Куыд баххуыс кӕнӕм, ӕвзӕр чи кӕсы, уыдонӕн

1. Ӕвзӕр чи кӕсы, ахӕм адӕмимӕ Библи ахуыр кӕнын зын цӕмӕн вӕййы?

¹ Ӕвзӕр чи кӕсы, ахӕм адӕмы дӕр фӕфӕнды Хуыцауы тыххӕй базонын. Фӕлӕ Библи кӕнӕ ӕндӕр чингуытӕ кӕсынмӕ сӕ ныфс нӕ фӕхӕссынц. Ахӕм адӕмӕн, Библи цы публикациты фӕрцы фӕахуыр кӕнӕм, уыдон куы раттӕм, уӕлдайдӕр фыццаг бацыды рӕстӕг, уӕд нын бирӕ нӕ бантысдзӕн. Уӕдӕ сын нӕ бон куыд у баххуыс кӕнын, цӕмӕй Хуыцауы тыххӕй фылдӕр базоной? 20 бӕстӕйӕ фылдӕрӕй бафарстам фӕлтӕрдджын хъусынгӕнджыты, ахӕм уавӕры цы фӕаразынц, уымӕй. Дӕлдӕр фыст ис, цы загътой, уый.

2. Ӕвзӕр чи кӕсы, уыдонӕн цавӕр публикацитӕ раттӕн ис?

² Ӕвзӕр чи кӕсы кӕнӕ кӕсын чи нӕ зоны, уыдонимӕ Библи ахуыр кӕнын райдайӕн ис брошюрӕтӕй «Хуыцаумӕ хъус» кӕнӕ «Хуыцаумӕ хъус, ӕмӕ ӕнустӕм цӕрай». Иугонд Штаттӕй иу пионер адӕймагӕн равдисы дыууӕ брошюрӕ дӕр ӕмӕ йӕ бафӕрсы, йӕ зӕрдӕмӕ дзы тынгдӕр кӕцы цӕуы. Кенийы филиалӕй нӕм ныффыстой, ацы брошюрӕтӕ стыр ӕххуыс кӕй сты. Уымӕн ӕмӕ Африкӕйы адӕмӕн ахуыр кӕнын ӕнцондӕр вӕййы, фарстатӕ сӕм куы фӕдӕттынц, уӕд нӕ, фӕлӕ сын хабӕрттӕ дзургӕ куы фӕкӕнынц, уӕд. Ахуыр кӕмӕ ис, ахӕм адӕймагӕн кӕсын ӕмӕ фарстатӕн дзуапп дӕттын ӕнцон вӕййы, фӕлӕ фаг ахуыр кӕмӕ нӕй, уыдонӕн та афтӕ ахуыр кӕнын зын вӕййы. Иугыццыл кӕсын чи зоны, уыдонӕн хъусынгӕнджытӕй бирӕтӕ раттынц хуымӕтӕг ӕвзагыл фыст чингуытӕ кӕнӕ брошюрӕтӕ.

3. Кӕсын чи нӕ зоны, уыдонӕн нӕ баххуыс кӕнын куы фӕнда, уӕд нӕ зӕрдыл цы хъуамӕ дарӕм?

³ Ӕппӕлӕм сӕ. Кӕсын чи нӕ зоны, уыдон ӕфсӕрмы фӕкӕнынц ӕмӕ бирӕтӕ сӕхимӕ ницӕйаг фӕкӕсынц. Ныфс сӕ куы бауадзӕм, уӕд нын ӕнцондӕр уыдзӕн, семӕ рӕстдзинады тыххӕй дзурын. Кӕсын чи нӕ зоны, уыдонӕн сӕ фылдӕр вӕййынц ӕмбаргӕ ӕмӕ сӕ бон вӕййы ахуыр кӕнын. Нӕхи семӕ куыд дарӕм, уымӕй хъуамӕ бӕрӕг уа, кӕй сын аргъ кӕнӕм (1 Пет. 3:15). Ахӕм адӕймӕгты дарддӕр ахуыр кӕнын фӕнддзӕн, куы уыной, сӕ фыдӕбонӕн сын кӕй аргъ кӕнӕм ӕмӕ сӕ уырнындзинад кӕй фидардӕр кӕны. Уӕдӕ сӕ арӕхдӕр ӕппӕлӕм.

4. Ӕвзӕр чи кӕсы, уыдоны нӕ бон куыд у разӕнгард кӕнын, цӕмӕй ахуырмӕ сӕхи цӕттӕ кӕной?

⁴ Адӕймаг ӕвзӕр куы кӕса, уӕддӕр ӕй разӕнгард кӕн, цӕмӕй ахуырмӕ йӕхи цӕттӕ кӕна. Хуссар Африкӕйы хъусынгӕджытӕй иуӕй-иутӕ сӕ ахуыргӕнинӕгтӕн фӕзӕгъынц, цӕмӕй, сӕ бинонтӕй кӕнӕ се ’мбӕлттӕй хорз чи кӕсы, уыдон сын ӕххуыс кӕной. Великобританийы иу хъусынгӕнӕг ахуыры рӕстӕг йӕ ахуыргӕнинӕгтӕм ратты йӕхи чиныг ӕмӕ уырдыгӕй цалдӕр абзацы равзарынц. Уыдон фенынц, фарстатӕн дзуаппытӕ ссарын ӕнцондӕр кӕй у, куы сӕ бахахх кӕнай, уӕд. Афтӕмӕй сӕ фӕразӕнгард кӕны, цӕмӕй ахуырмӕ сӕхи цӕттӕ кӕной. Индийы иу ӕфсымӕр йӕ ахуыргӕнинӕгтӕн фӕзӕгъы, цӕмӕй-иу ӕркӕсой, иннӕ къуыри цы сӕргонд ахуыр кӕндзысты, уым цы нывтӕ ис, уыдонмӕ ӕмӕ сыл ахъуыды кӕной.

5. Библийы ахуыры рӕстӕг фӕразон куыд уыдзыстӕм?

⁵ Фӕразон уӕм. Адӕймагимӕ цыфӕнды публикаци ма ахуыр кӕнӕм, уӕддӕр-иу архайӕм, цӕмӕй сӕйраг хъуыдытӕ хорз бамбара. Райдианты хорз уаид, 10–15 минуты йеддӕмӕ-иу куы нӕ ныхас кӕниккам. Ахуыры рӕстӕг-иу бирӕ ӕрмӕг равзарыныл ма архайӕм, фӕлӕ-иу аныхас кӕнӕм ӕрмӕст цалдӕр абзацыл. Фӕразон уӕм, ахуыргӕнинаг сындӕггай куы кӕса, уӕд. Адӕймаг Йегъовӕйы цас тынгдӕр бауарза, уыйас ӕй тынгдӕр фӕнддзӕн хуыздӕр кӕсын. Цӕмӕй уый йӕ къухы бафта, уый тыххӕй хорз уыдзӕн, фыццаг бонӕй фӕстӕмӕ йӕ ӕмбырдтӕм куы хонӕм.

6. Нӕ бон куыд у адӕймаджы кӕсын ахуыр кӕнын?

⁶ Библи кӕимӕ ахуыр кӕнӕм, уый кӕсын куы сахуыр уа, уӕд йӕ уырнындзинад тагъддӕр сфидар уыдзӕн (Пс. 1:1–3). Ахуыргӕнинагӕн йӕ ныфс куы асӕтта, уӕд ын баххуыс кӕндзынӕ, йӕ хъус ын куы ӕрдарай, нырмӕ дӕр ын цы бантыст, уымӕ. Зӕгъ ын, Йегъовӕ йын йӕ фыдӕбонӕн кӕй арфӕ кӕндзӕн, стӕй йӕм йӕ бон кӕй у кувын ӕмӕ дзы ӕххуыс курын (Ӕмб. 16:3; 1 Иоан. 5:14, 15). Великобританийы иуӕй-иу хъусынгӕнджытӕ сӕ ахуыргӕнинӕгты фӕразӕнгард кӕнынц, цӕмӕй сӕ разы ӕвӕрой, сӕ къухы чи бафтдзӕн, ахӕм нысӕнттӕ, зӕгъӕм, фыццаг уал сахуыр кӕной алфавит, стӕй стихтӕ агурой ӕмӕ сӕ кӕсой, уый фӕстӕ та кӕсой Библийыл арӕзт хуымӕтӕг публикацитӕ. Адӕмы кӕсын куы фӕахуыр кӕнӕм, уӕд сын, кӕсын куыд хъӕуы, ӕрмӕст уый нӕ фӕамонӕм, фӕлӕ ма сӕ фӕразӕнгард кӕнӕм, цӕмӕй сӕ уый фӕндгӕ дӕр кӕна.

7. Ӕвзӕр чи кӕсы, уыдонӕн рӕстдзинады тыххӕй цӕмӕн хъуамӕ дзурӕм?

⁷ Йегъовӕ былысчъилтӕ нӕ кӕны, фаг ахуыр кӕмӕ нӕй, уыцы адӕмыл (Иов 34:19). Йегъовӕ кӕсы адӕймагӕн йӕ зӕрдӕмӕ (1 Аз. 28:9). Уӕдӕ мах дӕр, ӕвзӕр чи кӕсы, уыдонӕн рӕстдзинад дзурӕм. Уымӕн нын ис бирӕ хорз кусӕнгӕрзтӕ. Ӕппынфӕстаг нӕ бон уыдзӕн рахизын, Библийы ахуырӕдтӕ бӕстондӕр ӕвзӕрст кӕм цӕуынц, уыцы публикацимӕ, цӕмӕй Фыстад ноджы хуыздӕр бамбара.