Дохтырты ӕххуыс дӕ куы бахъӕуа, уӕд фидар фӕлӕудзынӕ?
Ацы гӕххӕтт афтӕ бафснай, цӕмӕй дӕ куы бахъӕуа, уӕд ӕй тагъд ссарай
1 Махӕй ничи фӕхъуыды кӕны, абон кӕнӕ райсом рынчындонмӕ кӕй бахаудзӕн, ууыл. Фӕлӕ, кӕд кӕуыл цы ӕрцӕудзӕн, уымӕн ничи ницы зоны (Еккл. 9:11). Кӕд дӕ дохтырты ӕххуыс нӕ фӕхъӕуы, уӕддӕр дӕ бон цы у саразын, цӕмӕй дын туг ма ауадзой, ӕнӕнхъӕлӕджы дыл исты куы ӕрцӕуа, ӕмӕ, дӕхи куы не ’мбарай, афтӕмӕй дӕ рынчындонмӕ куы аласой, уӕд? Ӕнӕнхъӕлӕджы дыл исты куы ӕрцӕуа йе та дӕ ӕвӕстиатӕй дохтырты ӕххуыс куы бахъӕуа, уӕд дӕ уырнындзинад фӕлвӕрд ӕрцӕудзӕн.
2 Рынчындонмӕ куы бахауай ӕмӕ дын дохтыртӕ куы дзурой, зӕгъгӕ, туг куы нӕ ауадзай, уӕд амӕлдзынӕ, уӕд цы сараздзынӕ, цӕмӕй Хуыцауы раз ӕнаиппӕй баззайай? Дӕ уавӕр тынг ӕвзӕр у, зӕгъгӕ, уыцы ныхӕстыл уайтагъд сразы уыдзынӕ? Фидарӕй дӕ уырны, туг уадзын дӕ кӕй нӕ фӕнды, уый? Цӕттӕ дӕ ахӕм фӕлварӕнмӕ ӕмӕ туг ауадзын нӕ бауадздзынӕ? (Хъуыд. 15:28, 29).
3 Цӕмӕй дын туг ма ауадзой, уый тыххӕй фыццаджыдӕр хъуамӕ дӕхи фидарӕй уырна, уыцы хъуыддаг Хуыцауы цӕсты раст кӕй нӕу ӕмӕ дын дӕ уырнындзинадӕн стыр зиан кӕй ӕрхӕсдзӕн. Уымӕ гӕсгӕ хъуамӕ хорз зонай, Библийы туджы тыххӕй цы фыст ис, уый. Афтӕ куы нӕ уа, уӕд дӕ тыхст уавӕры ӕнцонтӕй фӕтӕрсын кӕндзысты, афтӕ дын куы дзурой, зӕгъгӕ, мах хабар дӕуӕй хуыздӕр зонӕм, уӕд. Афтӕ дӕм нӕ фӕкӕсдзӕн, ӕмӕ дохтыртӕ туджы тыххӕй Хуыцауӕй фылдӕр зонынц? Кӕй зӕгъын ӕй хъӕуы, ахӕм уавӕрты дын адӕм цыфӕнды куы дзурой, уӕддӕр ды фидар лӕудзынӕ ӕмӕ «Йегъовӕйы цӕсты раст цы у, уый» араздзынӕ (Дык. з. 12:23–25). Фӕлӕ уыцы фӕлварӕны иунӕг уыдзынӕ? (Еккл. 4:9–12).
РЫНЧЫНДӔТТӔН ИНФОРМАЦИДӔТТӔГ ХАЙАД ӔМӔ РЫНЧЫНДӔТТИМӔ ӔМГУЫСТГӔНӔГ КОМИТЕТ
4 Туг уадзыныл чи нӕ разы кӕны, уыдонӕн баххуыс кӕныны тыххӕй нӕ организаци скодта Рынчындӕттӕн информацидӕттӕг хайад. Стыр горӕтты ма арӕзт ӕрцыд Рынчындӕттимӕ ӕмгуыстгӕнӕг комитет дӕр. Алы комитеты дӕр ис цалдӕр хистӕр нӕлгоймаджы ӕмӕ сӕ уыцы хъуыддагыл сахуыр кодтой.
5 Рынчындӕттӕн информацидӕттӕг хайадӕн уый фадат ис, цӕмӕй ӕгас дунейы дӕр цы медицинон журналтӕ цӕуы, уыдонӕй 3 600 журналӕй фылдӕр кӕсой, ӕмӕ информаци агурой, ӕнӕ тугӕй операцитӕ ӕмӕ хос кӕныны мадзӕлттӕй хуыздӕр кӕцытӕ сты, уый тыххӕй. Уый фӕстӕ ацы Хайад медицинӕйы ӕнтыстыты тыххӕй информаци фӕхӕццӕ кӕны Рынчындӕттимӕ ӕмгуыстгӕнӕг комитетмӕ ӕмӕ ма иуӕй-иу дохтыртӕм. (Хатт-иу рынчындоны дохтыртӕ куы нӕ разы кодтой ӕнӕ тугӕй хос кӕныныл, уӕд-иу сӕм Рынчындӕттӕн информацидӕттӕг хайад арвыста, ӕнӕ тугӕй хос кӕныны тыххӕй медицинон статьятӕ, ӕмӕ-иу уавӕр фӕхуыздӕр.) Ацы Хайад Комитеттӕн фехъусын кӕны, тӕрхондӕтты нӕ пайдайӕн цы уынаффӕтӕ рахастой, уыцы хабӕрттӕ. Уыцы уынаффӕтӕ иннӕ тӕрхонгӕнджытӕн баххуыс кӕндзысты, цӕмӕй-иу нын нӕ хъуыддӕгтӕ лӕмбынӕгдӕр ӕвзарой. Ацы Хайадмӕ ма ис, ӕнӕ тугӕй чи дзӕбӕх кӕны ӕмӕ махӕн ӕнӕзивӕгӕй чи ӕххуыс кӕны, уыцы дохтырты номхыгъд. Уымӕ гӕсгӕ туг уадзыныл чи нӕ фӕразы кӕны, уыдоны ӕххуыс куы фӕхъӕуы, уӕд Комитеттӕн сӕ бон вӕййы ногдӕр номхыгъдтӕй пайда кӕнын.
6 Рынчындӕттӕн информацидӕттӕг хайад йӕ хъус дары, Рынчындӕттимӕ ӕмгуыстгӕнӕг комитетты чи ис, уыдоны куыд цӕттӕ кӕнынц ӕмӕ куыд кусынц, уымӕ. Комитеттӕ кӕм ис, уыцы горӕтты рынчындӕтты кусджытӕм ӕфсымӕртӕ арӕх фӕхӕццӕ кӕнынц ног информаци, цӕмӕй Комитеттимӕ кӕрӕдзи хуыздӕр ӕмбарой. Уыдон ма фӕагурынц, ӕнӕ тугӕй нын чи хос кӕна, ахӕм дохтырты. Уыцы ӕфсымӕртӕ кӕддӕриддӕр цӕттӕ сты, цӕмӕй дын баххуыс кӕной. Фӕлӕ уый тыххӕй дӕхӕдӕг дӕр хъуамӕ ахсджиаг къахдзӕфтӕ скӕнай.
АХСДЖИАГ КЪАХДЗӔФТӔ СКОДТАЙ?
7 Фыццаджыдӕр уал базон, дӕ бинонтӕй йӕ туджы гӕххӕтт алчидӕр кӕронмӕ байдзаг кодта: бон дзы амынд ис, къухфыст дзы ис ӕмӕ ӕвдисӕнты нӕмттӕ фыст сты? Ӕфсымӕртӕй-иу исчи рынчындонмӕ куы ӕрбацыд ӕмӕ-иу йӕ гӕххӕттыл къухфыст куы нӕ уыди ӕмӕ\йе та йӕ кӕд байдзаг кодта, уый амынд куы нӕ уыд, уӕд-иу дохтыртӕ гӕххӕттыл фӕдызӕрдыг сты. Дӕ ӕнаргъуыд сывӕллӕттӕй алкӕмӕндӕр «Удостоверение личности» ис? Кӕд нӕ, уӕд ӕнӕнхъӕлӕджы исты куы ӕрцӕуа, уӕд рынчындоны кусджытӕ кӕцӕй базондзысты, телефонӕй кӕмӕ хъӕуы дзурын ӕмӕ тугмӕ цы цӕстӕй кӕсут, уый?
8 Дӕ хъус дар, цӕмӕй дӕ сывӕллӕттӕ уыцы гӕххӕтт ӔДЗУХ семӕ хӕссой. Алы бон дӕр кӕдӕмфӕнды ма цӕуой, скъоламӕ, ӕддӕмӕ хъазынмӕ ӕви паркмӕ, уӕддӕр-иу сӕ бафӕрс, сӕ гӕххӕтт семӕ ис, ӕви нӕ. Махӕн дӕр хъуамӕ нӕ туджы гӕххӕтт ӕдзух уа немӕ: куысты уӕм, отпусчы кӕнӕ конгрессы. Макуы йӕ рох кӕн!
9 Зӕгъӕм, уӕззау уавӕры дӕ реанимацимӕ аластой, ницы ӕмбарыс ӕмӕ дӕ бон дзурын дӕр нӕу, афтӕмӕй. Дӕ туджы гӕххӕтт демӕ куы нӕ уа ӕмӕ дын дохтырты хъуыдымӕ гӕсгӕ туг бауадзын куы хъӕуа, фӕлӕ дӕ хиуӕттӕй ӕмӕ хистӕр нӕлгоймӕгтӕй дӕ фарсмӕ куы ничи уа, уӕд дын туг бауадздзысты. Иуӕй-иутимӕ хабар афтӕ рауад. Фӕлӕ нӕ гӕххӕтт немӕ куы уа, уӕд нӕ бӕсты дзурдзӕн ӕмӕ нӕ фӕндон бӕрӕг уыдзӕн.
10 Уымӕ гӕсгӕ туджы гӕххӕтт хуыздӕр у медицинон браслет кӕнӕ жетонӕй йе та брелоккӕй. Уыдӕттӕй иу дӕр не ’мбарын кӕны, Библимӕ гӕсгӕ туг цӕуылнӕ уадзӕм, уый. Стӕй сыл цы фыст ис, уый бӕлвырд кӕнынӕн дӕр сыл йӕ къух дӕр ничи ӕрӕвӕры. Канадӕйы иу тӕрхондоны иу хойы туджы гӕххӕтты тыххӕй загътой: «[Ацы пациенткӕ] хорз мадзал равзӕрста, цӕмӕй дохтыртӕн ӕмӕ иннӕтӕн бамбарын кӕна, туг цӕуылнӕ уадзы, исты йыл куы ӕрцӕуа ӕмӕ йӕ бон дзурын куы нӕ уа, уӕд». Уымӕ гӕсгӕ дӕ туджы гӕххӕтт ӕдзух хӕсс демӕ!
11 Нӕ медицинон гӕххӕтт сӕйраджыдӕр у, ӕнӕнхъӕлӕджы ныл исты куы ӕрцӕуа, уӕд цӕмӕй нӕ бӕсты дзура. Фӕлӕ рагацау куы зонай, операци кӕй кӕндзынӕ, уӕд хорз уаид, гӕххӕттыл бӕстон куы ныффыссис (туджы гӕххӕтмӕ гӕсгӕ), цавӕр операци кӕндзынӕ, дохтырты нӕмттӕ ӕмӕ кӕцы рынчындон у, уый. Уый бар дын кӕй ис, уымӕ гӕсгӕ дӕ бон у хос кӕныны мадзал дӕр равзарын. Кӕд дӕхимӕ ӕмӕ дохтырмӕ дӕр афтӕ кӕсы, ӕмӕ дӕ уавӕр нӕ фӕуӕззаудӕр уыдзӕн, уӕддӕр бамбарын кӕн, куы фӕтыхсай, уӕд цӕмӕй дӕ гӕххӕтмӕ гӕсгӕ архайой (Ӕмб. 22:3).
12 Иннӕ ахсджиаг хъуыддаг та у – операци дын чи кӕндзӕн кӕнӕ дӕ чи дзӕбӕх кӕндзӕн, уыцы дохтыртимӕ аныхас кӕнын. Фыццаг кӕимӕ хъуамӕ аныхас кӕнай?
ДОХТЫРТИМӔ АНЫХАС КӔНЫН
13 ХИРУРГТЫ КЪОРД. Ахӕм рӕстӕг адӕмӕй тӕрсын нӕ хъӕуы (Ӕмб. 29:25). Туг цыфӕндыйӕ дӕр кӕй нӕ бауадздзынӕ, уый бӕрӕг куы нӕ уа, уӕд сӕм афтӕ фӕкӕсдзӕн, ӕмӕ дын уӕлдай нӕу. Кӕд дӕ операци кӕнын ӕнӕмӕнг хъӕуы, уӕд дӕхӕдӕг кӕнӕ де ’ввахс хӕстӕджытӕй исчи хъуамӕ хирургмӕ фидарӕй ратта бӕлвырд фарстатӕ. Уыцы фарстатӕй иу у: хирургтӕ дын цыфӕндыйӕ дӕ хъуыдыйӕн аргъ кӕндзысты ӕмӕ дын туг нӕ бауадздзысты? Фидар дзуапп дын куы нӕ раттой, уӕд, гӕнӕн ис, сӕхи куыд фӕнды, афтӕ бакӕной.
14 Дӕ фӕндон бамбарын кӕн бӕлвырдӕй, фидарӕй ӕмӕ уӕзданӕй. Зӕгъ, кӕй дӕ фӕнды, цӕмӕй дын ӕнӕ тугӕй хос кӕной. Сабыр, фӕлӕ фидарӕй бамбарын кӕн, дзӕбӕх кӕныны мадзӕлттӕй кӕцытыл дӕ разы ӕмӕ байдзаг кӕн бланк, ӕнӕ тугӕй дын куы хос кӕной, уӕд дохтыртӕ дзуапп кӕй ницӕй тыххӕй дӕтдзысты. Кӕд хирург дӕ фӕндоныл нӕ разы кӕны, уӕд ӕвӕстиатӕй бацу отделенийы сӕргълӕууӕгмӕ кӕнӕ рынчындоны хицаумӕ, цӕмӕй дын ӕндӕр хирург операци кӕна. Уый сӕ хӕс у.
15 АНЕСТЕЗИОЛОГ. Операцийы размӕ хирургты къордӕй фыццаг ХЪУАМӔ АНЫХАС КӔНАЙ АНЕСТЕЗИОЛОГИМӔ. Йӕ хӕс у, цӕмӕй дын операцийы рӕстӕг дӕ цард хъахъхъӕна. Уымӕй кӕнгӕ у, туг уадзын дын хъӕудзӕн ӕви нӕ. Уымӕ гӕсгӕ фаг нӕу ӕрмӕст хирургимӕ аныхас кӕнын. Анестезиологимӕ аныхас кӕн ӕмӕ йын дӕ фӕндон бӕлвырд бамбарын кӕн, цӕмӕй зонай, ӕнӕ тугӕй хос кӕныныл разы у ӕви нӕ. (Абар Лукайы 18:3–5.)
16 Арӕхдӕр анестезиолог рынчынмӕ бацӕуы операцийы размӕ бон, фӕлӕ уый ӕгӕр рӕгмӕ у, цӕмӕй йын дӕ фӕндоны тыххӕй зӕгъай. Хирургӕн фидарӕй зӕгъ, цӕмӕй дын анестезиолог уа, ӕнӕ тугӕй хос кӕныныл чи разы кӕны, ахӕм, ӕмӕ йемӕ рагацау аныхас кӕн. Анестезиолог дӕ фӕндоныл куы нӕ сразы уа, уӕд дын рӕстӕг уыдзӕн ӕндӕры бацагурынӕн. Дӕуӕн бар ис, цӕмӕй анестезиолог дӕхӕдӕг равзарай.
17 Дохтыртӕ хъуамӕ зоной дӕ фидар фӕнд: ТУГ НӔ УАДЗЫС. Зӕгъ, цӕмӕй дын ӕнӕ тугӕй хос кӕной. Дӕ уавӕры хуыздӕр чи уыдзӕн, уыцы мадзӕлтты кӕнӕ хосты тыххӕй зӕгъ. Хирургты къорды хъуыдымӕ гӕсгӕ дӕ уавӕры уыцы мадзӕлттӕй пайда кӕнӕн куы нӕ уа, уӕд сын зӕгъ, цӕмӕй медицинон литературӕйы бацагурой ӕнӕ тугӕй хос кӕнынӕн ӕндӕр мадзӕлттӕ. Зӕгъ сын, кӕд сӕ фӕнды, уӕд сын ахӕм информаци кӕй ӕрбахӕсдзынӕ. Стӕй хистӕр нӕлгоймӕгтӕн фехъусын кӕн, цӕмӕй Рынчындӕттимӕ ӕмгуыстгӕнӕг комитетмӕ фӕдзурой.
ДӔ БАРТӔЙ ПАЙДА КӔН
18 Рынчындоны схуыссыны размӕ лӕмбынӕг бакӕс бланктӕ «Освобождение от ответственности» ӕмӕ «Заявление о согласии», уымӕн ӕмӕ сыл хъӕудзӕн къух ӕрфыссын. Рынчыны фӕндонӕн кӕй аргъ кӕндзысты, уый кӕм фыст ис, уый бынмӕ абзацы, иуӕй-иу хатт, фыст вӕййы: гӕххӕттыл йӕ къух чи ӕрӕвӕрдта, уыцы рынчын разы кӕй у, цӕмӕй, куы февзӕрдӕр уа, уӕд ӕй ӕвӕстиатӕй дзӕбӕх кӕной. Уымӕ, гӕнӕн ис, хауа туг уадзын дӕр. Дӕуӕн бар ис, цӕмӕй уыцы хъуыдыйад аивай кӕнӕ йӕ ахахх кӕнай, цӕмӕй дын туг ма бауадзой. Чи зоны дын исчи зӕгъа, афтӕ кӕныны бар кӕй нӕй, фӕлӕ дӕуӕн уый бар ис! Бамбарын сын кӕн, уый кӕй у рынчындонимӕ бадзырд, ӕмӕ дӕ къух не ’рфысдзынӕ, разы кӕимӕ нӕ дӕ, уыцы гӕххӕттыл. Дӕ къух дын тыххӕй куы ӕвӕрын кӕной, уӕд сӕйраг дохтыры бацагур.
19 Афтӕ бакӕнӕн ис? Ӕнӕмӕнг. Алы рынчынӕн дӕр ис бартӕ ӕмӕ уыцы бартӕ рынчындоны къӕсӕрыл нӕ фӕвӕййынц. Цӕмӕй дӕ дзӕбӕх кӕной, ӕрмӕст уый тыххӕй дӕ бартыл дӕ къух хъуамӕ ма сисай. Иннӕтӕ цыфӕнды ма дзурой, макӕмӕ хъус.
20 Уыцы бартӕй иу у: рынчын йӕхӕдӕг ӕвзары, куыд ӕй дзӕбӕх кӕндзысты, уый, ома разы цӕуыл нӕ дӕ, уый дын нӕ сараздзысты. Куы дӕ бафӕнда, уӕд дӕ бон у кӕцыфӕнды мадзалӕй дӕр «нӕ» зӕгъын. Цалынмӕ хос кӕныныл не сразы уай, уӕдмӕ дын хъуамӕ бӕстон бамбарын кӕной, хирургты къорд цы кусдзӕн ӕмӕ дын тӕссаг цӕмӕй у. Хъуамӕ дын радзурой, цавӕр хос кӕныны мадзӕлттӕ ма ис, уыдон. Уый фӕстӕ дӕ бон у равзарын, куыд дӕ дзӕбӕх кӕндзысты, уый.
21 Цӕуыл разы кӕныс, уый цӕмӕй хорз ӕмбарай, уый тыххӕй ХЪУАМӔ фӕрсай, цы нӕ бамбӕрстай, уыдӕттӕй, уӕлдайдӕр та, даргъ ныхӕстӕ кӕнӕ медицинон терминтӕй куы пайда кӕной, уӕд. Дзырдӕн, дохтыр куы зӕгъа, плазмӕйӕ кӕй спайда кӕндзӕн, уӕд ды, чи зоны, ахъуыды кӕнай, уый туг сбирӕ кӕнынӕн хос кӕй у, фӕлӕ уый афтӕ нӕу. Цалынмӕ не сразы уай, уӕдмӕ дохтыры бафӕрс: «Мыййаг, уый туджы хай у?» Алы процедурӕйӕ дӕр бафӕрс: «Уыцы хосы туджы хӕйттӕ ис?» Дохтыр цавӕрдӕр приборӕй спайда кӕнынмӕ куы хъава, уӕд ӕй бафӕрс: «Афтӕмӕй мӕ туг кӕмдӕр хицӕнӕй ӕвӕрд нӕ уыдзӕн?»
22 Цы кӕнын дӕ хъӕуы, уӕлдӕр цӕй кой кодтам, уыдӕттӕ куы бакӕнай, фӕлӕ уӕддӕр дохтыртӕ дӕ фӕндоныл куы нӕ разы кӕной, уӕд? Ма ӕфсӕрмы кӕн – ӕххуыс агур. Иуӕй-иутӕ уайтагъд нӕ архайдтой, ӕмӕ сӕ цард тӕссаг уавӕры баппӕрстой.
ТЫХСТ РӔСТӔГ СТЫР ӔХХУЫС
23 Ӕркӕсӕм, ӕххуыс бацагурӕн куыд ис, уымӕ. Зӕгъӕм: 1) дӕхи кӕнӕ дӕ хӕстӕгӕн кӕндзысты операци ӕмӕ дохтыртӕ дзурынц, туг уадзын ӕнӕмӕнг кӕй хъӕуы; 2) де ’нӕниздзинад кӕнӕ дӕ хионы ӕнӕниздзинад ӕвзӕрдӕр куы кӕна; 3) сывӕллоны (кӕнӕ стыр адӕймаджы) тыххӕй дохтыртӕ, медицинон хо кӕнӕ администраци куы зӕгъа, тӕрхондоны уылты кӕй архайдзысты, цӕмӕй туг бауадзой, уӕд:
24 ДЕ ’МБЫРДЫ ХИСТӔР НӔЛГОЙМӔГТӔМ ФӔДЗУР, кӕд сӕм нӕма бадзырдтай, уӕд. (Туг кӕй нӕ уадзӕм, уымӕ гӕсгӕ рынчындоны схуыссыны размӕ, раст уыдзӕн, хистӕр нӕлгоймӕгтимӕ рагацау куы аныхас кӕнис.) Куы хъӕуа, уӕд ХИСТӔР НӔЛГОЙМӔГТӔ ФӔДЗУРДЗЫСТЫ РЫНЧЫНДӔТТИМӔ ӔМГУЫСТГӔНӔГ КОМИТЕТМӔ. Куы дӕ фӕнда ӕмӕ гӕнӕн куы уа, кӕд уыцы горӕттӕй искӕцыйы дӕ, уӕд Рынчындӕттимӕ ӕмгуыстгӕнӕг комитетӕй ӕфсымӕр ӕрцӕудзӕн, цӕмӕй дын афойнадыл баххуыс кӕна (Ис. 32:1, 2).
25 Рынчындӕттимӕ ӕмгуыстгӕнӕг комитеты чи ис, уыцы хистӕр нӕлгоймӕгтӕ зонынц, кӕм цӕрыс, уым ӕнӕ тугӕй чи хос кӕны, уыцы дохтырты. Уыдон дын ссардзысты ӕндӕр дохтырты кӕнӕ рынчындон ӕмӕ сӕм дӕ бон уыдзӕн бацӕуын. Фӕлӕ кӕд уый гӕнӕн дӕр нӕ уа, уӕд хистӕр нӕлгоймӕгтӕ ӕххуыс бацагурдзысты хӕстӕгдӕр горӕты Рынчындӕттимӕ ӕмгуыстгӕнӕг комитетӕй. Кӕд уый гӕнӕн дӕр нӕ уа, уӕд фӕдзурдзысты Солнечныймӕ Рынчындӕттӕн информацидӕттӕг хайадмӕ. Чи зоны, уыдонӕн рауайа баныхас кӕнын, ӕнӕ тугӕй чи хос кӕны, ахӕм дохтыримӕ, цӕмӕй уый фӕдзура, чи дӕ дзӕбӕх кӕны, уыцы дохтыртӕм ӕмӕ сын зӕгъа, цавӕр мадзӕлттӕ ис ӕнӕ тугӕй хос кӕнынӕн. Рынчындӕттимӕ ӕмгуыстгӕнӕг комитеты ӕфсымӕртӕ ахуыр рацыдысты, ӕмӕ зонынц, ахӕм уавӕры цы саразӕн ис, уый.
26 Рынчындӕттимӕ ӕмгуыстгӕнӕг комитеты ӕфсымӕртӕ баххуыс кӕндзысты дӕхицӕн кӕнӕ дӕ хӕстӕгӕн дӕ дохтыримӕ аныхас кӕнын, фӕлӕ сӕ ӕххуыс дӕхӕдӕг хъуамӕ бацагурай. Уыцы ӕфсымӕртӕ уынаффӕ дӕ бӕсты нӕ рахӕсдзысты, фӕлӕ дын дӕ хъус ӕрдардзысты, уыцы уавӕрмӕ чи хауы, Библийӕ ахӕм уагӕвӕрдтӕм. Бамбарын дын кӕндзысты, дӕ бон кӕй у хос кӕныны мадзӕлттӕ ӕвзарын ӕмӕ дын закъонмӕ гӕсгӕ цы бартӕ ис, уый.
27 Фӕлӕ кӕд рынчындоны кусджытӕ уӕддӕр нӕ разы кӕнынц ӕнӕ тугӕй хос кӕныныл, уӕд Комитеты хистӕр нӕлгоймӕгтӕн зӕгъ, ӕмӕ дын уыдон ӕндӕр рынчындон бацагурдзысты. Рынчындонӕй ӔРМӔСТДӔР уӕд рацу, кӕд ӕндӕр ран ӕндӕр хирургимӕ бӕлвырд баныхас кодтай ӕмӕ дӕ бон у уырдӕм ацӕуын.
28 Дӕ бон у афтӕ бакӕнын? О, уый бар дын ис. Ахӕм фидар фӕнд дӕм кӕй ис, уый, гӕнӕн ис, искӕцы хирургы зӕрдӕ ӕрфӕлмӕн кӕна, ӕмӕ сразы уа, цӕмӕй дын ӕнӕ тугӕй операци скӕна. Сӕйрагдӕр та, куыд ӕмбӕлы, афтӕ дӕ дзӕбӕх кӕнын дӕр райдайдзысты, цалынмӕ де ’нӕниздзинад нӕ фӕуӕззаудӕр, уӕдмӕ. Рӕстӕг ма иваз!
КУЫ ДӔ КЪАХОЙ, УӔД КЪӔРЦХЪУС У
29 Хъуамӕ зонай, ис ахӕм фарстатӕ, ӕмӕ сӕ дохтыртӕ ӕмӕ ӕндӕр адӕймӕгтӕ сӕ хорз зӕрдӕйӕ нӕ фӕдӕттынц. Дохтыртӕ (кӕнӕ иуӕй-иу тӕрхонгӕнджытӕ) арӕх бафӕрсынц: «Цӕйнӕфӕлтау дын туг бауадзой, фӕлтау мӕлыныл разы дӕ (кӕнӕ цӕмӕй дӕ сывӕллон амӕла)?»
30 «О» куы зӕгъай, уӕд Библимӕ гӕсгӕ раст уыдзынӕ. Фӕлӕ ахӕм дзуапп арӕх раст нӕ бамбарынц, ӕмӕ уый тыххӕй тӕрхондоны раст уынаффӕ дӕр нӕ рахӕссынц. Хъуамӕ ӕмбарай, уацамынды кӕй нӕ дӕ. Ныртӕккӕ ды дзурыс, дохтырты ӕххуыс дӕ ӕнӕмӕнг кӕй хъӕуы, ууыл. Уымӕ гӕсгӕ дохтыртӕ кӕнӕ тӕрхонгӕнджытимӕ ӕндӕрхуызон ныхас кӕнын хъӕуы (Пс. 39:1; Кол. 4:5, 6).
31 Ахӕм фарстайӕн «о» куы зӕгъай, уӕд дохтыр кӕнӕ тӕрхонгӕнӕн афтӕ ахъуыды кӕндзӕн, ӕмӕ дын дӕ цард (кӕнӕ дӕ сывӕллоны цард) зынаргъ нӕу. Райгасдзинадыл фидарӕй кӕй ӕууӕндыс, уый тыххӕй дзурын дӕр ницы пайда у ахӕм уавӕры. Уӕд ахъуыды кӕндзысты фанатик кӕй дӕ, ӕмӕ дӕ цардӕн тӕссаг уавӕры раст уынаффӕ рахӕссын дӕ бон кӕй нӕу. Дзырд сывӕллоныл куы цӕуа, уӕд дохтыр кӕнӕ тӕрхонгӕнӕг ахъуыды кӕндзӕн, ӕнӕмӕт ныййарӕг кӕй дӕ, туг уадзын уый тыххӕй кӕй нӕ уадзыс.
32 Фӕлӕ ды дохтырты ӕххуысӕй «НӔ» нӕ зӕгъыс. Ды дохтыримӕ нӕ разы кӕныс, КУЫД дӕ дзӕбӕх кӕндзӕн, уыцы хъуыддаджы. Афтӕмӕй хъуыддагмӕ ӕндӕр цӕстӕй кӕсын райдайдзысты. Уымӕй уӕлдай ма адӕймаджы фӕсайынц, зӕгъгӕ, туг уадзын тӕссаг ницӕмӕй у ӕмӕ ӔРМӔСТДӔР уый фӕрцы аирвӕздзынӕ. (Кӕс брошюрӕ «Как кровь может спасти твою жизнь?», 7–12, 13–16, 17–22 фф.) Уымӕ гӕсгӕ дӕ ацы хъуыддаг бамбарын кӕнын хъӕуы. Куыд? Дӕ бон у ахӕм дзуапп раттын:
• «Мӕн мӕлын нӕ фӕнды (цӕмӕй мӕ сывӕллон амӕла). Мӕн мӕлын куы фӕндыдаид (цӕмӕй мӕ сывӕллон амардаид), уӕд рынчындонмӕ не ’рбацыдаин. Ӕз ӕрбацыдтӕн, цӕмӕй мӕ сдзӕбӕх кӕной ӕмӕ цӕрон (цӕмӕй мӕ сывӕллон сдзӕбӕх уа). Мӕн (мӕ сывӕллоны) фӕнды, цӕмӕй мӕ ӕнӕ тугӕй дзӕбӕх кӕной. Ӕнӕ тугӕй хос кӕныны мадзӕлттӕ ис».
33 Дохтыртӕ кӕнӕ тӕрхонгӕнджытӕ ма арӕх фӕдӕттынц ахӕм фарстатӕ:
• «Цы уыдзӕн, тӕрхон ахӕм уынаффӕ куы рахӕсса, цӕмӕй дын туг бауадзой? Искӕй раз дӕ дзуапп дӕттын хъӕудзӕн?»
• «Туг бауадзыныл куы сразы уай кӕнӕ дын ӕй тыххӕй куы бауадзой, уӕд дӕ ӕмбырдӕй ацух кӕндзысты ӕмӕ дын ӕнустӕм цӕрыны ныфс нал уыдзӕн?»
34 Иу хо тӕрхонгӕнӕгӕн загъта, тӕрхонгӕнӕджы уынаффӕйы тыххӕй дзуапп кӕй нӕ дӕтдзӕн. Ахӕм дзуапп раст уыд, фӕлӕ тӕрхонгӕнӕг ахъуыды кодта: «Кӕд дзуапп никӕй раз дӕтдзӕн, уӕд бӕрн мӕхимӕ исын». Ӕмӕ бар радта, цӕмӕй йын туг бауагътаиккой.
35 Хъуамӕ ӕмбарӕм, ахӕм фарстаты фӕрцы иуӕй-иутӕ фадат кӕй фӕагурынц, цӕмӕй дын туг бауадзой. Уымӕ гӕсгӕ къӕрцхъус у ӕмӕ лӕмбынӕг хъуыды кӕн! Цы саразӕн ис, цӕмӕй сӕ къӕппӕджы ма бахауай? Дӕ бон у зӕгъын:
• «Тыххӕй мын туг куы бауадзой, уӕд афтӕ уайы, ӕмӕ мын тыхми бакодтой. Уыцы мийы тыххӕй цӕрӕнбонты зӕрдӕрыст ӕмӕ ӕфхӕрд уыдзынӕн. Ӕз ӕппӕт тыхтӕй архайдзынӕн, цӕмӕй мын туг ма бауадзой. Стӕй алцыдӕр сараздзынӕн, цӕмӕй уыцы адӕмӕн ахӕм тӕрхон рахӕссой, раст цыма мын тыхми бакодтой».
36 Хъуамӕ афтӕ дзурӕм, цӕмӕй дохтыртӕ бамбарой, туг дын тыххӕй куы бауадзой, уӕд дын стыр маст кӕй бавзарын кӕндзысты. Уый гыццыл хъуыддаг нӕу. Уымӕ гӕсгӕ фидар лӕуу. Дзур, ӕнӕ тугӕй хос кӕныны мадзӕлттыл разы кӕй дӕ.
ЦЫ САРАЗДЗЫНӔ, ЦӔМӔЙ ЦӔТТӔ УАЙ?
37 Мах аныхас кодтам, цы саразын дӕ хъӕуы, цӕмӕй дӕхицӕн дӕр ӕмӕ дӕ бинонтӕй дӕр туг макӕмӕн бауадзой. (Фидӕны нӕ фӕнды фылдӕр информаци бацӕттӕ кӕнын, цы саразӕн ис, ноггуырд сывӕллӕттӕ ӕмӕ стырдӕр сывӕллӕттӕн туг бауадзыны тыххӕй куы дзурой, уӕд.) Уӕдӕ уынӕм нӕ организаци ныл куыд тыхсы ӕмӕ нын уӕззау уавӕры куыд ӕххуыс кӕны, уый. Ацы гӕххӕтт куы райсай, уӕд дӕ цы аразын хъӕуы, цӕмӕй зонай, дохтырты ӕххуыс дӕ куы бахъӕуа, уӕд фидар кӕй фӕлӕудзынӕ?
Фыццаг: ам цы бакастӕ, ууыл дӕ бинонтимӕ аныхас кӕн ӕмӕ ахъуыды кӕнут, цы бакӕндзыстут ӕмӕ цы зӕгъдзыстут, ӕнӕнхъӕлӕджы исты куы ӕрцӕуа, уӕд.
Дыккаг: бацархайут, цӕмӕй уӕм уой, цыдӕриддӕр гӕххӕттытӕ хъӕуы, уыдон.
Ӕртыккаг: Йегъовӕмӕ кувут ацы ахсджиаг хъуыддаджы тыххӕй, цӕмӕй уӕ бафидар кӕна ӕмӕ туг уадзыны хъуыддагмӕ йӕ цӕстӕй кӕсат. Йегъовӕ туджы тыххӕй цы загъта, уый куы ӕххӕст кӕнӕм, уӕд ӕнустӕм йӕ хорзӕхӕй хайджын уыдзыстӕм (Хъуыд. 15:29; Ӕмб. 27:11, 12).
[Рамкӕ 5 фарсыл]
Рынчынӕн йӕ уавӕр куы фӕуӕззаудӕр уа, ӕмӕ дохтыртӕ туг уадзыныл куы дзурой, уӕд цы аразын хъӕуы, уый кӕс ацы рамкӕйы:
1. Де ’мбырды хистӕр нӕлгоймӕгтӕм фӕдзур ӕмӕ сӕ ӕххуыс ракур.
2. Кӕд хъӕуы, уӕд хистӕр нӕлгойӕмгтӕн зӕгъ, цӕмӕй фӕдзурой, ӕввахсдӕр уӕм чи у, уыцы Рынчындӕттимӕ ӕмгуыстгӕнӕг комитетмӕ.
3. Рынчындӕттимӕ ӕмгуыстгӕнӕг комитет дын баххуыс кӕндзӕн дохтыртимӕ ныхас кӕнын.
4. Рынчындӕттимӕ ӕмгуыстгӕнӕг комитет дын баххуыс кӕндзӕн ӕндӕр дохтыртӕ ссарын, цӕмӕй уыдон уӕ рынчындоны хирургтӕн радзурой ӕнӕ тугӕй хос кӕныны мадзӕлтты тыххӕй.
5. Рынчындӕттимӕ ӕмгуыстгӕнӕг комитет ма дын баххуыс кӕндзӕн, дӕ фӕндонӕн дын кӕм аргъ кӕндзысты ӕмӕ дӕ, куыд ӕмбӕлы, афтӕ кӕм дзӕбӕх кӕндзысты, ахӕм рынчындон ссарынӕн.