Конгресты рӕстӕг у циндзинады рӕстӕг!
1 Иегъовӕйы Ӕвдисӕнты конгрестӕ хӕссынц стыр циндзинад. Уыцы фембӕлдтӕ сӕдӕ азӕй фылдӕр ахъаз сты нӕ организацийы рӕзтӕн. Райдианы организаци уыд гыццыл, ӕмӕ мах уынӕм, Иегъовӕ нын нӕ ӕппӕтдунеон хъуыддагӕн куыд тынг арфӕ кӕны, уый. Фыццаг конгрессы 1893 азы, Чикагойы (АИШ, штат Иллинойс) уыд 360 адӕймаджы; уыдонӕй аргъуыд райстой 70 адӕймаджы ӕмӕ уымӕй равдыстой, сӕхи Иегъовӕйӕн кӕй снывонд кодтой, уый. Фарон конгрестӕм, «Хуыцауы Ныхас ӕххӕстгӕнджытӕ», зӕгъгӕ, ӕппӕт дунейы дӕр ӕрбацыд 9 454 055 адӕймаджы, аргъуыд та райстой 129 367 адӕймаджы. Уый ӕцӕгӕйдӕр у диссаджы фадат цин кӕнынӕн!
2 Суанг ма рагзамантӕй дӕр Хуыцауы адӕмы фембӕлдтӕ сты диссаджы фадат Иегъовӕйӕ амындтӕ исынӕн. Ездрӕ ӕмӕ Неемийы рӕстӕджыты-иу Закъон куы кастысты, уӕд-иу адӕм хъуыстой «сӕумӕрайсомӕй сихоры онг» (Неем. 8:2, 3). Уыцы бон-иу Закъонӕй цыдӕртӕ хуыздӕр кӕй бамбӕрстой, уымӕ гӕсгӕ-иу адӕмы «цинӕн кӕрон нал уыд» (Неем. 8:8, 12). Мах дӕр цин кӕнӕм, конгресты кӕй исӕм «афоныл» Иегъовӕйӕ хорз амындтӕ ӕмӕ нӕ уырнындзинад фидаргӕнӕг хӕринаг «ӕууӕнкджын ӕмӕ зондджын цагъары» уылты (Матф. 24:45). Йесо афтӕ кӕй загъта, зӕгъгӕ, адӕймаг цӕрдзӕн «Хуыцауы дзыхӕй цӕуӕг алы дзырдӕй», уымӕ гӕсгӕ конгрестӕ тынг ахъаз сты нӕ уырнындзинад фидар кӕнынӕн (Матф. 4:4).
3 Ӕппӕт тыхтӕй бацархай, цӕмӕй ацӕуай. Алчидӕр нӕ хъуамӕ йӕ разы сӕвӕра хӕс: облӕстон конгресс «Хуыцауы Ныхас амонджытӕ», цы ӕртӕ боны уа, уыдонӕй иу дӕр ма рауадзӕм. Хъуамӕ спълан кӕнӕм, цӕмӕй ӕртӕ боны дӕр райсомӕй раджы ӕрбацӕуӕм ӕмӕ цалынмӕ кӕронбӕттӕн куывды «Оммен!» зӕгъӕм, уӕдмӕ ма ацӕуӕм. Цӕмӕй нын уый бантыса, уый тыххӕй нӕ, гӕнӕн ис, бахъӕуа нӕ графикы исты фӕивын. Чи зоны нын ӕнцон нӕ уа куыстӕй нӕхи ракурын конгресмӕ. Хъуамӕ фидар фӕлӕууӕм ӕмӕ ма хъуыды кӕнӕм, цы уа, уый уӕд, зӕгъгӕ. Конгрессы рӕстӕджы нӕ цӕрӕнбынат кӕнӕ транспорт куы хъӕуа, уӕд уыдӕттыл хъуамӕ рагацау батыхсӕм. Цыфӕнды ма саразӕм, уӕддӕр нӕ фыдӕбӕттӕ дзӕгъӕлы нӕ фӕуыдзысты!
4 Иегъовӕйы адӕммӕ конгресты цы арфӕдзинӕдтӕ фенхъӕлмӕ кӕсы, уыдон ӕхцайӕ нӕ барынц. Ӕркӕсӕм, 1958 азы Нью-Йоркмӕ Иегъовӕйы Ӕвдисӕнты ӕппӕтдунеон конгресс «Хуыцауы фӕндон»-мӕ, ацӕуынвӕнд чи скодта, уыдонӕй цалдӕры цӕвиттонмӕ. Иу ӕфсымӕр дыууӕ къуыримӕ сӕхгӕдта йӕ арӕзтадон куыстуат, цӕмӕй бархи кусӕгӕй конгресс цӕттӕ кӕнынӕн баххуыс кодтаид ӕмӕ конгресмӕ ацыдаид. Иннӕ ӕфсымӕр та, Виргинийы сакъадӕхты цӕрӕг, йӕ зӕххытӕй ауӕй кодта 2 гектары бӕрц, цӕмӕй йӕ бинонтӕ — ӕхсӕз адӕймаджы — конгресмӕ ацыдаиккой. Ӕрыгон бинонтӕ ауӕй кодтой, мотор ӕвӕрд кӕуыл уыд, ахӕм бӕлӕгъ, цӕмӕй сӕ бон суыдаид конгресмӕ ацӕуын се ’ртӕ сывӕллонимӕ дӕр, кӕстӕрыл цыд дыууӕ мӕйы, хистӕрыл та — авд азы. Калифорнийӕ иу бинонтӕй ӕртӕ ӕфсымӕры куыстой иумӕ ӕмӕ сын загътой, зӕгъгӕ, куыстмӕ куы нӕ ӕрбацӕуой, уӕд сӕ сисдзысты. Фӕлӕ сӕ уый нӕ баурӕдта ӕмӕ ацыдысты, ферохгӕнӕн кӕмӕн нӕ уыд, уыцы конгресмӕ.
5 Ӕппӕт тыхтӕй куы архайӕм, уӕд нӕ Иегъовӕ схорзӕхджын кӕндзӕн. Иегъовӕ уыны, йӕ адӕм ӕппӕт тыхтӕй кӕй архайынц, уый, ӕмӕ сын арфӕ кӕны (Дзут. 6:10). Зӕгъӕм, 1950 азы конгресс «Теократийы рӕзт»-ы хъусджытӕ байхъуыстой ахсджиаг раныхасмӕ — «Ног цардӕвӕрдтӕ». Ӕфсымӕр Фредерик Френц хъусджыты бацымыдис кодта ахӕм фарстӕй: «Ацы ӕппӕтдунеон ӕмбырдӕн ӕхсызгон нӕу базонын, фидӕны ног зӕххы кънйӕзтӕй иуӕй-иутӕ абон ам, немӕ кӕй сты, уый?» Рацыд 50 азӕй фылдӕр, ӕмӕ ма мах уӕддӕр цин кӕнӕм, Псаломы 44:17-ӕм стих хуыздӕр ӕмбӕрстгонд кӕй ӕрцыд, ууыл.
6 Фарон облӕстон конгрессы чи уыд, иу ахӕм бинонты хистӕр куыд бузныг уыд, уый тыххӕй ныффыста: «Ӕфсымӕртӕ, зӕгъӕн дӕр ын нӕй, ацы конгресс нӕ куыд фервӕзын кодта, уый. Цӕмӕй куыст ссардтаин, уый тыххӕй мӕ бинонтимӕ алыгъдыстӕм горӕтмӕ, фӕлӕ нӕ уырнындзинад кӕй фӕцудыдта, уый йеддӕмӕ дзы ницы рамбылдтам... Нӕ чырыстон хӕстӕ нал ӕххӕст кодтам. Суанг ма фембӕлдтӕм дӕр нал цыдыстӕм ӕмӕ ӕппындӕр нал хъусын кодтам... Ацы конгресс нын ног хъарутӕ радта, ӕмӕ та ногӕй нӕ разы ӕвӕрӕм нӕ уырнындзинадӕн ахъаз хӕстӕ ӕмӕ нӕ хъуыддӕгтӕ афтӕ аразӕм, цӕмӕй уыцы хӕстӕ нӕ къухы бафтой».
7 Иегъовӕ нын дӕтты, нӕ уырнындзинад фидар кӕнынӕн нӕ цы хӕринаг хъӕуы, уый. Нӕ конгресты нын ӕрӕвӕры хъӕздыг фынг. Уый тыххӕй дзы бузныг кӕй стӕм, уый нӕ хъуамӕ разӕнгард кӕна, апостол Петр Корнилимӕ куы бацыд, уӕд ын уый куыд загъта, афтӕ зӕгъынмӕ: «Ныр мах не ’ппӕт лӕууӕм Хуыцауы раз, ӕмӕ дын Хуыцау цытӕ бафӕдзӕхста, уыдон хъуамӕ фехъусӕм» (Ап. к. 10:33, НФ). Уӕдӕ нӕ разы хӕс сӕвӕрӕм, цӕмӕй ацы аз облӕстон конгресс «Хуыцауы Ныхас амонджытӕ»-н йӕ алы хайы дӕр «лӕууӕм Хуыцауы раз» ӕмӕ цин кӕнӕм!