Баххуыс кӕнынмӕ цӕттӕ у, ӕмӕ арфӕгонд уай
1. Давид ӕмӕ Нееми баххуыс кӕнынмӕ цӕттӕ кӕй уыдысты, уый куыд равдыстой?
1 Голиаф Израилы ӕфсӕддонтӕй куы хынджылӕг кодта, уӕд алы ӕфсӕддонӕн дӕр йӕ бон уыд йемӕ схӕцын. Фӕлӕ уымӕ йӕ ныфс бахаста хуымӕтӕг фыййау-лӕппу (1 Пад. 17:32). Дзуттӕгтӕ уацарӕй ӕрыздӕхтысты Иерусалимы къултӕ ногӕй самайынмӕ, фӕлӕ сын ницы бантыст. Ӕмӕ уӕд Персы паддзахы сӕндар йӕ кадджын бынат ныууагъта ӕмӕ Иерусалиммӕ ӕрцыд, цӕмӕй хъуыддӕгтӕ йӕхимӕ райстаид (Неем. 2:5). Давид ӕмӕ Нееми цы зӕрдӕйы уаг равдыстой, уый тыххӕй сын Йегъовӕ раарфӕ кодта (1 Пад. 17:45, 50; Неем. 6:15, 16).
2. Чырыстӕттӕ иннӕтӕн цӕмӕн ӕххуыс кӕнынц?
2 Баххуыс кӕнынмӕ цӕттӕ чи у, ахӕмтӕ ацы дунейы бирӕ нӕй. «Фӕстаг бонты» адӕм систы тынг ӕнӕвдӕлон, бирӕтӕ та – «хиуарзон» (2 Тим. 3:1, 2). Ахӕм уавӕрты адӕймаг ӕрмӕст йӕхи уды мӕт кӕнын райдайы. Ӕмӕ уӕд нал фӕуыны, йӕ бон иннӕтӕн куыд ӕмӕ цӕмӕй у баххуыс кӕнын, уый. Фӕлӕ мах, чырыстӕттӕ, фӕзмӕм Йесойы. Уый-иу йӕхӕдӕг фӕраздӕр ӕмӕ-иу иннӕтӕн баххуыс кодта (Иоан. 5:5–9; 13:12–15; 1 Пет. 2:21). Нӕ бон куыд у афтӕ ӕххуыс кӕнын ӕмӕ нын Хуыцау куыд арфӕ кӕндзӕн?
3. Нӕ бон куыд у ӕмбырдты ӕххуыс кӕнын?
3 Ӕххуыс кӕнӕм не ’фсымӕртӕн. Нӕ бон у иннӕтӕн, «сӕ уырнындзинадӕн ахъаз чи фӕуыдзӕн, уыцы хорздзинӕдтӕй хай кӕнын» – ӕмбырдты дзуаппытӕ дӕттын (Ром. 1:11). Нӕ дзуаппытӕй кадджын кӕнӕм Йегъовӕйы, ӕцӕгдзинад нӕ зонды ӕмӕ нӕ зӕрдӕты тынгдӕр фидар кӕны, ӕмӕ ма нын ӕмбырдтӕ фылдӕр цин хӕссынц (Пс. 25:12). Нӕ бон ма баххуыс кӕнын вӕййы, Хуыцауы Ныхас хъусынгӕнджыты скъолайы искӕй баивын куы бахъӕуы, уӕд дӕр. Уый нӕхицӕн дӕр баххуыс кӕндзӕн, цӕмӕй хуыздӕр ахуыргӕнджытӕ суӕм.
4. Нӕ бон иннӕтӕн цӕмӕй у ӕххуыс кӕнын?
4 Ӕфсымӕртӕн ма сӕ бон у ӕмбырды фылдӕр хӕстӕм тырнын дӕр (Ис. 32:2; 1 Тим. 3:1). Алкӕй бон дӕр у конгрессты алыхуызон хъуыддӕгты баххуыс кӕнын, цӕмӕй ӕнӕкъуылымпыйӕ цӕуой. Районон цӕстдарӕгимӕ уацамынды куы фӕцӕуӕм кӕнӕ йӕ сихор бахӕрынмӕ куы фӕхонӕм, уӕд кӕрӕдзийы бафидар кӕнӕм (Ром. 1:12). Ӕмбырды сидзӕртӕн, идӕдзтӕн, рынчынтӕн, гыццыл сывӕллӕттӕ кӕмӕн ис, ахӕм мадӕлтӕн ӕмӕ иннӕтӕн хъуыддагӕй куы ’ххуыс кӕнӕм, уӕд нӕхицӕн дӕр ӕхсызгон уыдзӕн ӕмӕ Йегъовӕйы хорзӕх дӕр ссардзыстӕм (Ӕмб. 19:17; Ап. хъ. 20:35).
5. Паддзахады залтимӕ баст хъуыддӕгты нӕ бон цӕмӕй у фӕкӕсын?
5 Нӕ бон ма у нӕ хъарутӕ дӕттын Паддзахады зал ӕфснайынмӕ ӕмӕ йӕм зилынмӕ. Стӕй ӕмбырдтӕ кӕй фылдӕр кӕнынц, уымӕ гӕсгӕ хъӕуы фылдӕр залтӕ аразын ӕмӕ уыцы хъуыддаджы баххуыс кӕнынмӕ цӕттӕ чи у, ахӕм адӕм. Иу лӕг ӕмӕ ус сфӕнд кодтой Паддзахады залтӕ аразджыты къордӕн ӕххуыс кӕнын, кӕд аразджытӕ нӕ уыдысты, уӕддӕр. Рӕстӕг рацыд, ӕмӕ сахуыр сты амайын. Нӕ хо загъта: «Иннӕтимӕ уӕхски-уӕхск кӕй фӕкусӕм, уый руаджы семӕ хорз хӕлӕрттӕ свӕййӕм. Кӕд изӕрмӕ бафӕллайӕм, уӕддӕр зӕрдӕрухсӕй баззайӕм».
6. Хъусын кӕнын ӕппӕты ахсджиагдӕр куыст цӕмӕн у?
6 Уацамынды. Уӕлдай тынгдӕр нӕ бон у нӕ хъарутӕ саразын ӕппӕты ахсджиагдӕр куыстмӕ – Хуыцауы Паддзахады тыххӕй хъусын кӕнынмӕ. Адӕмӕн куы баххуыс кӕнӕм Библийы уынаффӕтӕ бамбарын ӕмӕ сӕ пайда кӕнын, уӕд сӕ цард дзӕгъӕлы нал вӕййы ӕмӕ се ’взӕр хъуыддӕгтӕ ныууадзынц. Фидӕнӕй сын стыр ныфс фӕзыны. Хуыцауы Ныхас сын кӕй амонӕм, уый сын ӕрхӕсдзӕн ӕнусон хорздзинӕдтӕ (Иоан. 17:3; 1 Тим. 4:16). Чи зоны, нӕ уавӕртӕм гӕсгӕ нӕ бон у ӕххуысгӕнӕг, йе та ӕххӕстрӕстӕг пионерӕй лӕггад кӕнын, кӕнӕ та фылдӕр хъусынгӕнджытӕ кӕм хъӕуы, уырдӕм ацӕуын, науӕд ӕндӕр ӕвзаг сахуыр кӕнын.
7. Баххуыс кӕнынмӕ цӕттӕ уӕм, уый абон уӕлдай ахсджиаг цӕмӕн у?
7 Давид загъта, Мессийӕ Паддзах куы суа, уӕд Хуыцауы адӕм цӕттӕ кӕй уыдзысты алы хъуыддагмӕ дӕр (Пс. 109:3). Кӕд хъусын кӕныны хъуыддаг Йегъовӕ фӕтагъддӕр кодта, уӕддӕр ма бирӕ куыст ис (Ис. 60:22). Дӕ бон у зӕгъын: «Мӕнӕ ӕз! Мӕн арвит»? (Ис. 6:8). Ӕцӕгдӕр, баххуыс кӕнынмӕ цӕттӕ куы уӕм, уӕд кадджын кӕндзыстӕм Йегъовӕйы ӕмӕ бирӕ хорздзинӕдтӕй хайджын уыдзыстӕм.