Ахадгӕ цӕстуынгӕ ӕрмӕгӕй пайда кӕн
1. Иегъовӕ йӕ рагон лӕггадгӕнджыты ахуыр кӕнгӕйӕ цӕстуынгӕ ӕрмӕгӕй куыд пайда кодта ӕмӕ сын уый куыд фӕахъаз?
1 Хатт-иу Иегъовӕ йӕ рагон лӕггадгӕнджытӕн ахсджиаг хабӕрттӕ ӕмбарын кодта цӕстылуайӕнты ӕмӕ фынты уылты. Зӕгъӕм, Иезекил цӕстылуайӕны федта Иегъовӕйы уӕларвон уӕрдон (Иез. 1:1–28). Данел та пехуымпарадон цӕстылуайӕны федта, дунеон паддзахӕдтӕ кӕрӕдзийы куыд ивынц, уый. Ахъуыды ма кӕн, цы банкъардтаид! (Дан. 7:1–15, 28). Ӕмӕ цы зӕгъӕн ис, апостол Иоанн цы диссаджы раргомад федта – «Хицауы бон» цытӕ хъуамӕ ӕрцыдаид, уыдӕтты тыххӕй? (Рарг. 1:1, 10, НД). Иегъовӕ сын, цаутӕ кӕрӕдзи фӕдыл ивгӕ куыд цыдысты, уый цӕстуынгӕ хуызы ирд нывты ӕвдыста, ӕмӕ сын цы бацамыдта, уый сӕ зонды арф фӕд ныууагъта.
2. Адӕмӕн Библийы ӕцӕгад амонгӕйӕ, нӕ бон цавӕр цӕстуынгӕ ӕрмӕгӕй у пайда кӕнын?
2 Кӕд нӕ фӕнды, цӕмӕй, адӕмӕн Библийӕ цы амонӕм, уый сӕ зӕрдӕты баззайа, уӕд нӕ бон у кинонывтӕй пайда кӕнын. Нӕ кинонывтӕ сты алыхуызон фарстаты фӕдыл, ӕмӕ уыдоны руаджы адӕймаг тынгдӕр баууӕнды Библийыл, Иегъовӕйы организацийыл ӕмӕ, чырыстӕттыл хорзырдӕм чи фӕзыны, уыцы уагӕвӕрдтыл. Ӕркӕсӕм, куыд ӕмӕ кӕцы кинонывтӕй ис пайда кӕнӕн.
3. Библи кӕимӕ ахуыр кӕныс, уый нӕ организациимӕ базонгӕ кӕнӕн куыд ис?
3 Уацамынды. Мыййаг, Библи кӕимӕ ахуыр кӕныс, уыимӕ нӕ организацийы тыххӕй дзурыс? Уӕд ын равдис киноныв «Иегъовӕйы Ӕвдисӕнтӕ – йӕ номмӕ гӕсгӕ архайӕг организаци». Авӕр ӕм ӕй, цӕмӕй йӕм иннӕ хаттмӕ бакӕса, йе та йӕм иумӕ бакӕсут. Стӕй ӕрныхас кӕнут, 2000 азы октябры «Нӕ хъусын кӕныны хъуыддаджы» цы фарстытӕ ис, уыдоныл.
4. Ӕрыгон Ӕвдисӕнтӕн скъолайы цавӕр ӕрмӕгӕй у сӕ бон спайда кӕнын?
4 Ӕрыгӕттӕ, уӕ бон у уӕ ахуыргӕнджытимӕ аныхас кӕнын, цӕмӕй къласы равдисат киноныв «Нацистты ӕфхӕрд нӕ басаста Иегъовӕйы Ӕвдисӕнты» кӕнӕ «Фыдӕвзарӕнты иузӕрдион. Иегъовӕйы Ӕвдисӕнтӕ Советон Цӕдисы»? Зӕгъ, дӕ бон кӕй у фарстытӕ бацӕттӕ кӕнын. Уый тыххӕй спайда кӕн 2001 азы июны кӕнӕ 2003 азы февралы «Нӕ хъусын кӕныны хъуыддаджы» мыхуыр фарстытӕй,– ис сӕ фӕивӕн дӕр, де ’мкъласонтимӕ ныхас кӕнынӕн хуыздӕр куыд уой, афтӕ.
5. Бинонты ахуыры рӕстӕг ныййарджытӕн сӕ бон цӕмӕй у пайда кӕнын?
5 Бинонтӕ ӕмӕ хӕлӕрттимӕ. Ныййарджытӕ, уӕ сывӕллӕттӕ фӕстаг хатт кӕд кастысты киноныв «Фӕсивӕды фарстытӕ. Куыд ис ссарӕн ӕцӕг хӕлӕрттӕ?» Хорз нӕ уаид, иннӕ бинонты ахуыры рӕстӕджы йӕм ногӕй куы бакӕсиккат? 2004 азы сентябры «Нӕ хъусын кӕныны хъуыддаджы» уыцы кинонывы фӕдыл цы фарстытӕ ис, уыдоны руаджы алкӕй бон дӕр уыдзӕн йӕ хъуыдытӕ сӕрибарӕй зӕгъын.
6. Де ’мбӕлттимӕ рӕстӕг хорз арвитын дӕ бон куыд у?
6 Мыййаг дӕ ӕмбырдӕй де ’мбӕлтты хӕдзармӕ фӕхонын фӕнды? Уӕд иумӕ бакӕсут кинонывмӕ, «Библи: ӕцӕг историон цаутӕ, ӕууӕнчы аккаг пехуымпарӕдтӕ», зӕгъгӕ, ӕмӕ уын уыцы рӕстӕг тынгдӕр фӕахъаз уыдзӕн, уӕлдайдӕр та, цы дзы базыдтат, уый куы равзарат, 2000 азы декабры «Нӕ хъусын кӕныны хъуыддаджы» цы фарстытӕ ис, уыдонмӕ гӕсгӕ.
7. Цавӕр фадӕттӕ ма ис нӕ кинонывтӕй спайда кӕнынӕн?
7 Ӕндӕр фадӕттӕ. Куыд ма у дӕ бон, уырыссаг ӕвзагыл цы 13 кинонывы ис, уыдонӕй пайда кӕнын? Ӕдзух кӕмӕ цӕуыс, уымӕн дзы иу-дыууӕ куы равдисай, уӕд йӕ уырнындзинад нӕ фӕфидардӕр уыдзӕн? Дӕ бон нӕу зӕрӕдты хӕдзармӕ бацӕуын ӕмӕ сын киноныв равдисын? Дӕ хӕстӕджытӕй, дӕ сыхӕгтӕй ӕмӕ де ’мкусджытӕй Ӕвдисӕн чи нӕу, уыдон уыцы кинонывтӕм куы бакӕсиккой, уӕд нӕм хуыздӕр цӕстӕй нӕ ракӕсиккой? Нӕ кинонывтӕ сты зӕрдӕмӕхъаргӕ ӕмӕ ахадгӕ цӕстуынгӕ ӕрмӕг. Пайда сӕ кӕн адӕмы ахуыр кӕнгӕйӕ.