, уый (1 Кор. 4:2).

Хъусынгӕнджытӕй бирӕтӕ ӕмбарынц, сӕ лӕггад сын циндзинад кӕй хӕсдзӕн, сӕ къухы чи бафта, ахӕм нысӕнттӕ сӕ разы куы ’вӕрой, уӕд. Цавӕр нысӕнттӕ у нӕ бон нӕ разы ӕвӕрын? Уый фӕдыл цалдӕр уынаффӕйы ис рамкӕйы «Дӕ разы ӕвӕр, дӕ къухы чи бафта, ахӕм нысӕнттӕ».

Йегъовӕйӕ ӕххуыс кур, цӕмӕй уацамынды ӕнтыстджындӕр уай. Дӕ нысӕнттӕ-иу дӕ къухы куы бафтой, уӕд-иу дын ӕхсызгон уыдзӕн, уымӕн ӕмӕ ӕмбардзынӕ, дӕ бон цыдӕриддӕр у, уый кӕй аразыс.

Кӕй зӕгъын ӕй хъӕуы, хорз хабар хъусын кӕнын хатт ӕнцон нӕ вӕййы. Фӕлӕ уӕддӕр дӕ бон у архайын, цӕмӕй цыфӕнды уавӕрты дӕр зынгзӕрдӕйӕ хъусын кӕнай. Кӕимӕ хъусын кӕнай, уыимӕ-иу ныхас кӕн, цӕмӕй кӕрӕдзи бафидар кӕнат, Библи лӕмбынӕг ахуыр кӕн, ӕууӕнкджын ӕмӕ зондджын цагъары уынаффӕтӕй пайда кӕн ӕмӕ дӕ разы ӕвӕр, дӕ къухы чи бафта, ахӕм нысӕнттӕ. Ӕппӕты ахсджиагдӕр та, дӕ зӕрдыл дар, Йегъовӕ Хуыцау дӕ кӕй схайджын кодта уыцы стыр кадӕй, цӕмӕй йе ’вдисӕн уай ӕмӕ хорз хабар хъусын кӕнай (Ис. 43:10). Дӕ зӕрдӕйы зынг ӕрмынӕг кӕнын куы нӕ бауадзай, уӕд стыр цинӕй хайджын уыдзынӕ!