Нӕ ныхас цӕмӕй райдайдзыстӕм, уый куыд цӕттӕ кӕнӕм
1. Нӕ ныхас куыд райдайдзыстӕм, уый ахсджиаг цӕмӕн у?
1 Хӕрзад хӕринаджы тӕфмӕ адӕймагмӕ хӕрын куыд ӕрцӕуы, афтӕ, нӕ ныхас цӕмӕй райдайдзыстӕм, уымӕй кӕнгӕ у, Библийыл хорз аныхас кӕндзыстӕм ӕви нӕ. Нӕ ныхасы райдиан цас ӕмӕ цӕуыл дзурдзыстӕм, уый алыхуызӕттӕ вӕййы. Хӕрзад хӕринаг цӕттӕ кӕнын куыд хъӕуы, афтӕ хъуамӕ нӕ ныхӕстыл дӕр рагацау ахъуыды кӕнӕм ӕмӕ сӕ бацӕттӕ кӕнӕм (Ӕмб. 15:28). Нӕ ныхас ӕнтыстджын цӕй фӕрцы уыдзӕн?
2. Адӕймаджы чи бацымыдис кӕндзӕн, ахӕм ныхӕстӕ бацӕттӕ кӕнӕн куыд ис?
2 Адӕймаджы чи бацымыдис кӕндзӕн, ахӕм темӕтӕ цӕттӕ кӕнӕм. Нӕ ныхас цӕмӕй райдайдзыстӕм, уый адӕймаджы кӕнӕ цымыдис бакӕндзӕн кӕнӕ та ныл дуар рахгӕндзӕн. Уӕдӕ уацамындмӕ куы цӕттӕ кӕнӕм, уӕд-иу ахъуыды кӕнӕм, адӕмы цы тыхсын кӕны, ууыл. Чи зоны сӕ фӕнды, цӕмӕй сын хорз хицауад уа, бинонтӕ амондджындӕр уой кӕнӕ хӕстытӕн кӕрон ӕрцӕуа. Адӕм сӕ хъуыдытӕ дзурын кӕй уарзынц, уымӕ гӕсгӕ хъӕуы бацӕттӕ кӕнын, сӕ хъуыдытӕ дзурынмӕ сӕ чи разӕнгард кӕна, ахӕм фарста. Хорз уаид, «Нӕ хъусын кӕныны хъуыддаджы» цы цӕвиттонтӕ вӕййы, уыдонӕй спайда кӕнын ӕмӕ сӕ нӕ территоримӕ гӕсгӕ фӕивын. Нӕ бон у нӕ бинонты ахуыры рӕстӕг афӕлварын, уацамынды нӕ ныхас куыд райдайдзыстӕм, уый.
3. Нӕ ныхас цӕмӕй райдайдзыстӕм, уый куыд ивӕн ис, адӕм цавӕр ӕгъдӕуттӕ ӕмӕ зондыл хӕст сты, уымӕ гӕсгӕ?
3 Ахъуыды кӕнӕм, цавӕр ӕгъдӕуттӕ ӕмӕ зондыл хӕст сты. Иуӕй-иу рӕтты хъуамӕ фыццаг зӕгъӕм, цӕмӕн ӕрбацыдыстӕм, уый. Ӕндӕр рӕтты та уӕздандзинадыл дзурӕг нӕ уыдзӕн, адӕймаджы йе ’нӕниздзинадӕй куы нӕ бафӕрсӕм кӕнӕ сын нӕхи куы нӕ бацамонӕм. Кӕмдӕр та адӕм Хуыцауыл ӕууӕндынц, ӕмӕ нӕ бон вӕййы нӕ ныхас комкоммӕ Библийӕ райдайын (Хъуыд. 2:14–17). Фӕлӕ адӕм чырыстӕттӕ кӕм не сты кӕнӕ Хуыцауыл кӕм не ’ууӕндынц, уым хуыздӕр вӕййы Библийы кой скӕнын фыццаг хатт нӕ, фӕлӕ сӕм дыккаг хатт куы бацӕуӕм, уӕд (Хъуыд. 17:22–31).
4. Фыццаг цы ныхӕстӕ зӕгъдзыстӕм, ууыл хъуыды кӕнын цӕмӕн хъӕуы?
4 Фыццаг ныхӕстӕ. Фыццаг цы ныхӕстӕ зӕгъдзыстӕм, уый-иу лӕмбынӕг бацӕттӕ кӕнӕм. Хуыздӕр вӕййы хуымӕтӕг ӕмӕ цыбыр ныхас кӕнын. Нӕ фыццаг ныхӕстӕ куыд зӕгъдзыстӕм, уый дӕр тынг ахсджиаг у. Зӕрдиагӕй-иу дзурӕм. Адӕймагмӕ-иу фӕлмӕнӕй бахудӕм, цӕмӕй бӕрӕг уа, кӕй йыл тыхсӕм. Ацы уынаффӕтӕ нын баххуыс кӕндзысты, цӕмӕй-иу нӕ ныхӕсты фӕрцы адӕмы бафӕнда «Йегъовӕйы фынгӕй» хӕрын (1 Кор. 10:21).