Алы бон дӕр кадджын кӕн Йегъовӕйы
1. Хуыцауы лӕггадгӕнджытӕ цы хъуамӕ аразой ӕмӕ цӕмӕн?
1 Паддзах Давиды фӕндыд Йегъовӕйы «ӕнӕхъӕн бон» кадджын кӕнын, суанг ӕнусӕй-ӕнустӕм дӕр (Пс. 145:2, 7, 21). Мах дӕр зонӕм, Йегъовӕйы алы бон дӕр цӕй тыххӕй хъуамӕ кадджын кӕнӕм, бирӕ ахӕм хъуыддӕгтӕ (Пс. 37:10; 145:14, 18; 2 Пет. 3:13).
2. Бинонтӕн сӕ бон куыд у алы бон дӕр Йегъовӕйы кадджын кӕнын?
2 Хӕдзары. Махӕн ис, чи нӕ фидар кӕны, ахӕм литературӕ, ӕмӕ уый фӕрцы нӕ бон у Хуыцау ӕмӕ Библийыл ныхас кӕнын, алы бон дӕр стих куы февзарӕм, нӕ бинонтимӕ Библи куы фӕахуыр кӕнӕм ӕмӕ нӕхи ӕмбырдтӕм куы фӕцӕттӕ кӕнӕм, уӕд. Бирӕ бинонтӕ алы бон дӕр, ӕппынкъаддӕр, иу хатт хӕрды афон хӕдзары иумӕ ӕрӕмбырд вӕййынц. Афтӕмӕй сӕ бон вӕййы аныхас кӕнын ӕмӕ Йегъовӕйы кадджын кӕнын. Уый фӕрцы ныййарджытӕн сӕ бон у сӕ сывӕллӕтты «хъомыл кӕнын, Йегъовӕ куыд амоны, афтӕ, ӕмӕ сӕ йӕ зондыл аразын» (Еф. 6:4; Дык. з. 6:5–7).
3. Цавӕр фадат нын вӕййы, не ’мчырыстӕтты ӕхсӕн куы вӕййӕм, уӕд?
3 Не ’мчырыстӕтты ӕхсӕн. Уацамынды кӕнӕ ӕмбырды куы вӕййӕм, уӕд нын диссаджы фадат вӕййы нӕ хотӕ ӕмӕ не ’фсымӕртимӕ Йегъовӕйы кадджын кӕнынӕн (Ӕмб. 15:30; Фил. 4:8; Дзут. 13:15). Не ’ппӕт дӕр Йегъовӕйы кӕй уарзӕм, уымӕ гӕсгӕ нӕ фӕфӕнды кӕрӕдзийӕн дзурын, хӕларзӕрдӕ кӕй у, уымӕн кӕй аргъ кӕнӕм, уый тыххӕй (Пс. 106:1).
4. Цавӕр фадӕттӕ нын ис Йегъовӕйы кадджын кӕнынӕн?
4 Иннӕтимӕ ныхас кӕнгӕйӕ. Кӕд нын фадат нӕй, цӕмӕй алы бон дӕр уацамынды цӕуӕм, уӕддӕр не ’мкусджытимӕ, не ’мкъласӕгтимӕ ӕмӕ кӕуыл ӕмбӕлӕм, уыдонимӕ иугыццыл Йегъовӕйы ӕмӕ йӕ фӕндты тыххӕй куы ныхас кӕнӕм, уӕд сыгъдӕгзӕрдӕ адӕммӕ фидӕнӕй ныфс фӕзындзӕн (Пс. 27:14; 1 Пет. 3:15). Самолетыл тӕхгӕйӕ нӕ хо хорз хабар радзырдта, йӕ фарсмӕ чи бадти, уыцы сылгоймагӕн. Уыцы ныхас сылгоймаджы афтӕ бафидар кодта, ӕмӕ нӕ хойӕн радта йӕ адрис ӕмӕ йӕ телефоны номыртӕ, цӕмӕй ма уый фӕстӕ фембӕлдаиккой. Кӕд ацы дунейы уавӕртӕ бонӕй-бонмӕ фыддӕр кӕнынц, уӕддӕр Йегъовӕйы адӕм дарддӕр дзурынц, байхъусын кӕй фӕнды, уыдонӕн, «хуыздӕр цыдӕр кӕй уыдзӕн, уый тыххӕй хорз хабар». Уый фӕрцы уыдонмӕ дӕр фӕзыны ныфс ӕмӕ сӕ бафӕнды Йегъовӕйы кадджын кӕнын (Ис. 52:7; Ром. 15:11).
5. Йегъовӕйы кадджын кӕнын нӕ цӕмӕн фӕнды ӕмӕ нын уый фӕрцы цы бантысдзӕн?
5 Куыд фӕцин кӕны Йегъовӕ, йӕ лӕггадгӕнджытӕ йӕ алы бон дӕр куыд кадджын кӕнынц, уый уынгӕйӕ! Йе сконд дуне йӕ куыд кадджын кӕны, афтӕ махӕн дӕр ис фадат, цӕмӕй йӕ алы бон дӕр кадджын кӕнӕм хӕдзары, ӕмбырды ӕмӕ йын нырма чи нӕ лӕггад кӕны, уыцы адӕмимӕ ныхас кӕнгӕйӕ (Пс. 19:1–4).