Сӕйрагдӕр дын цы у?
1 Бирӕ динон организацитӕ хӕрзаудӕн хъуыддӕгтӕ кӕнынц, зӕгъӕм, аразынц ахуыры ӕмӕ медицинон уагдӕттӕ, кӕнӕ та сын ӕхцайӕ ӕххуыс кӕнынц. Ӕмӕ Иегъовӕйы Ӕвдисӕнтӕ дӕр нӕ рох кӕнынц иннӕтӕн «хорз ракӕнын ӕмӕ кӕрӕдзимӕ зӕрдиагӕй фӕкӕсын», фӕлӕ сын уӕддӕр сӕйрагдӕр у адӕмы Хуыцауимӕ базонгӕ кӕнын (Дзут. 13:16, НФ).
2 Фыццаг ӕнусы цӕвиттон. Йесо зӕххыл куы лӕггад кодта, уӕд бирӕ хорз хъуыддӕгтӕ арӕзта, фӕлӕ йын сӕйрагдӕр уыд ӕцӕгады тыххӕй ӕвдисӕнад дӕттын (Лук. 4:43; Иоан. 18:37; Ап. к. 10:38). Уый йӕ фӕдылдзӕуджытӕн загъта, цӕмӕй «цӕуой ӕмӕ цӕттӕ кӕной ахуыргӕнинӕгтӕ ӕппӕт адӕмты минӕвӕрттӕй... ахуыр сӕ кӕной» (Матф. 28:19, 20, НД). Уый ма загъта, зӕгъгӕ, йыл чи ӕууӕнды, уыдон, уый цы арӕзта, уымӕй ноджы стырдӕр хъуыддӕгтӕ сараздзысты (Иоан. 14:12). Йесойӕн сӕйрагдӕр уыд хъусын кӕныны хъуыддаг, уымӕн ӕмӕ уый фӕрцы адӕм слӕууынц ирвӕзындзинады фӕндагыл (Иоан. 17:3).
3 Апостол Павел хъусын кӕныны хъуыддаг нымадта «ӕнӕмӕнг хӕсыл», уӕлӕнгай цӕстӕй кӕсӕн кӕмӕ нӕй, ахӕм домӕныл (1 Кор. 9:16, 17). Уыцы хъуыддаг сӕххӕст кӕныны тыххӕй уый йӕхиуыл нӕ ауӕрста, цыфӕнды зындзинӕдтӕ ӕмӕ уӕззау уавӕртӕн дӕр фӕрӕзта (Ап. к. 20:22—24). Апостол Петр ӕмӕ йе ’мкусджытӕн дӕр уыд ахӕм зӕрдӕйыуаг. Кӕд сӕ ахӕстоны ӕппӕрстой ӕмӕ сӕ надтой, уӕддӕр «ӕнӕнцойӕ ахуыр кодтой ӕмӕ хорз уацхъуыд хъусын кодтой Йесо Чырыстийы тыххӕй» (Ап. к. 5:40—42).
4 Цы зӕгъӕн ис мах тыххӕй та? Махӕн дӕр Паддзахады тыххӕй хорз хабар хъусын кӕнын ӕмӕ ахуыргӕнинӕгтӕ цӕттӕ кӕнын иууыл сӕйрагдӕр хъуыддаг у? «Ӕнӕфыййау фыстау, фӕллад ӕмӕ хӕлиу» чи у, уыдоныл мах дӕр Йесойау тыхсӕм? (Матф. 9:36, НФ). Дунейы цы цаутӕ цӕуы, уыдон, ӕмӕ Библийы пехуымпарӕдтӕ бӕлвырд ӕвдисынц, ацы фыддунейӕн тагъд йӕ кӕрон кӕй ӕрцӕудзӕн! Хъусын кӕныны хъуыддаг тынг ахсджиаг кӕй у, уый хорз куы ӕмбарӕм, уӕд дарддӕр дӕр зӕрдиагӕй хъусын кӕндзыстӕм.
5 Дӕ уавӕртӕм ӕркӕс. Адӕймагӕн йӕ уавӕртӕ арӕх кӕй фӕивынц, уымӕ гӕсгӕ хорз уаид, рӕстӕгӕй-рӕстӕгмӕ-иу нӕ хъуыддӕгтӕм куы ӕркӕсиккам: нӕ бон у исты ивындзинӕдтӕ скӕнын, цӕмӕй фылдӕр хъусын кӕнӕм? Иу хо пионерӕй лӕггад кодта 1950—1970-ӕм ӕзты, фӕлӕ стӕй кӕй фӕрынчын, уымӕ гӕсгӕ пионерӕй нал лӕггад кодта. Рӕстӕг куыд цыд, афтӕ йе ’нӕниздзинад фӕхуыздӕр. Ӕрӕджы та йӕ уавӕртӕм ӕркаст ӕмӕ та аскъуыддзаг кодта пионерӕй лӕггад кӕнын. Куыд амондджын уыд, 90-аздзыдӕй Пионерты скъолайы кӕй ахуыр кодта! Дӕ уавӕртӕ та куыд сты? Чи зоны, тагъд рӕстӕджы пенсийы цӕуыс кӕнӕ та ахуыр фӕуд кӕныс? Дӕ уавӕртӕ куы фӕивой, уӕд дын нӕ уыдзӕн фадат пионерӕй балӕггад кӕнынӕн?
6 Йесо куы федта, Марфӕ бирӕ цӕйдӕрты тыххӕй кӕй «мӕт кодта ӕмӕ [кӕй] тыхст», уӕд ын хӕларзӕрдӕйӕ бамбарын кодта, хуымӕтӕгдӕр цард куы кӕна, уӕд стырдӕр хорздзинӕдтӕй хайджын кӕй уыдзӕн (Лук. 10:40—42). Дӕ бон нӕу дӕ цард фӕхуымӕтӕгдӕр кӕнын? Бинонты дарынӕн ӕнӕмӕнг лӕг дӕр хъуамӕ куса ӕмӕ ус дӕр? Чи зоны, бинонтӕ сӕ иуы мыздӕй дӕр фӕцӕрдзысты? Бирӕтӕ ивындзинӕдтӕ кӕй скодтой, уымӕ гӕсгӕ фылдӕр райдыдтой хъусын кӕнын, ӕмӕ сын уый стыр ахъаз фӕци сӕ уырнындзинадӕн.
7 Цӕй уӕдӕ Йесо ӕмӕ апостолты цӕвиттонмӕ гӕсгӕ архайӕм! Дзырд дӕр ыл нӕй, Паддзахады тыххӕй хорз хабар хъусын кӕныны ахсджиаг хъуыддаджы зӕрдӕбынӕй куы архайӕм, уӕд нын Иегъовӕ раарфӕ кӕндзӕн (Лук. 9:57—62).