Дӕ бон у хъусын кӕнын, фадат дын куы фӕзыны, уӕд!
1. а) Фадат куы фӕзыны, уӕд хъусын кӕнын, зӕгъгӕ, цы нысан кӕны? ӕ) Не ’мбырды рӕстдзинад фыццаг хатт, хӕдзармӕ сӕм кӕй ӕрбахостой, уый фӕрцы нӕ, фӕлӕ ӕндӕр искуы чи фехъуста, уыдон цал сты?
1 Де ’мбырдӕй фыццаг хатт рӕстдзинад цалӕй фехъуыстой, Йегъовӕйы Ӕвдисӕнтӕ сӕм хӕдзармӕ кӕй ӕрбахостой, уый фӕрцы нӕ, фӕлӕ сыл ӕндӕр кӕмдӕр кӕй амбӕлдысты? Чи зоны дӕм диссаг фӕкӕса, уыцы хотӕ ӕмӕ ’фсымӕртӕ цал сты, уый куы базонай, уӕд. Хӕдзарӕй хӕдзармӕ хъусын кӕнынӕй уӕлдай ма хорз хабар кӕм фӕдзурӕм? Искуыдӕм куы фӕцӕуӕм, нӕ хӕстӕджытӕм кӕнӕ нӕ сыхӕгтӕм куы бауайӕм, йе та дуканийы, скъолайы, куысты кӕнӕ ӕндӕр искуы куы вӕййӕм. 200 адӕймаджы кӕм ис, иу ахӕм ӕмбырды рӕстдзинад фыццаг хатт афтӕмӕй фехъуыстой 80 адӕймаджы бӕрц. Уӕдӕ йӕ уынӕм, фадат нын куы фӕзыны, уӕд куы фӕхъусын кӕнӕм, уӕд нын бирӕ кӕй бантысы.
2. Хуыцауы лӕггадгӕнджытӕн-иу фадат куы фӕзынд, уӕд кӕй хъусын кодтой, уымӕн Библийы цавӕр цӕвиттонтӕ ис?
2 Фыццаг ӕнусы дӕр Хуыцауы лӕггадгӕнджытӕ арӕх хъусын кодтой, фадат-иу сын куы фӕзынд, уӕд. Зӕгъӕм, Чырысти иухатт Самарийы куы уыд, уӕд сныхас кодта, Иаковы цъайӕ дон чи иста, уыцы сылгоймагимӕ (Иоан. 4:6–26). Филипп та ныхас кӕнын райдыдта, Исайы чиныг чи каст, уыцы ефиопаг хицауимӕ. Бафарста йӕ: «Цы кӕсыс, уый ӕмбарыс?» (Ап. хъ. 8:26–38). Апостол Павел ахӕстоны куы бадти, уӕд хорз хабар радзырдта ахӕстонгӕсӕн (Ап. хъ. 16:23–34). Фӕстӕдӕр ӕй хӕдзары ахстӕй куы дардтой, уӕд-иу ӕм чи ’рбацыд, «уыдонмӕ-иу се ’ппӕтмӕ дӕр хорз цӕстӕй ракаст, ӕмӕ сын хъусын кодта Хуыцауы паддзахады тыххӕй ӕмӕ сын... дзырдта Хицау Йесо Чырыстийы тыххӕй» (Ап. хъ. 28:30, 31). Махӕн дӕр нӕ бон у алыхуызон уавӕрты хъусын кӕнын, кӕд ӕфсӕрмыгӕнаг стӕм, уӕддӕр. Куыд?
3. Хорз хабар дзурын куы ’фсӕрмы кӕнӕм, уӕд нын цы баххуыс кӕндзӕн?
3 Ныхас райдайӕн куыд ис? Бирӕтӕн зын вӕййы ӕнӕзонгӕ адӕмимӕ ныхас кӕнын. Иуӕй-иутӕ суанг зонгӕтӕн дӕр ӕфсӕрмы фӕкӕнынц рӕстдзинады тыххӕй дзурын. Фӕлӕ Йегъовӕйы хорздзинӕдтыл, цы рӕстдзинад нын раргом кодта ӕмӕ ацы дунейы адӕм цы кӕуинаг уавӕры сты, уыдӕттыл куы хъуыды кӕнӕм, уӕд нӕ уый разӕнгард кӕндзӕн хъусын кӕнынмӕ (Ионӕ 4:11; Пс. 40:5; Матф. 13:52). Уымӕй уӕлдай ма нӕ бон у Йегъовӕмӕ кувын, цӕмӕй «ныфсджынӕй дзурӕм» (1 Фес. 2:2). Галаады скъола чи фӕци, иу ахӕм ӕфсымӕр загъта: «Арӕх вӕййы афтӕ, ӕмӕ мын адӕймагимӕ сныхас кӕнын зын куы вӕййы, уӕд Йегъовӕмӕ скувын ӕмӕ мын уый баххуыс кӕны». Кӕд ӕфсӕрмы кӕныс ныхас кӕнын райдайын, уӕд-иу ды дӕр дӕхинымӕр акув (Неем. 2:4).
4. Нӕ ныхас цӕмӕй райдайӕм ӕмӕ цӕмӕн?
4 Статьяйы номӕй куыд зыны, афтӕмӕй нын фадат куы фӕзыны, уӕд куы фӕхъусын кӕнӕм, уӕд нӕ ныхас цавӕрдӕр фарстайӕ кӕнӕ цавӕрдӕр стихӕй нӕ райдайӕм. Ӕнцондӕр нын уыдзӕн, фыццаг уал-иу адӕймагимӕ ӕнӕуи истӕуыл куы аныхас кӕнӕм, ома-иу комкоммӕ хорз хабарӕй куы нӕ райдайӕм. Хъусынгӕнджытӕй бирӕтӕ загътой, уый фӕрцы-иу кӕй фӕныфсджындӕр сты ӕмӕ-иу стӕй сӕ бон хъуыддагмӕ рахизын дӕр кӕй баци. Адӕймаджы ныхас кӕнын куы нӕ фӕнда, уӕд-иу ӕй ныууадзӕм. Уӕзданӕй нӕ ныхас фӕуӕм ӕмӕ ацӕуӕм.
5. Иу хойӕн цы ’ххуыс кӕны, цӕмӕй-иу ныхас кӕнын райдайа?
5 Иу ӕфсӕрмыгӕнаг хо базары исты куы фелхӕны, уӕд адӕймагмӕ бакӕсы ӕмӕ йӕм йӕ мидбылты бахуды. Уый дӕр ӕм куы бахуды, уӕд ын хо иу-дыууӕ ныхасы фӕзӕгъы. Куы йӕм байхъусы, уӕд фӕныфсджындӕр вӕййы ӕмӕ йӕ ныхас адарддӕр кӕны. Уыцы хо адӕймагмӕ лӕмбынӕг фӕхъусы, цӕмӕй бамбара, Хуыцау ныфс цӕмӕй ӕвӕры, уыцы хабӕрттӕй йӕ зӕрдӕмӕ тынгдӕр цы фӕцӕудзӕн, уый. Афтӕмӕй ратты бирӕ литературӕ, кӕимӕдӕр та Библи ахуыр кӕнын дӕр райдыдта.
6. Нӕ бон куыд у адӕймагимӕ ныхас кӕнын райдайын?
6 Ныхас кӕнын-иу дӕхӕдӕг райдай. Цӕмӕй ис ныхас кӕнын райдайӕн? Зӕгъӕм, Чырысти цъайы раз цы сылгоймагыл фембӕлд, уымӕй уал дон ракуырдта, уый фӕстӕ та ныхас кӕнын райдыдта (Иоан. 4:7). Афтӕ махӕн дӕр нӕ бон у нӕ ныхас райдайын зӕрдиаг саламӕй кӕнӕ исты фарстайӕ. Адӕймагимӕ ныхас кӕнгӕйӕ дын, чи зоны, фадат фӕуа Библийӕ исты хъуыды зӕгъынӕн, ӕмӕ йын афтӕмӕй йӕ зӕрдӕйы рӕстдзинады мыггаг ныппарай (Еккл. 11:6). Иуӕй-иутӕ та ахӕм исты фӕзӕгъынц, цӕмӕй адӕймаджы бацымыдис кӕна. Ӕмӕ уыйадыл ныхас кӕнын райдайынц. Зӕгъӕм, иннӕ рынчынтимӕ дохтырмӕ ӕнхъӕлмӕ кӕсгӕйӕ зӕгъӕн ис: «Тӕхуды, куы нал рынчын кӕндзыстӕм, уыцы рӕстӕг ма тагъддӕр куы ’рцӕуид».
7. Нӕ алыварс цытӕ цӕуы, уымӕ нӕ хъус куы дарӕм, уӕд нын уый фӕрцы хъусын кӕнынӕн фадат куыд фӕзындзӕн?
7 Нӕ алыварс цытӕ цӕуы, уымӕ нӕ хъус куы дарӕм, уӕд нын уый дӕр баххуыс кӕндзӕн, цӕмӕй-иу ныхас кӕнын райдайӕм. Зӕгъӕм, куы бафиппайӕм, кӕмӕндӕр йӕ сывӕллон йӕхи хорз дары, уӕд дзы нӕ бон у раппӕлын ӕмӕ йӕ бафӕрсын: «Куыд дын уайы дӕ сывӕллоны афтӕ хорз хъомыл кӕнын?». Иу хо йӕ хъус фӕдары, йе ’мкусджытӕ цӕуыл фӕныхас кӕнынц, уымӕ ӕмӕ сын фӕстӕдӕр уыцы фарстайы фӕдыл журналтӕ ’рбахӕссы. Йӕ куыстӕй иу сылгоймаг чындзы цӕуы, уый куы базыдта, уӕд ын радта литература уыцы фарстайы фӕдыл. Ныхас дзы цыди чындзӕхсӕвы хабӕрттӕ куыд пълан кӕнын хъӕуы, ууыл. Уыцы хабары фӕстӕ-иу арӕх ныхас кодтой Библийыл.
8. Нӕ бон куыд у нӕ литературӕйы руаджы искӕимӕ ныхас кӕнын райдайын?
8 Цӕмӕй адӕймагимӕ ныхас кӕнын райдайӕм, уый тыххӕй ма нӕ бон у кӕсын журнал кӕнӕ чиныг, иннӕтӕ нӕ кӕм уыной, ахӕм ран. Иу ӕфсымӕр исты цымыдисаг статья равзары ӕмӕ йӕ йӕхинымӕр фӕкӕсы. Куы бафиппайы, чидӕр ӕм кӕсы, уӕд ӕй бафӕрсы, фӕнды дӕ ацы статья бакӕсын, зӕгъгӕ, кӕнӕ йын статьяйы тыххӕй цалдӕр ныхасы фӕзӕгъы. Кӕнӕ та нӕ бон у нӕ литературӕ ахӕм ран ӕрӕвӕрын, цӕмӕй йӕ не ’мкусджытӕ кӕнӕ не ’мкъласӕгтӕ уыной. Чи зоны сӕ искӕцы темӕ кӕйдӕр зӕрдӕмӕ фӕцӕуа ӕмӕ йӕ фылдӕр базонын бафӕнда.
9, 10. а) Хъусын кӕнынӕн фадӕттӕ ссарӕн куыд ис? ӕ) Дӕуӕн та дӕ бон цы у бакӕнын, цӕмӕй-иу дын ахӕм фадат фӕзына?
9 Фадӕттӕ агурӕм. Ацы дунейӕн йӕ кӕрон хӕстӕг кӕй у, уымӕ гӕсгӕ хъуамӕ афтӕ ма хъуыды кӕнӕм, зӕгъгӕ нын хъусын кӕнынӕн фадат куы фӕзына, уӕд хорз, кӕннод дӕр ницы кӕны. Фӕлӕ хъуамӕ нӕхӕдӕг агурӕм уыцы фадӕттӕ, зӕгъӕм, боны дӕргъы нӕ хъуыддӕгтӕ куы кӕнӕм, уӕд. Рагацау-иу ахъуыды кӕнӕм, кӕуыл фембӕлдзыстӕм, уыцы адӕмыл ӕмӕ семӕ куыд аныхас кӕнӕн ис, ууыл. Немӕ-иу хӕссӕм Библи ӕмӕ ӕндӕр литературӕ, цӕмӕй нӕм чи байхъуса, уымӕн-иу исты бакӕсынӕн раттӕм (1 Пет. 3:15).
10 Бирӕ хъусынгӕнджытӕ сӕрӕндзинад кӕй равдисынц, уый руаджы сын фӕзыны хорз фадӕттӕ адӕмимӕ аныхас кӕнынӕн. Иу хо цӕры, хъахъхъӕнгӕ кӕй кӕнынц, ахӕм бирӕуӕладзыгон хӕдзары. Хо кӕртмӕ рацӕуы ӕмӕ фембырд кӕны гыццыл хӕйттӕй конд нывтӕ – рауайы дзы рӕсугъд ӕрдзы нывтӕ. Йӕ сыхӕгтӕ йӕ разы куы ’рлӕууынц ӕмӕ куы бадис кӕнынц, куыд рӕсугъд сты, зӕгъгӕ, уӕд хо уыцы фадатӕй спайда кӕны ӕмӕ сын радзуры, Библи зӕрдӕ кӕй ӕвӕры «ног арв ӕмӕ ног зӕххӕй» (Рарг. 21:1–4). Цымӕ махӕн та нӕ бон цы у бакӕнын, цӕмӕй-иу нын хъусын кӕнынӕн фадат фӕзына?
11. Цы хъӕуы саразын, цӕмӕй адӕймагӕн баххуыс кӕнӕм?
11 Бацархайӕм, цӕмӕй адӕймагӕн дарддӕр баххуыс кӕнӕм. Адӕймаг дӕм куы байхъуса, уӕд-иу бацархай, цӕмӕй та йемӕ ногӕй фембӕлай. Уавӕр куы амона, уӕд ын дӕ бон у зӕгъын: «Тынг ӕхсызгон мын уыд демӕ аныхас кӕнын. Кӕм ма уыдзӕн нӕ бон фембӕлын?». Иуӕй-иу хотӕ ӕмӕ ’фсымӕртӕ та адӕймагӕн раттынц сӕ адрис ӕмӕ сӕ телефоны номыртӕ ӕмӕ фӕзӕгъынц: «Нӕ ныхас мӕ зӕрдӕмӕ фӕцыд. Кӕд дӕ ацы хъуыддаджы тыххӕй фылдӕр базонын фӕнды, уӕд дын мӕнӕ мӕ адрис ӕмӕ мӕ телефоны номыртӕ». Кӕд дӕхи бон адӕймагимӕ ногӕй фембӕлын нӕу, уӕд ӕвӕстиатӕй байдзаг кӕн бланк «Пожалуйста, посети этого человека» (S-43-U), зӕгъгӕ, ӕмӕ йӕ ратт ӕмбырды секретармӕ. Уый та йӕ фӕхӕццӕ кӕндзӕн, уыцы адӕймагмӕ хӕстӕгдӕр цы ӕмбырд ис, уырдӕм.
12. а) Фадат нын куы фӕзыны, уӕд цас фӕхъусын кӕнӕм, уый фыссын цӕмӕн хъӕуы? ӕ) Фадат куы фӕзыны, уӕд кӕй фӕхъусын кӕнӕм, уый фӕрцы нын цы бантысы? (Кӕс рамкӕ «Фадат нын куы фӕзыны, уӕд кӕй фӕхъусын кӕнӕм, уый руаджы нын бирӕ бантысы».)
12 Фадат нын куы фӕзыны, уӕд цас рӕстӕг фӕхъусын кӕнӕм, уый фӕхъӕуы уацамындон хыгъды ныффыссын. Кӕд бон иу-цалдӕр минуты йеддӕмӕ нӕ хъусын кодтай, уӕддӕр-иу сӕ ныффысс. Ахъуыды-ма кӕн: ӕнӕхъӕн дунейы алы хъусынгӕнӕг дӕр бон 5 минуты искӕимӕ Хуыцауы тыххӕй куы ныхас кӕна, уӕд алы мӕй дӕр уайдзӕн 17 милуан сахатӕй фылдӕр!
13. Фадат нын куы фӕзыны, уӕд цӕмӕн фӕхъусын кӕнӕм?
13 Фадат нын куы фӕзыны, уӕд фӕхъусын кӕнӕм, Хуыцау ӕмӕ адӕмы кӕй уарзӕм, уый тыххӕй (Матф. 22:37–39). Йегъовӕйы рӕсугъд миниуджытӕн ӕмӕ йын йӕ диссаджы фӕндтӕн кӕй аргъ кӕнӕм, уый тыххӕй нын ӕхсызгон у «йӕ паддзахады кад ӕмӕ намысы тыххӕй» иннӕтӕн дзурын (Пс. 145:7, 10–12). Нӕ алыварс цы адӕм цӕры, уыдоныл кӕй тыхсӕм, уый нӕ разӕнгард кӕны, цӕмӕй алы фадатӕй дӕр пайда кӕнӕм ӕмӕ, цалынмӕ рӕстӕг ис, уӕдмӕ сын хорз хабар дзурӕм (Ром. 10:13, 14). Цы зӕгъдзыстӕм, ууыл-иу рагацау куы ахъуыды кӕнӕм ӕмӕ-иу нӕхи куы бацӕттӕ кӕнӕм, уӕд нӕ алкӕй бон дӕр уыдзӕн, фадат куы фӕзына, уӕд Хуыцауы тыххӕй цалдӕр ныхасы зӕгъын. Ӕмӕ, чи зоны, зӕрдиагӕй нӕм чи байхъуса, ахӕм сыгъдӕгзӕрдӕ адӕймагыл дӕр фембӕлӕм.
[Хицӕнгонд текст 4 фарсыл]
Ӕнцондӕр нын уыдзӕн, фыццаг уал-иу адӕймагимӕ ӕнӕуи истӕуыл куы аныхас кӕнӕм
[Хицӕнгонд текст 5 фарсыл]
Бирӕ хъусынгӕнджытӕ сӕрӕндзинад кӕй равдисынц, уый руаджы сын фӕзыны фадӕттӕ адӕмимӕ аныхас кӕнынӕн
[Рамкӕ 5 фарсыл]
Цы нын баххуыс кӕндзӕн ныхас кӕнын райдайынӕн
◼ Кув Йегъовӕмӕ, цӕмӕй дӕ бон бауа ныхас кӕнын райдайын
◼ Ныхас кӕнын-иу райдай, дӕумӕ гӕсгӕ, хӕларзӕрдӕ чи у ӕмӕ чи нӕ тагъд кӕны, ахӕм адӕймагимӕ
◼ Фыццаг уал-иу адӕймагмӕ бакӕс, дӕ мидбылты йӕм бахуд ӕмӕ дӕ ныхас райдай, уӕ дыууӕ дӕр зӕрдиагӕй цӕуыл аныхас кӕниккат, ахӕм хъуыддагӕй
◼ Лӕмбынӕг-иу ӕм хъус
[Рамкӕ 6 фарсыл]
Фадат нын куы фӕзыны, уӕд кӕй фӕхъусын кӕнӕм, уый руаджы нын бирӕ бантысы
• Иу ӕфсымӕрӕн цалынмӕ йӕ машинӕ ремонт кодтой, уӕдмӕ хъусын кодта, йӕ алыварс чи уыд, уыдонӕн. Фӕхуыдта сӕ конгрессы цы раныхас хъуамӕ уыдаид, уымӕ ӕмӕ сын хуынды гӕххӕттытӕ радта. Иу азы фӕстӕ йыл конгрессы иу лӕг тынг бацин кодта, фӕлӕ йӕ ’фсымӕр нӕ базыдта. Уыцы нӕлгоймаг уыди, хуынды гӕххӕт кӕмӕн радта, уыдонӕй иу! Афӕдзы размӕ уый конгресмӕ ӕрбацыд, раныхасмӕ байхъуыста ӕмӕ йӕ бафӕндыд Библи ахуыр кӕнын. Ныр йӕхӕдӕг дӕр ӕмӕ йӕ бинойнаг дӕр сты Йегъовӕйы Ӕвдисӕнтӕ.
• Иу хо йӕхӕдӕг дӕр рӕстдзинад базыдта, Йегъовӕйы Ӕвдисӕнтӕ йӕм хӕдзармӕ кӕй ӕрбацыдысты, уый фӕрцы нӕ, фӕлӕ кӕмдӕр йемӕ кӕй аныхас кодтой, уый руаджы. Ӕмӕ ныр уыцы хо, йе ’ртӕ сывӕллоны хъуыддӕгты фӕдыл рацу-бацу кӕнгӕйӕ, фӕархайы, кӕуыл амбӕлы, уыцы адӕмӕн хорз хабары тыххӕй дзурын. Зӕгъӕм, фӕныхас кӕны йӕ сыхӕгтимӕ, стӕй иннӕ сывӕллӕтты ныййарджытимӕ. Уыдоныл та амбӕлы, скъоламӕ куы бауайы кӕнӕ ныййарджыты ӕмбырды куы вӕййы, уӕд. Адӕймагимӕ куы базонгӕ вӕййы, уӕд алкӕддӕр фӕзӕгъы, Библи йын йӕ сывӕллӕттӕ хъомыл кӕнынӕн куыд тынг ӕххуыс кӕны, уый тыххӕй, стӕй та йӕ ныхас аздахы ӕндӕр фарстамӕ. Уыцы фыццаг къахдзӕф куы скӕны, уӕд ын уый фӕстӕ ӕнцондӕр вӕййы семӕ Библийыл ныхас кӕнын. Афтӕмӕй уыцы хо баххуыс кодта 12 адӕймагӕн донаргъуыд райсынӕн.
• Иухатт нӕ хомӕ ’рбацыд, страховкӕ чи кӕны, ахӕм компанийы кусӕг. Хо уыцы фадатӕй спайда кодта ӕмӕ нӕлгоймаджы бафарста, нӕ дӕ фӕндид, фидар ныфс дын куы бавӕриккой, ӕнӕниз ӕмӕ амондджын уыдзынӕ, стӕй ӕнустӕм цӕрдзынӕ, зӕгъгӕ. Нӕлгоймагӕн уый йӕ зӕрдӕмӕ фӕцыд ӕмӕ йӕ бафарста, цавӕр страховкӕйы кой кӕны, уымӕй. Нӕ хо йын бакаст, Библийы фидӕны тыххӕй цы фыст ис, уый ӕмӕ йын радта нӕ чингуытӕй иу. Лӕг чиныг иу изӕрмӕ бакаст ӕмӕ йӕ бафӕндыд Библи ахуыр кӕнын. Стӕй райдыдта ӕмбырдтӕм цӕуын ӕмӕ фӕстӕдӕр донаргъуыд райста.
• Нӕ хо ныхас кӕнын райдыдта, хӕдтӕхӕгы йӕ фарсмӕ цы сылгоймаг бадти, уыимӕ ӕмӕ йын Хуыцауы тыххӕй дӕр радзырдта. Бынатмӕ куы фӕцӕйхӕццӕ кодтой, уӕд хо сылгоймагӕн радта йӕ адрис ӕмӕ йӕ телефоны номыртӕ ӕмӕ йын загъта, зӕгъгӕ, дам, дӕм иннӕ хатт Йегъовӕйы Ӕвдисӕнтӕ куы ’рбацӕуой, уӕд сын зӕгъ, ӕмӕ демӕ Библи ахуыр кӕнын райдайой. Дыккаг бон уыцы сылгоймаджы дуар бахостой дыууӕ хойы. Сылгоймаг Библи ахуыр кӕнын райдыдта, йӕ уырнындзинад фидарӕй-фидардӕр кодта, донаргъуыд райста ӕмӕ, бирӕ нӕ рацыд, афтӕ йӕхӕдӕг ӕртӕ адӕймагимӕ Библи ахуыр кӕнын райдыдта.
• Не ’фсымӕртӕй иу цӕры зӕрӕдты хӕдзары. Цӕуы йыл 100 азы ӕмӕ у куырм. Уыцы ӕфсымӕр арӕх фӕзӕгъы: «Куыд тынг нӕ хъӕуы Хуыцауы Паддзахад!». Рынчынтӕм чи зилы, уыдоны дӕр ӕмӕ рынчынты дӕр бацымыдис кӕны, Хуыцауы Паддзахад цы у, уый ӕмӕ ’фсымӕрӕн фадат фӕзыны, цӕмӕй сын ӕй бамбарын кӕна. Уым чи кусы, иу ахӕм сылгоймаг ӕй бафарста, ӕмӕ дзӕнӕты та цы кусдзынӕ, зӕгъгӕ. Уый йын дзуапп радта: «Ногӕй та цӕстӕй ракӕсдзынӕн, ногӕй та мӕ дыууӕ къахыл цӕудзынӕн ӕмӕ мӕ коляскӕ басудздзынӕн». Куырм кӕй у, уымӕ гӕсгӕ сылгоймагӕн фӕзӕгъы, цӕмӕй йын-иу журналтӕ бакӕса. Уыцы ’фсымӕрмӕ иухатт йӕ чызг бӕрӕггӕнӕг куы ’рбацыд, уӕд ӕй сылгоймаг бафарста, ацы журнал нӕхимӕ ахӕссон, зӕгъгӕ. Ӕмӕ йын стӕй загъта: «Ам ныр нӕ ныхас алкӕддӕр райдайы ӕмӕ фӕвӕййы иу хабарӕй: „Куыд тынг нӕ хъӕуы Хуыцауы Паддзахад!“».
• Рестораны иу хо фехъуыста, йӕ фарсмӕ цы ацӕргӕ нӕлгоймӕгтӕ бадт, уыдон политикӕйыл кӕй ныхас кодтой. Иу дзы загъта, зӕгъгӕ, дам, хицауадӕн йӕ бон нӕу адӕмӕн баххуыс кӕнын. Хо ахъуыды кодта, уый хорз фадат кӕй у исты зӕгъынӕн. Йӕхинымӕр акуывта ӕмӕ сӕм бацыд. Чи у, уый сын загъта ӕмӕ сын стӕй радзырдта, адӕмы зындзинӕдтӕн кӕрон чи скӕндзӕн, уыцы хицауады тыххӕй, ӕмӕ сын стӕй брошюрӕ радта. Раст уыцы рӕстӕг сӕ размӕ бацыд рестораны хицау. Хо загъта, зӕгъгӕ мӕ ныртӕккӕ ардыгӕй атӕрдзӕн. Фӕлӕ нӕлгоймаг бамбарын кодта, сӕ ныхас сын кӕй фехъуыста ӕмӕ уый дӕр брошюрӕ кӕй хъӕуы. Цӕуыл дзырдтой, уый ма фехъуыста, рестораны чи куыста, уыцы сылгоймӕгтӕй иу. Уый дӕр сӕм бацыд, йӕ цӕссыгтӕ йӕ рустыл гӕр-гӕр кодтой, афтӕмӕй. Кӕддӕр уыцы сылгоймаг ахуыр кодта Библи, фӕлӕ йӕ стӕй ныууагъта ӕмӕ та йӕ ныр ногӕй Библи ахуыр кӕнын бафӕндыд.