3 хай. Библи кӕимӕ ахуыр кӕнӕм, уыдонӕн ӕххуыс кӕнӕм уырнындзинады рӕзынӕн
Фыстад арӕхстджынӕй амон
1. Искӕимӕ Библи куы ахуыр кӕнӕм, уӕд сӕйраг хъусдард Фыстадмӕ цӕмӕн хъуамӕ уа?
1 Адӕмимӕ Библи ахуыр кӕнгӕйӕ, нӕ нысан у «цӕттӕ кӕнын ахуыргӕнинӕгтӕ» — Хуыцауы Ныхасы цы ахуырӕдтӕ ис, уыдон сын ӕмбарын кӕнӕм ӕмӕ сын ӕххуыс кӕнӕм, цӕмӕй сӕ сӕ зӕрдӕмӕ исой ӕмӕ сӕ цард уыдонмӕ гӕсгӕ аразой (Матф. 28:19, 20, НД; 1 Фес. 2:13). Нӕ сӕйраг хъусдард Фыстадмӕ дӕр хъуамӕ уымӕн уа. Фыццаг уал хорз уаид, кӕимӕ ахуыр кӕнӕм, уыдонӕн, стихтӕ Библийы куыд агургӕ сты, уый куы бацамониккам. Фӕлӕ ӕрмӕст уый фаг нӕу. Уӕдӕ сын куыд ис Фыстады руаджы баххуыс кӕнӕн, цӕмӕй сӕ уырнындзинад рӕза?
2. Библийӕ кӕцы стихтӕ хъӕуы бакӕсын ӕмӕ сыл аныхас кӕнын?
2 Равзар, кӕцы стихтӕ кӕсдзыстут. Куы цӕттӕ кӕнай, уӕд ӕркӕс, урочы цы стихтӕ ис, уыдонӕй алкӕцыдӕр, цӕуыл дзурдзыстут, уымӕ куыд хауы. Стӕй дзы равзар, кӕй бакӕсдзыстут ӕмӕ кӕуыл аныхас кӕндзыстут, уыцы стихтӕ. Хуыздӕр уаид, цӕуыл ӕууӕндӕм, уыдон Библийыл кӕй ӕнцайынц, уый чи ӕвдисы, уыцы стихтӕ кӕсын. Уӕлӕмхасӕн ӕрмӕг цы стихты ис, уыдон ӕнӕмӕнг кӕсын нӕ хъӕуы. Хъуыды кӕн алы ахуыргӕнинагыл дӕр хицӕнӕй.
3. Фарстытӕ дӕттын хорз цӕмӕн у ӕмӕ сӕ куыд дӕттын хъӕуы?
3 Дӕтт фарстытӕ. Ахуыргӕнинагӕн стихтӕ дӕхӕдӕг ма ӕмбарын кӕн, фӕлӕ дын сӕ уадз уый ӕмбарын кӕна. Уый йын ӕнцон уыдзӕн, арӕхстджынӕй йӕм фарстытӕ куы дӕттай, уӕд. Кӕд стих ӕнцон ӕмбарӕн у, уӕд ӕм ратт хуымӕтӕг фарст, абзацимӕ куыд баст у, зӕгъгӕ. Хатт та, цӕмӕй ахуыргӕнинаг раст хатдзӕг скӕна, уый тыххӕй йӕм раттын бахъӕудзӕн бӕлвырддӕр фарст кӕнӕ цалдӕр фарсты дӕр. Кӕд ма йын ӕй бамбарын кӕнын хъӕуа, уӕд — ахуыргӕнинаг дзуапп куы радта, уый фӕстӕ.
4. Цы стихтӕ кӕсӕм, уыдон куыд ӕмбарын кӕнын хъӕуы?
4 Дӕ ныхас хуымӕтӕг уӕд. Дӕсны фатӕйӕхсӕджы арӕх иу фат йеддӕмӕ нӕ бахъӕуы, цӕмӕй мил акъуыра. Афтӕ дӕсны ахуыргӕнӕджы дӕр ахуыргӕнинагӕн цыдӕр бамбарын кӕнынӕн бирӕ ныхӕстӕ нӕ бахъӕуы. Уый ӕрмӕг ӕмбарын кӕны хуымӕтӕг ныхӕстӕй, бӕлвырд ӕмӕ раст. Цӕмӕй стихтӕ раст амонай, уый тыххӕй-иу дӕ, чи зоны, нӕ журналты ӕмӕ нӕ чингуыты ӕрмӕг бацагурын бахъӕуа (2 Тим. 2:15). Фӕлӕ дзы алы стих дӕр алывӕрсыгӕй ӕвзарын нӕ хъӕуы. Бамбарын дзы кӕн ӕрмӕстдӕр хъӕугӕ ныхӕстӕ.
5, 6. Цӕмӕй ахуыргӕнинӕгтӕ сӕ цард Хуыцауы Ныхасмӕ гӕсгӕ аразой, уый тыххӕй сын нӕ бон баххуыс кӕнын куыд у, фӕлӕ нӕ цы кӕнын нӕ хъӕуы?
5 Цардмӕ йӕ ахӕсс. Уавӕр куыд амона, уымӕ гӕсгӕ ахуыргӕнинагӕн баххуыс кӕн, цӕмӕй фена, стих уымӕн йӕхимӕ куыд хауы. Зӕгъӕм, ӕмбырдтӕм нӕма цӕуы, ӕмӕ йемӕ ныхас кӕныс Дзуттытӕм 10:24, 25. Ис ын фембӕлдтӕй иуы кой ракӕнӕн ӕмӕ йӕ уыцы фембӕлдмӕ фӕхонӕн. Фӕлӕ йын тыхдзырд ма кӕн, ӕмбырдтӕм хъуамӕ цӕуай, зӕгъгӕ. Иегъовӕйы хорзӕх ссарынӕн ӕй цы къахдзӕфтӕ кӕнын хъӕуы, уыдон ын уадз Хуыцауы Ныхас йӕхӕдӕг кӕнын кӕна (Дзут. 4:12).
6 Ахуыргӕнинӕгтӕ цӕттӕ кӕныны фӕдзӕхст ӕххӕст кӕнгӕйӕ, адӕмӕн Фыстад арӕхстджынӕй амонӕм, цӕмӕй «уырнындзинадӕн басӕттой» (Ром. 14:25).