Ӕрдзон бӕллӕх куы ’рцӕуа
КӔД дӕуыл дӕр ахӕм бӕллӕх ӕрцыд, уӕд хорз ӕмбардзынӕ, ахӕм уавӕры, чи уыд, уыдоны: адӕймаг арвыцӕфау фӕвӕййы, цы ’рцыд, уый йӕ нӕ фӕуырны, фӕтыхсы, фӕмӕт кӕны ӕмӕ, цыма фыдфынтӕ фӕуыны, афтӕ йӕм фӕкӕсы. Бӕллӕх кӕуыл ӕрцыд, уыцы ныфссаст ӕмӕ фӕллад адӕмӕй бирӕты фӕндгӕ дӕр нал фӕкӕны, цӕмӕй та ногӕй исты аразой.
Кӕд ды дӕр исты бӕллӕхы тыххӕй алцыдӕр фесӕфтай, уӕд дӕм, чи зоны, афтӕ кӕсы, ӕмӕ уыцы зындзинӕдтӕ не сфӕраздзынӕ. Уый тыххӕй ма, гӕнӕн ис, афтӕ хъуыды кӕнын дӕр райдайай, ӕмӕ дӕ цардӕй мӕлӕт хуыздӕр у. Фӕлӕ Библи ӕмбарын кӕны, цӕрынӕн тыхтӕ ссарын кӕй хъӕуы, ӕмӕ дын хорз фидӕнӕй фидар ныфс кӕй ис.
БИБЛИ ФИДӔНӔЙ НЫФС ӔВӔРЫ
Екклесиаст 7:8 стихы фыст ис: «Хъуыддагӕн йӕ кӕрон йӕ райдайӕнӕй хуыздӕр у». Бӕллӕхы фӕстӕ дӕм, чи зоны, афтӕ кӕса, ӕмӕ дӕ цард ницыуал пайда у. Фӕлӕ дӕ хъӕуы фӕразондзинад, цӕмӕй та раздӕрау дӕ царды кой кӕнай.
Библи зӕрдӕ ӕвӕры, ахӕм рӕстӕг кӕй уыдзӕн, ӕмӕ «нал райхъуысдзӕн кӕуын ӕмӕ, зӕрдӕ кӕмӕй уынгӕг кӕны, ахӕм хъӕр» (Исай 65:19). Уый уыдзӕн, Хуыцауы Паддзахады дӕлбар зӕхх дзӕнӕт куы суа, уӕд (Псалом 37:11, 29). Уӕд бӕллӕхтӕн сӕ кой дӕр нал уыдзӕн. Дӕ зӕрдӕйы кӕнӕ дӕ буары хъӕдгӕмттӕ, стӕй дын маст цы хъуыдытӕ хӕссынц, уыдонӕн сӕ кой дӕр нал уыдзӕн, уымӕн ӕмӕ Ӕппӕтхъомысджын Хуыцау зӕрдӕ ӕвӕры: «Раздӕр цы уыд, уыдон хъуыды дӕр ничиуал ӕркӕндзӕн ӕмӕ зӕрдӕйы дӕр нал баззайдзысты» (Исай 65:17).
Ахъуыды-ма кӕн: Сфӕлдисӕг батыхсти, цӕмӕй дын «фидӕн ӕмӕ ныфс» уа, ома йӕ Паддзахады дӕлбар фӕрнӕй цӕрай (Йереми 29:11). Ахӕм цард кӕй уыдзӕн, уый дӕ ныфс нӕ уадзы ӕмӕ цардӕн тынгдӕр нӕ аргъ кӕныс? Раззаг статьяйы кӕй кой цыди, уыцы сылгоймаг, Салли, загъта: «Фидӕны Хуыцауы Паддзахад цы диссаджы хъуыддӕгтӕ сараздзӕн, уыдон-иу дӕ зӕрдыл куы ӕрлӕууын кӕнай, уӕд ӕдзух нӕ хъуыды кӕндзынӕ, цы ӕрцыд, ууыл ӕмӕ зындзинӕдтӕн фӕраздзынӕ».
Хорз уаид, куы базонис, тагъд рӕстӕджы Хуыцауы Паддзахад адӕмӕн цы диссаджы цард сараздзӕн, уый тыххӕй. Кӕд бӕллӕхы бахаудтӕ, уӕддӕр дын уый баххуыс кӕндзӕн, цӕмӕй дӕ цӕрын фӕнда ӕмӕ зӕрдиагӕй ӕнхъӕлмӕ кӕсай, бӕллӕхтӕ кӕм нал уыдзӕн, уыцы фидӕнмӕ. Цалынмӕ уыцы рӕстӕг нӕ ралӕууыд, уӕдмӕ дын Библийы уынаффӕтӕ баххуыс кӕндзысты, бӕллӕхы фӕстӕ цы зындзинӕдтӕ ӕййафыс, уыдон сфӕразынӕн. Ӕркӕсӕм цалдӕр цӕвиттонмӕ.