Уыдон «уыдтой», Хуыцау сын зӕрдӕ цӕмӕй бавӕрдта, уый
«Хуыцау [сын] зӕрдӕ цӕмӕй бавӕрдта, уыдӕттӕ сӕ рӕстӕджы нӕ сӕххӕст сты... Фӕлӕ сӕ дардӕй уыдтой» (ДЗУТ. 11:13).
1. Цы нӕ федтам, уый нӕ цӕстытыл ауайын кӕнын нӕ бон кӕй у, уый нын цы пайда у? (Кӕс нывмӕ статьяйы райдианы.)
ЙЕГЪОВӔ нӕ схайджын кодта диссаджы курдиатӕй – нӕ бон у нӕ цӕстытыл ауайын кӕнын, цы нӕ федтам, уый. Ахӕм курдиат нӕм кӕй ис, уый фӕрцы нӕ бон у фидӕны хорз цӕмӕдӕр ӕнхъӕлмӕ кӕсын, нӕ хъуыддӕгтӕ рагацау пълан кӕнын ӕмӕ нӕхи зындзинӕдтӕй хизын. Йегъовӕ зоны, фидӕны цы хабӕрттӕ ӕрцӕудзӕн, уый ӕмӕ нын уыцы хабӕрттӕй иуӕй-иутӕ йӕ Ныхасы ӕргом кӕны. Кӕд уыцы хабӕрттӕ нӕ уынӕм, уӕддӕр сӕ нӕ бон у нӕ цӕстытыл ауайын кӕнын. Ӕмӕ нын уый та ӕххуыс кӕны, цӕмӕй сыл фидарӕй ӕууӕндӕм (2 Кор. 4:18).
2, 3. а) Ӕрцӕуӕн кӕмӕн ис, ахӕм хабӕрттыл цӕмӕн хъуамӕ хъуыды кӕнӕм? б) Ацы статьяйы цавӕр фарстатӕм ӕркӕсдзыстӕм?
2 Кӕй зӕгъын ӕй хъӕуы, иуӕй-иу хатт адӕймаг йӕ цӕстытыл ауайын кӕны, ӕрцӕуӕн кӕмӕн нӕй, ахӕм цыдӕр. Зӕгъӕм, гыццыл чызг, чи зоны, йӕ цӕстытыл ауайын кӕна, гӕлӕбуйыл куыд фӕтӕхы, уый, кӕд уымӕн гӕнӕн нӕй, уӕддӕр. Фӕлӕ Самуилы мад Аннӕйы куы ’рхъуыды кӕнӕм, уӕд-иу уымӕн та йӕ цӕстытыл уади, ӕрцӕуӕн кӕмӕн уыд, ахӕм хабар – йӕ фырты кувӕндонмӕ куыд акӕндзӕн ӕмӕ уым Хуыцауӕн куыд лӕггад кӕндзӕн, уый. Ӕмӕ уый ӕрмӕст бӕллиц нӕ уыд, фӕлӕ кӕй спълан кодта, уыцы хъуыддаг. Аннӕ-иу уыдӕттӕ йӕ цӕстытыл кӕй ауайын кодта, уый йын баххуыс кодта, цӕмӕй, Йегъовӕйӕн цы дзырд радта, уый сӕххӕст кодтаид (1 Сам. 1:22). Мах дӕр, Йегъовӕ нын зӕрдӕ цӕмӕй ӕвӕры, уыдӕттӕ нӕ цӕстытыл куы фӕуайын кӕнӕм, уӕд фӕхъуыды кӕнӕм, ӕнӕмӕнг чи ’рцӕудзӕн, ахӕм хабӕрттыл (2 Пет. 1:19–21).
3 Рагзаманты-иу Йегъовӕйы лӕггадгӕнджытӕй бирӕтӕ сӕ цӕстытыл ауайын кодтой, Хуыцау сын зӕрдӕ цӕмӕй бавӕрдта, уыдӕттӕ. Цымӕ сын уый куыд ӕххуыс кодта? Ӕмӕ хорз цӕмӕн уыдзӕн, мах дӕр-иу нӕ цӕстытыл куы ауайын кӕнӕм, Хуыцау нын зӕрдӕ цӕмӕй бавӕрдта, уыдӕттӕ?
СӔ УЫРНЫНДЗИНАД ФИДАР КОДТА, ФИДӔНЫЛ КӔЙ ХЪУЫДЫ КОДТОЙ, УЫЙ ФӔРЦЫ
4. Авелы хуыздӕр фидӕнӕй ныфс цӕй фӕрцы уыд?
4 Йегъовӕйы зӕрдӕвӕрдтыл чи ӕууӕндыд, уыдонӕй фыццаг уыд Авел. Уый зыдта, Адам ӕмӕ Евӕ тӕригъӕд куы ракодтой, уӕд Йегъовӕ калмӕн цы загъта, уый тыххӕй. Йегъовӕ загъта: «Ӕз дӕу ӕмӕ сылгоймаджы, дӕ байзӕддаг ӕмӕ уый байзӕддаджы кӕрӕдзийӕн скӕндзынӕн знӕгтӕ. Уый дын дӕ сӕр ныцъцъӕл кӕндзӕн, ды та йын йӕ зӕвӕтыл фӕхӕцдзынӕ» (Райд. 3:14, 15). Уыцы хабар куыд сӕххӕст уыдзӕн, уый Авел бӕлвырд нӕ зыдта. Фӕлӕ-иу, ӕвӕццӕгӕн, Хуыцауы ныхӕстыл бирӕ хъуыды кодта. Чи зоны-иу хъуыды кодта, калм кӕуыл фӕхӕцдзӕн ӕмӕ адӕмы ӕххӕстдзинадмӕ чи ’ркӕндзӕн, уый чи уыдзӕн, зӕгъгӕ. Авелы фидарӕй уырныдта, Йегъовӕ зӕрдӕ цӕмӕйдӕриддӕр бавӕрдта, уый ӕнӕмӕнг кӕй сӕххӕст уыдзӕн. Ӕмӕ нывонд куы ’рхаста, уӕд дзы Йегъовӕйы зӕрдӕ барухс ӕмӕ йын йӕ нывонд айста. (Бакӕс Райдианы 4:3–5; Дзуттӕгтӕм 11:4.)
5. Енох-иу йӕ цӕстытыл фидӕн кӕй ауайын кодта, уый йын куыд ӕххуыс кодта?
5 Енох дӕр уыди, Йегъовӕйыл фидарӕй чи ӕууӕндыд, ахӕм адӕймаг. Уый царди, Хуыцауӕй «алы фыдтӕ» чи дзырдта, ахӕм тӕригъӕдджын адӕмы ’хсӕн. Фӕлӕ Енох хъӕбатырӕй хъусын кодта, Хуыцау фыдгӕнджыты кӕй фесафдзӕн, уый тыххӕй (Иуд. 14, 15). Цымӕ йын цы ’ххуыс кодта, Хуыцау ын кӕй бафӕдзӕхста, уыцы хъуыддаг ӕххӕст кӕнынӕн? Ӕвӕццӕгӕн-иу йӕ цӕстытыл ауайын кодта, алчидӕр Йегъовӕйӕн кӕм лӕггад кӕндзӕн, ахӕм дуне. (Бакӕс Дзуттӕгтӕм 11:5, 6.)
6. Доны хъаймӕты фӕстӕ-иу Ной йӕ цӕстытыл цавӕр рӕстӕг ауайын кодтаид?
6 Ной дӕр ӕууӕндыд Йегъовӕйыл, ӕмӕ уый фӕрцы Доны хъаймӕты аирвӕзт (Дзут. 11:7). Доны хъаймӕты фӕстӕ йӕ йӕ уырнындзинад баразӕнгард кодта, цӕмӕй Йегъовӕйӕн фосы нывӕндтӕ ӕрхастаид (Райд. 8:20). Авелау уый дӕр ӕууӕндыд, фидӕны адӕм тӕригъӕд ӕмӕ мӕлӕтӕй кӕй ссӕрибар уыдзысты, ууыл. Ӕмӕ фӕстӕдӕр Нимрод адӕмӕн йӕхи куы схицау кодта ӕмӕ сӕ Йегъовӕйы ныхмӕ куы скодта, уӕд дӕр Ной йӕ зӕрдӕ Хуыцауыл дардта ӕмӕ йыл фидарӕй ӕууӕндыд (Райд. 10:8–12). Ӕвӕццӕгӕн-иу йӕ цӕстытыл ауайын кодта, ӕгъатыр хицӕуттӕ, стӕй тӕригъӕд ӕмӕ мӕлӕт куы нал уа, уыцы рӕстӕг. Ныр уыцы рӕстӕг тынг ӕввахс у, ӕмӕ йыл махӕн дӕр нӕ бон у хъуыды кӕнын (Ром. 6:23).
УЫДОН «УЫДТОЙ», ХУЫЦАУЫ ЗӔРДӔВӔРДТӔ КУЫД СӔХХӔСТ УЫДЗЫСТЫ, УЫЙ
7. Авраам, Исахъ ӕмӕ Иаков цавӕр фидӕн «уыдтой»?
7 Авраам, Исахъ ӕмӕ Иаковӕн сӕ бон уыди сӕ цӕстытыл ауайын кӕнын диссаджы фидӕн. Йегъовӕ сын зӕрдӕ бавӕрдта, сӕ «байзӕддаджы» фӕрцы ӕппӕт адӕмыхӕттытӕ дӕр арфӕгонд кӕй ӕрцӕудзысты (Райд. 22:18; 26:4; 28:14). Хуыцау ма сын зӕрдӕ бавӕрдта, сӕ хӕдзарвӕндагӕй кӕй рацӕудзӕн стыр адӕм ӕмӕ Зӕрдӕвӕрд зӕххыл кӕй цӕрдзысты (Райд. 15:5–7). Уыцы иузӕрдион нӕлгоймӕгтӕ Хуыцауыл ӕппӕт зӕрдӕйӕ кӕй ӕууӕндыдысты, уый фӕрцы «уыдтой», сӕ байзӕддӕгтӕ уыцы зӕхх бынӕн куыд райсдзысты ӕмӕ йыл куыд цӕрдзысты, уый. Адам ӕмӕ Евӕ тӕригъӕд куы ракодтой, уӕдӕй фӕстӕмӕ Йегъовӕ йӕ иузӕрдион лӕггадгӕнджытӕн ӕргом кодта, иубон адӕм фӕстӕмӕ алцӕмӕй ӕххӕст кӕй суыдзысты, уый.
8. Авраамӕн йӕ уырнындзинад фидар цӕй фӕрцы уыд ӕмӕ йын цы ’ххуыс кодта, цӕмӕй алкӕддӕр Йегъовӕйы коммӕ кастаид?
8 Авраамӕн фидар уырнындзинад кӕй уыд, уый фӕрцы-иу суанг тынг зын уавӕрты дӕр Йегъовӕйы коммӕ каст. Авраамӕн ӕмӕ иннӕ иузӕрдион лӕггадгӕнджытӕн «Хуыцау зӕрдӕ цӕмӕй бавӕрдта, уыдӕттӕ сӕ рӕстӕджы нӕ сӕххӕст сты», фӕлӕ сӕ уӕддӕр уыдон «дардӕй уыдтой ӕмӕ сыл цин кодтой». (Бакӕс Дзуттӕгтӕм 11:8–13.) Авраам зыдта, Йегъовӕ-иу йӕ ныхас алкӕддӕр кӕй сӕххӕст кодта, ӕмӕ йӕ уымӕ гӕсгӕ фидарӕй уырныдта, фидӕны зӕрдӕ цӕмӕй ӕвӕры, уыдӕттӕ дӕр кӕй сӕххӕст кӕндзӕн.
9. Авраам Хуыцауы зӕрдӕвӕрдтыл кӕй ӕууӕндыд, уый йын куыд ӕххуыс кодта?
9 Авраам Хуыцауы зӕрдӕвӕрдтыл кӕй ӕууӕндыд, уый фӕрцы йын алкӕддӕр йӕ фӕндон ӕххӕст кодта. Зӕгъӕм, Уры йӕ хӕдзар ныууагъта ӕмӕ уӕдӕй фӕстӕмӕ иу горӕты дӕр нал ӕрбынат кодта. Авраам зыдта, уыцы горӕттӕм хорзӕй кӕй ницы ӕнхъӕлмӕ каст, уымӕн ӕмӕ сӕ хицӕуттӕ Йегъовӕйӕн нӕ лӕггад кодтой (Йес. Н. 24:2). Авраам ӕнхъӕлмӕ касти, «фидар бындур кӕмӕн ис, йӕ саразӕг ӕмӕ йе скӕнӕг Хуыцау кӕмӕн у, уыцы горӕтмӕ» (Дзут. 11:10). Уый «уыдта», йӕ хицау Йегъовӕ кӕмӕн уыдзӕн, уыцы дунейы куыд цӕрдзӕн, уый. Авел, Енох, Ной, Авраам ӕмӕ ма иннӕ иузӕрдион лӕггадгӕнджытӕ дӕр фидарӕй ӕууӕндыдысты райгасдзинадыл ӕмӕ зӕрдиагӕй ӕнхъӕлмӕ кастысты, Хуыцауы Паддзахад бартӕ йӕ къухмӕ куы райса, уыцы рӕстӕгмӕ. Уыдон сӕ цӕстытыл уайын кодтой, рӕсугъд зӕххыл ӕнустӕм куыд цӕрдзысты, уый, ӕмӕ уый фӕрцы сӕ уырнындзинад фидар кодта. (Бакӕс Дзуттӕгтӕм 11:15, 16.)
10. Саррӕ фидӕныл кӕй хъуыды кодта, уый йын куыд ӕххуыс кодта?
10 Авраамы бинойнаг Саррӕ дӕр ӕппӕт зӕрдӕйӕ ӕууӕндыд, Йегъовӕ сын зӕрдӕ цӕмӕй бавӕрдта, уыдӕттыл. Кӕд ыл 90 азы цыд ӕмӕ йын зӕнӕг нӕ уыди, уӕддӕр ӕнхъӕлмӕ касти, сывӕллон ын кӕд райгуырдзӕн, уыцы рӕстӕгмӕ. Саррӕ ма-иу йӕ цӕстытыл ауайын кодта, йӕ байзӕддӕгтӕй стыр адӕм куыд рацӕудзӕн, уый дӕр (Дзут. 11:11, 12). Уымӕй йӕ афтӕ фидар ныфс цӕй фӕрцы уыд? Уымӕн ӕмӕ Йегъовӕ йӕ сӕрыхицауӕн загъта: «Ӕз ын раарфӕ кӕндзынӕн ӕмӕ дын уымӕй ратдзынӕн фырт. Раарфӕ йын кӕндзынӕн, ӕмӕ уымӕй рацӕудзӕн бирӕ адӕмыхӕттытӕ ӕмӕ адӕмты паддзӕхтӕ» (Райд. 17:16). Ӕмӕ ӕппынфӕстаг, Йегъовӕ куыддӕриддӕр загъта, афтӕ, Саррӕйӕн райгуырд лӕппу – Исахъ. Хуыцау ахӕм диссаг кӕй скодта, уый фӕрцы Саррӕйы ноджы фидардӕрӕй бауырныдта, Йегъовӕ ма зӕрдӕ кӕмӕй бавӕрдта, уыцы хабӕрттӕ дӕр ӕнӕмӕнг кӕй сӕххӕст уыдзысты. Йегъовӕ нын зӕрдӕ цы диссаджы хорздзинӕдтӕй ӕвӕры, уыдоныл куы хъуыды кӕнӕм, уӕд мах дӕр нӕ уырнындзинад фидар кӕндзыстӕм.
ЙӔ ХЪУЫДЫТӔ ИУУЫЛДӔР УЫДЫСТЫ ХӔРЗИУӔГЫЛ
11, 12. Моисей Йегъовӕйы тынгӕй-тынгдӕр цӕй фӕрцы уарзта?
11 Моисей дӕр фидарӕй ӕууӕндыд, Йегъовӕ зӕрдӕ цӕмӕй бавӕрдта, ууыл. Уый схъомыл паддзахы хӕдзары ӕмӕ уыди фараоны чызджы фыртыл нымад. Фӕлӕ алкӕмӕй ӕмӕ алцӕмӕй тынгдӕр Йегъовӕйы кӕй уарзта, уымӕ гӕсгӕ кад ӕмӕ хъӕздыгдзинадмӕ никуы бабӕллыд. Моисей йӕ ныййарджытӕй базыдта Йегъовӕйы тыххӕй ӕмӕ йӕ адӕмӕн зӕрдӕ цӕмӕй бавӕрдта, уый тыххӕй – цагъарадӕй сӕ кӕй ссӕрибар кӕндзӕн ӕмӕ сӕ Зӕрдӕвӕрд зӕхмӕ кӕй бакӕндзӕн (Райд. 13:14, 15; Рац. 2:5–10). Хуыцауы адӕммӕ разӕй цы арфӕдзинӕдтӕ ӕнхъӕлмӕ каст, уыдоныл Моисей цас фылдӕр хъуыды кодта, уыйас тынгдӕр уарзта Йегъовӕйы.
12 Библийы фыст ис, Моисейӕн йӕ хъуыдытӕ иууылдӕр цӕуыл уыдысты, уый тыххӕй: «Моисей куы сыстыр, уӕд ӕй йӕ уырнындзинады фӕрцы нӕ бафӕндыд фараоны чызджы фырты ном хӕссын, ӕмӕ, тӕригъӕд рӕстӕгмӕ цы ӕхсызгондзинад хӕссы, уый цинӕй цӕрыны бӕсты равзӕрста Хуыцауы адӕмимӕ ӕфхӕрд ӕййафын – уый Египеты хӕзнатӕй стырдӕр хъӕздыгдзинадыл банымадта, Хуыцауы сӕрст лӕггадгӕнӕг уӕвгӕйӕ цы ӕфхӕрд ӕййӕфта, уый, уымӕн ӕмӕ йӕ хъуыдытӕ иууылдӕр уыдысты, цы хӕрзиуӕг ӕм ӕнхъӕлмӕ каст, ууыл» (Дзут. 11:24–26).
13. Моисей Йегъовӕйы зӕрдӕвӕрдтыл арф кӕй хъуыды кодта, уый йын куыд ӕххуыс кодта?
13 Моисей-иу, ӕвӕццӕгӕн, бирӕ фӕхъуыды кодта, Йегъовӕ дзуттӕгтӕн зӕрдӕ цӕмӕй бавӕрдта, ууыл, Египетӕй уӕ ракӕндзынӕн, зӕгъгӕ. Хуыцауы иннӕ иузӕрдион лӕггадгӕнджытау Моисей дӕр зыдта, фидӕны Йегъовӕ адӕмы се ’ппӕты дӕр мӕлӕтӕй кӕй фервӕзын кӕндзӕн (Иов 14:14, 15; Дзут. 11:17–19). Уымӕ гӕсгӕ Моисей ӕмбӕрста, Йегъовӕ адӕмы куыд тынг уарзы, уый. Ӕмӕ йӕ уый тыххӕй ноджы тынгдӕр уарзта ӕмӕ йыл тынгдӕр ӕууӕндыд. Уый йын ӕххуыс кодта, цӕмӕй йӕ цард-цӕрӕнбонты Йегъовӕйӕн лӕггад кодтаид (Дык. з. 6:4, 5). Ӕмӕ йӕ фараон марынмӕ куы хъавыд, уӕд дӕр Моисей нӕ фӕтарст, уымӕн ӕмӕ зыдта, фидӕны йӕ Йегъовӕ кӕй схорзӕхджын кӕндзӕн, уый (Рац. 10:28, 29).
ДӔ ЦӔСТЫТЫЛ-ИУ АУАЙЫН КӔН, ХУЫЦАУЫ ПАДДЗАХАД ЦЫ САРАЗДЗӔН, УЫЙ
14. Адӕмӕй бирӕтӕ фидӕныл хъуыды кӕнгӕйӕ сӕ цӕстытыл цы ауайын кӕнынц?
14 Абон бирӕтӕ фидӕныл хъуыды кӕнгӕйӕ сӕ цӕстытыл ауайын кӕнынц, ӕрцӕуӕн кӕмӕн нӕй, ахӕм хабӕрттӕ. Зӕгъӕм, тынг мӕгуыр чи у, уыдонӕй иуӕй-иутӕ сӕ цӕстытыл фӕуайын кӕнынц, куыд схъӕздыг уыдзысты ӕмӕ ӕнӕмӕт цард куыд кӕндзысты, уый. Фӕлӕ Библи куыд зӕгъы, афтӕмӕй Хӕйрӕджы дунейы адӕмӕн сӕ царды алкӕддӕр уыдзӕн бирӕ «маст ӕмӕ фыдӕбон» (Пс. 90:10). Чидӕртӕ та сӕ цӕстытыл ауайын кӕнынц, хицӕуттӕ адӕмы зындзинӕдтӕн кӕрон куыд скӕндзысты, уый. Фӕлӕ Библимӕ гӕсгӕ уыцы хъуыддаг ӕрмӕстдӕр Хуыцауы Паддзахадӕн бантысдзӕн (Дан. 2:44). Бирӕты хъуыдымӕ гӕсгӕ та ацы дунейы ницы фӕивдзӕн. Фӕлӕ Библи куыд дзуры, афтӕмӕй Хуыцау ацы фыддуне фесафдзӕн (Соф. 1:18; 1 Иоан. 2:15–17). Йегъовӕмӕ фидӕны тыххӕй цы фӕнд ис, уый чи ницӕмӕ дары ӕмӕ йӕхицӕн мӕнг ныфсытӕ чи ӕвӕры, уыдоны сӕ фынтӕ фӕсайдзысты.
Ног дунейы цы араздзынӕ, уый дӕ цӕстытыл ауайын кӕнын дӕ бон у? (кӕс 15 абзац)
15. а) Хуыцау нын зӕрдӕ цы фидӕнӕй ӕвӕры, ууыл хъуыды кӕнын хорз цӕмӕн у? б) Ног дунейы цӕмӕ ӕнхъӕлмӕ кӕсыс?
15 Йегъовӕ нын зӕрдӕ ӕвӕры диссаджы фидӕнӕй. Уыцы рӕстӕгыл куы фӕхъуыды кӕнӕм, уӕд нӕ зӕрдӕ цинӕй байдзаг вӕййы ӕмӕ нӕм хъарутӕ фӕзыны, цӕмӕй дарддӕр дӕр Хуыцауӕн лӕггад кӕнӕм. Йегъовӕ дын зӕрдӕ цы хорздзинӕдтӕй ӕвӕры, уыдон куыд сӕххӕст уыдзысты, уый «уыныс»? Уӕлӕрвты цӕрыны ныфс дын ис ӕви зӕххыл, уӕддӕр дӕ бон у уыцы диссаджы фидӕн дӕ цӕстытыл ауайын кӕнын. Кӕд дын зӕххыл цӕрыны ныфс ис, уӕд-ма дӕ цӕстытыл ауайын кӕн: де ’мбӕлттимӕ иумӕ кусут, цӕмӕй зӕхх ӕнӕхъӕнӕй дӕр дзӕнӕт суа. Уыцы куыстмӕ йӕ хъус чи дары, уыдон дӕ хорзыл тыхсынц, ӕмӕ дын алы бон дӕр у стыр цины хос. Дӕ алыварс ис, дӕуау Йегъовӕйы чи уарзы, ахӕм адӕм. Ӕппындӕр дӕ ницы риссы, ницӕуыл тыхсыс ӕмӕ, фӕллад цы у, уый нӕ зоныс. Ӕхсызгон дын у, дӕ курдиӕтты фӕрцы дӕ бон кӕй у иннӕтӕн лӕггад кӕнын ӕмӕ Йегъовӕйы кадджын кӕнын, зӕгъӕм, чи райгас, уыдонӕн Йегъовӕйы базонынӕн ӕххуыс кӕнын (Иоан. 17:3; Хъуыд. 24:15). Ӕппӕт уыдӕттӕ рӕсугъд фынтӕ не сты. Уыцы хабӕрттӕ ӕнӕмӕнг ӕрцӕудзысты, уымӕн ӕмӕ уый тыххӕй фыст ис Хуыцауы Ныхасы (Ис. 11:9; 25:8; 33:24; 35:5–7; 65:22).
ФИДӔНЫ ЦӔМӔ ӔНХЪӔЛМӔ КӔСЫС, УУЫЛ ИННӔТИМӔ НЫХАС КӔН
16, 17. Йегъовӕ нын зӕрдӕ цы фидӕнӕй ӕвӕры, ууыл ныхас кӕнын хорз цӕмӕн у?
16 Ног дунейы цы араздзыстӕм, ууыл-иу хотӕ ӕмӕ ӕфсымӕртимӕ куы ныхас кӕнӕм, уӕд уыцы рӕсугъд фидӕн ноджы ирддӕрӕй «уындзыстӕм». Кӕй зӕгъын ӕй хъӕуы, ныртӕккӕ йӕ бӕлвырд нӕ зонӕм, ног дунейы нӕ чи цавӕр куыст кӕндзӕн, уый. Фӕлӕ фидӕны цӕмӕ ӕнхъӕлмӕ кӕсӕм, уый тыххӕй-иу куы ныхас кӕнӕм, уӕд бӕрӕг уыдзӕн, Йегъовӕйы зӕрдӕвӕрдтыл фидарӕй кӕй ӕууӕндӕм. Афтӕмӕй апостол Павелау ӕмӕ ромаг чырыстӕттау нӕ кӕрӕдзи разӕнгард кӕндзыстӕм, цӕмӕй ацы зын рӕстӕджыты Йегъовӕйӕн дарддӕр дӕр иузӕрдионӕй лӕггад кӕнӕм (Ром. 1:11, 12).
17 Йегъовӕ нын зӕрдӕ кӕмӕй ӕвӕры, уыцы фидӕныл цас фылдӕр хъуыды кӕнай, уыйас къаддӕр хъуыды кӕндзынӕ, ныртӕккӕ цы зындзинӕдтӕ ӕййафыс, уыдоныл. Петрӕн дӕр уыди йӕхи зындзинӕдтӕ, ӕмӕ иухатт Йесойы бафарста: «Мах ӕппӕт дӕр нӕ ныууагътам ӕмӕ дӕ фӕдыл нӕ рацыдыстӕм? Цы нын уыдзӕн хорзӕй?» Йесойы фӕндыд, цӕмӕй Петр ӕмӕ иннӕ ахуыргӕнинӕгтӕ хъуыды кодтаиккой, фидӕны цы диссаджы куыст кӕндзысты, ууыл. Ӕмӕ сын уымӕ гӕсгӕ загъта: «Адӕймаджы Фырт йӕ кадджын паддзахбадӕныл куы ӕрбада... уӕд сымах дӕр, мӕ фӕдылдзӕуджытӕ, ӕрбаддзыстут дыууадӕс паддзахбадӕныл ӕмӕ тӕрхон кӕндзыстут Израилы дыууадӕс мыггагӕн. Мӕ номы тыххӕй йӕ хӕдзӕрттӕ, кӕнӕ йе ’фсымӕрты, кӕнӕ йӕ хоты, кӕнӕ йӕ фыды, кӕнӕ йӕ мады, кӕнӕ йӕ сывӕллӕтты, кӕнӕ йӕ зӕххытӕ чи ныууагъта, уый ссардзӕн, цы ныууагъта, уымӕй бирӕ фылдӕр ӕмӕ уыдзӕн ӕнусон цардӕй хайджын» (Матф. 19:27–29). Уый фӕрцы Петрӕн ӕмӕ иннӕ ахуыргӕнинӕгтӕн дӕр сӕ бон уыди сӕ цӕстытыл ауайын кӕнын, уӕлӕрвты Чырыстиимӕ паддзӕхтӕ куыд уыдзысты ӕмӕ коммӕгӕс адӕмӕн куыд ӕххуыс кӕндзысты, цӕмӕй алцӕмӕй ӕххӕст суой.
18. Йегъовӕ нын зӕрдӕ цы цардӕй ӕвӕры, ууыл хъуыды кӕнын хорз цӕмӕн у?
18 Ацы статьяйӕ базыдтам, Йегъовӕйы лӕггадгӕнджытӕн фидар уырнындзинад цӕй фӕрцы уыд, уый. Авел-иу йӕ цӕстытыл ауайын кодта, Йегъовӕ зӕрдӕ кӕмӕй бавӕрдта, уыцы диссаджы фидӕн. Ӕмӕ уыцы зӕрдӕвӕрдыл фидарӕй кӕй ӕууӕндыд, уый фӕрцы Йегъовӕйы хорзӕх ссардта. Авраам-иу хъуыды кодта, зӕрдӕвӕрд «байзӕддаг» кӕд фӕзындзӕн, уыцы рӕстӕгыл, ӕмӕ уый фӕрцы суанг зын уавӕрты дӕр Йегъовӕйы коммӕ касти (Райд. 3:15). Моисейӕн «йӕ хъуыдытӕ иууылдӕр уыдысты, цы хӕрзиуӕг ӕм ӕнхъӕлмӕ каст, ууыл», ӕмӕ уый фӕрцы Йегъовӕйы ноджы тынгдӕр уарзта ӕмӕ йыл тынгдӕр ӕууӕндыд (Дзут. 11:26). Йегъовӕ нын зӕрдӕ кӕмӕй ӕвӕры, уыцы цардыл куы фӕхъуыды кӕнӕм, уӕд махӕн дӕр нӕ уырнындзинад бафидар вӕййы ӕмӕ Йегъовӕйы ноджы тынгдӕр фӕуарзӕм. Фӕлӕ, цы нӕ уынӕм, уый нӕ бон нӕ цӕстытыл ауайын кӕнын кӕй у, уыцы курдиатӕй ма ноджыдӕр нӕ бон куыд у спайда кӕнын? Ууыл дзырд цӕудзӕн иннӕ статьяйы.