Адӕмыл сыгъдӕгзӕрдӕйӕ тыхс – уӕздан у
1 «Фӕлмӕнзӕрдӕ у Хицау», Иегъовӕ (Пс. 144:8). Кӕд Дунедарӕг у, уӕддӕр ӕнӕххӕст адӕмимӕ у хӕларзӕрдӕ ӕмӕ ӕрхъуыдыджын (Уӕв. 13:14; 19:18–21, 29). Нӕ фӕлмӕнзӕрдӕ Хуыцауы куы фӕзмӕм, уӕд хорз хабар арӕхстджындӕрӕй хъусын кӕндзыстӕм (Кол. 4:6). Фӕлӕ уымӕ ӕрмӕст уӕзданӕй ныхас кӕнын нӕ хауы.
2 Хӕдзарӕй-хӕдзармӕ хъусын кӕнын. Цы кӕнгӕ нын у, хӕдзары хицауы немӕ ныхас кӕнынмӕ куы не ’вдӕла, уӕд? Ахӕм уавӕры хъуамӕ цӕттӕ уӕм нӕ хъуыды цыбыртӕй бамбарын кӕнынмӕ кӕнӕ адӕймагӕн зӕгъын, ӕндӕр хатт ӕм кӕй ӕрбацӕудзыстӕм. Мах хӕларзӕрдӕ уыдзыстӕм, адӕймаджы нӕ литературӕ куы нӕ хъӕуа, уӕд ын ӕй тыххӕй куы нӕ хъарӕм. Адӕмыл куы хъуыды кӕнӕм, уӕд ӕрхъуыдыджын уыдзыстӕм: адӕймаг нын мидӕмӕ рацу куы нӕ зӕгъа, уӕд нӕ бацӕудзыстӕм, ӕнӕфӕрсгӕйӕ ницӕмӕ ӕвналдзыстӕм ӕмӕ нӕ сывӕллӕтты дӕр ууыл ахуыр кӕндзыстӕм. Хӕдзары кӕй нӕ баййафӕм, уымӕн литературӕ ныууадздзыстӕм, иннӕтӕм кӕм нӕ зына, ахӕм ран. Уӕдӕ нӕ хӕларзӕрдӕдзинад разӕнгард кӕндзӕн, цӕмӕй нӕ нӕхицӕн куыд фӕнды, иннӕтӕн дӕр афтӕ уӕм (Лук. 6:31).
3 Уынджы хъусын кӕнгӕйӕ. Уынджы хъусын кӕнгӕйӕ нӕ уӕздандзинад бӕрӕг уыдзӕн, фӕндагыл цӕуджыты куы нӕ хъыгдарӕм, ӕмӕ дуканиты раз куы не ’мбырд кӕнӕм, уӕд. Лӕмбынӕг куы уӕм, уӕд ӕмбардзыстӕм адӕмы уавӕртӕ ӕмӕ, ӕнӕвдӕлон чи у, уыдонимӕ аныхас кӕныныл архайыны бӕсты, дзурдзыстӕм, иу гыццыл рӕстӕг кӕмӕн ис, уыдонимӕ. Уынджы хъусын кӕнгӕйӕ нӕ хатт фӕхъӕуы хъӕрдӕр дзурын, цӕмӕй нӕ фехъусой, фӕлӕ хъуамӕ нӕхицӕн аргъ кӕнын зонӕм ӕмӕ адӕмы нӕхимӕ ма ӕркӕсын кӕнӕм (Матф. 12:19).
4 Телефонӕй хъусын кӕнгӕйӕ. Адӕмыл куы хъуыды кӕнӕм, уӕд телефонӕй хъусын кӕнынӕн равзардзыстӕм, уынӕр кӕм нӕй, ахӕм ран. Ӕгъдауджын кӕй стӕм, уый бӕрӕг уыдзӕн, ныхасы райдиан адӕймагӕн нӕхи куы бацамонӕм, ӕмӕ йӕм цӕмӕн фӕдзырдтам, уый йын куы бамбарын кӕнӕм, уӕд. Комкоммӕ хӕтӕлмӕ куы дзурай ӕмӕ уӕздан ныхас куы кӕнай, уӕд адӕймагӕн ӕнцондӕр уыдзӕн Библийыл ныхас кӕнын (1 Кор. 14:8, 9). Алыхуызон уавӕрты хӕларзӕрдӕ ӕмӕ уӕздан кӕй стӕм, уӕмӕй фӕзмӕм нӕ фӕлмӕнзӕрдӕ Хуыцау Иегъовӕйы.