Дӕ бон у не ’мчырыстӕтты ӕнӕуырнӕг цардӕмбӕлттӕн ӕххуыс кӕнын?
1. Сӕ цардӕмбӕлттӕ уырнӕг кӕмӕн не сты, уыцы хотӕ ӕмӕ ’фсымӕртӕй уӕлдай ма кӕй фӕнды, цӕмӕй уыдон дӕр рӕстдзинад базоной?
1 Ӕвӕццӕгӕн, уе ’мбырды дӕр ахӕм хотӕ ӕмӕ ’фсымӕртӕ ис, сӕ цардӕмбӕлттӕ Йегъовӕйы Ӕвдисӕнтӕ кӕмӕн не сты. Кӕй зӕгъын ӕй хъӕуы, уыдоны тынг фӕнды, цӕмӕй се ’мкъӕйттӕ рӕстдзинад базоной. Фӕлӕ уымӕ ӕрмӕст уыдон нӕ бӕллынц. Ӕнӕхъӕн ӕмбырды дӕр, Хуыцауы куыд фӕнды, афтӕ фӕнды, цӕмӕй «алыхуызон адӕм, рӕстдзинад цы у, уый бӕлвырдӕй базоной ӕмӕ фервӕзой» (1 Тим. 2:4). Уӕдӕ нӕ хоты ӕмӕ не ’фсымӕрты ӕнӕуырнӕг цардӕмбӕлттӕн рӕстдзинад базонынӕн куыд баххуыс кӕнӕм?
2. Ӕмбаргӕ куы уӕм, уӕд уый фӕрцы нӕ хоты ӕмӕ не ’фсымӕрты цардӕмбӕлттӕн куыд ӕххуыс кӕндзыстӕм?
2 Фыццаджыдӕр, бацархайӕм нӕхи ӕнӕуырнӕг адӕймаджы бынаты сӕвӕрыныл. Ӕнӕуырнджытӕй бирӕтӕ сӕ бинонты уарзынц ӕмӕ сӕ фӕнды, цӕмӕй уой хорз лӕгтӕ кӕнӕ устытӕ, стӕй сӕ сывӕллӕттӕн хорз ныййарджытӕ. Фӕлӕ уыдоны цы уырны, уый хицӕн кӕны, мах цӕуыл ӕууӕндӕм, уымӕй. Гӕнӕн ис, Йегъовӕйы Ӕвдисӕнты зонынц, уарзгӕ нӕ чи нӕ кӕны, йе та нӕ хорз чи нӕ зоны, ӕрмӕстдӕр уыдоны ныхӕстӕм гӕсгӕ. Кӕйдӕр зӕрдӕмӕ та нӕ цӕуы, йӕ цардӕмбал йӕ дины тыххӕй ныр йӕ бинонтимӕ къаддӕр рӕстӕг кӕй вӕййы, уый. Ӕмбаргӕ куы уӕм, уӕд нӕ хо кӕнӕ не ’фсымӕры цардӕмбалӕн аргъ кӕндзыстӕм, уыдзыстӕм фӕлмӕн ӕмӕ йӕм нӕ мӕсты кӕндзыстӕм (Ӕмб. 16:20–23).
3. Ӕнӕуырнӕг адӕймагӕн рӕстдзинад базонынӕн сӕйраджыдӕр цы баххуыс кӕны?
3 Адӕймаг хъуамӕ уына, кӕй йыл хъуыды кӕнӕм. Цӕмӕй адӕймаг рӕстдзинад базона, уый тыххӕй райдианы сӕйрагдӕр вӕййынц нӕ хъуыддӕгтӕ, Библийы кой йын кӕй фӕкӕнӕм, уый нӕ, фӕлӕ (1 Пет. 3:1, 2). Ацы хъуыддаджы ахсджиаг у, цӕмӕй адӕймаг уына, кӕй йыл хъуыды кӕнӕм, уый. Хотӕн сӕ бон у, ӕмӕ хуыздӕр базонгӕ уой ӕфсымӕры ӕнӕуырнӕг усимӕ, ӕфсымӕртӕн та – хойы ӕнӕуырнӕг лӕгимӕ. Уый сӕ къухы куыд бафтдзӕн?
4. Адӕймагыл кӕй хъуыды кӕнӕм, уый нӕ бон равдисын куыд у?
4 Чи зоны, уе ’мбырды кӕйдӕр ӕнӕуырнӕг цардӕмбалы нӕма зоныс. Цалынмӕ йемӕ нӕ базонгӕ уай, уӕдмӕ уал ӕфсымӕр кӕнӕ хойӕн йӕхиимӕ аныхас кӕн. Йе ’нӕуырнӕг цардӕмбал дыл фыццаг куы нӕ бацин кӕна, уӕд-иу дӕм уый хъыг ма фӕкӕсӕд. Хӕларзӕрдӕ кӕй стӕм ӕмӕ йыл кӕй хъуыды кӕнӕм, уый куы уына, уӕд, чи зоны, Йегъовӕйы Ӕвдисӕнтӕм хуыздӕр цӕстӕй кӕсын райдайа (Ром. 12:20). Иуӕй-иу фӕлтӕрд чырыстӕттӕ ӕнӕуырнӕг адӕймаджы ӕмӕ йын йӕ бинонты сӕхимӕ фӕхонынц, цӕмӕй хуыздӕр базонгӕ уой ӕмӕ кӕд, мыййаг, Йегъовӕйы Ӕвдисӕнтӕм хорз цӕстӕй нӕ кӕсы, уӕд йӕ хъуыды фӕива. Уыцы адӕймагимӕ ныхас фӕкӕнынц, йӕ зӕрдӕмӕ цы цӕуы, уыдӕттыл, Хуыцау ӕмӕ йын дины кой нӕ фӕкӕнынц, фӕлӕ. Фӕстӕдӕр, кӕрӕдзи хуыздӕр куы базонынц, уӕд уыцы хъуыддӕгтыл дӕр вӕййы аныхас кӕнӕн. Ахӕм адӕймаг, чи зоны, сразы уа ӕмбырдмӕ ацӕуын дӕр, цӕмӕй хуыздӕр базона, йӕ ус цы хъуыддагыл хӕст у, уый. Ӕмбырдмӕ ацӕуын ын ӕнцондӕр уыдзӕн, искӕйты дзы куы зона, уӕд. Кӕд рӕстдзинадмӕ зӕрдиагӕй нӕма хъусы, уӕд дӕр дзы раппӕлӕн ис, йӕ цардӕмбалӕн Хуыцауӕн лӕггад кӕнынӕн кӕй ӕххуыс кӕны.
5. Хистӕр нӕлгоймӕгтӕн сӕ бон куыд у се ’мчырыстӕтты ӕнӕуырнӕг лӕгтӕ ӕмӕ устытӕн ӕххуыс кӕнын?
5 Хоты ӕмӕ ’фсымӕрты ӕнӕуырнӕг цардӕмбӕлттӕн хъуамӕ уӕлдай тынгдӕр ӕххуыс кӕной хистӕр нӕлгоймӕгтӕ, зӕгъӕм, фадат куы амона, уӕд-иу сын Хуыцауы тыххӕй дзурой. Чидӕртӕ дзы Библийы тыххӕй ныхас кӕнын нӕ уарзынц. Фӕлӕ рынчындонмӕ куы бахауынц кӕнӕ исты уӕззау низӕй куы фӕрынчын вӕййынц, уӕд байхъусынц, Фыстадӕй сын цы ныфсы ныхӕстӕ фӕкӕсынц, уыдонмӕ. Лӕг кӕнӕ ус Йегъовӕйы Ӕвдисӕн кӕм нӕу, ахӕм бинонтыл исты бӕллӕх куы ’рцӕуа, зӕгъӕм, сӕ хиуӕттӕй исчи куы амӕла, уӕд хистӕр нӕлгоймӕгтӕн сӕ бон у ныфсытӕ бавӕрын, ӕнӕуырнӕг чи у, уымӕн дӕр.
6. Нӕ хоты ӕмӕ не ’фсымӕрты ӕнӕуырнӕг цардӕмбӕлттӕн ӕххуыс кӕнын нӕ цӕмӕн фӕнды?
6 Ахъуыды-ма кӕнут, куыд тынг фӕцин кӕны хо кӕнӕ ’фсымӕр, йӕ цардӕмбал Библи ахуыр кӕнын куы райдайы ӕмӕ рӕстдзинад куы базоны, уӕд! Уый стыр циндзинад ӕрхӕссы Йегъовӕйӕн, зӕдтӕн ӕмӕ ӕнӕхъӕн ӕмбырдӕн дӕр (Лук. 15:7, 10). Фӕлӕ кӕд хо кӕнӕ ’фсымӕры ӕнӕуырнӕг цардӕмбал нырма рӕстдзинадмӕ нӕ хъусы, уӕд дӕр нӕ бон у цин кӕнын. Цӕмӕн? Мах ӕй зонӕм, уыцы хъуыддаджы зӕрдиагӕй кӕй архайӕм, уый Йегъовӕйӕн ӕхсызгон кӕй у, уымӕн ӕмӕ йӕ «нӕ фӕнды, цӕмӕй исчи фесӕфа, фӕлӕ йӕ фӕнды, цӕмӕй се ’ппӕтӕн дӕр уа ӕрфӕсмон кӕныны фадат» (2 Пет. 3:9).
[Хицӕнгонд текст 6 фарсыл]
Цӕмӕй адӕймаг рӕстдзинад базона, уый тыххӕй райдианы сӕйрагдӕр вӕййынц нӕ хъуыддӕгтӕ, Библийы кой йын кӕй фӕкӕнӕм, уый нӕ, фӕлӕ