Хъусын кӕныны размӕ агурӕм, ӕндӕр ӕвзагыл чи дзуры, ахӕм адӕмы
1. Бирӕ ӕвзӕгтыл кӕм дзурынц, уыцы территориты ӕмбырдты участоктӕ се ’взӕгтӕм гӕсгӕ дих цӕмӕн сты?
1 Йесойы ахуыргӕнинӕгтӕ н. э. 33 азы Фӕндзайӕм бон Хуыцауы сыгъдӕг тыхӕй куы схайджын сты, уӕд дзурын райдыдтой, зӕххы алы къуымтӕй сӕм чи ӕрцыд, уыцы адӕмы ӕвзӕгтыл (Хъуыд. 2:4). Уый фӕрцы 3 мин адӕймаджы бӕрц донаргъуыд райстой. Чи ӕрцыд, уыдонӕн сӕ фылдӕр сӕхи ӕвзагӕй уӕлдай, ӕвӕццӕгӕн, дзырдтой дзуттагау кӕнӕ та грекъагау. Фӕлӕ Йегъовӕйы фӕндыд, цӕмӕй Паддзахады хабар фехъуыстаиккой сӕхи мадӕлон ӕвзагыл. Дзырд дӕр ыл нӕй, адӕм арӕх хорз хабармӕ хуыздӕр кӕй байхъусынц, сӕхи ӕвзагыл сын ӕй куы фӕдзурынц, уӕд. Уымӕ гӕсгӕ абон бирӕ ӕвзӕгтыл кӕм дзурынц, уыцы территориты ӕмбырдты участоктӕ дих сты се ’взӕгтӕм гӕсгӕ («Организованы», 107 ф., 1, 2 абз.). Ӕндӕр ӕвзагыл дзурӕг къордтӕн сӕхи участоктӕ нӕ вӕййы, фӕлӕ фӕхъусын кӕнынц, цы ӕмбырдмӕ хауынц, уый территорийы ӕмӕ сыхаг ӕмбырдты территориты.
2. а) Ӕндӕр ӕвзагыл дзурӕг адӕмы агурынмӕ цы хауы ӕмӕ афтӕ кӕнын кӕд фӕхъӕуы? ӕ) Алыхуызон ӕвзӕгтыл кӕм дзурынц, ахӕм территорийы ӕмбырдтӕн сӕ бон куыд у кӕрӕдзийӕн ӕххуыс кӕнын? б) Цы хъуамӕ саразӕм, Хуыцауы тыххӕй фылдӕр базонын кӕй фӕнды, ахӕм адӕймагыл куы фембӕлӕм, фӕлӕ ӕндӕр ӕвзагыл куы дзура, уӕд?
2 Кӕм цӕрыс, уым кӕд иууылдӕр иу ӕвзагыл дзурынц, уӕд дын хӕдзарӕй-хӕдзармӕ хъусын кӕнын зын нӕу. Фӕлӕ бирӕ ӕвзӕгтыл кӕм дзурынц, ахӕм стыр горӕты куы цӕрай, уӕд хабар бынтон ӕндӕрхуызон вӕййы. Алыхуызон ӕвзӕгтыл дзурӕг ӕмбырдтӕ, гӕнӕн ис, ӕмӕ хъусын кӕной уыцы иу районы. Кӕд уын иннӕ ӕмбырдтӕ фехъусын кӕндзысты, уе ’взагыл чи дзуры, ахӕм адӕмы тыххӕй, уӕддӕр сӕйрагдӕр уе ’мбырды кӕнӕ уӕ къорды хӕс у, цӕмӕй ахӕм адӕмы агурат. (Кӕс рамкӕ «Кӕрӕдзийӕн ӕххуыс кӕнӕм».) Уымӕ гӕсгӕ ӕндӕр ӕвзагыл чи дзуры, уыцы адӕмы хъӕуы агурын, цӕмӕй зонат кӕм цӕрынц, уый. Уый куыд ис аразӕн?
3. Цӕмӕй кӕнгӕ у, ӕмбырд кӕнӕ къорд ӕндӕр ӕвзагыл дзурӕг адӕмы кӕм агурдзӕн ӕмӕ сын уыцы хъуыддагыл цас рӕстӕг ацӕудзӕн, уый?
3 Куыд ис ахӕм адӕмы агурӕн. Алыхуызон ӕвзӕгтыл кӕм дзурынц, ахӕм территорийы адӕмы агурыныл цас рӕстӕг ацӕудзӕн, уый баст у бынӕттон уавӕртыл. Зӕгъӕм, уыцы ӕвзагыл уым цал адӕймаджы дзуры? Уыцы ӕвзагыл цал хъусынгӕнӕджы ис? Ӕмбырдмӕ кӕнӕ къордмӕ цал адрисы радтой? Ӕнӕмӕнг нӕу, цӕмӕй ӕмбырд йӕ территорийы алы районы дӕр адӕм агургӕйӕ ӕмхуызон рӕстӕг хардз кӕна – йӕ бон у йӕ хъус дарын, йӕ территорийы фылдӕр адӕм кӕм цӕры кӕнӕ йӕм ӕввахсдӕр чи у, ахӕм районтӕм. Хъуамӕ адӕмы агурыны хъуыддаг хорз спълан кӕной, цӕмӕй фылдӕр адӕмӕн фадат уа Йегъовӕмӕ йӕ номӕй кувынӕн (Ром. 10:13, 14).
4. а) Куыд ис спълан кӕнӕн агурыны хъуыддаг? ӕ) Цавӕр мадзӕлттӕй ис спайда кӕнӕн, цӕмӕй уе ’взагыл чи дзуры, уыдоны ссарат?
4 Ӕндӕр ӕвзагыл дзурӕг адӕмы чи агуры, уыцы хъусынгӕнджытӕ цӕмӕй кӕрӕдзи ма хъыгдарой, уый тыххӕй ӕмбырды хистӕр нӕлгоймӕгты совет, уӕлдайдӕр та уацамындӕн дзуапдӕттӕг цӕстдарӕг, хъуамӕ ахӕм адӕмы агурыны хъуыддаг хорз спълан кӕна ӕмӕ йӕм йӕ хъус дара (1 Кор. 9:26). Ӕндӕр ӕвзагыл дзурӕг къорд кӕмӕ хауы, уыцы ӕмбырды хистӕр нӕлгоймӕгты совет равзардзӕн аккаг ӕфсымӕры, хуыздӕр уыдзӕн хистӕр нӕлгоймаджы кӕнӕ кӕстӕриуӕггӕнӕг ӕфсымӕры, цӕмӕй уыцы хъуыддагмӕ йӕ хъус дара. Бирӕ ӕмбырдтӕ ӕмӕ къордтӕ рагацау телефонты справочникы кӕнӕ Интернеты бацагурынц, уыцы адӕмыхатмӕ чи ӕмбӕлы, ахӕм нӕмттӕ ӕмӕ мыггӕгтӕ. Уый фӕстӕ сӕм телефонӕй бадзурынц кӕнӕ сӕм бацӕуынц, цӕмӕй базоной, сӕ адристӕ сын хъӕуы бахӕссын сӕ участокты хыгъдмӕ ӕви нӕ. Уый фӕстӕ куы хъӕуа, уӕд къорд кӕмӕ хауы, уыцы ӕмбырды хистӕр нӕлгоймӕгты совет ӕнӕхъӕн ӕмбырдӕн дӕр зӕгъдзӕн, цӕмӕй, уыцы ӕвзагыл дзурӕг адӕмы рӕстӕгӕй-рӕстӕгмӕ агурой. (Кӕс рамкӕ «Куыд ис ссарӕн, уе ’взагыл чи дзуры, ахӕм адӕмы».)
5. а) Ӕндӕр ӕвзагыл дзурӕг адӕмы чи агуры, уыцы хъусынгӕнджытӕ сӕ хъус цавӕр уынаффӕтӕм хъуамӕ дарой? ӕ) Адӕмы агургӕйӕ сын цы ис зӕгъӕн?
5 Ӕндӕр ӕвзагыл дзурӕг адӕмы агургӕйӕ алы хатт дӕр нӕ разы хъуамӕ уа бӕлвырд нысан. Ацы хъуыддаг дӕр нӕ лӕггадмӕ кӕй хауы, уымӕ гӕсгӕ хъуамӕ аив конд уӕм, уацамындмӕ цӕугӕйӕ куыд аив конд вӕййӕм, афтӕ. Хъусынгӕнджытӕй бирӕтӕ загътой, адӕмы агургӕйӕ кӕй фӕныфсджындӕр вӕййынц ӕмӕ уыцы ӕвзагыл хуыздӕр дзурын кӕй райдайынц, кӕрӕдзиимӕ уыцы ӕвзагыл кӕй фӕдзурынц ӕмӕ, сӕ ныхас куыд райдайдзысты, уый кӕй афӕлварынц, уый фӕрцы. Нӕ бон у уацамынды хыгъды фыссын, адӕмы агургӕйӕ нын цы рӕстӕг ацӕуы, уый, фӕлӕ территорийы картӕ ӕмӕ адӕмы списоктӕ аразыныл цы рӕстӕг ацӕуы, уый та нӕ фыссӕм. Цы ӕвзагыл хъусын кӕнӕм, уыцы ӕвзагыл дзурӕг адӕймаджы куы ссарӕм, уӕд хъуамӕ бацархайӕм, цӕмӕй йын хорз хабар радзурӕм ӕмӕ стӕй уыцы адӕймаджы тыххӕй ӕвӕстиатӕй зӕгъӕм уацамындӕн дзуапдӕттӕг цӕстдарӕгӕн кӕнӕ уыцы хъуыддагӕн дзуапп чи дӕтты, уыцы ӕфсымӕрӕн, цӕмӕй территорийы тыххӕй ног информаци ныффысса. Афтӕ кӕнын хъӕуы, адӕймаг нӕм байхъуыста ӕви нӕ, уӕд дӕр. Кӕд агурыны хъуыддаг ахсджиаг у, уӕддӕр хъуамӕ ӕмбаргӕ уӕм ӕмӕ ӕндӕр хуызы дӕр хъусын кӕнӕм. (Кӕс рамкӕ «Адӕмы агургӕйӕ цы ис зӕгъӕн».)
6. Хъусӕй чи нӕ хъусы, уыдоны агурын ӕнцон цӕуылнӕ у?
6 Куыд ис, хъусӕй чи нӕ хъусы, уыдоны агурӕн. Хъусӕй чи нӕ хъусы, уыдоны агурын ӕнцон нӕу, хъӕуы ӕдзух бирӕ фыдӕбон кӕнын. Ахӕм адӕймаджы нӕй базонӕн нӕдӕр йӕ номӕй, нӕдӕр йе ’ддаг бакастӕй ӕмӕ нӕдӕр йӕ дзаумайы кондӕй. Уымӕй уӕлдай-ма, ахӕм адӕймаджы бинонтӕ кӕнӕ ӕмбӕлттӕ гӕнӕн ис, ӕмӕ хъусынгӕнджытӕн мацы дзурой, кӕй йын тӕрсынц, уый тыххӕй. Дӕлдӕр ис уынаффӕтӕ, хъусӕй чи нӕ хъусы, уыдоны куыд ис агурӕн, уый фӕдыл. Уыдон ма баххуыс кӕндзысты ӕндӕр ӕвзагыл дзурӕг адӕмы агурынӕн дӕр.
7. а) Цы хъӕуы, цӕмӕй, хъусӕй чи нӕ хъусы, ахӕм адӕмы, стыр хӕдзӕрттӕ кӕм ис, уыцы районты агурӕм? ӕ) Цы хъӕуы саразын, цӕмӕй ныл адӕймаг ма гуырысхо кӕна?
7 Къухӕйамонгӕ ӕвзагыл дзурӕг ӕмбырдтӕ ӕмӕ къордтӕ адӕмы агургӕйӕ сты ӕнтыстджын. Стыр хӕдзӕрттӕ кӕм ис, уыцы районты цӕрджыты бафӕрсынц, хъусӕй чи нӕ хъусы, уыдонӕй искӕй зонынц ӕви нӕ, уый тыххӕй. Чи зоны, сӕ сыхӕгтӕй, се ’мкусджытӕй кӕнӕ та скъолайы чидӕр къухӕйамонгӕ ӕвзагыл дзуры. Йе та уынджы искуы федта знак, ӕввахс кӕмдӕр къуырма сывӕллӕттӕ кӕй ис. Кӕнӕ та, чи зоны, йӕ хӕстӕджытӕй чидӕр хъусӕй нӕ хъусы. Дӕ зӕрдыл дар, исчи дын де ’рбацыдыл гуырысхо дӕр кӕй кӕндзӕн. Фӕлӕ дыл цӕмӕй адӕймаг баууӕнда, уый тыххӕй у хӕларзӕрдӕ, ӕмӕ де ’рбацыды сӕр цыбыртӕй ӕмӕ уӕзданӕй бамбарын кӕн. Хъусынгӕнджытӕ куы бафӕрсынц, зӕгъгӕ, хъусӕй чи нӕ хъусы, ахӕм искӕй зонынц, уӕд сын равдисынц Библи кӕнӕ та къухӕйамонгӕ ӕвзагыл DVD-тӕ. Уый фӕстӕ фӕзӕгъынц, ахӕм адӕмӕн сӕ кӕй фӕнды, Библи цы ныфс дӕтты, уый фехъусын кӕнын. Фӕлӕ адӕймаджы куы нӕ фӕнда, хъусӕй чи нӕ хъусы, ахӕм хӕстӕг кӕнӕ ӕмбалы тыххӕй исты дзурын, уӕддӕр чи зоны райса дӕ адрис кӕнӕ дӕ телефоны номыр кӕнӕ ӕмбырды фембӕлдтӕм хуынды гӕххӕтт, цӕмӕй йӕм ӕй ратта.
8. Ӕндӕр ӕмбырдтӕн сӕ бон куыд у къухӕйамонгӕ ӕвзагыл дзурӕг ӕмбырдӕн баххуыс кӕнын?
8 Къухӕйамонгӕ ӕвзагыл дзурӕг ӕмбырдӕн йӕ территори стыр куы уа, уӕд йӕ бон у, ӕндӕр ӕвзагыл чи ис, ахӕм ӕмбырдӕй ӕххуыс ракурын, цӕмӕй горӕты районтӕй иуӕй-иутыл ӕрзилой ӕмӕ, хъусӕй чи нӕ хъусы, ахӕм адӕмы ссарой. Афтӕ кӕнӕн ис афӕдзы мидӕг иу кӕнӕ дыууӕ бон. Къухӕйамонгӕ ӕвзагыл дзурӕг ӕмбырдӕй исчи уацамындон фембӕлды рӕстӕг зӕгъдзӕн, хъусын кӕнын куыд хъӕуы ӕмӕ йӕ ӕвдисгӕ дӕр ракӕндзӕн. Уацамынды чи цӕуа, уыцы къордтӕй алкӕцыйы дӕр уыдзӕн, къухӕйамонгӕ ӕвзагыл дзурӕг ӕмбырдӕй иу хъусынгӕнӕг. Алы къордӕн дӕр ратдзысты, адӕмы кӕм агурдзысты, уыцы бынаты картӕ.
9. Хъусӕй чи нӕ хъусы, ахӕм адӕмы куыд ис агурӕн, иумӕ кӕм ӕрӕмбырд вӕййынц, ахӕм рӕтты?
9 Хъусӕй чи нӕ хъусы, ахӕм адӕмы ма агурӕн вӕййы, иумӕ кӕм ӕрӕмбырд вӕййынц ӕмӕ кӕм фӕулӕфынц, ахӕм рӕтты, кӕнӕ та ӕххуыс цы бынӕтты фӕисынц, уым. Хъусынгӕнджытӕ хъуамӕ аив конд уой. Хуыздӕр уаид хъусын кӕнын иу кӕнӕ дыууӕ адӕймагӕн, ӕнӕхъӕн къордӕн нӕ, фӕлӕ; афтӕмӕй равдисдзыстут, ӕмбаргӕйӕ кӕй архайут. Хорз куы аныхас кӕнат, уӕд уӕ бон у уӕ кӕрӕдзийӕн уӕ адристӕ кӕнӕ уӕ телефонты номыртӕ раттын.
10. Хъусынгӕнджытӕн сӕ бон куыд у куыстуӕтты, хъусӕй чи нӕ хъусы, ахӕм адӕмы агурын?
10 Бацӕттӕ кӕнӕн ма ис, куыстуӕттӕ кӕм ис, ахӕм картӕтӕ дӕр ӕмӕ сӕм бацӕуӕн ис, хуыздӕр кӕд уыдзӕн, уӕд. Иу картӕйыл бацамонӕн ис цалдӕр заправкӕйы, иннӕйыл та – химчисткӕтӕ, прачечнытӕ, ресторантӕ, гостиницӕтӕ кӕнӕ ӕндӕр ахӕм бынӕттӕ. Алы картӕйыл дӕр иухуызон куыстуӕттӕ куы уа, уӕд хъусынгӕнджытӕ сахуыр уыдзысты, ахӕм рӕтты хуыздӕр куыд у, афтӕ хъусын кӕнын ӕмӕ сӕм фӕлтӕрддзинад фӕзындзӕн. Зӕгъӕм, гостиницӕты ӕрлӕууы, хъусӕй чи нӕ хъусы, ахӕм адӕм дӕр, ӕмӕ уымӕ гӕсгӕ нӕ бон у администратортӕн цыбыртӕй бамбарын кӕнын, цӕмӕн ӕрбацыдыстӕм, уый ӕмӕ сын ныууадзын DVD-тӕ ӕмӕ ӕмбырды фембӕлдмӕ хуынды гӕххӕттытӕ, цӕмӕй-иу сӕ ахӕм уазджытӕн радтой. Иуӕй-иу куыстуӕтты та нӕ бон у бафӕрсын, сӕ кусджытӕй йе та сӕ клиенттӕй исчи къухӕйамонгӕ ӕвзаг зоны, ӕви нӕ. Кӕд уӕ территорийы къуырма сывӕллӕттӕн скъола ис, уӕд уӕ бон у сӕ библиотекӕйӕн нӕ DVD-тӕй искӕцытӕ ныууадзын.
11. Ӕндӕр ӕвзагыл дзурӕг адӕмы агурын ахсджиаг хъуыддаг цӕмӕн у?
11 Ахсджиаг хъуыддаг. Ӕндӕр ӕвзагыл чи дзуры, ахӕм адӕмы агурын зын у. Уымӕй уӕлдай-ма, уыцы адӕм горӕтӕн иу районӕй иннӕ районмӕ цӕрынмӕ кӕй ацӕуынц, уымӕ гӕсгӕ нӕ территорийы тыххӕй цы ныффыссӕм, уый арӕх фӕивы. Фӕлӕ адӕмы агурыны хъуыддаг бирӕ горӕтты сси уацамынды ахсджиаг хай. Хъусын кӕнын нын бахӕс кодта Йегъовӕ, ӕмӕ уый та никӕй хъулон кӕны (Хъуыд. 10:34). «Уый фӕнды, цӕмӕй алыхуызон адӕм, рӕстдзинад цы у, уый бӕлвырдӕй базоной ӕмӕ фервӕзой» (1 Тим. 2:3, 4). Уӕдӕ Йегъовӕимӕ ӕмӕ нӕ кӕрӕдзиимӕ ӕмгуыст кӕнӕм, цӕмӕй агурӕм, алыхуызон ӕвзӕгтыл чи дзуры ӕмӕ, «хорз ӕмӕ фӕлмӕн зӕрдӕ кӕмӕн ис, ахӕм адӕймӕгты» (Лук. 8:15).
[Рамкӕ 5 фарсыл]
Кӕрӕдзийӕн ӕххуыс кӕнӕм
Ӕмбырды кӕнӕ къорды куы фӕнда, цӕмӕй сын баххуыс кӕной, сӕхи ӕвзагыл кӕмӕн хъусын кӕной, ахӕм адӕмы агурынӕн, уӕд уацамындӕн дзуапдӕттӕг цӕстдарӕг уый тыххӕй зӕгъдзӕн сыхаг ӕмбырдты хистӕр нӕлгоймӕгтӕн. Хуыздӕр у зӕгъын сыхаг ӕмбырдтӕн, кӕнӕ, уыцы ӕвзагыл дзурӕг адӕмӕй бирӕ кӕм цӕры, уыцы территори кӕмӕ хауы, уыцы ӕмбырдтӕн. Уый фӕстӕ ӕмбырдты фехъусын кӕндзысты, цӕмӕй ахӕм ӕвзагыл дзурӕг адӕймагыл куы сӕмбӕлой, уӕд ын йӕ адрис райсой ӕмӕ йӕ уацамындӕн дзуапдӕттӕг цӕстдарӕгмӕ радтой, ӕмӕ йӕ уый та ратдзӕн, ӕххуыс чи ракуырдта, уыцы ӕмбырд кӕнӕ къордмӕ. Бирӕ ӕвзӕгтыл кӕм дзурынц, уыцы территори кӕмӕ хауы, уыцы ӕмбырдты уацамындӕн дзуапдӕттӕг цӕстдарджытӕн сӕ бон у иумӕ спълан кӕнын, сӕ территорийы куыд хъусын кӕндзысты ӕмӕ, фылдӕр базонын кӕй фӕнды, уыцы адӕмы, кӕцы ӕмбырдмӕ кӕнӕ къордмӕ хауой, уырдӕм куыд ӕрвитдзысты.
Хъусынгӕнджытӕ ӕндӕр ӕвзагыл дзурӕг адӕймагыл куы сӕмбӕлой (кӕнӕ хъусӕй чи нӕ хъусы, ахӕмыл), ӕмӕ йӕ ӕцӕгдӕр фылдӕр базонын куы фӕнда, уӕд ӕвӕстиатӕй байдзаг кӕнӕнт бланк «Пожалуйста, посети этого человека» (S-43) ӕмӕ йӕ раттӕнт ӕмбырды секретармӕ. Афтӕмӕй уыцы адӕймаг ӕвӕстиатӕй ссардзӕн дзуапп йӕ фарстатӕн. (Кӕс km 5/11 3 ф.)
[Рамкӕ 6 фарсыл]
Куыд ис ссарӕн, уе ’взагыл чи дзуры, ахӕм адӕмы
• Иннӕты фӕрсӕм: Библи чи ахуыр кӕны, нӕ бинонты, не ’мкусджыты ӕмӕ афтӕ дарддӕр.
• Телефонты справочникты агурӕм, уыцы ӕвзагыл чи дзуры, уыцы адӕмыхатмӕ чи ӕмбӕлы, ахӕм нӕмттӕ ӕмӕ мыггӕгтӕ. Адристы справочниктӕ ссарӕн ис Интернеты кӕнӕ телефонты компаниты.
• Уӕзданӕй фӕрсӕм алы рӕтты, зӕгъӕм, библиотекӕты, учреждениты кӕнӕ та ахуыргӕнӕндӕтты.
• Бынӕттон газеттӕ кӕсгӕйӕ нӕ хъус дарӕм, ӕндӕр ӕвзӕгтыл цы ӕхсӕнӕдтӕ ис, уыдон цы фембӕлдтӕ аразынц, уымӕ.
• Ӕндӕр ӕвзагыл дзурӕг адӕм арӕхдӕр цы дуканитӕм ӕмӕ организацитӕм фӕцӕуынц, уырдӕм цӕуӕм.
• Ӕндӕр ӕвзагыл дзурӕг адӕмыл арӕх фембӕлӕн кӕм ис, ахӕм стыр дуканиты, студентты центрты кӕнӕ вокзалты хицӕуттӕй бар ракурӕм ӕмӕ дзы нӕ литературӕимӕ стъол сӕвӕрӕм.
• Балхӕнӕм телефонты кӕнӕ адристы справочниктӕ, йе та компьютерон программӕтӕ ӕмӕ Интернеты адӕмы агурӕм, кӕд уымӕн нӕ бӕстӕйы закъонмӕ гӕсгӕ бар ис, уӕд.
[Рамкӕ 7 фарсыл]
Адӕмы агургӕйӕ цы ис зӕгъӕн
Хӕларзӕрдӕ ӕмӕ уӕздан куы уӕм, уӕд ныл ничи гуырысхо кӕндзӕн. Хуыздӕр уыдзӕн, фыццаг уал-иу уыцы ӕвзагыл литературӕ куы равдисиккам.
Салам куы раттай, уӕд ис зӕгъӕн: «Мах агурӕм, ․․․․․ ӕвзагыл чи дзуры, ахӕм адӕмы, цӕмӕй сын радзурӕм, Библи цы ныфсы кой кӕны, уый тыххӕй. Нӕ бон аныхас кӕнын кӕимӕ уаид, ахӕм искӕй зоныс?»
Хъусӕй чи нӕ хъусы, ахӕм адӕмы куы агурай, уӕд та ис зӕгъӕн: «Салам. Иу цыдӕр дын равдисон? [DVD-тӕм кӕсӕн цӕуыл ис, ахӕм истӕмӕй спайда кӕн, ӕмӕ йын «Ног дунейы тӕлмац»-ӕй иу стих равдис къухӕйамонгӕ ӕвзагыл.] Уый уыди скъуыддзаг Библийӕ уырыссаг къухӕйамонгӕ ӕвзагыл. Библийӕ уӕлдай ма нӕм ис ӕндӕр видео-публикацитӕ дӕр, цӕмӕй хъусӕй чи нӕ хъусы, уыцы адӕм Хуыцауы тыххӕй фылдӕр базоной. Ӕмӕ сты лӕвар. Хъусӕй чи нӕ хъусы кӕнӕ ӕвзӕр чи хъусы, уыдонӕй къухӕйамонгӕ ӕвзагыл чи дзуры, ахӕм адӕймӕгтӕй никӕй зоныс?» Кӕд адӕймаг никӕй хъуыды кӕны, уӕд ӕй бафӕрс, мыййаг, куысты, скъолайы кӕнӕ та йӕ сыхӕгтӕй ахӕм ничи ис.