«Уӕ рухс... кӕлӕд»
1. Цы хъуамӕ аразӕм?
1 Хуры рухс Йегъовӕ Хуыцауӕн хӕссы кад. Фӕлӕ Йесо йӕ ахуыргӕнинӕгтӕн дзырдта ӕндӕр рухсы тыххӕй – «цардӕттӕг рухсы» тыххӕй, ӕмӕ хъуамӕ уымӕй уыдаиккой хайджын (Иоан. 8:12). Адӕймаг цӕмӕй уыцы диссаджы рухсӕй схайджын уа, уый тыххӕй хъуамӕ цавӕрдӕр ахсджиаг хъуыддӕгтӕ араза. Йесо загъта, зӕгъгӕ, «уӕ рухс... кӕлӕд адӕммӕ», цӕмӕй сын пайда хӕсса (Матф. 5:16). Абон адӕм саудалынджы кӕй сты, уымӕ гӕсгӕ сӕм хъуамӕ уыцы рухс хӕссӕм. Ӕмӕ сӕ уыцы рухс абон куыд тынг хъӕуы, афтӕ никуы! Нӕ бон цы у саразын, цӕмӕй махӕн дӕр нӕ рухс Чырыстийы рухсау кӕла?
2. Рӕстдзинады рухс адӕммӕ хӕссын кӕй хъӕуы, уый Йесо куыд равдыста?
2 Хъусын кӕнгӕйӕ. Йесо йӕ рӕстӕг, йӕ тыхтӕ ӕмӕ йӕ хъарутӕ иууылдӕр уымӕ сарӕзта, цӕмӕй адӕммӕ алы рӕтты хастаид рӕстдзинады рухс. Уый тыххӕй хъусын кодта хӕдзӕртты, бирӕ адӕм кӕм уыд, ахӕм рӕтты ӕмӕ хӕхты. Чырысти хорз зыдта, рӕстдзинады рухс адӕмӕн ӕнусон пайда кӕй ӕрхӕсдзӕн (Иоан. 12:46). Ӕмӕ цӕмӕй фылдӕр адӕмыл аххӕссыдаид, уый тыххӕй йӕ ахуыргӕнинӕгты бацӕттӕ кодта, цӕмӕй «уыдаиккой ацы дунейӕн рухс» (Матф. 5:14). Йӕ ахуыргӕнинӕгтӕ иннӕтӕн кӕй ӕххуыс кодтой ӕмӕ сын хорз хабар кӕй хъусын кодтой, уый фӕрцы сӕ рухс адӕммӕ калд.
3. Рӕстдзинады рухсӕн зӕрдиагӕй кӕй аргъ кӕнӕм, уый куыд ис равдисӕн?
3 Хуыцауы адӕм сӕ зӕрдӕмӕ айстой Библийы фӕдзӕхст, «рухсы хъӕбултӕн куыд ӕмбӕлы, афтӕ цӕрут», зӕгъгӕ, ӕмӕ адӕм кӕмдӕриддӕр ис, уым хъусын кӕнынц (Еф. 5:8). Куысты перерывы кӕнӕ скъолайы переменӕйы Библи йе та ӕндӕр публикацитӕ ахӕм ран куы кӕсӕм, цӕмӕй нӕ иннӕтӕ уыной, уӕд, гӕнӕн ис, ӕмӕ нын искӕимӕ Библийы тыххӕй ныхас бацайдагъ уа. Афтӕмӕй иу ӕрыгон хо скъолайы кӕимӕдӕр Библи ахуыр кӕнын райдыдта ӕмӕ йе ’мкъласонтӕй дыууадӕсӕн чингуытӕ радта.
4. Хорз ӕгъдауыл хӕст цӕмӕн хъуамӕ уӕм?
4 Нӕ хорз ӕгъдауӕй. Цӕмӕй нӕ рухс адӕммӕ кӕла, уый тыххӕй нӕ хъӕуы ахъуыды кӕнын не ’гъдауыл дӕр (Еф. 5:9). Куысты, скъолайы ӕмӕ ӕндӕр рӕтты нӕхи куыд фӕдарӕм, уый иннӕтӕ ӕнӕбафиппайгӕ нӕ фӕвӕййынц, ӕмӕ уымӕ гӕсгӕ нӕ бон вӕййы адӕмӕн рӕстдзинады тыххӕй радзурын (1 Пет. 2:12). Цӕвиттон, иу 5-аздзыд лӕппу йӕхи куыд дардта, уый йӕ ахуыргӕнӕджы зӕрдӕмӕ афтӕ тынг фӕцыд, ӕмӕ йын йӕ ныййарджыты фӕхуыдта, ӕмӕ сын загъта: «Ахӕм ӕмбаргӕ ӕмӕ ӕнӕхӕлд сывӕллоны никуыма федтон!» О, хорз хабар кӕй хъусын кӕнӕм ӕмӕ хорз ӕгъдауыл хӕст кӕй стӕм, уый адӕмы «царддӕттӕг рухсмӕ» здахы ӕмӕ нӕ Хуыцауӕн кад хӕссы.