Йегъовӕ мӕм цы цӕстӕй кӕсы?

1. Библи кӕсӕны хуызӕн куыд у?

¹ Кӕсӕнмӕ цас арӕх фӕкӕсыс? Нӕ фылдӕр алы бон дӕр, цӕмӕй фенӕм, барӕсугъд кӕнын нӕ цы хъӕуы, уый. Библи дӕр у кӕсӕны хуызӕн. Куы йӕ кӕсӕм, уӕд фендзыстӕм, Йегъовӕ нӕ цыхуызӕнӕй уыны, ома мидӕгӕй цавӕр стӕм, уый (1 Сам. 16:7; Иак. 1:22–24). Хуыцауы Ныхас «базоны зӕрдӕйы хъуыдытӕ ӕмӕ фӕндтӕ» (Дзут. 4:12). Библи алы бон дӕр куы кӕсӕм ӕмӕ йыл куы хъуыды кӕнӕм, уӕд куыд фендзыстӕм, фӕхуыздӕр кӕнын нӕ цы хъӕуы, цӕмӕй ноджы хуыздӕр хъусынгӕнджытӕ уӕм? (Пс. 1:1–3).

2. Библийы фӕрцы куыд бамбардзыстӕм, фӕхуыздӕр кӕнын нӕ цы хъӕуы, уый?

² Библи дын кӕсӕны хуызӕн уӕд. Йегъовӕйы зӕрдӕмӕ цавӕр миниуджытӕ цӕуы, уый базондзыстӕм, Библийы йӕ иузӕрдион лӕггадгӕнджыты тыххӕй куы кӕсӕм, уӕд. Зӕгъӕм, Давид Хуыцауы ном фӕчъизи кӕнын нӕ уагъта (1 Сам. 17:45, 46). Исай хъӕбатырӕй сразы, адӕм ӕвзӕр кӕм хъуыстой, ахӕм ран хъусын кӕныныл (Ис. 6:8, 9). Йесо йӕ уӕларвон Фыды тынг кӕй уарзта, уымӕ гӕсгӕ йын йӕ лӕггад уаззау уаргъы хуызӕн нӕ уыд, фӕлӕ йын уыд удӕнцойы ӕмӕ зӕрдӕрухсы хос (Иоан. 4:34). Фыццаг ӕнусы чырыстӕттӕ хорз хабар зынгзӕрдӕйӕ хъусын кодтой, сӕ зӕрдӕ Йегъовӕйыл дардтой ӕмӕ сӕ ныфс сӕттын нӕ уагътой (Хъуыд. 5:41, 42; 2 Кор. 4:1; 2 Тим. 4:17). Ахӕм цӕвиттонтыл куы хъуыды кӕнӕм, уӕд бамбардзыстӕм, цы нӕ хъӕуы фӕивын, цӕмӕй нӕ лӕггад фӕхуыздӕр кӕнӕм.

3. Фӕивын нӕ цы хъӕуы, ууыл фӕстиат кӕнын цӕуылнӕ хъӕуы?

³ Дӕ хъӕндзинӕдтӕ раст кӕн. Кӕй зӕгъын ӕй хъӕуы, кӕсӕнмӕ кӕсын ницы пайда у, дӕ хъӕндзинӕдтӕ куы нӕ раст кӕнай, уӕд. Нӕ бон у Йегъовӕмӕ кувын, цӕмӕй нӕхиуыл лӕмбынӕг ахъуыды кӕнӕм ӕмӕ нӕ фӕивын цы хъӕуы, уый фӕивӕм (Пс. 139:23, 24; Лук. 11:13). Фӕлӕ нӕ фӕивын цы хъӕуы, ууыл фӕстиат ма кӕнӕм, уымӕн ӕмӕ рӕстӕг бирӕ нал баззад ӕмӕ дзырд цӕуы адӕмы цардыл (1 Кор. 7:29; 1 Тим. 4:16).

4. Хуыцауы Ныхас лӕмбынӕг чи иртасы ӕмӕ, цы базоны, уымӕ гӕсгӕ чи архайы, уый цавӕр адӕймаг свӕййы?

⁴ Йегъовӕ кӕсы, адӕймаг мидӕгӕй цавӕр у, уымӕ, ӕмӕ йын уый бирӕ ахсджиагдӕр у йе ’ддаг бакастӕй (1 Пет. 3:3, 4). Хуыцауы Ныхас лӕмбынӕг чи иртасы ӕмӕ, цы базоны, уымӕ гӕсгӕ чи архайы, уый цавӕр адӕймаг свӕййы? Ахӕм адӕймаг, «цы фехъусы, уый нӕ ферох кӕны, фӕлӕ йӕ ӕххӕст кӕны. Ӕмӕ афтӕ кӕй кӕны, уый фӕрцы вӕййы амондджын» (Иак. 1:25). Мах «кӕсӕнтау... ӕвдисӕм Йегъовӕйы кад», ӕмӕ уымӕ гӕсгӕ уыдзыстӕм амондджын ӕмӕ хорз хъусынгӕнджытӕ (2 Кор. 3:18).