«Зонд бӕрӕг вӕййы раст хъуыддӕгтӕй»
1. Иуӕй-иутӕ нӕм цы цӕстӕй кӕсынц?
1 Хӕдзарӕй-хӕдзармӕ хъусын кӕнгӕйӕ иуӕй-иу хатт фембӕлӕм, Йегъовӕйы Ӕвдисӕнтӕ ӕцӕгдӕр чи сты, уый чи нӕ зоны кӕнӕ сӕ цыдӕр мӕнг ныхӕстӕ чи фехъуыста, ахӕм адӕмыл. Чи зоны, афтӕ уымӕн вӕййы, ӕмӕ телевизорӕй цыдӕр фехъуыстой кӕнӕ газеты исты бакастысты. Иуӕй-иу рӕтты ныл ахӕм ном дӕр сӕвӕрдтой, «тӕссаг сектӕ», зӕгъгӕ. Уӕдӕ нӕ фыдкой куы кӕной, уӕд нӕхи куыд хъуамӕ дарӕм?
2. Нӕ фыдкой куы кӕной, уӕд нын цы баххуыс кӕндзӕн, цӕмӕй нӕ ныфс ма асӕтта?
2 Нӕ ныфс ма асӕттӕд. Фыццаг ӕнусы Чырыстийы дӕр ӕмӕ Йегъовӕйы иннӕ лӕггадгӕнджыты дӕр бирӕтӕ не ’мбӕрстой ӕмӕ сӕ алы мӕнг ныхӕстӕ дзырдтой (Ап. хъ. 28:22). Фӕлӕ сӕ фыдкой кӕй кодтой, уый тыххӕй сӕ къухтӕ не ’руагътой ӕмӕ дарддӕр хъусын кодтой. Чырысти загъта: «Зонд бӕрӕг вӕййы раст хъуыддӕгтӕй» (Матф. 11:18, 19). Йесо йӕ Фыды фӕндон зынгзӕрдӕйӕ ӕххӕст кодта, ӕмӕ ӕппындӕр нӕ дызӕрдыг кодта, рӕстдзинад чи агуры, уыдон хорз хабармӕ кӕй байхъусдзысты. Уӕдӕ Хуыцауы Фыртмӕ дӕр ахӕм цӕстӕй кӕй кастысты, уый нӕ зӕрдыл куы дарӕм, уӕд нӕ ныфс нӕ асӕтдзӕн.
3. Абон нӕ кӕй ӕфхӕрынц ӕмӕ нӕ ныхмӕ кӕй цӕуынц, уый нӕм диссаг цӕуылнӕ кӕсы?
3 Чырысти загъта, дуне йын йӕ фӕдылдзӕуджытӕй йе сӕфт кӕй уындзӕн, йӕхицӕй йын йе сӕфт куыд уыдта, афтӕ (Иоан. 15:18–20). Уымӕ гӕсгӕ нӕ абон кӕй ӕфхӕрынц ӕмӕ нӕ ныхмӕ кӕй цӕуынц, уый нӕм диссаг нӕ кӕсы. Ацы дунейӕн йӕ кӕрон куыд хӕстӕгдӕр кӕны, афтӕ ахӕм хабӕрттӕ дӕр арӕхӕй-арӕхдӕр цӕудзысты ӕмӕ Хӕйрӕджы маст дӕр ноджы тынгдӕр судздзӕн (Рарг. 12:12). Уый нын ӕхсызгон у, уымӕн ӕмӕ уыцы хабӕрттӕ ууыл дзурӕг сты, тагъд Хӕйрӕджы дуне кӕй фесӕфдзӕн.
4. Хорз хабар кӕмӕн дзурӕм, уыцы адӕймаг нӕ куы ’фхӕра, уӕд дзуапп куыд хъуамӕ дӕттӕм?
4 Дзуапп дӕттӕм фӕлмӕнӕй. Куы нӕ ’фхӕрой, уӕд хъуамӕ дзуапп дӕттӕм фӕлмӕнӕй (Ӕмб. 15:1; Кол. 4:5, 6). Уавӕр куы амона, уӕд адӕймагӕн нӕ бон у бамбарын кӕнын, Йегъовӕйы Ӕвдисӕнтӕй бирӕ мӕнг ныхӕстӕ кӕй дзурынц. Кӕнӕ та йӕ ис бафӕрсӕн, афтӕ цӕмӕн хъуыды кӕныс, зӕгъгӕ. Фӕлмӕнӕй йемӕ куы ныхас кӕнӕм, уӕд чи зоны бамбара, Йегъовӕйы Ӕвдисӕнты тыххӕй цы фехъуыста, уый раст кӕй нӕу, ӕмӕ йӕм иннӕ хатт куы бацӕуой, уӕд сӕм байхъуса. Фӕлӕ адӕймаг тынг мӕсты куы уа, уӕд хуыздӕр уаид, хӕрзбон ын куы зӕгъиккам ӕмӕ куы ацӕуиккам. Фидарӕй нӕ хъуамӕ уырна иу хъуыддаг: иннӕтӕ нӕм цыфӕнды цӕстӕй ма кӕсой, уӕддӕр Йегъовӕ стыр аргъ кӕны нӕ лӕггадӕн (Ис. 52:7).