«Куыд ссарон рӕстӕг?»
1 Бирӕтӕ тыхсынц, рӕстӕг сын кӕй нӕ фаг кӕны сӕ хъуыддӕгтӕ кӕнынӕн, ууыл. Адӕм дзурынц, зӕгъгӕ, рӕстӕг у тынг зынаргъ, ӕмӕ уый дӕр тагъд ивгъуыйы. Уӕдӕ куыд ссарӕм рӕстӕг ахсджиаг хъуыддӕгтӕн, зӕгъӕм, Хуыцауы Ныхас кӕсынӕн ӕмӕ ахуыр кӕнынӕн? (Фил. 1:10).
2 Уымӕн ис иу мадзал, нӕ хъӕуы ӕнхъӕлмӕ кӕсын, фылдӕр рӕстӕг нын кӕд фӕзындзӕн, уымӕ, фӕлӕ уый бӕсты хъӕуы сбӕрӕг кӕнын, цы рӕстӕг нын ис, уый цӕуыл хардз кӕнӕм. Алкӕмӕндӕр нӕ къуырийы мидӕг ис 168 сахаты, уыдонӕй иу 100 сахаты бӕрц ацӕуы фынӕй кӕныныл ӕмӕ куыстыл. Уӕдӕ нын цы рӕстӕг баззайы, уымӕй куыд ис хуыздӕр спайда кӕнӕн? Ефесӕгтӕм 5:15—17-ӕм стихты ис ахӕм уынаффӕ, зӕгъгӕ, «архайут ӕнӕмбаргӕты хуызӕн нӕ, фӕлӕ куыд зондджынтӕ, рӕстӕгӕн аргъ кӕнгӕйӕ [«ӕмбӕлон рӕстӕг ӕлхӕнгӕйӕ», НД]... ӕмбаргӕйӕ цы у Хуыцауы фӕндон». Ацы стихтӕй бӕрӕг у, кӕй хъӕуы алы уавӕрӕй дӕр пайда кӕнын, цӕмӕй Иегъовӕйы цӕсты ахсджиагдӕр цы хъуыддӕгтӕ сты, уыдон аразӕм.
3 Йесо нын нӕ рӕстӕг абарста Нойы рӕстӕгимӕ (Лук. 17:26, 27). Нойы дуджы цы адӕм цард, уыдон се ’рвылбоны хъуыддӕгтӕй не ’вдӕлд. Фӕлӕ Ной ссардта рӕстӕг ӕнахуыр стыр ковчег саразынӕн ӕмӕ хъусын кӕнынӕн (Дзут. 11:7; 2 Пет. 2:5). Куыд? Ной Хуыцауы хъуыддаг фыццаг бынаты кӕй ӕвӕрдта ӕмӕ коммӕгӕс кӕй уыд, уымӕ гӕсгӕ алцыдӕр арӕзта, Хуыцау ын куыдӕриддӕр амыдта, афтӕ (Уӕв. 6:22).
4 Сӕйрагдӕр цы у? Йесо загъта: «Ӕрмӕст дзулӕй нӕ цӕрдзӕн адӕймаг, фӕлӕ Хуыцауы дзыхӕй цӕуӕг алы дзырдӕй» (Матф. 4:4). Алы къуыри дӕр исӕм «афоныл... [монон] дзулы хай» (Лук. 12:42). Цӕмӕй нын монон хӕринаг ӕцӕгӕйдӕр ӕххуыс кӕна, уый тыххӕй йӕ махӕй алчидӕр хъуамӕ ӕппынӕдзух иса ӕмӕ йӕ ахуыр кӕна. Монон хӕринаджы тыххӕй бузныг куы уӕм, уӕд ыл уӕлӕнгӕйтты нӕ цӕст нӕ ахӕсдзыстӕм, исты тагъд-тагъд куыд акомдзаг кӕнӕм, афтӕ, фӕлӕ рӕстӕг ардзыстӕм, цӕмӕй йӕ сабыргай ахуыр кӕнӕм, адджын хӕринаг куыд фӕхӕрӕм, афтӕ.
5 Монон хӕринаг чи исы, уый цӕрдзӕн ӕнустӕм (Иоан. 17:3). Нӕ ӕрвылбоны хъуыддӕгты нын монон хӕринагӕй ахсджиагдӕр ницы ис. Алы бон дӕр Библи кӕсынӕн ӕмӕ ӕмбырдтӕм цӕттӕ кӕнынӕн ис рӕстӕг хицӕн кӕнӕн? Кӕй зӕгъын ӕй хъӕуы, ис. Афтӕ куы архайӕм, уӕд базондзыстӕм ӕмӕ ӕххӕст кӕндзыстӕм Хуыцауы фӕндон, уый та у «стыр лӕвар» (Пс. 18:8—12).