Уыцы лӕварӕн дӕ царды «бынат ссар»
1 Иухатт Йесо, йӕ ахуыргӕнинӕгтимӕ ӕмкъайадыл дзургӕйӕ, загъта, зӕгъгӕ, ӕнӕкъайӕ лӕггад кӕнын у «лӕвар». Уый фӕстӕ загъта: «Уымӕн йӕ бон бынат ссарын кӕмӕн у, уый йын ссарӕд бынат» (Матф. 19:10—12, НД). Цалдӕр азы фӕстӕ апостол Павел ныффыста, ӕнӕкъайӕ лӕггад кӕнын хорз цӕмӕн у, уый фӕдыл, ӕмӕ иннӕты дӕр разӕнгард кодта, цӕмӕй уыцы хъуыддаджы уый бафӕзмыдтаиккой (1 Кор. 7:7, 38). Абон бирӕтӕ уыцы лӕварӕн сӕ царды «бынат ссардтой», ӕмӕ тынг саргъ кодтой, уый фӕрцы цы гӕнӕнтӕ ис, уымӕн. Уыцы гӕнӕнтӕй иуӕй-иутӕ цавӕртӕ сты?
2 «Ӕнӕкъуылымпыйӕ» лӕггад кӕнын. Павел ӕмбӕрста, ӕнӕ бинонтӕй йӕ бон кӕй уыдзӕн Иегъовӕйӕн «ӕнӕкъуылымпыйӕ» (НД) лӕггад кӕнын. Афтӕ абон дӕр, ӕнӕус ӕфсымӕрӕн фадат ис Лӕггаддзинад фӕхуыздӕр кӕныны скъолайы ахуыр кӕнынӕн. Ӕнӕус ӕфсымӕрӕн кӕнӕ ӕнӕцыд хойӕн ӕнцондӕр у райдайын пионерӕй лӕггад кӕнын, ӕндӕр ӕвзаг ахуыр кӕнын, фылдӕр хъусынгӕнджытӕ кӕм хъӕуы, уырдӕм ацӕуын, Вефилы лӕггад кӕнын кӕнӕ ма ноджы ӕндӕр искуыд фылдӕр лӕггад кӕнын. Уыдонӕн фылдӕр рӕстӕг ӕмӕ гӕнӕнтӕ ис Библи бӕстон ахуыр кӕнынӕн ӕмӕ йыл арф хъуыды кӕнынӕн, стӕй ма Иегъовӕмӕ зӕрдӕбынӕй кувынӕн. Ӕнӕус кӕнӕ ӕнӕцыд чырыстонӕн фылдӕр рӕстӕг вӕййы иннӕтӕн ӕххуыс кӕнынӕн. Ахӕм хъуыддӕгтӕ иууылдӕр сты, адӕймагӕн бинонтӕ кӕй нӕй, уый «пайда» (1 Кор. 7:32—35; Ап. к. 20:35).
3 Хуыцауӕн афтӕ ӕнӕкъуылымпыйӕ куы лӕггад кӕнӕм, уӕд хайджын уыдзыстӕм стыр арфӕдзинӕдтӕй. Кенийы 27 азы чи фӕлӕггад кодта, иу ахӕм ӕнӕцыд хо ныффыста: «Уым мын тынг бирӕ хӕлӕрттӕ уыд ӕмӕ тынг бирӕ хъусын кодтон! Алцыдӕр арӕзтам иумӕ, кӕрӕдзимӕ уазӕгуаты цыдыстӕм. [...] Бинонтӕ мын кӕй нӕ уыд, уый фӕрцы уыдтӕн сӕрибардӕр, мӕ бон уыди кӕдӕмфӕндыдӕр ацӕуын, афтӕмӕй мӕхи ӕгасӕй дӕр радтон Хуыцауы хъуыддагӕн ӕмӕ мын уый хаста стыр циндзинад». Нӕ хо ма йӕ ныхасмӕ бафтыдта: «Уыцы азты дӕргъы ӕз Иегъовӕмӕ ноджы тынгдӕр баввахс дӕн».
4 Уыцы лӕварӕн куыд ис бынат ссарӕн. Йесо загъта, зӕгъгӕ, адӕймаг бинонтӕ куы нӕ кӕна, уӕд уый хъуамӕ уа «Уӕларвон Паддзахады тыххӕй» (Матф. 19:12). Ӕнӕкъайӕ цӕрын у лӕвар, ӕмӕ цӕмӕй циндзинад ӕмӕ арфӕдзинӕдтӕ хӕсса, уый тыххӕй йӕм хъӕуы раст ахаст дарын, куыд цыфӕнды ӕндӕр лӕвармӕ, афтӕ. Ӕнӕкъай цард адӕймагӕн цы фадӕттӕ дӕтты, уыдонӕй раст пайдагӕнгӕйӕ ӕмӕ Иегъовӕйӕ зонд ӕмӕ тых кургӕйӕ, ӕнӕус ӕмӕ ӕнӕцыд чырыстӕттӕй бирӕтӕ бамбӕрстой, куыд ахсджиаг у уыцы лӕварӕн царды бынат ссарын.