Адӕмӕн ӕххуыс кӕнӕм, цӕмӕй сын ахӕстаргъ ахъаз уа
Чырыстийы мӕлӕт Ӕрымысӕн изӕр уыдзӕн 12 апрелы
1. Хуыцауы адӕм ахӕстаргъы тыххӕй бузныг кӕй сты, уый сӕ бон ӕвдисын цы хъуыддӕгтӕй у, уыдонӕй иу цавӕр у?
1 «Арфӕ Хуыцауӕн Йӕ диссаг лӕвары тыххӕй!» (2 Кор. 9:15, НФ). Ацы ныхӕстӕ хорз ӕвдисынц, Хуыцау йӕ адӕммӕ йӕ Фырт, Йесо Чырыстийы уылты цы хорздзинад ӕмӕ ӕнувыд уарзт равдыста, уымӕ цы цӕстӕй кӕсӕм, уый. Куыд бузныг дзы стӕм, уый уӕлдай тынгдӕр разындзӕн, 12 апрелы Чырыстийы мӕлӕт Ӕрымысӕн изӕрмӕ куы ӕрӕмбырд уӕм, уӕд.
2. Иегъовӕйы лӕггадгӕнджытӕй уӕлдай ма Ӕрымысӕн изӕрмӕ чи ӕрбацӕуы ӕмӕ сӕ цы хъӕуы аразын, цӕмӕй сын ахӕстаргъ ахъаз уа?
2 Иегъовӕйы лӕггадгӕнджытӕй уӕлдай ма Ӕрымысӕн изӕрмӕ алы аз дӕр ӕрбацӕуы иу-дӕс милуан адӕймаджы. Се ’рбацыдӕй уыдон равдисынц, Чырыстийы нывондӕн кӕй аргъ кӕнынц. Фӕлӕ сын цӕмӕй ахӕстаргъ ахъаз уа, уый тыххӕй йыл хъуамӕ кӕной ӕууӕндгӕ (Иоан. 3:16, 36). Ахӕм уырнындзинад сӕм фӕзына, уымӕн сын куыд баххуыс кӕнӕм? Нӕ бон сӕ у Ӕрымысӕн изӕры размӕ ӕмӕ уый фӕстӕ дӕр разӕнгард кӕнын, цӕмӕй Библи ахуыр кӕной ӕмӕ алы къуыри дӕр ӕмбырды фембӕлдтӕм цӕуой. Ӕркӕсӕм дӕлдӕр амынд уынаффӕтӕм.
3. Ӕрымысӕн изӕрмӕ кӕй хонӕм, уыдонимӕ нӕ бон куыд у Библи ахуыр кӕнын райдайын?
3 Библийы ахуыртӕ. Цымыдисгӕнаг адӕмы Ӕрымысӕн изӕрмӕ куы хонай, уӕд хорз уаид семӕ Библи ахуыр кӕнын райдайын чиныг «Библи цы дзуры?»-йӕ. Ӕрымысӕн изӕр цы нысан кӕны, уый бамбарын кӕныны тыххӕй рафӕлдах чиныджы 206–208 фӕрстӕ ӕмӕ аныхас кӕн сӕргондыл «Хицауы ӕхсӕвӕр – ацы стырбон у Хуыцауы кадӕн». Уыцы ӕрмӕг равзарӕн ис иу кӕнӕ дыууӕ бацыдӕн, суанг къӕсӕргӕрон куы ахуыр кӕнат, уӕд дӕр. Ацы ӕрмӕг куы фӕуат, уӕд адӕймаджы, чи зоны, бафӕнда аныхас кӕнын 5-ӕм сӕрыл «Ахӕстаргъ – Хуыцауы стырдӕр лӕвар». Библи иудадзыг ахуыр кӕнын куы райдайат, уӕд раздӕхӕн ис чиныджы фыццаг цыппар сӕрмӕ.
4. Ӕрымысӕн изӕры рӕстӕджы нӕ бон кӕимӕ у Библи ахуыр кӕнын райдайын?
4 Уӕлдӕр амынд уынаффӕмӕ гӕсгӕ нӕ бон кӕимӕ у Библи ахуыр кӕнын райдайын? Де ’мкусджытӕ, де ’мкъласонтӕ йе та дӕ сыхӕгтӕй искӕимӕ. Хорз уаид ӕфсымӕртӕ куы аныхас кӕниккой ӕмбырды хоты ӕнӕуырнӕг лӕгтимӕ. Фӕлӕ-иу дӕ дӕхи ӕнӕуырнӕг хӕстӕджытӕн дӕр Библи ахуыр кӕныны тыххӕй зӕгъын ма ферох уӕд. Уыимӕ ма нӕ хъӕудзӕн бацархайын, цӕмӕй Ӕрымысӕн изӕрмӕ фӕхонӕм, йӕ уырнындзинад кӕмӕн ӕрлӕмӕгъ ӕмӕ ӕмбырдтӕм чи нал цӕуы, уыдоны (Лук. 15:3–7). Цӕй уӕдӕ ӕппӕт ахӕм адӕмӕн ӕххуыс кӕнӕм, ӕмӕ сын ахӕстаргъ ахъаз уа.
5. Нӕ бон цы у бакӕнын, цӕмӕй Библи чи ахуыр кӕны кӕнӕ цымыдис чи кӕны, уыдон ӕмбырды фембӕлдтӕм цӕуой?
5 Ӕмбырды фембӕлдтӕ. Библи чи ахуыр кӕны кӕнӕ цымыдис чи кӕны, уыдонӕй бирӕтӕ фыццаг хатт кӕдӕм ӕрбацӕуынц, уый вӕййы Ӕрымысӕн изӕр. Фӕлӕ нӕ бон цы у бакӕнын, цӕмӕй ӕмбырды иннӕ фембӕлдтӕм дӕр цӕуой? 2005 азы апрелы «Нӕ хъуысын кӕныны хъуыддаджы», 8 фарсыл уыд ахӕм уынаффӕтӕ: «Зӕгъ сын, цӕуыл уыдзӕн иннӕ хатт раныхас. Равдис, „Хъахъхъӕнӕн мӕсыг“-ӕй цавӕр статья ахуыр кӕндзыстӕм ӕмӕ чиныгахуыры цы ӕрмӕг ӕвзардзыстӕм. Радзур сын, Хъусынгӕнджыты скъола ӕмӕ Хъусын кӕныны фембӕлды цы вӕййы, уый тыххӕй. Скъолайы дын хӕслӕвӕрд куы уа, уӕд сын дӕ бон у равдисын, куыд ӕй дзурдзынӕ, уый. Радзур-иу сын, фембӕлдты цы цымыдисаг хъуыдытӕ фехъуыстай, уыдон. Нӕ литературӕйы цы къамтӕ вӕййы, уыдон-иу сын равдис, цӕмӕй феной, куыд фӕцӕуынц нӕ фембӕлдтӕ. Фыццаг хатт куы ахуыр кӕнай семӕ, уӕд дӕр ӕмӕ сӕ уый фӕстӕ дӕр хон фембӕлдтӕм».
6. Сыгъдӕгзӕрдӕ адӕмӕн цавӕр дыууӕ мадзалӕй у нӕ бон баххуыс кӕнын, цӕмӕй сын ахӕстаргъ ахъаз уа?
6 Сыгъдӕгзӕрдӕ адӕм иудадзыг Библи куы фӕахуыр кӕнынц ӕмӕ ӕмбырды фембӕлдтӕм куы фӕцӕуынц, уӕд арӕх сӕ уырнындзинад тагъддӕр сфидар вӕййы. Уымӕ гӕсгӕ сӕ, цӕй ӕмӕ, разӕнгард кӕнӕм, цӕмӕй ацы уырнындзинад фидаргӕнӕн мадзӕлттӕй пайда кӕной ӕмӕ сын Хуыцауы ӕппӕты стырдӕр лӕвар – ахӕстаргъ – ахъаз уа.