Хъусын кӕнынӕн алы фадатӕй дӕр пайда кӕнӕм
1. Чырысти самариаг сылгоймагӕн кӕй хъусын кодта, уымӕй цӕуыл ахуыр кӕнӕм?
1 Чырысти йӕ ахуыргӕнинӕгтимӕ Галилеймӕ цыди. Фӕндагыл сӕххормаг ӕмӕ сдойны. Цалынмӕ йӕ ахуыргӕнинӕгтӕ хӕринаг ӕлхӕнынмӕ уыдысты, уӕдмӕ Самаримӕ хӕстӕг цъайы цур бадти ӕмӕ йӕ фӕллад уагъта. Чырысти уырдӕм хъусын кӕнынмӕ не ’рцыд, фӕлӕ уӕддӕр фадатӕй спайда кодта, ӕмӕ донмӕ цы сылгоймаг ӕрбацыд, уыимӕ ныхас кӕнын райдыдта (Иоан. 4:5–14). Цӕмӕн? «Иузӕрдион ӕмӕ ӕцӕг ӕвдисӕн» кӕй уыд, уый нӕ рох кодта (Рарг. 3:14). Мах дӕр хъусын кӕнынӕн алы фадатӕй дӕр куы пайда кӕнӕм, уӕд Чырыстийы фӕзмдзыстӕм (1 Пет. 2:21).
2. Нӕхи куыд бацӕттӕ кӕнӕм, цӕмӕй нын фадат куы фӕзына, уӕд хъусын кӕнӕм?
2 Хъусын кӕнынмӕ цӕттӕ уӕм. Цӕмӕй адӕймагӕн, фадат нын куы фӕзына, уӕд хорз хабар радзурӕм, уый тыххӕй нӕ хъӕуы немӕ литературӕ хӕссын. Хъусынгӕнджытӕй бирӕтӕ семӕ райсынц трактаттӕ ӕмӕ-иу сӕ раттынц дуканигӕстӕн, заправкӕйы кусджытӕн ӕмӕ иннӕтӕн (Еккл. 11:6). Фӕндагыл арӕх чи вӕййы, иу ахӕм хо ӕдзух йемӕ фӕхӕссы гыццыл Библи ӕмӕ чиныг «Библи цы дзуры», ӕмӕ фӕныхас кӕны, йӕ фарсмӕ чи фӕбады, уыдонимӕ.
3. Адӕмимӕ ныхас кӕнын цӕмӕй райдайӕн ис?
3 Ныхас кӕнын цӕмӕй райдайӕм? Хъусын кӕнынӕн нын фадат куы фӕзыны, уӕд адӕймагӕн ӕппӕты райдианы нӕ фӕхъӕуы Библийы кой кӕнын. Йесо дӕр, уыцы сылгоймагимӕ ныхас кӕнын куы райдыдта, уӕд ын нӕ загъта Мессийӕ кӕй у, уый. Загъта йын, «дон ма мын авӕр», зӕгъгӕ, ӕмӕ уыйадыл ныхас кӕнын райдыдтой (Иоан. 4:7–9). Иу хо дӕр афтӕ райдайы адӕмимӕ ныхас кӕнын. Куы йӕ бафӕрсынц, бӕрӕгбӕттӕ цӕуылнӕ кӕныс, уӕд сын уайтагъд нӕ фӕзӕгъы, Йегъовӕйы Ӕвдисӕн дӕн, зӕгъгӕ. Фӕлӕ фӕзӕгъы: «Мӕхи нал фӕнды бӕрӕгбӕттӕ кӕнын». Ахӕм дзуапп фехъусгӕйӕ адӕймаг бафӕрсы, цӕуылнӕ, зӕгъгӕ, ӕмӕ уый фӕрцы нӕ хо йемӕ ныхас кӕнын райдайы.
4. Матфейы 28:18–20 стихтӕ нӕ хъусын кӕнынмӕ цӕмӕн разӕнгард кӕнынц?
4 Кӕд Йесо абон зӕххыл нал лӕггад кӕны, уӕддӕр уацамынды хъуыддагмӕ йӕ хъус дары, цӕмӕй размӕ цӕуа (Матф. 28:18–20). Уӕдӕ мах дӕр Чырыстийау цӕттӕ уӕм нӕ уырнындзинады тыххӕй кӕдфӕнды дӕр ӕргом дзурынмӕ (Дзут. 10:23).