Библи дын кӕсӕны хуызӕн уӕд

Ахуыргӕнинаг Иаков Библи абарста кӕсӕнимӕ. Библийы нӕ бон вӕййы нӕхи фенын ӕмӕ бамбарын, ӕцӕгӕй цавӕр адӕймӕгтӕ стӕм, уый (Иак. 1:22–25). Нӕ бон куыд у уыцы «кӕсӕнӕй» раст пайда кӕнын?

Лӕмбынӕг ӕй кӕс. Кӕсӕнмӕ иу каст куы бакӕнӕм, уӕд, гӕнӕн ис, ма фенӕм, цыдӕр нӕ бадзӕбӕхтӕ кӕнын кӕй хъӕуы, уый. Раст афтӕ, Библи дӕр тагъд-тагъд куы кӕсӕм, уӕд нӕ бамбардзыстӕм, фӕивын нӕ цы хъӕуы, уый. Уымӕ гӕсгӕ йӕ хъуамӕ лӕмбынӕг кӕсӕм.

Дӕхи-иу дзы фен, иннӕты нӕ, фӕлӕ. Кӕсӕн иннӕрдӕм куы фӕзилӕм, уӕд дзы, гӕнӕн ис, ӕндӕр искӕй дӕр фенӕм ӕмӕ нӕ цӕст ӕрхӕца, кӕмдӕр ӕй йӕхи бадзӕбӕхтӕ кӕнын кӕй хъӕуы. Раст афтӕ Библи кӕсгӕйӕ дӕр, гӕнӕн ис, фӕуынӕм иннӕты хъӕндзинӕдтӕ ӕмӕ сӕм ныккомкоммӕ вӕййӕм. Фӕлӕ нын уый зынтӕй баххуыс кӕндзӕн, нӕхи цы хъӕуы, уый ивынӕн.

У ӕмбаргӕ. Кӕсӕнмӕ кӕсгӕйӕ, нӕ зӕрдӕмӕ цы нӕ цӕуы, ӕрмӕст уыдӕттӕ куы уынӕм, уӕд нӕ ныфс асӕтдзӕн. Библи кӕсгӕйӕ дӕр хъуамӕ ӕмбаргӕ уӕм ӕмӕ нӕхицӕй, Йегъовӕ нӕ цы нӕ домы, уый ма домӕм (Иак. 3:17).