Адӕмыл сыгъдӕгзӕрдӕйӕ тыхс – фарстытӕ сӕм дӕтт ӕмӕ сӕм хъус
1 Адӕмӕн сӕ фылдӕр ӕхсызгонӕй фӕдзурынц сӕ хъуыдытӕ, фӕлӕ сын зонд амоной, кӕнӕ сӕ хынцфарст кӕной, уый нӕ уарзынц. Уымӕ гӕсгӕ мах, хорз хабар хъусынгӕнджытӕ, хъуамӕ ахуыр кӕнӕм адӕммӕ фарстытӕ дӕттын ӕмӕ сӕ сӕ хъуыдытӕ зӕгъынмӕ разӕнгард кӕнын (Ӕмб. 20:5).
2 Нӕ фарстытӕй хъуамӕ адӕймаг ма фӕтыхса, фӕлӕ йӕ хъуамӕ ахъуыды кӕнынмӕ сразӕнгард кӕной. Хӕдзарӕй-хӕдзармӕ хъусынгӕнгӕйӕ иу ӕфсымӕр бафӕрсы: «Куыд хъуыды кӕныс, искуы ахӕм рӕстӕг уыдзӕн, ӕмӕ адӕм кӕрӕдзийӕн аргъ кӕной?». Цы дзуапп ын раттынц, уымӕ гӕсгӕ дарддӕр бафӕрсы: «Куыд дӕм кӕсы, цы хъӕуы цӕмӕй афтӕ уа?» кӕнӕ «Цӕмӕн дӕм афтӕ кӕсы?». Ӕндӕр ӕфсымӕр та, ӕнӕуи йын фадат куы фӕвӕййы, уӕд, йе та ӕхсӕнадон бынӕтты хъусынгӕнгӕйӕ, сывӕллӕттимӕ чи вӕййы, уыдоны бафӕрсы: «Сывӕллӕттӕ хъомыл кӕнгӕйӕ дын фылдӕр цин цы хӕссы?». Стӕй бафӕрсы: «Иууыл тынгдӕр та цӕуыл мӕт кӕныс?». Дӕ хъус ма ӕрдар, ацы фарстытӕ адӕймагӕн йӕ хъуыды зӕгъыны фадат кӕй дӕттынц, къуыммӕ йӕ кӕй нӕ батӕрынц. Алы ран алыхуызон ӕгъдӕуттӕ ис, ӕмӕ нӕ уый тыххӕй, чи зоны, хъӕуа нӕ фарстытӕ ӕмӕ сӕ куыд фӕдӕттӕм, уый дӕр ивын,– кӕм хъусын кӕнӕм, уымӕ гӕсгӕ.
3 Адӕмы сӕ хъуыдытӕ дзурынмӕ разӕнгард кӕн. Адӕймаг дын йӕ хъуыдытӕ куы дзура, уӕд-иу ӕм лӕмбынӕг байхъус, йӕ ныхас-иу ын ӕрдӕгыл ма аскъуын (Иак. 1:19). Йӕ хъуыды дын кӕй загъта, уый тыххӕй-иу ын раарфӕ кӕн (Кол. 4:6). Дӕ бон у зӕгъын: «Бузныг, дӕ хъуыды мын ӕргом кӕй загътай». Кӕд ӕм раппӕлинагӕй исты уа, уӕд дзы раппӕл. Хӕларзӕрдӕйӕ йӕм ӕндӕр фарстытӕ дӕр ратт, цӕмӕй бӕлвырд базонай, цы хъуыды кӕны ӕмӕ цӕмӕн. Архай, уӕ дыууӕ дӕр разы цӕуыл стут, ахӕм хъуыддагыл дзурын. Библийы стих бакӕсын дӕ куы фӕнда, уӕд дӕ бон у зӕгъын: «Искуы ахъуыды кодтай, ӕмӕ мӕнӕ амӕн гӕнӕн уыдзӕн?». Тыхдзырд ӕмӕ быцӕу ныхас ма кӕн (2 Тим. 2:24, 25).
4 Адӕймаг нын нӕ фарстытӕн цы зӕрдӕйӕ дзуапп кӕны, уый ӕнгом баст у, куыд ӕм хъусӕм, уыимӕ. Лӕмбынӕг сӕм хъусӕм ӕви нӕ, уый адӕм фӕуынынц. Иу цӕугӕ цӕстдарӕг загъта: «Адӕммӕ фӕразонӕй, зӕрдиагӕй куы хъусай, уӕд сын сӕ зӕрдӕ ссардзынӕ,– уӕд фендзысты, ӕцӕгдӕр сыл кӕй тыхсыс». Иннӕтӕм кӕй хъусӕм, уымӕй сын кад кӕнӕм. Афтӕмӕй сӕ гӕнӕн ис, ӕмӕ бафӕнда, цы хорз хабар хӕссӕм, уымӕ байхъусын (Ром. 12:10).