Кӕимӕ ахуыр кӕнут, уыдонӕн «уӕ удтӕ раттынмӕ» цӕттӕ ут
1. Библи кӕимӕ ахуыр кӕнӕм, уыдонӕн куыд баххуыс кӕнӕн ис?
1 Цӕмӕй, Библи кӕимӕ ахуыр кӕныс, уыцы адӕймаг йӕ цард Йегъовӕйӕн снывонд кӕна, уый тыххӕй йемӕ ӕрмӕст Библи ахуыр кӕнын фаг нӕу. Апостол Павел рӕстдзинад кӕмӕн амыдта, уыдонӕн уыди, ноггуырд сывӕллонӕн ныййарӕг мад куыд вӕййы, раст афтӕ. Мах дӕр, кӕимӕ ахуыр кӕнӕм, уыдонӕн хъуамӕ «нӕ удтӕ раттынмӕ» дӕр цӕттӕ уӕм, цӕмӕй сӕ уырнындзинад фидар кӕна (1 Фес. 2:7–9).
2. Кӕимӕ ахуыр кӕнӕм, уыдоныл цӕмӕн хъуамӕ тыхсӕм ӕмӕ нӕ бон куыд у уый аразын?
2 Тыхсут сыл. Адӕймаг Библийӕ цы базоны, уымӕй йӕ царды пайда кӕнын куы райдайы, уӕд ӕй нал фӕфӕнды, Библийы уагӕвӕрдтӕм гӕсгӕ чи нӕ цӕры, ахӕм ӕмбӕлттимӕ йӕ рӕстӕг ӕрвитын (1 Пет. 4:4). Гӕнӕн ис, йӕ хиуӕттӕ дӕр йӕ ныхмӕ рацӕуой (Матф. 10:34–36). Куы йыл тыхсӕм, уӕд ын йӕ уаргъ фӕрогдӕр кӕндзыстӕм. Иу фӕлтӕрдджын миссионер загъта: «Ахуыры фӕстӕ-иу уайтагъд лидзынмӕ ма фӕу. Кӕд дын фадат ис, уӕд-иу ӕрлӕуу ӕмӕ йемӕ истӕуыл аныхас кӕн». Хъуыды кӕн, цӕмӕй йын у дӕ бон баххуыс кӕнын, ууыл. Зӕгъӕм, рынчын куы уа, уӕд-иу ӕм телефонӕй бадзур кӕнӕ-иу ӕй абӕрӕг кӕн. Ӕмбырды рӕстӕджы та-иу йӕ цуры сбад ӕмӕ-иу ын йӕ сывӕллӕттӕм фӕкӕс.
3. Цы у нӕ бон саразын, цӕмӕй нӕ ахуыргӕнинагӕн ӕмбырды хотӕ ӕмӕ ’фсымӕртӕ хи бинонтау суой?
3 Ӕмбырды ’ххуыс. Кӕимӕ ахуыр кӕныс, уыцы адӕймаг кӕм цӕры, уымӕ хӕстӕг куы хъусын кӕнай, уӕд хорз нӕ уаид, де ’мбалимӕ йӕм куы бауаис? Фадат куы вӕййы, уӕд-иу ӕм ахуыр кӕнынмӕ бацу, куы иу ӕфсымӕр кӕнӕ хоимӕ, куы ӕндӕримӕ, стӕй йӕ хистӕр нӕлгоймӕтимӕ дӕр базонгӕ кӕн. Искӕимӕ Библи ахуыр кӕнын куыддӕр райдайай, афтӕ-иу ӕй ӕмбырдмӕ фӕхон. Ӕмбырдтӕм куы цӕуа, уӕд йӕ уырнындзинад фидар кӕндзӕн ӕмӕ йын хотӕ ӕмӕ ’фсымӕртӕ суыдзысты хи бинонтау (Марчы 10:29, 30; Дзут. 10:24, 25).
4. Цы нӕм ӕнхъӕлмӕ кӕсы, нӕ ахуыргӕнинӕгтӕн нӕ удтӕ раттынмӕ дӕр цӕттӕ куы уӕм, уӕд?
4 Ныййарджытӕ ӕдзух фӕфыдӕбон кӕнынц, цӕмӕй сӕ сывӕллӕттӕ Йегъовӕйы фарс слӕууой ӕмӕ рӕстдзинадмӕ гӕсгӕ цӕрой. Нӕ цӕстытыл ма ауайын кӕнӕм, куыд фӕцин кӕнынц, уый сӕ къухы куы бафты, уӕд (3 Иоан. 4). Сымах дӕр бавзардзыстут ахӕм циндзинад, Библи кӕимӕ ахуыр кӕнут, уыдонӕн уӕ удтӕ раттынмӕ дӕр цӕттӕ куы уат, уӕд.