Ӕртӕ хъуыддаджы фӕрцы уыдзыстӕм ноджы хуыздӕр ахуыргӕнджытӕ
1. Цӕмӕн нӕ хъуамӕ фӕнда, цӕмӕй ноджы хуыздӕр ахуыргӕнджытӕ суӕм?
1 Чырыстӕттӕ иууылдӕр сты ахуыргӕнджытӕ. Адӕймагмӕ фыццаг хатт бацыдыстӕм ӕви дыккаг хатт йе та йемӕ Библи ахуыр кӕнӕм, мах ын хай кӕнӕм нӕ зонындзинӕдтӕй. Уыцы зонындзинӕдтӕ исӕм «сыгъдӕг Фыстыттӕй»,– уыдон та адӕймагӕн ратдзысты ахӕм зонд, цӕмӕй фервӕза (2 Тим. 3:15). Уый цӕй стыр кад у! Ӕртӕ хъуыддаджы нын баххуыс кӕндзысты, цӕмӕй ноджы хуыздӕр ахуыргӕнджытӕ суӕм.
2. Нӕ бон куыд у исты хуымӕтӕгӕй ӕмбарын кӕнын?
2 Хуымӕтӕг ныхас. Цӕуыл ныхас кӕнӕм, уый хорз куы фӕзонӕм, уӕд нӕ айрох вӕййы, иннӕ адӕймаг уыдӕттӕ хорз кӕй нӕ зоны. Искӕимӕ Библи куы ахуыр кӕнӕм, уӕд ӕрмӕг лыстӕггай ӕвзарын нӕ хъӕуы. Хуыздӕр уаид сӕйраг хъуыдытӕм хъус ӕрдарын. Бирӕ куы дзурӕм, уӕд уымӕй хуыздӕр ахуыргӕнджытӕ не суыдзыстӕм (Ӕмб. 10:19). Хуыздӕр уыдзӕн, сӕйраг стихтӕ-иу куы бакӕсиккам. Уый фӕстӕ-иу нӕ хъус ӕрдарӕм, стихы темӕимӕ баст чи у, уыцы хаймӕ. Йесо хохыл адӕмы куы ахуыр кодта, уӕд ахсджиаг хъуыддӕгтӕ ӕмбарын кодта хуымӕтӕг ныхӕстӕй ӕмӕ цыбыртӕй. Фыст сты Матфейы 5–7 сӕрты.
3. Цӕвиттонтӕ пайда цӕмӕй сты ӕмӕ цавӕр цӕвиттонтӕ вӕййынц хуыздӕр?
3 Цӕвиттонтӕ. Цӕвиттонтӕ адӕймаджы хъуыдытыл бафтауынц, йӕ зӕрдӕ йын бацагайынц ӕмӕ сӕ хуыздӕр бахъуыды кӕны. Афтӕ ма хъуыды кӕн, ӕмӕ цӕвиттонмӕ мысынмӕ хъуамӕ дӕсны уай. Йесо арӕх пайда кодта цыбыр ӕмӕ хуымӕтӕг цӕвиттонтӕй (Матф. 7:3–5; 18:2–4). Стыр пайда ма уыдзысты, гӕххӕттыл дӕр-иу истытӕ куы аныв кӕнӕм, уый дӕр. Дӕхи хорз куы цӕттӕ кӕнай, уӕд-иу ссардзынӕ хорз цӕвиттонтӕ.
4. Нӕ бон куыд у фарстатӕй арӕхстджындӕрӕй пайда кӕнын?
4 Фарстатӕ. Дӕ ахуыргӕнинагмӕ фарстатӕ куы дӕттай, уӕд ӕй хъуыдытыл ӕфтаудзынӕ. Фӕлӕ-иу дзуапмӕ ӕнхъӕлмӕ кӕсгӕйӕ фӕразон у. Дӕ фарстӕн ӕвиппайды дӕхӕдӕг дзуапп куы дӕттай, уӕд нӕ зондзынӕ, дӕ ахуыргӕнинаг цы хъуыды кӕны, уый. Раст дзуапп куы нӕ ратта, уӕд хуыздӕр уыдзӕн, куы нӕ йӕ бараст кӕнис, фӕлӕ йын ӕндӕр фарстаты руаджы куы баххуыс кӕнис, цӕмӕй раст хатдзӕгмӕ ӕрцӕуа (Матф. 17:24–27). Махӕй иу дӕр ӕххӕст ахуыргӕнӕг нӕу. Фӕлӕ нӕ уӕддӕр Библи разӕнгард кӕны, цӕмӕй ӕдзух дӕр нӕ хъус дарӕм, иннӕты куыд ахуыр кӕнӕм, уымӕ. Афтӕмӕй нӕхӕдӕг дӕр ӕмӕ нӕм чи хъусы, уыдон дӕр ӕнустӕм арфӕгонд уыдзыстӕм (1 Тим. 4:16).