Цӕй уӕдӕ, иууылдӕр кад кӕнӕм Иегъовӕйӕн ӕмӕ Йӕ Фыртӕн
8 апрелы Ӕрымысӕн изӕрмӕ чи ӕрбацӕуа, уыдонӕн сӕ бон куыд у фылдӕр пайда райсын
1 Абон адӕм тынгдӕр кӕмӕн кад кӕнынц? Стыр аргъ кӕнынц сгуыхт адӕмӕн. Фӕлӕ сын фылдӕрхатт сӕ хъуыддӕгтӕ тагъд ферох кӕнынц. Уӕдӕ ӕппӕт адӕмӕн дӕр ӕцӕг пайда чи хӕссы, уыцы хъуыддӕгты тыххӕй та цы ис зӕгъӕн? Уыдонӕй ӕппӕты ахсджиагдӕр хъуыддагмӕ нӕ хъус уӕлдай тынгдӕр ӕрдардзыстӕм, 2001 азы 8 апрелы, хурныгуылды фӕстӕ, Хицауы Ӕрымысӕн изӕр куы бӕрӕг кӕнӕм, уӕд.
2 Цымӕ ӕппӕты тынгдӕр кады аккаг чи у? Библи нын дӕтты дзуапп: «Аккаг дӕ ды, Хицау [«Иегъовӕ», НД], райсын кад ӕмӕ намыс ӕмӕ тых, уымӕн ӕмӕ Ды сфӕлдыстай ӕппӕтдӕр» (Рар. 4:11). Иегъовӕ Сфӕлдисӕг кӕй у, уымӕ гӕсгӕ у дун-дунейы Иунӕг Кадджын Хуыцау. Уый алкӕддӕр уыдзӕн кады аккаг! (1 Тим. 1:17).
3 Йесо Чырысти, Хуыцауы Фырт, сарӕзта, адӕмӕн ӕгӕрон арфӕдзинӕдтӕ чи хӕсдзӕн, ахӕм диссаджы хъуыддӕгтӕ. Уый алцӕмӕйдӕр фӕзмыдта йӕ Фыды (Иоан. 5:19). Алы хъуыддаджы дӕр коммӕгӕс кӕй уыд ӕмӕ иузӕрдионӕй кӕй лӕггад кодта, уымӕ гӕсгӕ «аккаг у... райсын тых ӕмӕ хъӕздыгдзинад, ӕмӕ уӕлзонд ӕмӕ фидардзинад, ӕмӕ намыс, ӕмӕ кад, ӕмӕ арфӕдзинад» (Рар. 5:12). Йӕ Фыд ын скад кодта, Паддзахӕй йӕ кӕй сӕвӕрдта, уымӕй (Пс. 2:6—8). Уӕдӕ махӕн дӕр уыдзӕн фадат, цӕмӕй скад кӕнӕм Фыдӕн дӕр ӕмӕ Фыртӕн дӕр, 2001 азы 8 апрелы, Хицауы Ӕрымысӕн изӕрмӕ куы ӕрбацӕуӕм, уӕд.
4 Хъыгагӕн, Иегъовӕ ӕмӕ йӕ Фыртӕн куыд ӕмбӕлд, афтӕ чи лӕггад кодта, ахӕм адӕм зӕххыл бирӕ нӕ уыд. Рӕстӕгӕй-рӕстӕгмӕ-иу суанг Хуыцауы рагон адӕм дӕр, израилӕгтӕ, Иегъовӕйӕн ӕнӕбары лӕггад кодтой. Уыдон-иу ӕй ӕппындӕр ницӕмӕ дардтой (Мал. 1:6). Куыд ӕмбӕлы, афтӕ кад кӕнын нысан кӕны иузӕрдиондзинад, коммӕгӕсдзинад, ӕмӕ бындуриуӕг кӕны уарзондзинадыл ӕмӕ, Иегъовӕ ӕмӕ йӕ Фырт мах тыххӕй цы сарӕзтой, уымӕн кӕй аргъ кӕнӕм, ууыл. Афтӕ кад кӕндзыстӕм ӕмӕ цыт дӕтдзыстӕм, Хуыцауӕй куы тӕрсӕм ӕмӕ йӕ тынг куы нымайӕм, уыимӕ нӕ алы къахдзӕф кӕнгӕйӕ Иегъовӕ ӕмӕ Йесойыл куы хъуыды кӕнӕм, уӕд. Чырыстон ӕмбырды уӕнгтӕ архайынц, цӕмӕй иннӕты дӕр ууыл ахуыр кӕной ӕмӕ сын уымӕн ӕххуыс кӕной.
5 Сӕрмагонд цау фадат дӕтты кад кӕнынӕн. Алы аз дӕр Ӕрымысӕн изӕр Иегъовӕйы Ӕвдисӕнтӕн вӕййы ӕппӕты ахсджиагдӕр фембӕлд. Иегъовӕйӕн лӕггад кӕнын ӕмӕ кад кӕнын кӕй фӕнды, уыдон иууылдӕр хъуамӕ уыцы фембӕлдмӕ ӕрбацӕуой (Лук. 22:19). Ныфс нӕ ис, 6 милуан зынгзӕрдӕ Ӕвдисӕнӕй уӕлдай ма кӕй ӕрбацӕудзысты цымыдисгӕнаг адӕм дӕр ӕмӕ ӕдӕппӕтӕй кӕй уыдзыстӕм 14 милуанӕй фылдӕр. Уый цӕй диссаджы фадат у, цӕмӕй нӕ уӕларвон Фыдӕн скад кӕнӕм! Кӕд уыцы бон хъусдард здӕхт уыдзӕн Йесомӕ, уӕддӕр цы сарӕзта, уымӕн кад кӕнгӕйӕ ӕмӕ цыт дӕтгӕйӕ, мах кад кӕндзыстӕм йӕ Фыдӕн, чи йӕ рарвыста, уымӕн (Иоан. 5:23).
6 Цы у нӕ бон саразын, цӕмӕй уыцы ахсджиаг фембӕлд хорз ацӕуа? Нӕ бон у цымыдисгӕнаг адӕмӕн баххуыс кӕнын куыдфылдӕр пайда райсынӕн. Сразӕнгард сӕ кӕн ӕрбацӕуынмӕ, ӕмӕ куы хъӕуа, уӕд сын зӕрдӕхӕларӕй зӕгъ, уымӕн сын кӕй баххуыс кӕндзынӕ. Бамбарын сын кӕн, раныхас дзы цӕмӕн вӕййы, уый. Иннӕтимӕ сӕ базонгӕ кӕн. Цы феной ӕмӕ цы фехъусой, уый сӕ, гӕнӕн ис, сразӕнгард кӕна немӕ иумӕ Иегъовӕйӕн кад кӕнынмӕ.
7 Уыцы фембӕлды программӕйӕн хъӕуы аргъ кӕнын, уымӕн ӕмӕ адӕмыл тынг бандавы. Мӕнӕ цы загъта иу студент: «Мӕ аргъуаны ӕз бирӕ хӕттыты саходыдтон дзул ӕмӕ сӕнӕй, фӕлӕ уӕ фембӕлд у бынтондӕр ӕндӕрхуызон. Ам цы федтон, уый у растдӕр Библимӕ гӕсгӕ, ӕмӕ мӕнмӕ гӕсгӕ, сымахмӕ ис ӕцӕгад». Уый райдыдта фембӕлдтӕм ӕнӕсцухӕй цӕуын ӕмӕ тагъд рӕстӕджы аргъуыд райста.
8 Цымыдисгӕнаг адӕмӕн ӕххуыс кӕн, цӕмӕй сӕ уырнындзинад фидардӕр кӕна. Ӕрымысӕн изӕрмӕ чи ӕрбацыд, уыцы цымыдисгӕнаг адӕмӕн рӕстӕг ссар ӕмӕ сӕ уый фӕстӕ дӕр рохуаты ма ныууадз, афойнадыл сӕм бацу, цӕмӕй семӕ аныхас кӕнай, цы базыдтой ӕмӕ цы федтой, ууыл. Зӕгъ сын иннӕ фембӕлдты тыххӕй дӕр, цыран сӕ бон у Библи хуыздӕр базонын. Равзар семӕ чиныг «Базонынад»-ӕй 17-ӕм сӕр «Ссар ӕдасдзинад Хуыцауы адӕмы ’хсӕн», цӕмӕй феной, ӕмбырды сын сӕ уырнындзинад фидар кӕнынӕн цы алыхуызон мадзӕлттӕ ис, уыдон, ӕмӕ сӕ уыдонӕн дӕр сӕ бон пайда кӕнын кӕй у, уый.
9 Ахсджиаг у, цӕмӕй цымыдисгӕнаг адӕм бамбарой, уыдонӕн дӕр сӕ бон куыд у Иегъовӕйӕн кад кӕнын ӕмӕ цыт дӕттын, уый. Бамбарын сын кӕн, зӕрдӕбын куывд Иегъовӕйы зӕрдӕмӕ кӕй цӕуы ӕмӕ уый уылты адӕймаджы уырнындзинад ӕдзухдӕр кӕй фидар кӕны, уый (1 Иоан. 5:14). Радзур сын, Иегъовӕйӕн кад чи хӕссы, ахӕм уагахасты тыххӕй, ӕмӕ спайда кӕн брошюрӕ «Цы домы»-йӕ, 8—12-ӕм сӕртӕ. Брошюрӕ «Иегъовӕйы Ӕвдисӕнтӕ»-йы, 30, 31-ӕм фӕрстыл цы ӕрмӕг ис, ууыл ӕрныхас кӕн ӕмӕ цымыдисгӕнаг адӕмы сразӕнгард кӕн, цӕмӕй ахъуыды кӕной, хъусын кӕныны хъуыддаджы хайад исгӕйӕ сӕ бон Иегъовӕйӕн кад кӕнын кӕй у, ууыл.
10 Йесойы нывондӕн ӕмӕ йӕ ахуыргӕнинӕгтӕ уӕвыны фадатӕн куы аргъ кӕнӕм, уӕд уый кад хӕсдзӕн нӕ Фыдӕн ӕмӕ иннӕ адӕмӕн та — арфӕдзинӕдтӕ. Йесо зӕрдӕ бавӕрдта: «Мӕнӕн чи кусы, уый скадджын кӕндзӕн Мӕ Фыд» (Иоан. 12:26).