Иегъовӕйы кадджын кӕн, фадат дын куы фӕзыны, уӕд
1 Иегъовӕйы иузӕрдион лӕггадгӕнджытӕ алы бон дӕр агурынц фадӕттӕ, цӕмӕй йӕ кадджын кӕной (Пс. 95:2, 3; Дзут. 13:15). Иегъовӕйы кадджын кӕнын нӕ бон у, зӕгъӕм, фадат нын куы фӕзыны, уӕд искӕимӕ хорз хабары тыххӕй ныхасгӕнгӕйӕ. Иегъовӕйӕн кувӕг адӕмӕй абон бирӕтӕ бузныг сты, чидӕртӕ семӕ ӕнӕнхъӕлӕджы ныхас кӕнын кӕй райдыдтой ӕмӕ сӕ афтӕмӕй Паддзахады хабаримӕ кӕй базонгӕ кодтой.
2 Арӕх ӕцӕгады тыххӕй иу адӕймагимӕ кӕй аныхас кӕнынц, уый фӕрцы ӕндӕртӕ дӕр Паддзахады хабар фехъусынц. Цӕвиттон, Иаковы цъайы цур Йесо самариаг сылгоймагимӕ кӕй аныхас кодта, уый фӕрцы ноджы фылдӕр адӕмы бацымыдис кодта хорз хабар (Иоан. 4:6—30, 39—42). Павел ӕмӕ Силӕ Филиппы ахӕстоны куы бадтысты, уӕд хъусын кодтой ахӕстоны хъахъхъӕнӕгӕн, ӕмӕ фӕстӕдӕр уыцы лӕг ӕмӕ йӕ бинонтӕ иууылдӕр ӕцӕгады фӕндагыл слӕууыдысты (Ап. к. 16:25—34).
3 Кӕм ис ныхас кӕнӕн. Адӕмимӕ ӕцӕгады тыххӕй ныхас кӕнӕн кӕм ис? Бирӕтӕ фӕныхас кӕнынц дуканиты истытӕ ӕлхӕнгӕйӕ, ӕхсӕнадон транспортыл цӕугӕйӕ, кӕнӕ та дохтырмӕ рады ӕнхъӕлмӕ кӕсгӕйӕ. Иннӕтӕ та уымӕн фадат ссарынц, куысты кӕнӕ сын скъолайы улӕфты рӕстӕг куы вӕййы, уӕд. Нӕ библион литературӕ бӕрӕг ран куы дарӕм, уӕд ӕй чи уына, уый нӕ, гӕнӕн ис, ӕмӕ бафӕрса, цӕуыл ӕууӕндӕм, уымӕй (1 Пет. 3:15).
4 Куыд ис ныхас райдайӕн. Иу ӕфсӕрмыгӕнаг авдаздзыд чызг ӕмбырды фембӕлды фехъуыста, алчидӕр кӕй хъуамӕ хъусын кӕна. Ӕмӕ йӕ мадимӕ дуканимӕ куы цыд, уӕд йӕ хызыны сӕвӕрдта дыууӕ брошюрӕйы. Цалынмӕ мад уӕйгӕнӕгӕн ӕхца фыста, уӕдмӕ чызг иу сылгоймагӕн брошюрӕ радта, уый дӕр ӕй ӕхсызгонӕй айста. Мад ӕй куы бафарста, зӕгъгӕ, сылгоймагмӕ бацӕуын дӕ ныфс куыд бахастай, уӕд уыцы ӕфсӕрмыгӕнаг чызг загъта: «Ӕз мӕхицӕн загътон: Иу! Дыууӕ! Ӕртӕ! Ӕмӕ йӕм бацыдтӕн!».
5 Фадат нын куы фӕзына, уӕд цӕмӕй искӕимӕ ныхас райдайӕм, уый тыххӕй махӕй алкӕйдӕр хъӕуы ацы гыццыл чызджы зӕрдӕйы уаджы хуызӕн зӕрдӕйы уаг. Цы нын баххуыс кӕндзӕн? Хуыцаумӕ кувын, цӕмӕй ныфсджынӕй дзурӕм (1 Фес. 2:2). Ныхас райдайынӕн бацӕттӕ кӕн, адӕмы чи тыхсын кӕны, ахӕм фарст, кӕнӕ та исты хъуыды. Ныфс дӕ уӕд, Иегъовӕ дын дӕ фыдӕбонӕн кӕй раарфӕ кӕндзӕн (Лук. 12:11, 12).
6 Алы бон дӕр кӕуыл ӕмбӕлӕм, уыцы адӕмимӕ, гӕнӕн уӕвгӕйӕ, ӕцӕгады тыххӕй куы ныхас кӕнӕм, уӕд уымӕй кадджын кӕндзыстӕм Иегъовӕйы ӕмӕ махӕн та нӕ зӕрдӕтӕ рухс кӕндзысты. Чи зоны уый фӕрцы исчи ӕнусон царды фӕндагыл ӕрлӕууа.