«Хуыцауӕн... ӕппӕтдӕр у Йӕ бон»
1 Чырыстон ӕмбырдӕн йӕ иууыл ахсджиагдӕр хӕслӕвӕрд у ӕппӕт дунейыл Паддзахады тыххӕй уацхъуыд хъусын кӕнын (Матф. 24:14). Уый у тынг стыр хъуыддаг. Бирӕтӕ хъуыды кӕнынц, зӕгъгӕ, уымӕн хъӕуы, махмӕ цы фӕрӕзтӕ ис, уыдонӕй бирӕ фылдӕр. Иннӕтӕм та афтӕ кӕсы, цыма ацы хӕслӕвӕрдӕн сӕххӕстгӕнӕн нӕй, уымӕн ӕмӕ ныл адӕм худынц, нӕ ныхмӕ цӕуынц ӕмӕ нӕ ӕфхӕрынц (Матф. 24:9; 2 Тим. 3:12). Дызӕрдыггӕнджыты фидарӕй уырны, уыцы хъуыддагӕн саразӕн кӕй нӕй. Фӕлӕ Йесо загъта: «Хуыцауӕн... ӕппӕтдӕр у Йӕ бон» (Матф. 19:26).
2 Фӕзминаг дӕнцӕгтӕ. Йесо йӕ лӕггаддзинад куы райдыдта, уӕд иунӕг йӕхӕдӕг уыд дунейы цардӕвӕрды ныхмӕ. Цӕмӕй йын мацы бантыстаид, уый тыххӕй йӕ йӕ ныхмӕдзӕуджытӕ ӕгад кодтой, сӕ бон куыддӕриддӕр уыд, афтӕ, ӕмӕ ма йӕ фыдмард дӕр акодтой. Фӕлӕ фӕстагмӕ Йесо фидарӕй загъта: «Ӕз дунейы басастон» (Иоан. 16:33). Уый ӕцӕгдӕр уыд диссаджы ӕнтыстдзинад!
3 Йесойы ахуыргӕнинӕгтӕ дӕр лӕггад кодтой афтӕ ныфсджынӕй ӕмӕ зӕрдиагӕй. Бирӕты сӕ надтой, ахӕстӕтты сӕ ӕппӕрстой ӕмӕ ма сӕ маргӕ дӕр-иу акодтой. Фӕлӕ уыдон «цин кодтой, Хицау Йесойы номы сӕрыл ӕфхӕрд кӕй фесты, ууыл» (Ап. к. 5:41, НФ). Кӕд зындзинӕдтӕ ӕвзӕрстой, уӕддӕр сын бантыст, фыццаг бакастӕй зын сӕххӕстгӕнӕн чи зынд, уыцы хӕслӕвӕрд — хорз уацхъуыд фехъусын кодтой «суанг зӕххы кӕронмӕ» (Ап. к. 1:8; Кол. 1:23).
4 Абон куыд ис ӕнтыстджын уӕвӕн. Мах дӕр зӕрдиагӕй райдыдтам Паддзахады тыххӕй хъусын кӕнын, кӕд афтӕ зыны, цыма уыцы хъуыддагӕн бакӕнӕн нӕй, уӕддӕр. Кӕд нын ранӕй-рӕтты нӕ архайдӕн бар нӕ фӕдӕттынц, ӕфхӕрынц нӕ, ахӕстӕтты нӕ бадын кӕнынц ӕмӕ ма ӕндӕр фыдмитӕ дӕр кӕнынц, цӕмӕй нӕ ӕрлӕууын кӕной, уӕддӕр нӕ къухы ӕфты бирӕ ӕнтыстдзинӕдтӕ. Уый нын куыд уайы? «„Ӕфсӕдтӕ ӕмӕ тыхы руаджы нӕ, фӕлӕ мӕ сыгъдӕг уды руаджы“,— зӕгъы ӕфсӕдты Хуыцау Иегъовӕ» (Зах. 4:6). Цалынмӕ Иегъовӕ немӕ уа, уӕдмӕ нын нӕ хъуыддаг ничи бакъуылымпы кӕндзӕн! (Ром. 8:31).
5 Хорз уацхъуыд хъусынгӕнгӕйӕ хъуамӕ ма ӕфсӕрмы кӕнӕм, мацӕмӕй тӕрсӕм ӕмӕ ма хъуыды кӕнӕм, зӕгъгӕ, дзурынмӕ нӕ арӕхсӕм (2 Кор. 2:16, 17). Махӕн ис бӕлвырд аххосӕгтӕ, цӕмӕй тырнӕм Паддзахады тыххӕй хорз уацхъуыд хъусын кӕнынмӕ. Иегъовӕйы ӕххуысӕй мах сараздзыстӕм, «адӕймӕгты бон цы нӕу», уый! (Лук. 18:27).