Ма рох кӕн ацӕргӕ иузӕрдион чырыстӕтты
1 84-аздзыд Аннӕ кӕд идӕдз уыд ӕмӕ йыл азтӕ сӕ уӕз ӕруагътой, уӕддӕр «кувӕндонӕй иуварс нӕ цыд». Афтӕ иузӕрдион кӕй уыд, уый тыххӕй йын Иегъовӕ уӕлдай кад скодта (Лук. 2:36—38). Абон дӕр бирӕ ӕфсымӕртӕ ӕмӕ хотӕ зын уавӕрты равдисынц, Аннӕйӕн цы зӕрдӕйы уаг уыдис, ахӕм зӕрдӕйы уаг. Ахӕм иузӕрдион чырыстӕттӕн се ’нӕниздзинад куы фӕцуды кӕнӕ сыл азтӕ сӕ уӕз куы ӕруадзынц, уӕд гӕнӕн ис ӕмӕ сӕ ныфс асӕтта. Цӕй уӕдӕ ӕркӕсӕм, ныфс сӕ бауадзын ӕмӕ сын Хуыцауы хъуыддӕгты архайынӕн баххуыс кӕнын нӕ бон куыд у, уымӕ.
2 Фембӕлдтӕ ӕмӕ уацамынд. Иузӕрдион ацӕргӕ чырыстӕтты исчи фембӕлдтӕм куы фӕласы, уӕд сын ӕнцондӕр вӕййы фембӕлдтӕм ӕнӕфӕцухӕй цӕуын. Уый стыр ахъаз вӕййы уыцы ӕнувыд чырыстӕтты — Хуыцауӕн рагӕй чи лӕггад кӕны, уыдоны — уырнындзинадӕн ӕмӕ ӕмбырдӕн ӕмткӕй райсгӕйӕ. Уыцы хъуыддаджы искӕмӕн ӕххуыс кӕныс? (Дзут. 13:16).
3 Ӕцӕг чырыстӕттӕ иудадзыг хъусын кӕныны хъуыддаджы кӕй архайынц, уый сын у стыр цин ӕмӕ зӕрдӕрухсы хос. Фӕлӕ ацӕргӕ ӕмӕ рынчын чырыстӕттӕн уацамынды цӕуын ӕнцон нӕу. Куыд хъуыды кӕныс, афтӕ саразӕн нӕй, цӕмӕй нӕ зынаргъ ӕфсымӕртӕ ӕмӕ хотӕ хъусын кӕныны хъуыддаджы «де ’мкусджытӕ» уой? (Ром. 16:3, 9, 21). Гӕнӕн ис, ӕмӕ сӕ фӕхонай, цӕмӕй искӕмӕн ӕцӕгады тыххӕй телефонӕй радзурат, кӕнӕ, раздӕр кӕмӕн хъусын кодтай, ахӕм адӕммӕ ногӕй иумӕ бацӕуат, йе та дӕ бон у, ӕмӕ сӕ демӕ акӕнай, Библи кӕимӕ ахуыр кӕныс, ахӕм адӕймагмӕ. Ацӕргӕ ӕфсымӕр кӕнӕ хо уатон рынчын у, зӕгъгӕ, уӕд хорз нӕ уаид, Библи кӕимӕ ахуыр кӕныс, уыимӕ йӕм хӕдзармӕ куы бацӕуиккат ӕмӕ уым библион ахуыр куы ауадзиккат?
4 Иумӕ Библи ахуыр кӕнын ӕмӕ ныхас кӕнын. Иуӕй-иутӕ сӕ бинонтимӕ Библи куы фӕахуыр кӕнынц, уӕд фӕхонынц ахӕм ӕфсымӕр кӕнӕ хойы, йе та йӕм сӕхӕдӕг хӕдзармӕ дӕр бацӕуынц. Иу мад-иу йӕ дыууӕ сывӕллонимӕ бацыд иу ацӕргӕ хомӕ «Мӕ библион радзырдты чиныг» ахуыр кӕнынмӕ ӕмӕ сын уый алкӕмӕндӕр уыд стыр ныфсы хос. Ахӕм адӕм тынг бузныг вӕййынц, исчи сӕ семӕ къӕбӕр бахӕрынмӕ кӕнӕ рӕстӕг иумӕ арвитынмӕ куы фӕхоны, уӕд. Ацӕргӕ ӕфсымӕр кӕнӕ хо йӕхи ӕвзӕр куы хата ӕмӕ йӕм бирӕ рӕстӕг бафӕстиатгӕнӕн куы нӕ уа, уӕд хорз уаид, цыбыр рӕстӕгмӕ йӕм куы бауаис ӕмӕ йын исты куы бакӕсис, йемӕ куы акувис кӕнӕ йын уацамындӕй зӕрдӕфидаргӕнӕн цау куы радзурис (Ром. 1:11, 12).
5 Иегъовӕ нӕ рох кӕны йӕ иузӕрдион ацӕргӕ лӕггадгӕнджыты (Дзут. 6:10, 11). Мах дӕр ӕй уӕд фӕзмдзыстӕм, нӕ ацӕргӕ ӕфсымӕртӕ ӕмӕ хотӕн куы аргъ кӕнӕм ӕмӕ сын Хуыцауы хъуыддӕгты архайынӕн куы ӕххуыс кӕнӕм.