Архайӕм арӕхстджындӕрӕй хъусын кӕныныл. Ныхас кӕнын-иу райдайӕм, цӕмӕй-иу хорз хабар радзурӕм

Уый ахсджиаг цӕмӕн у. Хӕдзарӕй-хӕдзармӕ хъусын кӕнгӕйӕ арӕх бирӕты хӕдзары нӕ баййафӕм. Фӕлӕ сыл фембӕлӕн вӕййы транспорты цӕугӕйӕ, поликлиникӕйы дохтырмӕ ӕнхъӕлмӕ кӕсгӕйӕ, куысты кӕнӕ скъолайы улӕфты рӕстӕг ӕмӕ афтӕ дарддӕр. Йегъовӕйы фӕнды, цӕмӕй алы адӕймаг дӕр йӕ Паддзахады тыххӕй хорз хабар фехъуса (1 Тим. 2:3, 4). Цӕмӕй хорз хабар радзурӕм, уый тыххӕй арӕх нӕхи фӕхъӕуы семӕ ныхас кӕнын райдайын.

Уый куыд ис аразӕн:

Адӕммӕ дӕ хъус лӕмбынӕг дар. Адӕймаг хӕларзӕрдӕ у, ныхас кӕнын ӕм цӕуы? Уавӕртӕм гӕсгӕ сӕрибарӕй ныхас кӕнӕн ис? Иуӕй-иу хъусынгӕнджытӕ уал фыццаг адӕймаджы цӕстытӕм бакӕсынц ӕмӕ йӕм сӕ мидбылты бахудынц. Кӕд сӕм уый дӕр бахуды, уӕд йемӕ ныхас кӕнын райдайынц.
Кӕд ныхас кӕнын райдайынмӕ дӕ ныфс нӕ хӕссыс, уӕд цыбыртӕй дӕхинымӕр скув (Неем. 2:4; Хъуыд. 4:29).
Дӕ бон у дӕ ныхас хуымӕтӕгӕй райдайын, зӕгъӕм, салам ын раттын. Йесо самариаг сылгоймагимӕ йӕ ныхас Хуыцауы Паддзахадӕй нӕ райдыдта (Иоан. 4:7). Хатт, цӕмӕй ныхас кӕнын райдайӕм, уый тыххӕй хорз вӕййы адӕймагӕй раппӕлын: «Дӕ сывӕллӕттӕ цы хорз хъомыл сты!» Кӕнӕ та ис фарстайӕ райдайӕн: «Дысон ног хабӕрттӕм кастӕ?»
Адӕймагимӕ ныхас кӕнын куы райдайай, уӕд фадӕттӕ агур, цӕмӕй йын хорз хабар радзурай, фӕлӕ тагъд ма кӕн. Чи зоны, дӕ бон у ахӕм цыдӕр зӕгъын, ӕмӕ адӕймаджы бацымыдис кӕна ӕмӕ дӕм йӕхӕдӕг фарстатӕ дӕттын дӕр райдайа. Зӕгъӕм, бинонты царды кой куы кӕнат, уӕд дӕ бон у зӕгъын: «Сывӕллӕттӕ хъомыл кӕныны тыххӕй иу замманай хъуыды бакастӕн». Кӕд дӕ ныхас ног хабӕрттӕй райдыдтай, уӕд та дӕ бон у зӕгъын: «Иу бон бакастӕн, тагъд цы диссаджы ивындзинӕдтӕ ӕрцӕудзӕн, уый тыххӕй хорз хабар». Дӕ ныфс-иу ма асӕттӕд, хорз хабар ын куы нӕ радзурай, афтӕмӕй уӕ ныхас куы фӕуа, уӕд.
Демӕ хӕсс буклеттӕ кӕнӕ ӕндӕр литературӕ, цӕмӕй-иу дӕм чи байхъуса, уыдонӕн сӕ радтай.

Бафӕлвар мӕйы дӕргъы:

Алы къуыри дӕр-иу бацархай, цӕмӕй, ӕппынкъаддӕр, иу адӕймагимӕ ныхас кӕнын райдайай ӕмӕ йын хорз хабар радзурай.