Видеофильмтӕ ӕххуыс кӕнынц ӕцӕгад базонынӕн
1 «Нӕ лӕппу цӕуын нӕма зыдта, афтӕмӕй каст уыцы видеофильммӕ. Ныр дӕр ӕм ногӕй ӕмӕ ногӕй фӕкӕсы. Цӕй хорз у, кӕй нӕм ис ахӕм ӕрмӕг, нӕ сывӕллӕттӕн Иегъовӕйы бауарзынӕн чи ӕххуыс кӕны!» Цавӕр видеофильмы кой кодта уыцы чырыстон ныййарӕг? Уый у видеофильм «Ной — уый цыд Хуыцауимӕ» (англ.). Ӕвдисӕн чи нӕу, иу ахӕм сылгоймагӕн йӕ лӕппу кӕмӕдӕр Нойы тыххӕй видеофильммӕ куы бакаст, уӕд уыцы сылгоймаг Ӕхсӕнады филиалмӕ арвыста 90 доллӕры мысайнаг ӕмӕ бафарста, сывӕллӕттӕн ма нӕм ӕндӕр исты видеофильмтӕ ис ӕви нӕ. Иегъовӕйы организаци цы видеофильмтӕ уадзы, уыдон тынг агайынц адӕмы зӕрдӕтӕ, куыд гыццылты, афтӕ стырты дӕр.
2 Бинонты ’хсӕн. Ӕвдисӕнтӕй иу бинонтӕ куы бакастысты видеофильммӕ «Нацистты ӕфхӕрд нӕ басаста Иегъовӕйы Ӕвдисӕнты», уӕд уый фӕстӕ сӕ мад загъта: «Ӕнӕхъӕн бон ууыл хъуыды кодтон, цас тыхтӕ радта Иегъовӕ уыцы хуымӕтӕг адӕймӕгтӕн, цӕмӕй ахӕм ӕнахуыр зындзинӕдтӕн ныффӕрӕзтаиккой! Ууыл хъуыдыгӕнгӕйӕ бамбӕрстон, уыдӕттимӕ абаргӕйӕ мӕ зындзинӕдтӕ куыд ницы сты, уый. Видеофильммӕ нӕ сывӕллӕттимӕ иумӕ кӕй бакастыстӕм, уый фӕрцы уыдон ноджы хуыздӕр бамбӕрстой, куыд ахсджиаг у Иегъовӕйыл ныфс ӕвӕрын. Стӕй фильмыл кӕй аныхас кодтам, уымӕй нӕ чызджытӕн баххуыс кодтам, цӕмӕй цӕттӕ уой, царды ма цы ныхмӕдзыд ӕмӕ ӕфхӕрдыл, гӕнӕн ис, сӕмбӕлой, уыдон фӕразын».
3 Скъолайы. Иу ӕвзонг Ӕвдисӕнӕн фадат фӕцис, цӕмӕй йӕ раныхасы равдыстаид иу скъуыддзаг видеофильмӕй «Нацистты ӕфхӕрд нӕ басаста Иегъовӕйы Ӕвдисӕнты». Уый размӕ ахуыргӕнӕг дзырдта, Ӕвдисӕнтӕ йӕ зӕрдӕмӕ кӕй нӕ цӕуынц. Видеофильммӕ куы бакаст, уӕд загъта: «Ацы видеофильм мын бынтондӕр фӕивта мӕ хъуыды Иегъовӕйы Ӕвдисӕнты тыххӕй. Дзырд дӕттын, иннӕ хатт мӕм куы ӕрбацӕуой, уӕд сӕм кӕй байхъусдзынӕн ӕмӕ семӕ Библи ахуыр кӕнын кӕй райдайдзынӕн!» Цы йын фӕивта йӕ ахаст махмӕ? Йӕхӕдӕг куыд загъта, афтӕмӕй нӕ «ӕцӕг уарзондзинад ӕмӕ [нӕ] иузӕрдиондзинад».
4 Уацамынды. Нӕ хо фембӕлди иу сылгоймагыл, уый литературӕ исын нӕ фӕндыд, фӕлӕ йӕм уыдис фарстытӕ нӕ организаци ӕмӕ нӕ уырнындзинӕдты тыххӕй. Иннӕ хатт ын хо ӕрбахаста видеофильм «Иегъовӕйы Ӕвдисӕнтӕ — йӕ номмӕ гӕсгӕ архайӕг организаци» ӕмӕ йӕм уыцы сылгоймаг йӕ лӕгимӕ бакаст. Дыууӕйӕн дӕр сӕ зӕрдӕмӕ тынг фӕцыд ӕмӕ сразы сты Библи ахуыр кӕныныл. Ӕмӕ Библи ахуыргӕнгӕйӕ та райдыдтой Хуыцауы фӕндонмӕ гӕсгӕ сӕ цард ивын.
5 Нӕ видеофильмтӕй ды дӕр хорз пайда кӕныс?