Ӕмбырды фембӕлдтӕ фӕсивӕдӕн пайда хӕссынц
1 Иу ӕвзонг чызг загъта: «Иуӕй-иу хатт мӕм афтӕ фӕкӕсы, цыма фӕсивӕдӕй зындӕр цӕрӕн никӕмӕн у. Алыран дӕр нӕ алыварс ис, хӕтгӕ чи кӕны, наркотиктӕ чи аразы ӕмӕ нуазгӕ чи кӕны, ахӕм адӕм». Сымах дӕр афтӕ хъуыды кӕнут? Кӕд о, уӕд куыд хъуыды кӕнут, цы уын баххуыс кӕндзӕн ахӕм ӕвзӕр ӕндӕвдады ныхмӕ фӕлӕууынӕн? Сымах хъӕуы уырнындзинад, фидар уырнындзинад, Иегъовӕйы фӕндӕгтӕ раст кӕй сты, ууыл, уымӕн ӕмӕ ӕнӕ уымӕй «Хуыцауы зӕрдӕ балхӕнӕн нӕй» (Дзут. 11:6). Ӕмбырды фембӕлдтӕм куы цӕуат, уӕд уын уый бафидар кӕндзӕн уӕ чырыстон цӕстӕнгӕстӕ ӕмӕ уӕ бахъахъхъӕндзӕн ӕвзӕр хъуыддӕгтӕй.
2 Фембӕлдтӕ бирӕ цӕуылдӕрты ахуыр кӕнынц. Ӕввахс ӕмгӕрттимӕ къӕбӕр хӕрын ӕхсызгон цӕмӕн вӕййы? Хӕрзад хӕринаг кӕй фӕхӕрӕм ӕмӕ нӕ зӕрдиаг адӕмы ’хсӕн кӕй фӕбадӕм, цымӕ нын уый тыххӕй нӕ вӕййы ӕхсызгон? Не ’мбырды фембӕлдтӕ дӕр нын хӕссынц ахӕм ӕхсызгондзинад, Хуыцауы Ныхас иумӕ куы фӕахуыр кӕнӕм, уӕд.
3 Фембӕлдты цӕуыл фӕдзурынц, уый фидар кӕны уырнындзинад, ӕххуыс кӕны ӕрвылбоны зындзинӕдтӕ фӕразынӕн, ӕмӕ Библийы диссаджы пехуымпарӕдтӕ ахуыр кӕнынӕн. Лӕвӕрд цӕуынц царды спайда кӕнӕн кӕмӕй ис, ахӕм уынаффӕтӕ, уыдон та уӕ ахуыр кӕнынц царды ӕппӕты хуыздӕр фӕндагыл цӕуын ӕмӕ уӕ фӕндагыл цы цӕлхдуртыл ӕмбӕлат, уыдон иуварс кӕнын. Фембӕлдты иууылдӕр ныхас кӕнынц уырнындзинад цы хъуыддӕгтӕ фидардӕр кӕнынц, уыдоныл, уым вӕййы циндзинад ӕмӕ сабырдзинад, ӕмӕ ма дзы ссардзыстут ӕппӕты хуыздӕр хӕлӕрттӕ дӕр (Пс. 132:1). Уӕдӕ диссаг нӕу, иу ӕвзонг чызг кӕй загъта: «Ӕз алы бон дӕр скъолайы бирӕ рӕстӕг вӕййын, ӕмӕ тынг бафӕллайын. Фӕлӕ фембӕлдтӕ сты фӕскъӕвда хур бонау, ӕмӕ мын раттынц тых дыккаг бон скъолайы бафӕразынӕн». Иннӕ чызг та дзуры: «Ӕз бафиппайдтон, Иегъовӕйы чи уарзы, уыдонимӕ куы вӕййын, уӕд мын уый ӕххуыс кӕны, цӕмӕй йемӕ ӕввахс ахастыты уон».
4 Теократон лӕггаддзинады скъолайы фыст куы уат, уӕд ахуыр кӕндзыстут куыд ис библион ӕрмӕг агурӕн, куыд дзы ис раныхас саразӕн, ӕмӕ йӕ уый фӕстӕ куыд ис хуымӕтӕгӕй радзурӕн Паддзахады Залы хъусджыты раз. Ахъуыды ма кӕнут, Хуыцауы Ныхасы ирвӕзынгӕнӕг ӕцӕгӕдтӕ хорз амонын ахуыр кӕнут! Фӕсивӕд ма ахӕм ахуырад ӕндӕр кӕм райсдзысты?
5 Фембӕлдтӕй фылдӕр пайда куыд ис райсӕн. Фембӕлдтӕй фылдӕр пайда исыны тыххӕй хъӕуы ӕртӕ къахдзӕфы: рагацау сӕм цӕттӕ кӕнын, хайад сӕ исын ӕмӕ цы базонат, уымӕй царды пайда кӕнын.
6 Цӕттӕ сӕм кӕнут. Фембӕлдтӕм иудадзыг цӕттӕ кӕныны тыххӕй снысан кӕнут рӕстӕг. Бацархайут, цӕмӕй уӕ хӕдзармӕ лӕвӕрд хӕслӕвӕрдтӕ, куыст кӕнӕ та ирхӕфсӕнтӕ ма хъыгдарой алы фембӕлды дӕр цы ӕрмӕг цӕудзӕн ӕвзӕрст, уый цӕттӕ кӕнынӕн. Хорз уаид график скӕнын. Фыццаг ӕмӕ ӕппӕты ахсджиаг, Теократон лӕггаддзинады Скъолайы Библийы ӕрвылкъуырион кастӕн цы программӕ ис, уымӕ гӕсгӕ кӕсын. Амынд сӕртӕ бакӕсынӕн ӕмӕ сыл ахъуыды кӕнынӕн алы бон дӕр бахъӕудзӕн ӕрмӕстдӕр цалдӕр минуты. Рахицӕн кӕнут рӕстӕг ӕмбырды чиныгахуыркӕнынадмӕ ӕмӕ «Хъахъхъӕнӕг мӕсыджы» ахуыркӕнынадмӕ цӕттӕ кӕнынӕн. Иуӕй-иутӕ уыцы фембӕлдтӕм цӕттӕ кӕнынц иу кӕнӕ дыууӕ бон раздӕр. Гӕнӕн уӕвгӕйӕ ма алы къуыри дӕр афтӕ цӕттӕ кӕнын хъӕуы лӕггаддзинады фембӕлдтӕм дӕр.
7 Хайад сӕ исут. Библи дзуры, зӕгъгӕ дыууадӕсаздзыд Йесойы кувӕндоны куы ссардтой, уӕд уый хъуыста, фарстытӕ лӕвӕрдта ӕмӕ фарстытӕн дзуапп кодта (Лук. 2:46, 47). Иудзырдӕй, уый ныхасы хайад иста. Фембӕлдтӕ уын фылдӕр пайда хӕсдзысты хайад сӕ куы исат, уӕд (Фӕсн. н. 15:23).
8 Фембӕлдты хъуамӕ лӕмбынӕг хъусат. Иуӕй-иу хатт раныхасмӕ хъусын йӕ радзурынӕй зындӕр вӕййы. Цӕмӕн? Исчи куы фӕдзуры, уӕд уӕ хъуыдытӕ гӕнӕн ис дзӕгъӕл кӕной. Цы ис саразӕн? Уӕ бон у фыссын. Сӕйраг хъуыдытӕ цыбыртӕй фыссут, цӕмӕй сӕм фӕстӕдӕр уӕ бон уа ӕркӕсын. Куы фыссат, уӕд уын уый баххуыс кӕндзӕн программӕмӕ хъусынӕн. Ноджы ма Библийӕ амынд стихтӕ агурут ӕмӕ докладгӕнӕг цы стихтӕ кӕса, уыдонмӕ кӕсут.
9 Уымӕй уӕлдай ма уӕ разы сӕвӕрут нысан, цӕмӕй хайад исат, фембӕлды фарстытӕ ӕмӕ дзуаппытӕм гӕсгӕ цы ӕрмӕг цӕудзӕн ӕвзӕрст, уым. Цы дзурдзыстут, ууыл лӕмбынӕг куы ахъуыды кӕнат, уӕд фылдӕр пайда райсдзыстут. Фӕсномыг ныхӕсты 15:28-ӕм стихы фыст у: «Рӕстгӕнӕджы зӕрдӕ йӕ ныхӕстыл хъуыды акӕны».
10 Цы базонат, уымӕй царды пайда кӕнут. Фӕстаг къахдзӕф — бацархайут, цӕмӕй цы базонат, уый уӕ мидӕг «архайа» (1 Фес. 2:13). Алы фембӕлды дӕр цы ахсджиаг хъуыдытӕ базонут, уыдонӕй куы пайда кӕнат, уӕд Иегъовӕ Хуыцаумӕ ӕввахсдӕр кӕнут. Ӕцӕгады куы цӕуат ӕмӕ уӕ уырнындзинад куы фидардӕр кӕна, уӕд Хуыцау суыдзӕн уе ’ввахс хӕлар, уый та уын ӕрхӕсдзӕн стыр циндзинад ӕмӕ стыр ӕхцондзинад (3 Иоан. 4).
11 Ӕвзонг ӕфсымӕртӕ ӕмӕ хотӕ, фембӕлдтӕм иудадзыг куы цӕттӕ кӕнат, куы сӕ исат хайад ӕмӕ цы базонат, уымӕй царды куы пайда кӕнат, уӕд фембӕлдтӕй стырдӕр циндзинад исдзыстут. Уыимӕ ма сӕ фылдӕр пайда дӕр райсдзыстут. Уӕд фӕфидардӕр уыдзӕн уӕ уырнындзинад ӕмӕ ма уӕ тынгдӕр фӕнддзӕн уӕ уӕларвон Фыд Иегъовӕйӕн иузӕрдионӕй лӕггад кӕнын дӕр (Пс. 144:18).