Йегъовӕ йӕ адӕмы фыддзинадӕй куыд хъахъхъӕны, уымӕй йӕ уарзондзинад ӕмӕ йӕ рӕстдзинад куыд зынынц? (4 статьяйӕ 3)

1–3. а) 5-ӕм псаломы 4-ӕм стихӕй 6-ӕм стихмӕ фыст ныхӕстӕм гӕсгӕ, Йегъовӕ фыддзинадмӕ цы цӕстӕй кӕсы? б) Цӕмӕн ис зӕгъӕн, ӕмӕ, сывӕллӕттӕн тыхми ӕмӕ ӕвзӕр митӕ чи бакӕны, уый «Чырыстийы закъоны» ныхмӕ рацӕуы?

ЙЕГЪОВӔ ХУЫЦАУ йе сӕфт уыны фыддзинадӕй. (Бакӕс Псалом 5:4–6.) Уӕлдай тынгдӕр йе сӕфт уыны, сывӕллӕттӕн тыхми ӕмӕ ӕвзӕр митӕ куы бакӕнынц, уымӕй. Уымӕй фыддӕр ӕмӕ ӕнаккагдӕр хъуыддагӕн скӕнӕн нӕй! Ӕмӕ мах йӕ лӕггадгӕнджытӕ кӕй стӕм, уымӕ гӕсгӕ мах дӕр уыцы фыдхъуыддагӕй не сӕфт уынӕм ӕмӕ, зӕгъгӕ, ӕмбырды ахӕм хабар ӕрцыд, уӕд уымӕ ӕнцад нӕ кӕсдзыстӕм (Ром. 12:9; Дзут. 12:15, 16).

² Сывӕллӕттӕн тыхми ӕмӕ ӕвзӕр митӕ чи бакӕны, уый «Чырыстийы закъоны» ныхмӕ рацӕуы! (Гал. 6:2). Афтӕ цӕмӕн ис зӕгъӕн? Айразмӕйы статьяйӕ куыд базыдтам, афтӕмӕй Чырыстийы закъонмӕ хауынц, Йесо ныхасӕй дӕр ӕмӕ хъуыддагӕй дӕр адӕмы цӕуылдӕриддӕр ахуыр кодта, уыдӕттӕ. Ӕмӕ уыцы закъонӕн йӕ бындур у уарзондзинад ӕмӕ разӕнгард кӕны рӕстӕй архайынмӕ. Уымӕ гӕсгӕ ӕцӕг чырыстӕттӕ сывӕллӕттӕм хорз зӕрдӕ дарынц, ӕмӕ уый фӕрцы сывӕллӕттӕ ӕмбарынц, ӕмбырды сӕ кӕй уарзынц ӕмӕ сын уым ӕдас кӕй у, уый. Фӕлӕ, сывӕллонӕн тыхми ӕмӕ ӕвзӕр митӕ бакӕнай, уый уарзондзинадыл нӕ, фӕлӕ хиуарзондзинадыл дзурӕг у. Стӕй уый у стыр фыдракӕнд, уымӕн ӕмӕ уый аххосӕй сывӕллон йӕхи ӕдас нал фӕхаты ӕмӕ йӕм афтӕ фӕкӕсы, ӕмӕ йӕ ничи уарзы.

³ Хъыгагӕн, сывӕллӕттӕн тыхми ӕмӕ ӕвзӕр митӕ чи бакӕны, ахӕмтӕ ӕгас дунейы дӕр бирӕ ис, ӕмӕ Хуыцауы лӕггадгӕнджытыл дӕр ахӕм хабар ӕрцӕуы. Афтӕ уымӕн у, ӕмӕ «ӕвзӕр адӕм ӕмӕ цӕстфӕлдахджытӕ» кӕнынц фылдӕрӕй-фылдӕр, ӕмӕ иуӕй-иутӕ исты райсын ӕнхъӕлӕй ӕмбырдтӕм цӕуын райдайынц (2 Тим. 3:13). Стӕй ма ӕмбырдӕй дӕр чидӕртӕ сӕ буары монцты фӕдыл ацыдысты ӕмӕ сывӕллӕттӕн ӕвзӕр митӕ кодтой. Ацы статьяйӕ базондзыстӕм, сывӕллӕттӕн тыхми ӕмӕ ӕвзӕр митӕ бакӕнын Хуыцауы цӕсты стыр тӕригъӕд цӕмӕн у, уый. Стӕй ӕркӕсдзыстӕм, исчи ахӕм фыдхъуыддаг кӕнӕ ӕндӕр уӕззау тӕригъӕд куы саразы, уӕд хистӕр нӕлгоймӕгтӕ куыд фӕархайынц ӕмӕ ныййарджытӕн сӕ бон куыд у сӕ сывӕллӕтты бахъахъхъӕнынb.

СТЫР ТӔРИГЪӔД

4, 5. Цӕмӕн ис зӕгъӕн, ӕмӕ, сывӕллонӕн тыхми ӕмӕ ӕвзӕр митӕ бакӕнай, уый йӕ ныхмӕ тӕригъӕд у?

⁴ Сывӕллӕттӕн тыхми ӕмӕ ӕвзӕр митӕ куы бакӕнынц, уӕд уый стыр зиан ӕрхӕссы сывӕллӕттӕн, стӕй сӕ бинонтӕн ӕмӕ ӕмбырды хотӕ ӕмӕ ӕфсымӕртӕн дӕр. Уый у стыр тӕригъӕд.

⁵ Тӕригъӕд сывӕллоны ныхмӕ. Искӕмӕн рыст ӕмӕ хъизӕмӕрттӕ бавзарын кӕнай, уый у тӕригъӕд. Ӕмӕ, иннӕ статьяйы куыд фендзыстӕм, афтӕмӕй, сывӕллонӕн тыхми ӕмӕ ӕвзӕр митӕ чи бакӕны, уыдон дӕр ахӕм тӕригъӕд аразынц. Уый уымӕ ӕркӕны, ӕмӕ сывӕллӕттӕ сӕхи ӕдас нал фӕхатынц ӕмӕ сын ахӕм митӕ чи бакӕны, уыдоныл нал феууӕндынц. Сывӕллӕтты ахӕм фыдхъуыддагӕй хъӕуы хъахъхъӕнын ӕмӕ, ахӕм хабар кӕуыл ӕрцыд, уыдонӕн хъӕуы удӕнцой дӕттын ӕмӕ сын ӕххуыс кӕнын (1 Фес. 5:14).

6, 7. Цӕмӕн ис зӕгъӕн, ӕмӕ сывӕллонӕн тыхми ӕмӕ ӕвзӕр митӕ бакӕнай, уый тӕригъӕд у ӕмбырды ныхмӕ, стӕй хицауады раз дӕр?

⁶ Тӕригъӕд ӕмбырды ныхмӕ. Сывӕллӕттӕн тыхми ӕмӕ ӕвзӕр митӕ чи бакӕны, ахӕм адӕймаг ӕмбырды ном ӕгад кӕны (Матф. 5:16; 1 Пет. 2:12). Милуангай иузӕрдион чырыстӕттӕ Йегъовӕйӕн кад хӕссыныл архайынц, ӕмӕ уӕдӕ ахӕм адӕймаджы миты тыххӕй сӕ ном цӕмӕн хъуамӕ фӕчъизи уа?! (Иуд. 3). Йӕ фыдхъуыддӕгтыл чи нӕ фӕсмон кӕны ӕмӕ ӕмбырды ном чи худинаг кӕны, ахӕм адӕймагӕн ӕмбырды бынат нӕй.

⁷ Тӕригъӕд хицауады раз. Чырыстӕттӕ хӕсджын сты, цӕмӕй «хицӕуттӕн коммӕгӕс уой» (Ром. 13:1). Ӕмӕ сӕ коммӕ кӕй кӕсӕм, уый ӕвдисӕм, нӕ бӕстӕйы закъӕттӕн кӕй аргъ кӕнӕм, уымӕй. Ӕмбырдӕй исчи бӕстӕйы закъон куы фехалы, уӕд афтӕмӕй хицауады раз тӕригъӕд саразы, ӕмӕ уый зӕгъӕн ис, сывӕллонӕн тыхми ӕмӕ ӕвзӕр митӕ чи бакӕны, уыдонӕй дӕр. (Абар Хъуыддӕгтӕ 25:8.) Хистӕр нӕлгоймӕгтӕн ахӕм бартӕ нӕй, ӕмӕ бӕстӕйы закъӕттӕм гӕсгӕ адӕмӕн тӕрхон кӕной. Фӕлӕ уӕддӕр, ӕмбырдӕй исчи сывӕллонӕн тыхми кӕнӕ ӕвзӕр митӕ куы бакӕны, уӕд уымӕ ӕнцад нӕ фӕкӕсынц ӕмӕ ууыл нӕ фӕархайынц, цӕмӕй сӕ хицауады ӕфхӕрдӕй бахизой (Ром. 13:4). Галатӕгтӕм 6:7 стихы куыд фыст ис, афтӕмӕй, «адӕймаг цы байтауа, уый ӕркӕрддзӕн».

8. Искӕй ныхмӕ тӕригъӕд саразай, уымӕ Йегъовӕ цы цӕстӕй кӕсы?

⁸ Тӕригъӕд Хуыцауы раз (Пс. 51:4). Адӕймаг искӕй ныхмӕ тӕригъӕд куы саразы, уӕд афтӕмӕй тӕригъӕд саразы Йегъовӕйы раз дӕр. Ӕркӕсӕм, Хуыцау израилӕгтӕн цы Закъон радта, уымӕй иу цӕмӕдӕр. Адӕймаг-иу искӕмӕй исты куы адавта кӕнӕ-иу ыл сайдӕй куы рацыд, уӕд-иу Закъонмӕ гӕсгӕ уый афтӕ нымад уыд, ӕмӕ «Йегъовӕйы раз сарӕзта тӕригъӕд» (Лев. 6:2–4). Ӕмбырдӕй исчи сывӕллонӕн тыхми кӕнӕ ӕвзӕр митӕ куы бакӕны, уӕд ыл сывӕллон нал феууӕнды ӕмӕ йӕхи ӕдас нал фӕхаты. Зӕгъӕн ис, ахӕм адӕймаг сывӕллонӕй цыдӕр давы кӕнӕ йыл сайдӕй цӕуы ӕмӕ афтӕмӕй Хуыцауы раз тӕригъӕд аразы. Ахӕм адӕймаг Йегъовӕйы ном худинаг кӕны. Уымӕ гӕсгӕ чырыстӕттӕ хъуамӕ ӕмбарой, сывӕллонӕн тыхми ӕмӕ ӕвзӕр митӕ бакӕнай, уый Хуыцауы цӕсты уӕззау тӕригъӕд кӕй у ӕмӕ йӕм сӕхӕдӕг дӕр хъуамӕ ахӕм цӕстӕй кӕсой.

9. Йегъовӕйы организаци бирӕ азты дӕргъы цавӕр ӕрмӕг уадзы ӕмӕ цавӕр разамынд дӕтты? Афтӕ цӕмӕн фӕархайы?

⁹ Сывӕллӕттӕн тыхми ӕмӕ ӕвзӕр митӕ куы бакӕнынц, уыцы хабары фӕдыл нӕм ис бирӕ ӕрмӕг, ӕмӕ Йегъовӕйы организаци ахӕм ӕрмӕг бирӕ азты дӕргъы уадзы. Зӕгъӕм, «Хъахъхъӕнӕн мӕсыджы» ӕмӕ «Райхъал ут!»-ы статьятӕй кӕцыдӕрты дзырд цӕуы, ахӕм хабар кӕуыл ӕрцыд, уыдонӕн цы баххуыс кӕндзӕн, цӕмӕй сӕ зӕрдӕйы хъӕдгом байгас уа, стӕй иннӕтӕн сӕ бон куыд у ахӕм адӕймӕгтӕн баххуыс кӕнын ӕмӕ сын удӕнцой раттын. Ис ма дзы уынаффӕтӕ ныййарджытӕн, сӕ сывӕллӕтты бахъахъхъӕнын сӕ бон куыд у, уый фӕдыл. Хистӕр нӕлгоймӕгтӕн та Библимӕ гӕсгӕ бӕлвырд разамынд фӕдӕттынц, исчи ахӕм тӕригъӕд куы сараза, уӕд куыд хъӕуы архайын, уый фӕдыл. Разамонӕг совет арӕх ӕркӕсы, хистӕр нӕлгоймӕгтӕн уыцы фарстайы фӕдыл цы разамынд ис, уымӕ ӕмӕ, куы бахъӕуы, уӕд дзы цыдӕртӕ фӕивы. Афтӕ уымӕн фӕархайы, цӕмӕй-иу хистӕр нӕлгоймӕгтӕ ахӕм хъуыддӕгтӕ ӕвзаргӕйӕ уарзондзинад ӕвдисой ӕмӕ рӕстӕй архайой ӕмӕ афтӕмӕй Чырыстийы закъон ӕххӕст кӕной.

ИСЧИ УӔЗЗАУ ТӔРИГЪӔД КУЫ САРАЗЫ, УӔД ХИСТӔР НӔЛГОЙМӔГТӔ КУЫД ФӔАРХАЙЫНЦ

10–12. а) Исчи уӕззау тӕригъӕд куы саразы, уӕд хистӕр нӕлгоймӕгтӕ уыцы хъуыддаг ӕвзаргӕйӕ сӕ зӕрдыл цы фӕдарынц ӕмӕ сӕ нысан цы вӕййы? б) Иаковы 5:14, 15 стихтӕм гӕсгӕ, хистӕр нӕлгоймӕгтӕ цӕуыл фӕархайынц?

¹⁰ Исчи уӕззау тӕригъӕд куы саразы, уӕд хистӕр нӕлгоймӕгтӕ ахӕм хъуыддаг ӕвзаргӕйӕ сӕ зӕрдыл фӕдарынц, Чырыстийы закъон цы домы, уый, ома цӕмӕй Хуыцауы дзуг уарзой ӕмӕ, Йегъовӕйы цӕсты раст ӕмӕ ӕнӕхӕрам цы у, уый аразой. Ӕмӕ сӕ уымӕ гӕсгӕ фӕхъӕуы се ’ргом цалдӕр хъуыддагмӕ раздахын. Хистӕр нӕлгоймӕгтӕн сӕ сӕйраг нысан у, цӕмӕй Хуыцауы кадджын кӕной ӕмӕ йын йӕ ном сыгъдӕг кӕной (Лев. 22:31, 32; Матф. 6:9). Стӕй ма фӕтыхсынц се ’мбырды хотӕ ӕмӕ ӕфсымӕрты уырнындзинадыл дӕр ӕмӕ, адӕймаг тӕригъӕд кӕй ныхмӕ сарӕзта, уыдонӕн баххуыс кӕныныл фӕархайынц.

¹¹ Стӕй ма хистӕр нӕлгоймӕгтӕ фӕархайынц, цӕмӕй-иу сбӕрӕг кӕной, уӕззау тӕригъӕд чи сарӕзта, уый фӕсмон кӕны ӕви нӕ. Ӕмӕ, кӕй фӕсмон кӕны, уый бӕрӕг куы вӕййы, уӕд ын баххуыс кӕнынц, цӕмӕй та фӕстӕмӕ Йегъовӕйы хӕлар суа. (Бакӕс Иаковы 5:14, 15.) Адӕймаг йе ’взӕр фӕндтыл куы ацӕуы ӕмӕ уӕззау тӕригъӕд куы саразы, уӕд уый ууыл дзурӕг вӕййы, ӕмӕ Йегъовӕйӕ адардc. Ахӕм чырыстоны абарӕн ис рынчын адӕймагимӕ, хистӕр нӕлгоймӕгты та – дохтыртимӕ. Уыдон фӕархайынц, цӕмӕй «рынчын [кӕнӕ, тӕригъӕд чи сарӕзта, уый] сдзӕбӕх уа». Сӕ бон у Библийы фӕрцы уыцы адӕймагӕн баххуыс кӕнын, цӕмӕй та раздӕрау Хуыцауимӕ ӕнгом уа, ӕрмӕст кӕд зӕрдӕйӕ фӕсмон кӕны, уӕд (Хъуыд. 3:19; 2 Кор. 2:5–10).

¹² Уӕдӕ бӕрӕг у, хистӕр нӕлгоймӕгтыл стыр хӕс кӕй ис. Уыдон зӕрдиагӕй тыхсынц, Хуыцау сын сӕ бар кӕй бакодта, уыцы «дзугыл» (1 Пет. 5:1–3). Фӕнды сӕ, цӕмӕй сӕ хотӕ ӕмӕ се ’фсымӕртӕ зоной, ӕмбырд ӕдас бынат кӕй у. Ӕмӕ уымӕ гӕсгӕ, чидӕр уӕззау тӕригъӕд кӕй сарӕзта, уый тыххӕй сын исчи куы фӕзӕгъы, уӕд хъуыддаг уайтагъд ӕвзарын райдайынц. Ӕмӕ афтӕ фӕархайынц, сывӕллӕттӕн чидӕр тыхми кӕнӕ ӕвзӕр митӕ кӕй бакодта, уый тыххӕй куы фехъусынц, уӕд дӕр. Аныхас кӕнӕм ацы хабаримӕ баст ӕртӕ ахсджиаг фарстайыл.

13, 14. Хистӕр нӕлгоймӕгтӕ куы фехъусой, чидӕр сывӕллонӕн тыхми кӕнӕ ӕвзӕр митӕ кӕй бакодта, уӕд цымӕ уый тыххӕй хъуамӕ пъӕлицӕмӕ фӕхабар кӕной, кӕд бӕстӕйы закъон уый домы, уӕд? Бамбарын ӕй кӕн.

¹³ Хистӕр нӕлгоймӕгтӕ куы фехъусынц, чидӕр сывӕллонӕн тыхми кӕнӕ ӕвзӕр митӕ кӕй бакодта, уӕд уый тыххӕй пъӕлицӕмӕ фӕхабар кӕнынц, кӕд бӕстӕйы закъон уый домы, уӕд? О. Кӕцыдӕр бӕстӕты закъонмӕ гӕсгӕ, адӕймаг куы фехъуса, чидӕр сывӕллонӕн тыхми кӕнӕ ӕвзӕр митӕ кӕй бакодта, уӕд уый тыххӕй хъуамӕ пъӕлицӕмӕ фӕхабар кӕна. Ӕмӕ хистӕр нӕлгоймӕгтӕ дӕр ахӕм закъӕттӕм хъусынц (Ром. 13:1). Ахӕм закъӕттӕ Хуыцауы закъоны ныхмӕ не сты (Хъуыд. 5:28, 29). Уымӕ гӕсгӕ, хистӕр нӕлгоймӕгтӕ, чидӕр ахӕм ми бакодта, уый тыххӕй куы фехъусынц, уӕд уайтагъд филиалӕй разамынд бацагурынц, закъонмӕ гӕсгӕ сӕ куыд бакӕнын хъӕуы, уый фӕдыл.

¹⁴ Хистӕр нӕлгоймӕгтӕ, ахӕм хабар кӕуыл ӕрцыд, уыимӕ, стӕй йӕ ныййарджытимӕ ӕмӕ, уый тыххӕй чи базыдта, уыдонимӕ куы фӕныхас кӕнынц, уӕд сын фӕзӕгъынц, сӕ бон кӕй у пъӕлицӕмӕ фӕхабар кӕнын. Фӕлӕ, зӕгъӕм, ахӕм фыдхъуыддаджы аххосджын кӕнынц ӕмбырдӕй кӕйдӕр, ӕмӕ уый тыххӕй бирӕтӕ базыдтой. Цымӕ уый тыххӕй исчи пъӕлицӕмӕ куы фӕхабар кӕна, уӕд Хуыцауы ном фӕхудинаг кӕндзӕн? Кӕй зӕгъын ӕй хъӕуы, нӕ. Хуыцауы ном худинаг кӕны, ахӕм фыдхъуыддаг чи сарӕзта, уый.

15, 16. а) 1 Тимофеймӕ 5:19 стихмӕ гӕсгӕ, хистӕр нӕлгоймӕгты барадон комитет скӕныны размӕ цы хъӕуы саразын ӕмӕ цӕмӕн? б) Ӕмбырдӕй искӕй куы аххосджын кӕной, зӕгъгӕ, сывӕллонӕн тыхми кӕнӕ ӕвзӕр митӕ бакодта, уӕд хистӕр нӕлгоймӕгтӕ куыд архайдзысты?

¹⁵ Хистӕр нӕлгоймӕгты барадон комитет скӕныны размӕ ӕппынкъаддӕр дыууӕ ӕвдисӕны ныхасмӕ гӕсгӕ цӕмӕн хъӕуы хабар сбӕрӕг кӕнын? Уымӕн ӕмӕ Библимӕ гӕсгӕ афтӕ раст у. Кӕй аххосджын кӕнынц, уый куы зӕгъа, ахӕм хъуыддаг нӕ бакодтон, зӕгъгӕ, уӕд хистӕр нӕлгоймӕгты барадон комитет скӕныны размӕ хъӕуы хабар дыууӕ ӕвдисӕны ныхасмӕ гӕсгӕ сбӕрӕг кӕнын (Дык. з. 19:15; Матф. 18:16; бакӕс 1 Тимофеймӕ 5:19). Цымӕ уый ууыл дзурӕг у, ӕмӕ ахӕм хъуыддаджы тыххӕй пъӕлицӕмӕ фӕхабар кӕнынӕн дӕр дыууӕ ӕвдисӕны хъӕуы? Нӕ. Дзырд бӕстӕйы закъон фехалыныл куы цӕуа, уӕд уый фыдракӕнд у, ӕмӕ, хистӕр нӕлгоймӕгтӕ кӕнӕ иннӕтӕ пъӕлицӕмӕ фӕхабар кӕнынмӕ куы хъавой, уӕд сӕ уый тыххӕй ӕвдисӕнтӕ нӕ хъӕуы.

¹⁶ Ӕмбырдӕй искӕй куы аххосджын кӕной, зӕгъгӕ, сывӕллонӕн тыхми кӕнӕ ӕвзӕр митӕ бакодта, уӕд хистӕр нӕлгоймӕгтӕ пъӕлицӕмӕ фӕхабар кӕндзысты, кӕд закъон уый домы, уӕд. Ӕмӕ стӕй сӕхӕдӕг бацархайдзысты хабар сбӕрӕг кӕныныл, цӕмӕй Библимӕ гӕсгӕ аскъуыддзаг кӕной, барадон комитет сӕ скӕнын хъӕуы ӕви нӕ. Кӕд адӕймаг афтӕ дзура, ахӕм хъуыддаг нӕ бакодтон, зӕгъгӕ, уӕд хистӕр нӕлгоймӕгтӕ аныхас кӕндзысты дыууӕ ӕвдисӕнимӕ. Ӕмӕ кӕд уыцы ӕвдисӕнтӕ – адӕймаджы чи аххосджын кӕна, уый ӕмӕ ма ноджыдӕр иу адӕймаг – сбӕлвырд кӕной, ахӕм хъуыддаг кӕй бакодта кӕнӕ та ӕндӕр сывӕллонӕн ахӕм ми кӕй бакодта, уӕд уый фаг у, цӕмӕй хистӕр нӕлгоймӕгтӕ барадон комитет скӕнойd. Кӕд уыцы хабарӕн ӕрмӕстдӕр иу ӕвдисӕн уа, уӕддӕр уый ууыл дзурӕг нӕу, ӕмӕ йӕ ныхӕстӕ раст не сты. Хистӕр нӕлгоймӕгтӕ ӕмбарынц, уӕддӕр уый гӕнӕн кӕй ис, ӕмӕ адӕймаг ӕцӕгдӕр уӕззау тӕригъӕд сарӕзта ӕмӕ иннӕтӕн зиан ӕрхаста. Хистӕр нӕлгоймӕгтӕ цӕттӕ сты, уыцы фыдхъуыддаг зиан кӕмӕндӕриддӕр ӕрхаста, уыдонӕн ӕххуыс кӕнынмӕ. Стӕй сӕ хъус дардзысты, ахӕм фыдхъуыддаджы кӕй аххосджын кӕнынц, уымӕ, цӕмӕй ӕмбырд бахъахъхъӕной (Хъуыд. 20:28).

17, 18. Барадон комитетӕн йӕ хӕс цы вӕййы?

¹⁷ Барадон комитетӕн йӕ хӕс цы вӕййы? Барадон комитет уынаффӕ рахӕссы, тӕригъӕд чи сарӕзта, уый ӕмбырдӕй ацух кӕнын хъӕуы ӕви нӕ. Хистӕр нӕлгоймӕгтӕн уый бар нӕй, цӕмӕй скъуыддзаг кӕной, адӕймаджы йӕ фыдракӕнды тыххӕй закъонмӕ гӕсгӕ бафхӕрын хъӕуы ӕви нӕ. Уыдон ӕмбарынц, фыдракӕнд чи саразы, уыдонӕн тӕрхон кӕныны хӕс хицауады кусджытыл кӕй ис ӕмӕ уыдон кӕй скъуыддзаг кӕнынц, куыд сӕ бафхӕрын хъӕуы, уый (Ром. 13:2–4; Тит. 3:1).

¹⁸ Тӕригъӕд чи саразы, уыдонӕн барадон комитет фӕтӕрхон кӕны Хуыцауы закъӕттӕм гӕсгӕ. Барадон комитет фӕархайы, цӕмӕй-иу Библимӕ гӕсгӕ сбӕрӕг кӕна, сывӕллонӕн тыхми кӕнӕ ӕвзӕр митӕ чи бакодта, уыцы адӕймаг фӕсмон кӕны ӕви нӕ. Ахӕм адӕймаг йӕ тӕригъӕдыл куы не ’рфӕсмон кӕны, уӕд ӕй ӕмбырдӕй ацух кӕнынц ӕмӕ стӕй уый тыххӕй ӕмбырды фехъусын кӕнынц (1 Кор. 5:11–13). Куы ӕрфӕсмон кӕны, уӕд та йӕ нӕ ацух кӕнынц. Фӕлӕ йын хистӕр нӕлгоймӕгтӕ фӕзӕгъынц, уый гӕнӕн кӕй ис, ӕмӕ йын ӕмбырды хӕслӕвӕрдтӕ макуы уа ӕмӕ хистӕр нӕлгоймаг кӕнӕ кӕстӕриуӕггӕнӕг ӕфсымӕр макуы суа. Хистӕр нӕлгоймӕгтӕ сывӕллӕтты хорзыл кӕй тыхсынц, уымӕ гӕсгӕ, ӕмбырды сывӕллӕттӕ кӕмӕн ис, уыдоны, чи зоны, хибарӕй бафӕдзӕхсой, цӕмӕй-иу къӕрцхъус уой, уыцы адӕймаг сӕ сывӕллӕтты раз куы уа, уӕд. Фӕлӕ сын хистӕр нӕлгоймӕгтӕ, уыцы адӕймаг тыхми кӕнӕ ӕвзӕр митӕ кӕмӕн бакодта, уыдоны нӕмттӕ нӕ дзурдзысты.

НЫЙЙАРДЖЫТӔН СӔ БОН КУЫД У СӔ СЫВӔЛЛӔТТЫ БАХЪАХЪХЪӔНЫН?

19–22. Ныййарджытӕн сӕ бон куыд у сӕ сывӕллӕтты хъахъхъӕнын? (Кӕс нывмӕ ӕддаг цъарыл.)

¹⁹ Сывӕллӕтты хъахъхъӕныны хӕс сымахыл ис, ныййарджытӕe. Уӕ сывӕллӕттӕ сты Хуыцауы лӕвар (Пс. 127:3). Йегъовӕ сӕ сымах бар бакодта, ӕмӕ сӕ хъуамӕ хъахъхъӕнат, тӕссаг сын цӕмӕйдӕриддӕр у, уыдӕттӕй. Уӕ бон куыд у уӕ сывӕллӕтты бахъахъхъӕнын, сывӕллӕттӕн тыхми ӕмӕ ӕвзӕр митӕ чи бакӕны, уыдонӕй?

²⁰ Фыццаг: сывӕллӕттӕн тыхми ӕмӕ ӕвзӕр митӕ куы бакӕнынц, уыцы хабары тыххӕй фылдӕр базонут. Базонут, ахӕм митӕ цавӕр адӕм бакӕнынц ӕмӕ сывӕллӕттыл сайдӕй куыд рацӕуынц, уый тыххӕй. Ахъуыды кӕнут, уӕ сывӕллӕттӕн тӕссаг цавӕр уавӕрты уыдзӕн, ууыл (Ӕмб. 22:3; 24:3). Рох уӕ ма уӕд: арӕхдӕр сывӕллӕттӕн тыхми ӕмӕ ӕвзӕр митӕ бакӕнынц, сывӕллӕттӕ хорз кӕй фӕзонынц ӕмӕ кӕуыл феууӕндынц, уыдон.

²¹ Дыккаг: уӕ сывӕллӕттимӕ ӕргом ныхас кӕнут (Дык. з. 6:6, 7). Уый тыххӕй уӕ архайын хъӕуы, цӕмӕй-иу сӕм лӕмбынӕг байхъусат (Иак. 1:19). Уӕ зӕрдыл дарут уый, ӕмӕ арӕх сывӕллӕтты нӕ фӕфӕнды, чидӕр сын ахӕм ми кӕй бакодта, уый тыххӕй дзурын. Чи зоны, фӕтӕрсынц, куы ничи сыл баууӕнда, уымӕй. Кӕнӕ та сын ахӕм ми чи бакӕны, уыдон сӕм, чи зоны, бартхъирӕн кӕнынц, куы сӕ схъӕр кӕной, уӕд сын ӕвзӕрӕй исты кӕй сараздзысты. Кӕд уӕ сывӕллонмӕ уӕ зӕрдӕ истӕмӕй ӕхсайы, уӕд йемӕ фӕлмӕнӕй аныхас кӕнут, фарстатӕ йӕм раттут ӕмӕ йӕм фӕразонӕй байхъусут.

²² Ӕртыккаг: уӕ сывӕллӕтты ахуыр кӕнут. Нӕлгоймаг ӕмӕ сылгоймаджы ’хсӕн цы вӕййы, уый сын сӕ кармӕ гӕсгӕ ӕмбарын кӕнут. Амонут сын, исчи сӕм дзӕгъӕл ӕвнӕлдтытӕ куы кӕна, уӕд цы хъуамӕ зӕгъой ӕмӕ сӕхи куыд хъуамӕ дарой, уый. Сывӕллӕтты куыд ис бахъахъхъӕнӕн, уый фӕдыл нӕм цы ӕрмӕг ис, уымӕй пайда кӕнут. (Кӕс рамкӕ «Фылдӕр базонут ӕмӕ уӕ сывӕллӕтты ахуыр кӕнут».)

23. Сывӕллӕттӕн тыхми кӕнӕ ӕвзӕр митӕ кӕй бакӕнынц, уымӕ мах цы цӕстӕй кӕсӕм? Иннӕ статьяйӕ цы базондзыстӕм?

²³ Сывӕллӕттӕн тыхми ӕмӕ ӕвзӕр митӕ кӕй бакӕнынц, уый мах нымайӕм уӕззау тӕригъӕдыл ӕмӕ фыдракӕндыл. Чырыстийы закъон кӕй ӕххӕст кӕнӕм, уымӕ гӕсгӕ мах нӕ фӕархайӕм, ахӕм фыдхъуыддаг чи саразы, уыдоны ӕфхӕрдӕй бахизыныл. Фӕлӕ куыд ис баххуыс кӕнӕн, гыццылӕй ахӕм ми кӕмӕн бакодтой, уыцы хотӕ ӕмӕ ӕфсымӕртӕн? Уый базондзыстӕм иннӕ статьяйӕ.