Дӕуӕн дӕр Йегъовӕ дӕ ахуыргӕнӕг у?

1. Ахуыр кӕныны хъуыддагмӕ Йегъовӕ цы цӕстӕй кӕсы?

¹ Йегъовӕ у нӕ «Кадджын Зондамонӕг» ӕмӕ йӕ фӕнды, цӕмӕй нӕ ахуыр кӕна (Ис. 30:20). Йегъовӕ ӕппӕты фыццаг ахуыр кӕнын райдыдта йӕ фыццаггуырд Фырты (Иоан. 8:28). Адам Йегъовӕйы коммӕ куы нӕ бакаст, уӕддӕр ӕнӕххӕст адӕмы ахуыр кодта, фӕлмӕнӕй сын зонд амыдта (Ис. 48:17, 18; 2 Тим. 3:14, 15).

2. Абон нӕ Йегъовӕ куыд ахуыр кӕны?

² Абон Йегъовӕ цас адӕмы ахуыр кӕны, афтӕ никуы ма уыд. Пехуымпар Исай куыд ныффыста, афтӕ ӕгас зӕххыл дӕр милуантӕ гуылф кӕнынц, «Йегъовӕйы хӕдзар цы хохыл ис», уырдӕм (Ис. 2:2). Цӕмӕн? Цӕмӕй сын Йегъовӕ йӕ фӕндӕгтӕ бацамона ӕмӕ сӕ ахуыр кӕна! (Ис. 2:3). 2010 лӕггады азы Йегъовӕйы Ӕвдисӕнтӕ 1,6 миллиард сахаты бахардз кодтой хорз хабар хъусын кӕныныл ӕмӕ адӕмимӕ Библи ахуыр кӕныныл. Стӕй алы къуыри дӕр ӕгас зӕххыл 105 000 ӕмбырдӕй фылдӕры Хуыцауы Ныхас ахуыр кӕнынц. Библи хуыздӕр базонынӕн ма нын ӕууӕнкджын ӕмӕ зондджын цагъар 500 ӕвзагӕй фылдӕрыл уадзы алыхуызон публикацитӕ.

3. Цы пайда дын у, Йегъовӕ дӕ кӕй ахуыр кӕны, уый?

³ Стыр пайда. Хуыцау нӕ кӕй ахуыр кӕны, уый нын стыр пайда у! Мах базыдтам Хуыцауы ном ӕмӕ ныл кӕй тыхсы, уый (Пс. 83:18; 1 Пет. 5:6, 7). Дзуапп базыдтам царды ахсджиаг фарстатӕн: Адӕм цӕмӕн хъизӕмар кӕнынц ӕмӕ мӕлынц? Амондджын цӕй фӕрцы уыдзыстӕм? Адӕймаг цӕмӕн цӕры? Йегъовӕ ма нын дӕтты алыхуызон уынаффӕтӕ, цӕмӕй царды ӕнтыстджын уӕм (Йес. Н. 1:8).

4. Хуыцауы лӕггадгӕнджытӕн сӕ бон цавӕр скъолаты у ахуыр кӕнын, ӕмӕ Йегъовӕмӕ цӕмӕн хъуамӕ ахуыр кӕнӕм?

⁴ Йегъовӕ ма алыхуызон скъолаты фӕрцы йӕ лӕггадгӕнджытӕн ӕххуыс кӕны, цӕмӕй сӕ бон уа фылдӕр лӕггад кӕнын. 4–6 фӕрстыл фыст ис уыцы скъолаты тыххӕй. Кӕд нӕ уавӕртӕм гӕсгӕ нӕ бон нӕу уыцы скъолатӕй искӕцыйы ахуыр кӕнын, уӕддӕр нӕ бон у, Хуыцау ма нӕ цӕй фӕрцы ахуыр кӕны, уымӕй пайда кӕнын. Ӕрыгӕтты сӕ ахуыргӕнджытӕ ӕмӕ ӕндӕртӕ фӕразӕнгард кӕнынц уӕлдӕр ахуырадмӕ. Мах та сӕ разӕнгард кӕнӕм, цӕмӕй сӕ разы ӕвӕрой Хуыцауы хъуыддагимӕ баст нысӕнттӕ кӕнӕ та йе скъолатӕй искӕцы фӕуой. Йегъовӕ нӕ куы ахуыр кӕна, уӕд амондджын уыдзыстӕм ныр дӕр ӕмӕ фидӕны дӕр (Пс. 119:105; Иоан. 17:3).

Цавӕр фадӕттӕ ис Йегъовӕйы организацийы ахуыр кӕнынӕн

Кӕсын ӕмӕ фыссыны курсытӕ

• Цӕмӕн хъӕуы: кӕсын ӕмӕ фыссын сахуыр кӕнын, цӕмӕй адӕймагӕн йӕ бон уа Библи ахуыр кӕнын ӕмӕ иннӕтӕн хорз хабар амонын.

• Цас рӕстӕг цӕуы: цас хъӕуа, уыйбӕрц.

• Кӕм фӕцӕуы: Паддзахады залы.

• Чи дзы фӕахуыр кӕны: хъусынгӕнджытӕ ӕмӕ Библи чи ахуыр кӕны, уыдон.

• Чи йӕ скӕны: куы фӕхъӕуы, уӕд ӕмбырды хистӕр нӕлгоймӕгтӕ уыцы курсытӕ саразынц, ӕмӕ пайда кӕмӕн уыдзӕн, уыдоны ахуыр кӕнынмӕ фӕразӕнгард кӕнынц.

Хуыцауы Ныхас хъусынгӕнджыты скъола

• Цӕмӕн хъӕуы: цӕмӕй хъусынгӕнджытӕ арӕхстджынӕй хорз хабар дзурой ӕмӕ йӕ иннӕтӕн амоной.

• Цас рӕстӕг цӕуы: ӕппынӕдзухдӕр.

• Кӕм фӕцӕуы: Паддзахады залы.

• Чи дзы фӕахуыр кӕны: хъусынгӕнджытӕ се ’ппӕт дӕр, ӕмбырдмӕ чи цӕуы, Библийы ахуырӕдтимӕ разы чи у ӕмӕ Библимӕ гӕсгӕ чи цӕры, уыдон.

• Чи йӕ уадзы: Хуыцауы Ныхас хъусынгӕнджыты скъолайы цӕстдарӕг.

Ӕндӕр ӕвзаг ахуыр кӕныны курсытӕ

• Цӕмӕн хъӕуы: цӕмӕй хъусынгӕнджытӕ сахуыр уой ӕндӕр ӕвзагыл хорз хабар хъусын кӕныныл.

• Цас рӕстӕг цӕуы: цыппар-фондз мӕйы. Арӕхдӕр вӕййы сабаты райсомӕй иу-дыууӕ сахаты бӕрц.

• Кӕм фӕцӕуы: арӕхдӕр Паддзахады залы.

• Чи дзы фӕахуыр кӕны: хорз ном кӕмӕн ис, ахӕм хъусынгӕнджытӕй ӕндӕр ӕвзагыл хъусын кӕнын кӕй фӕнды, уыдон.

• Чи йӕ кӕны: ацы курсытӕ куы фӕхъӕуынц, уӕд сӕ филиал саразы.

Паддзахады залты арӕзтад

• Цӕмӕн хъӕуы: Паддзахады залтӕ аразынӕн ӕмӕ сӕ цалцӕг кӕнынӕн. Уый скъола нӕу, фӕлӕ дзы чи фӕкусы, уыдон алыхуызон куыстытыл сахуыр вӕййынц ӕмӕ сӕ бон вӕййы арӕзтады рӕстӕг ӕххуыс кӕнын.

• Цас рӕстӕг дзы ис архайӕн: уавӕртӕм гӕсгӕ.

• Кӕм фӕцӕуы: Регионалон арӕзтадон комитет куыст кӕм спълан кӕны, уым. Иуӕй-иу хотӕ ӕмӕ ӕфсымӕрты фӕхонынц дард рӕттӕм ӕххуыс кӕнынмӕ дӕр, зӕгъӕм, ӕрдзон бӕллӕхы рӕстӕг.

• Кӕмӕн дзы у йӕ бон архайын: донаргъуыд чи у ӕмӕ хистӕр нӕлгоймӕгтӕ бар кӕнӕм раттой, уыдонӕн. Кӕмӕдӕр дзы вӕййы цавӕрдӕр дӕсныйад, кӕмӕдӕр та нӕ.

• Куыд ӕм ис бахауӕн: байдзаг кӕнын хъӕуы бланк «Заявление на служение добровольцем Программы строительства Залов Царства» (A-25), райсӕн ӕй ис хистӕр нӕлгоймӕгтӕй.

Пионерты скъола

• Цӕмӕн хъӕуы: цӕмӕй пионертӕ сӕ лӕггады ӕнтыстджын уой (2 Тим. 4:5).

• Цас рӕстӕг цӕуы: дыууӕ къуыри.

• Кӕм фӕцӕуы: филиал кӕм фӕзӕгъы, уым; арӕхдӕр Паддзахады залы.

• Чи дзы фӕахуыр кӕны: иу аз ӕххӕстрӕстӕг пионерӕй чи лӕггад кӕны, уыдон.

• Куыд ӕм ис бахауӕн: пионерӕй чи лӕггад кӕны, уыдонмӕ районон цӕстдарӕг писмотӕ арвиты ӕмӕ сӕ фӕхоны.

Скъола ног вефилӕгтӕн

• Цӕмӕн хъӕуы: Вефилы лӕггад кӕнын чи райдайы, уыдон цӕмӕй ӕнтыстджын уой.

• Цас рӕстӕг цӕуы: алы къуыри дӕр иу сахат цыппар мӕйы дӕргъы.

• Кӕм фӕцӕуы: Вефилы.

• Чи дзы фӕахуыр кӕны: Вефилы бинонтӕй чи у кӕнӕ рӕстӕгмӕ лӕггад кӕнынмӕ кӕй фӕхуыдтой, уый (иу аз кӕнӕ фылдӕр рӕстӕгмӕ).

• Куыд ӕм ис бахауӕн: фӕхонынц Вефилы лӕггадгӕнджытӕй алкӕйдӕр.

Хистӕр нӕлгоймӕгты ӕмӕ кӕстӕриуӕггӕнӕг ӕфсымӕрты скъола

• Цӕмӕн хъӕуы: цӕмӕй сӕ хӕстӕ хуыздӕр ӕххӕст кӕной ӕмӕ разамынд хуыздӕр дӕттой (Хъуыд. 20:28). Ацы скъола вӕййы цалдӕр азы мидӕг иу хатт, Разамонӕг совет ӕй кӕд спълан кӕны, уӕд.

• Цас рӕстӕг цӕуы: фӕстаг азты хистӕр нӕлгоймӕгтӕн вӕййы иу бон ӕмӕ ӕрдӕг, кӕстӕриуӕггӕнӕг ӕфсымӕртӕн та иу бон.

• Кӕм фӕцӕуы: Паддзахады залы кӕнӕ Конгрессты залы.

• Чи дзы фӕахуыр кӕны: хистӕр нӕлгоймӕгтӕ ӕмӕ кӕстӕриуӕггӕнӕг ӕфсымӕртӕ.

• Куыд ӕм ис бахауӕн: хистӕр нӕлгоймӕгтӕ ӕмӕ кӕстӕриуӕггӕнӕг ӕфсымӕрты фӕхоны районон цӕстдарӕг.

Скъола хистӕр нӕлгоймӕгтӕнa

• Цӕмӕн хъӕуы: цӕмӕй хистӕр нӕлгоймӕгтӕ ӕмбырды сӕ хӕстӕ хуыздӕр ӕххӕст кӕной.

• Цас рӕстӕг цӕуы: фондз боны.

• Кӕм фӕцӕуы: уый пълан кӕны Вефил; арӕхдӕр Паддзахады залы кӕнӕ Конгрессты залы.

• Чи дзы фӕахуыр кӕны: хистӕр нӕлгоймӕгтӕ.

• Куыд ӕм ис бахауӕн: хистӕр нӕлгоймӕгты фӕхоны Вефил.

Скъола цӕуӕг цӕстдарджытӕн ӕмӕ сӕ устытӕнb

• Цӕмӕн хъӕуы: цӕмӕй районон ӕмӕ облӕстон цӕстдарджытӕ ноджы арӕхстджындӕр уой, «Хуыцауы ныхас дзурын ӕмӕ амоныны хъуыддаджы» ӕнтыстджындӕр уой ӕмӕ хуыздӕр фыййӕуттӕ уой (1 Тим. 5:17; 1 Пет. 5:2, 3).

• Цас рӕстӕг цӕуы: дыууӕ мӕйы.

• Кӕм фӕцӕуы: уый пълан кӕны Вефил.

• Чи дзы фӕахуыр кӕны: районон ӕмӕ облӕстон цӕстдарджытӕ.

• Куыд ӕм ис бахауӕн: районон ӕмӕ облӕстон цӕстдарджыты фӕхоны Вефил.

Библион скъола ӕнӕус ӕфсымӕртӕнc

• Цӕмӕн хъӕуы: ӕнӕус хистӕр нӕлгоймӕгтӕ ӕмӕ кӕстӕриуӕггӕнӕг ӕфсымӕрты бацӕттӕ кӕнынц фылдӕр хӕстӕ ӕххӕст кӕнынмӕ. Ацы скъолайы чи сахуыр кодта, уыдонӕн сӕ фылдӕры снысан кӕнынц, сӕ бӕстӕйы ӕххуыс тынгдӕр кӕм хъӕуы, уырдӕм. Кӕйдӕрты дзы ӕндӕр бӕстӕмӕ дӕр снысан кӕнынц, кӕд сӕ бон вӕййы, уӕд.

• Цас рӕстӕг цӕуы: дыууӕ мӕйы.

• Кӕм фӕцӕуы: уый пълан кӕны Вефил; арӕхдӕр Паддзахады залы кӕнӕ Конгрессты залы.

• Чи дзы фӕахуыр кӕны: ӕнӕус ӕфсымӕртӕй 23 азӕй 62 азы онг кӕуыл цӕуы, йе ’нӕниздзинад дзӕбӕх кӕмӕн у ӕмӕ ӕххуыс кӕм хъӕуы, уым ӕфсымӕртӕн лӕггад кӕнын ӕмӕ хорз хабар хъусын кӕнын кӕй фӕнды, уыдон (Мар. 10:29, 30). Хъуамӕ, ӕппынкъаддӕр, фӕстаг дыууӕ азы уой хистӕр нӕлгоймӕгтӕ кӕнӕ кӕстӕриуӕггӕнӕг ӕфсымӕртӕ.

• Куыд ӕм ис бахауӕн: кӕд ацы скъола уӕ бӕстӕйы ис, уӕд, ахуыр кӕнын кӕй фӕнды, уыдонӕн фембӕлд вӕййы районон конгрессы. Уыцы фембӕлды хабӕрттӕ бӕстондӕр базонынц.

Библион скъола чырыстон бинонтӕнd

• Цӕмӕн хъӕуы: чырыстон бинонты ахуыр кӕнынц, цӕмӕй сӕ бон уа Йегъовӕ ӕмӕ йӕ организацийӕн фылдӕр ӕххуыс кӕнын. Ацы скъола чи фӕвӕййы, уыдонӕн сӕ фылдӕры снысан кӕнынц, сӕ бӕстӕйы ӕххуыс тынгдӕр кӕм хъӕуы, уырдӕм. Кӕйдӕрты дзы ӕндӕр бӕстӕмӕ дӕр снысан кӕнынц, кӕд сӕ бон вӕййы, уӕд.

• Цас рӕстӕг цӕуы: дыууӕ мӕйы.

• Кӕм фӕцӕуы: фыццаг кълӕстӕ арӕзт уыдысты Хъахъхъӕнӕн мӕсыгы ахуырадон центры, Паттерсоны (штат Нью-Йорк, АИШ). Уый фӕстӕ йӕ уадзын райдыдтой, Вефил кӕм спълан кӕны, уым, арӕхдӕр фӕцӕуы Паддзахады залы кӕнӕ Конгрессты залы.

• Чи дзы фӕахуыр кӕны: чырыстон бинонтӕй 25 азӕй 50 азы онг кӕуыл цӕуы, йе ’нӕниздзинад хорз кӕмӕн у, йӕ уавӕртӕм гӕсгӕ, кӕм хъӕуы, уым лӕггад кӕнын йӕ бон кӕмӕн у ӕмӕ Исайау афтӕ чи зӕгъдзӕн: «Мӕнӕ ӕз! Мӕн арвит» (Ис. 6:8). Хъуамӕ иумӕ цӕрой дыууӕ азы бӕрц ӕмӕ дыууӕ азы фӕд-фӕдыл ӕххӕстрӕстӕг лӕггад кӕной.

• Куыд ӕм ис бахауӕн: кӕд ацы скъола уӕ бӕстӕйы ис, уӕд, ахуыр кӕнын кӕй фӕнды, уыдонӕн фембӕлд вӕййы районон конгрессы. Уыцы фембӕлды хабӕрттӕ бӕстондӕр базонынц.

Хъахъхъӕнӕн мӕсыгы Ӕхсӕнады библион скъола Галаад

• Цӕмӕн хъӕуы: пионерты ӕмӕ иннӕ ӕххӕстрӕстӕг лӕггадгӕнджыты цӕттӕ кӕнынц, цӕмӕй миссионертӕй лӕггад кӕной.

• Цас рӕстӕг цӕуы: фондз мӕйы.

• Кӕм фӕцӕуы: Хъахъхъӕнӕн мӕсыгы ахуырадон центры, Паттерсоны (штат Нью-Йорк, АИШ).

• Чи дзы фӕахуыр кӕны: ӕртӕ азы донаргъуыд чи у, ахӕм чырыстон бинонтӕй 21 азӕй 38 азы онг кӕуыл цӕуы, уыдон (фыццаг хатт анкетӕ куы дзаг кодтой, уыцы рӕстӕг). Хъуамӕ зоной англисаг ӕвзаг, иумӕ цӕрой дыууӕ азы бӕрц ӕмӕ дыууӕ азы фӕд-фӕдыл ӕххӕстрӕстӕг лӕггад кӕной. Хъуамӕ сын уа хорз ӕнӕниздзинад. Сӕ бон ма у анкетӕ байдзаг кӕнын, ӕндӕр бӕстӕйы пионерӕй чи лӕггад кӕны (миссионеры статус кӕмӕн ис, уыдон дӕр), цӕуӕг цӕстдарджытӕн, Вефилы лӕггадгӕнджытӕн ӕмӕ Лӕггад фӕхуыздӕр кӕныны скъола, Библион скъола ӕнӕус ӕфсымӕртӕн ӕмӕ Библион скъола чырыстон бинонтӕн чи фӕци, уыдонӕн.

• Куыд ӕм ис бахауӕн: кӕцыдӕр бӕстӕты Вефилтӕ облӕстон конгрессы рӕстӕг ӕрӕмбырд кӕнынц, ацы скъолайы ахуыр кӕнын кӕй фӕнды, уыдоны. Уыцы фембӕлды хабӕрттӕ бӕстондӕр базонынц. Кӕд уӕ бӕстӕйы конгрессы ахӕм фембӕлд нӕ вӕййы, уӕд дӕ бон ныффыссын у уӕ бӕстӕйы Вефилмӕ.

Скъола филиалы комитеты уӕнгтӕн ӕмӕ сӕ устытӕн

• Цӕмӕн хъӕуы: филиалы комитеты чи лӕггад кӕны, уыдонӕн ӕххуыс кӕнын, цӕмӕй Вефилы хуыздӕр разамынд дӕттой, сӕ хъус хуыздӕр дарой ӕмбырдты уацамынды хъуыддагмӕ, сӕ территорийы районтӕ ӕмӕ облӕсттӕм, стӕй тӕлмац кӕныны, мыхуыр кӕныны ӕмӕ литературӕ ӕрвитыны хъуыддагмӕ ӕмӕ ма Вефилы ӕндӕр хайӕдтӕм дӕр (Лук. 12:48ӕ).

• Цас рӕстӕг цӕуы: дыууӕ мӕйы.

• Кӕм фӕцӕуы: Хъахъхъӕнӕн мӕсыгы ахуырадон центры, Паттерсоны (штат Нью-Йорк, АИШ).

• Чи дзы фӕахуыр кӕны: филиалы комитеты уӕнгтӕ кӕнӕ бӕстӕйы комитеты уӕнгтӕ.

• Куыд ӕм ис бахауӕн: Разамонӕг совет фӕхоны уыцы ӕфсымӕрты ӕмӕ сӕ устыты.

[Фиппаинӕгтӕ]