Иегъовӕйы диссаджы миниуджытӕн аргъ кӕнын сӕ ахуыр кӕн
1 Уацамынды адӕмӕн ӕрмӕст Библийы сӕйраг ахуырӕдтӕ нӕ амонӕм. Фӕлӕ сын ӕххуыс кӕнӕм Иегъовӕйы диссаджы миниуджытӕ базонын ӕмӕ сын аргъ кӕнын. Рӕстзӕрдӕ адӕм Хуыцауы хуыздӕр куы базонынц, уӕд сыл уый афтӕ тынг фӕзыны ӕмӕ сӕ цард аивынц, цӕмӕй «цӕрой, Иегъовӕйы раз куыд ӕмбӕлы, афтӕ, ӕмӕ йын алцӕмӕйдӕр йӕ зӕрдӕ рухс кӕной» (Колоссӕгтӕм 1:9, 10, НД; 3:9, 10).
2 Нӕ ног чиныг. Чиныг «Библи бӕлвырдӕй цы дзуры» нын суанг райдианӕй не ’ргом здахы Иегъовӕйы миниуджытӕм. Фыццаг сӕры ис дзуаппытӕ ахӕм фарстытӕн: «Хуыцау ныл тыхсы? Хуыцау цыхуызӕн у? Уый гӕнӕн ис, ӕмӕ Хуыцаумӕ баввахс уай?» Уыцы сӕр ма Иегъовӕйы миниуджыты тыххӕй дзуры, зӕгъгӕ, Хуыцау у сыгъдӕг (10 абз.), рӕстдзинад уарзаг ӕмӕ тӕригъӕдгӕнаг (11 абз.), уарзӕгой (13 абз.), хъаруджын (16 абз.), фӕлмӕнзӕрдӕ ӕмӕ хӕларзӕрдӕ, хатыр кӕнынмӕ цӕттӕ, бирӕбыхсаг ӕмӕ иузӕрдион (19 абз.). 20 абзацы ис хатдзӕг: «Иегъовӕйы тыххӕй цас фылдӕр зонай, уыйас хуыздӕр ӕмбардзынӕ, удӕгас Хуыцау кӕй у. Ӕмӕ дын удӕгас Хуыцауы уарзын та ӕнцондӕр уыдзӕн, куыд ӕввахс дӕм у, уый тынгдӕр хатдзынӕ».
3 Нӕ бон куыд у чиныгӕй «Библи цы дзуры», зӕгъгӕ, пайда кӕнын, цӕмӕй, кӕимӕ ахуыр кӕнӕм, уыдон Иегъовӕмӕ ӕввахсдӕр кӕной? Иегъовӕйы миниуджытӕй кӕцыдӕрыл дзырд кӕм цӕуы, уыцы сӕр куы равзарӕм, уӕд кӕимӕ ахуыр кӕнӕм, уый афӕрсӕн ис: «Иегъовӕ цавӕр Хуыцау у, уый тыххӕй цы базыдтай?» кӕнӕ «Уый куыд ӕвдисы, Хуыцау дӕуыл кӕй мӕт кӕны?» Рӕстӕгӕй-рӕстӕгмӕ сӕм ахуыры афон ахӕм фарстытӕ куы дӕттӕм, уӕд сахуыр уыдзысты, цы базыдтой, ууыл хъуыды кӕнын ӕмӕ Иегъовӕйы диссаджы миниуджытӕн тынгдӕр аргъ кӕндзысты.
4 Фӕлгӕтӕй пайда кӕн. Алы сӕры фӕстӕ дӕр-иу ахуыргӕнинагӕн зӕгъ, цӕмӕй йӕ хъуыдытӕ зӕгъа фӕлгӕт «Цы зӕгъы Библи»-йы цы фыст ис, уый фӕдыл. Йе ’ргом ын здах, цы стихтӕ дзы ис, уыдонмӕ. Цӕмӕй ӕцӕгдӕр цӕуыл хъуыды кӕны, уый зӕгъа, уый тыххӕй йӕ дӕ бон у бафӕрсын: «Цы хъуыды кӕныс, Библи ацы фарсты тыххӕй цы дзуры, уый фӕдыл?» Афтӕ куы кӕнай, уӕд, цы сӕр рацыдыстут, ӕрмӕст уый сӕйраг хъуыдытӕ нӕ бахахх кӕндзынӕ, фӕлӕ ма уындзынӕ, ахуыргӕнинаг ӕцӕгӕйдӕр цӕуыл ӕууӕнды. Уый ахуыргӕнинагӕн ӕххуыс кӕндзӕн Иегъовӕмӕ ӕввахсдӕр кӕнынӕн.