Нӕлгоймӕгтӕн хъусын кӕнӕм
1. Цӕмӕй Хуыцауы Паддзахады хъуыддаг размӕ цӕуа, уый тыххӕй кӕй ӕххуыс хъӕуы?
1 Ацы фӕстаг бонты Хуыцауы Паддзахады хъуыддаг размӕ кӕй цӕуы, уымӕ гӕсгӕ тынг хъӕуы фӕлтӕрдджын нӕлгоймӕгты ӕххуыс (Марчы 4:30–32; Ап. хъ. 20:28; 1 Тим. 3:1–13). Фӕлӕ кӕмдӕрты хорз хабармӕ фылдӕр сылгоймӕгтӕ хъусынц. Иуӕй-иу адӕмтӕм та нӕлгоймаг йӕ усы бар бакӕны, цӕмӕй сывӕллӕтты Хуыцауы хъуыддӕгтыл ахуыр кӕна. Нӕ бон куыд у нӕлгоймӕгтӕн баххуыс кӕнын, цӕмӕй бамбарой, ӕнӕ Хуыцауӕй цӕрӕн кӕй нӕй, ӕмӕ йын лӕггад кӕнын райдайой?
2. Павел ӕмӕ Петр нӕлгоймӕгтӕн кӕй хъусын кодтой, уый фӕрцы сын цы бантыст?
2 Фылдӕр хъусын кӕнӕм нӕлгоймӕгтӕн. Нӕлгоймаг хорз хабармӕ куы байхъусы, уӕд арӕх йӕ бинонтӕ дӕр Хуыцауӕн лӕггад кӕнын райдайынц. Зӕгъӕм, Павел ӕмӕ Силӕ ахӕстоны куы уыдысты, уӕд хъусын кодтой ахӕстонгӕсӕн. Уый фӕрцы уыцы нӕлгоймаг ӕмӕ йӕ бинонтӕ се ’ппӕт дӕр донаргъуыд райстой (Ап. хъ. 16:25–34). Павел Коринфы куы хъусын кодта, уӕд Крисп, «ӕмбырдгӕнӕны хистӕр, ӕмӕ йӕ хӕдзаронтӕ иууылдӕр баууӕндыдысты Хицауыл» (Ап. хъ. 18:8). Йегъовӕ Петры сразӕнгард кодта, цӕмӕй хорз хабар радзырдтаид ӕфсады къорды хицау Корнилийӕн, Хуыцауӕй чи тарст ӕмӕ йыл ӕнувыд чи уыд, ахӕм адӕймагӕн. Ӕмӕ Корнилий, йӕ бинонтӕ ӕмӕ йе ’мбӕлттӕ донаргъуыд райстой (Ап. хъ. 10:1–48).
3. «Стыр бынӕттӕ чи ахсы», уыдонӕй нӕ бон кӕмӕн у хъусын кӕнын ӕмӕ ацы хъуыддаджы Филиппы куыд фӕзмӕм?
3 «Стыр бынӕттӕ чи ахсы», ахӕм нӕлгоймӕгтӕн куы хъусын кӕнӕм, уӕд нӕ къухы бирӕ хорз хъуыддӕгтӕ бафтдзӕн (1 Тим. 2:1, 2). Зӕгъӕм, Йегъовӕйы зӕд Филиппӕн загъта, цӕмӕй аныхас кодтаид ефиопаг хицауимӕ. Уыцы адӕймаджы бар уыдысты «Ефиопийы ус-паддзахы хӕзнатӕ иууылдӕр». Филипп фехъуыста, уыцы лӕг «пехуымпар Исайы чиныг» куыд каст, уый ӕмӕ йын «Йесойы тыххӕй хорз хабар бамбарын кодта». Ефиопаг хицау Чырыстийы ахуыргӕнинаг сси ӕмӕ, ӕвӕццӕгӕн, ӕнӕхъӕн фӕндаг хорз хабар хъусын кодта. Чи зоны ма хъусын кодта йӕ паддзахӕн ӕмӕ йын чи лӕггад кодта, уыдонӕн дӕр. Уыцы адӕмӕн хорз хабар фехъусынӕн ӕндӕр фадат нӕ уыд (Ап. хъ. 8:26–39).
4. Нӕ бон куыд у нӕлгоймӕгтӕн хорз хабар хъусын кӕнын?
4 Фылдӕр нӕлгоймӕгтӕ кӕм вӕййы, уым хъусын кӕнӕм. Нӕлгоймӕгтӕ арӕхдӕр куысты кӕй вӕййынц, уымӕ гӕсгӕ дӕ бон нӕу дӕ график афтӕ саразын, цӕмӕй уацамынды цӕуай изӕрыгӕтты, улӕфгӕ бонты кӕнӕ бӕрӕгбӕтты рӕстӕг? Алыхуызон куыстуӕттӕ кӕм ис, ахӕм территорийы арӕх куы хъусын кӕнай, уӕд дын хорз фадат уыдзӕн, хӕдзары кӕй нӕ баййафыс, уыцы нӕлгоймӕгтимӕ ныхас кӕнынӕн. Ӕфсымӕртӕн ма сӕ бон у сӕ куысты дӕр нӕлгоймӕгтӕн хъусын кӕнын. Хӕдзарӕй хӕдзармӕ хъусын кӕнгӕйӕ (уӕлдайдӕр арӕх кӕм фӕхъусын кӕнынц, уыцы участокты), ӕфсымӕртӕн иуӕй-иу хатт сӕ бон у нӕлгоймӕгтӕм бадзурын, цӕмӕй семӕ аныхас кӕной.
5. Уацамынды хомӕ нӕлгоймаг хорз куы байхъуса, уӕд ӕй куыд бакӕнын хъӕуы?
5 Уацамынды хомӕ нӕлгоймаг хорз куы байхъуса, уӕд ӕм дыккаг хатт иунӕгӕй хъуамӕ ма бацӕуа. Йӕ бон ӕм у йӕ лӕгимӕ кӕнӕ ӕндӕр хъусынгӕнӕгимӕ бацӕуын. Нӕлгоймаджы фылдӕр базонын куы фӕнда, уӕд хуыздӕр уыдзӕн йӕ адрис фӕлтӕрдджын ӕфсымӕрмӕ раттын, цӕмӕй йӕм уый цӕуа.
6. Апостол Павелау махӕн дӕр нӕ бон куыд у «фылдӕр адӕмы зӕрдӕтӕм фӕндаг ссарын»?
6 Нӕлгоймӕгты цы цымыдис кӕны, ууыл ныхас кӕнӕм. Апостол Павел йӕ ныхас арӕзта, чи йӕм хъуыста, уыдоны уавӕртӕм гӕсгӕ, цӕмӕй «фылдӕр адӕмы зӕрдӕтӕм фӕндаг ссардтаид» (1 Кор. 9:19–23). Мах дӕр-иу хъуамӕ ахъуыды кӕнӕм, цӕуыл ныхас кӕндзыстӕм, ууыл, цӕмӕй-иу нӕм нӕлгоймӕгтӕ байхъусой. Зӕгъӕм, нӕлгоймӕгтӕ арӕх фӕныхас кӕнынц экономикӕйы ӕвзӕр уавӕрыл, хицауады тыххӕй, фӕтыхсынц сӕ бинонты ӕдасдзинадыл, кӕнӕ фӕхъуыды кӕнынц, адӕймаг цӕмӕн цӕры, зӕхх ма цӕрынӕн сбӕздзӕн ӕви нӕ ӕмӕ Хуыцау зындзинӕдтӕн кӕрон цӕуылнӕ скӕны. Лӕмбынӕг куы хъуыды кӕнӕм, нӕлгоймӕгтимӕ цӕуыл ныхас кӕнӕм, ууыл, уӕд нӕм хуыздӕр хъусдзысты (Ӕмб. 16:23).
7. Нӕ хоты ӕнӕуырнӕг лӕгтӕй ӕмбырдмӕ чи ’рбацӕуы, уыдонӕн нӕ алкӕй бон дӕр куыд у баххуыс кӕнын?
7 Хоты ӕнӕуырнӕг лӕгтӕн хъусын кӕнӕм. Нӕ хоты хорз уаг ӕмӕ ӕгъдау арӕх хорзырдӕм фӕзыны сӕ лӕгтыл. Фӕлӕ сын ӕмбырды алкӕй бон дӕр у ӕххуыс кӕнын (1 Пет. 3:1–4). Ӕнӕуырнӕг лӕг йӕ бинойнагимӕ ӕмбырдмӕ куы ’рбацӕуа ӕмӕ йыл зӕрдиагӕй куы бацин кӕной, уӕд ыл уый дӕр тынг фӕзындзӕн. Кӕй ӕрбацыд, уымӕй бӕрӕг у, Хуыцауы хабӕрмӕ куыдфӕндыйы цӕстӕй кӕй нӕ кӕсы ӕмӕ, чи зоны, Библи ахуыр кӕныныл дӕр сразы уа.
8. Хотӕн се ’нӕуырнӕг лӕгтӕй хорз хабармӕ иу гыццылдӕр чи хъусы, уыдонӕн ӕфсымӕрты бон куыд у баххуыс кӕнын?
8 Иуӕй-иу лӕгты райдианы тынг нӕ фӕфӕнды Хуыцауы хабармӕ хъусын, фӕлӕ сӕ фӕстӕдӕр бафӕнды аныхас кӕнын, хуыздӕр цы ӕфсымӕры зонынц, уыимӕ. Иу ӕмбырды ӕфсымӕртӕ баныхас кодтой, искуы иу хатт иу хойы ӕнӕуырнӕг лӕгимӕ кӕй ныхас кӕндзысты, цы хабӕрттыл уарзы дзурын, уыдӕттыл. Фӕстагмӕ райдыдтой Хуыцауы тыххӕй ныхас кӕнын ӕмӕ ныр уыцы нӕлгоймаг у не ’фсымӕр. Иу ӕфсымӕр та нӕ хойы ӕнӕуырнӕг лӕгмӕ йӕ хӕдзары алыварс забор аразынмӕ фӕкаст. Уыцы хабары фӕстӕ нӕлгоймаг Библи ахуыр кӕныныл сразы (Гал. 6:10; Фил. 2:4). Кӕд ды дӕр донаргъуыд ӕфсымӕр дӕ, уӕд дӕ бон нӕ уаид иу кӕнӕ цалдӕр ахӕм нӕлгоймагӕн хъусын кӕнын?
9. Нӕлгоймӕгтӕн куы ’ххуыс кӕнӕм, уӕд уый цӕмӕ ӕркӕндзӕн?
9 Ӕфсымӕртӕн ӕххуыс кӕнут, цӕмӕй фидӕны сӕ бон уа ӕмбырды хъуыддӕгты архайын. Хорз хабармӕ чи байхъуыста ӕмӕ Йегъовӕйӕн лӕггад кӕнын чи райдыдта, уыцы нӕлгоймӕгтӕ, чи зоны, фидӕны суой хистӕр нӕлгоймӕгтӕ. Хистӕр нӕлгоймӕгты Библи хоны «лӕвӕрттӕ», уыдон ӕмбырдӕн ӕппӕт хъарутӕй лӕггад кӕнынц (Еф. 4:8; Пс. 68:18). Ахӕм фыййӕуттӕ хотӕ ӕмӕ ӕфсымӕртӕн фӕлӕггад кӕнынц зӕрдиагӕй ӕмӕ ӕнӕзивӕгӕй (1 Пет. 5:2, 3). Ӕнӕхъӕн ӕмбырдӕн дӕр вӕййынц стыр ӕххуыс!
10. Анани Павелӕн кӕй баххуыс кодта, уый бирӕтӕн цы пайда ӕрхаста?
10 Зӕгъӕм, Савл хорз хабар хъусын кодта иннӕ адӕмыхӕттытӕн, кӕд раздӕр чырыстӕтты карзӕй ӕфхӕрдта, уӕддӕр (Ром. 11:13). Уый тыххӕй ахуыргӕнинаг Ананийы нӕ фӕндыд Савлӕн хъусын кӕнын. Фӕлӕ Анани Чырыстимӕ байхъуыста ӕмӕ йемӕ аныхас кодта. Павел бирӕ азты дӕргъы хъусын кодта ӕмӕ баххуыс кодта мингай адӕмӕн. Йӕ фыстӕджытӕ йын Библийы чи каст ӕмӕ сӕ абон дӕр чи кӕсы ӕмӕ пайда кӕмӕн хӕссынц, уыдон та сты милуантӕ (Ап. хъ. 9:3–19; 2 Тим. 3:16, 17).
11. Нӕлгоймӕгтӕн хъусын кӕныныл зӕрдиагӕй цӕмӕн хъуамӕ архайӕм?
11 Уӕдӕ нӕ бон цы у, уый аразӕм, куы хъӕуа, уӕд-иу нӕ уацамынды график дӕр фӕивӕм, цӕмӕй нӕлгоймӕгтӕн хъусын кӕнӕм. Нӕлгоймӕгтӕн хъусын кӕныныл куы архайӕм, уӕд нын Йегъовӕ ӕнӕмӕнгдӕр арфӕ кӕндзӕн, йӕ фӕндон ын зӕрдиагӕй кӕй ӕххӕст кӕнӕм, уый тыххӕй.