Цӕттӕ у дӕ территорийы, хъусӕй чи нӕ хъусы, ахӕм адӕмы агурынмӕ
1 Иегъовӕ хоны: «Ӕрцу!... Кӕй фӕнды, уадз исӕд царды дон лӕвар» (Рар. 22:17). Ацы ныхӕстӕ йӕ зӕрдӕмӕ чи айста, уыдоны ’хсӕн фылдӕрӕй-фылдӕр кӕнынц, хъусӕй чи нӕ хъусы, ахӕм адӕм. Уый фӕстиуӕгӕн, Уӕрӕсейы филиал йӕ хъус цы бӕстӕтӕм дары, уым фӕстаг цыппар азы фӕзынд аст ӕмбырды ӕмӕ ма бирӕ къордтӕ къухӕй амонгӕ ӕвзагыл.
2 Кӕд, къухӕй амонгӕ ӕвзагыл цы ӕмбырдтӕ ӕмӕ къордтӕ ис, уыдон ӕппӕт тыхтӕй архайынц сӕ территориты, хъусӕй чи нӕ хъусы кӕнӕ ӕвзӕр чи хъусы, ахӕм адӕмы ссарыныл, уӕддӕр нырма нӕ бӕстӕйы уыдонӕй бирӕты хъӕуы ссарын ӕмӕ сын хорз уацхъуыд фехъусын кӕнын.
3 Куыд у дӕ бон баххуыс кӕнын? Искуы куы вӕййыс, уӕд, мыййаг, феныс, къухӕй амонгӕ ӕвзагыл искӕй ныхасгӕнгӕ? Де ’мкусджытӕй кӕнӕ де ’мкъласонтӕй искӕмӕн йӕ бинонтӕй исчи хъусӕй нӕ хъусы? Дӕхи хъуыддӕгты фӕдыл куы цӕуай, уӕддӕр-иу архай, хъусӕй чи нӕ хъусы, ахӕм адӕмы агурыныл. Фӕлӕ цы ис бакӕнӕн, цӕмӕй Паддзахады тыххӕй хорз уацхъуыд айсой?
4 Ӕвдисӕн кӕнын. Къухӕй амонгӕ ӕвзагыл цы ӕмбырд кӕнӕ къорд ис, уыдонӕй дӕм хӕстӕгдӕр кӕцы у, уырдӕм фехъусын кӕн, чи нӕ хъусы, уыцы адӕймаджы адрис. Хъусӕй чи нӕ хъусы, уыцы адӕмӕй бирӕтӕн ӕцӕгад сӕ зӕрдӕтӕм тынгдӕр бахъары, хъусӕй чи нӕ хъусы, уыцы Ӕвдисӕнтимӕ, къухӕй амонгӕ ӕвзагыл цы ӕмбырды фембӕлдтӕ цӕуынц уагъд, уым куы фембӕлынц, уӕд. Уымӕ гӕсгӕ уӕм кӕд хӕстӕг ис, къухӕй амонгӕ ӕвзагыл кӕм дзурынц, ахӕм ӕмбырд кӕнӕ къорд, уӕд сын уе ’мбырды секретарь хъуамӕ зӕгъа, уӕ территорийы, хъусӕй чи нӕ хъусы, ахӕм адӕмӕй чи цӕры, уыдоны тыххӕй.
5 Фӕлӕ кӕм цӕрыс, уым, хъусӕй чи нӕ хъусы, уыцы адӕмӕн Хуыцауы базонынӕн чи баххуыс кӕнид, ахӕм адӕймаг куы нӕ уа, уӕд та цы кӕнгӕ у? Куыд сын у дӕ бон баххуыс кӕнын? Цӕуылнӕ сӕм ис дыккаг хатт бацӕуӕн ӕмӕ сӕ бинонтӕй чи хъусы, уыдонӕй искӕимӕ аныхас кӕнӕн? Хъусӕй чи нӕ хъусы, уыцы адӕймаг цӕмӕй бацымыдис кӕна, уый тыххӕй йын равдис къухӕй амонгӕ ӕвзагыл уагъд видеофильмы тыххӕй. Хъусынгӕнджытӕй ма иуӕй-иутӕ къухӕй амонгӕ ӕвзаг дӕр сахуыр кодтой, цӕмӕй, чи нӕ хъусы, ахӕм адӕмӕн ӕнтыстджындӕрӕй хъусын кӕной (Ап. к. 16:9, 10). Брошюрӕ «Цы домы» рацыд видеокассетӕйыл уырыссаг къухӕй амонгӕ ӕвзагыл. Бирӕтӕ Библи ахуыр кӕнгӕйӕ уыцы мадзӕлттӕй кӕй пайда кодтой, уый ӕрхаста бирӕ хорз дыргътӕ.
6 Дӕ территорийы, хъусӕй чи нӕ хъусы, ахӕм адӕмы агурынмӕ цӕттӕ куы уай, уӕд сын баххуыс кӕндзынӕ царды дон лӕвар исынӕн (Матф. 10:11).