Ног зарджытӕ!
1 Ӕрӕджы, 2014 азы 4 октябры, уыд Хъахъхъӕнӕн мӕсыджы, Библитӕ ӕмӕ трактатты Ӕхсӕнады (Пенсильвани) ӕрвылазон фембӕлд, ӕмӕ дзы фехъусын кодтой, нӕ зарджыты чиныг ногӕй рауадзын кӕй фӕнд кӕнӕм. Уый ӕхсызгон хабар куыннӕ уыд! Фембӕлды чи уыд, уыдонӕн сӕ зӕрдыл ӕрлӕууын кодтой, нӕ Паддзахады зарджытӕ Хуыцауӕн кувынимӕ баст кӕй сты ӕмӕ сын тынг кӕй аргъ кӕнӕм (Пс. 96:2).
2 Чи зоны, ахъуыды кӕнай: «Цымӕ зарджыты чиныг ногӕй рауадзын цӕмӕн бахъуыд?» Фыццаджыдӕр уый тыххӕй, ӕмӕ Библийӕ цавӕрдӕр ахуырӕдтӕ хуыздӕр бамбарӕм, ӕмӕ уый нӕ зарджыты чиныгыл дӕр, чи зоны, фӕзына (Ӕмб. 4:18). Стӕй нӕ зарджыты чиныджы ныхӕстӕй ӕмӕ дзырдбӕстытӕй бирӕтӕ ист сты раздӕры уагъд «Ног дунейы тӕлмац»-ӕй (англ.). Ӕмӕ сӕ ныр хъӕуы фӕивын, цӕмӕй ног уагъд «Ног дунейы тӕлмац»-мӕ гӕсгӕ раст уой. Уый тыххӕй ӕнӕуи дӕр бирӕ бафыдӕбон кӕнын хъӕудзӕн, ӕмӕ ахӕм уынаффӕ рахастам, цӕмӕй ма чиныгмӕ цалдӕр ног зарӕджы бафтауӕм.
3 Цымӕ, цалынмӕ ног зарджыты чиныг нӕ рацӕуа, уӕдмӕ нӕ бон ног зарджытӕ зарын нӕ уыдзӕн? Нӕ, уый афтӕ нӕу. Ӕхсызгонӕй уын хъусын кӕнӕм, ацы цалдӕр мӕйы дӕргъы-иу нӕ сайты ног зарджытӕ кӕй фӕзындзӕн. Ног зарӕг-иу куы фӕзына, уӕд-иу программӕйы фыст уыдзӕн, «ног зарӕг», зӕгъгӕ, ӕмӕ-иу ӕй Хъусын кӕныны фембӕлды фӕстӕ азардзыстӕм.
4 Куыд у нӕ бон ног зарджытӕ сахуыр кӕнын. Чи зоны, ног зарджытӕ сахуыр кӕнын афтӕ ӕнцон ма уа. Фӕлӕ нӕ уӕддӕр псаломзарӕггӕнӕгау фӕнды, цӕмӕй-иу ӕмбырды «хъусӕй ма лӕууӕм», фӕлӕ-иу зарӕм (Пс. 30:12). Ног зарӕг сахуыр кӕнынӕн дын баххуыс кӕндзысты цалдӕр уынаффӕйы.
Нӕ сайты уыцы зарджытӕм цы музыкӕ уыдзӕн, уымӕ-иу цалдӕр хатты байхъус. Цас ӕм арӕхдӕр хъусай, уыйас дын ӕй ӕнцондӕр уыдзӕн бахъуыды кӕнын.
Зарӕджы ныхӕстӕ-иу сахуыр кӕн.
Музыкӕйы цагъдмӕ-иу сӕ азар. Афтӕ кӕн, цалынмӕ зарӕг нӕ сахуыр кӕнай, уӕдмӕ.
Уӕ бинонты ахуыры рӕстӕг-иу ног зарӕг цалдӕр хатты иумӕ азарут, цалынмӕ йӕ нӕ сахуыр кӕнат, уӕдмӕ.
5 Программӕмӕ гӕсгӕ Хъусын кӕныны фембӕлды фӕстӕ ног зарӕг зарын куы хъӕуа, уӕд уал ӕмбырд уыцы зарӕджы музыкӕмӕ иу хатт байхъусдзӕн ӕмӕ йӕ уый фӕстӕ иумӕ азардзысты, иннӕ зарджытӕ куыд фӕзарӕм, афтӕ.
6 Ахъуыды-ма кӕнӕм, ӕмбырды Йегъовӕйы иумӕ нӕ зарджытӕй куы фӕкадджын кӕнӕм, уӕд нын уый цы стыр циндзинад ӕрхӕссы. Уӕдӕ раст нӕ уаид, зарӕг азарыны размӕ-иу залӕй ӕнӕхъуаджы куы рацӕуиккам.
7 Нӕ музыкӕйӕн ӕмӕ нӕ зарджытӕн кӕй аргъ кӕнӕм, уый равдисынӕн ма нын ис ӕндӕр фадат дӕр. Конгрессты райсомы ӕмӕ фӕссихоры программӕйы размӕ фӕцӕгъды музыкӕ. Афӕдз дыууӕ хатты зӕххы алы къуымтӕй не ’фсымӕртӕ ӕмӕ нӕ хотӕ Паттерсонмӕ (штат Нью-Йорк) сӕхи хардзӕй ӕрцӕуынц, цӕмӕй-иу, не ’мбырдты чи фӕцӕгъды, ахӕм рӕсугъд музыкӕ ныффыссой. Уӕдӕ конгрессы сӕрдариуӕггӕнӕг ӕфсымӕр куы зӕгъа, цӕмӕй нӕ бынӕтты сбадӕм ӕмӕ, уыцы оркестр цы музыкӕ ныффыста, уымӕ байхъусӕм, уӕд-иу афтӕ бакӕнӕм. Уый фӕрцы нӕ зӕрдӕтӕ бацӕттӕ кӕндзыстӕм, цӕмӕй программӕмӕ лӕмбынӕг хъусӕм (Езд. 7:10).
8 Абон нӕ фембӕлды кӕрон азардзыстӕм нӕ ног зарӕг, «Ӕрцӕуӕд дӕ Паддзахад!», зӕгъгӕ. Ацы зарӕг сӕрмагондӕй ныффыстой, Хуыцауы Паддзахад 100 азы кӕй архайы, уый номыл, ӕмӕ йӕ, ӕрӕджы цы ӕрвылазон фембӕлд уыд, уым азарыдысты.
9 Дзырд дӕр ыл нӕй, ног зарджытӕ сты Йегъовӕйы «хорздзинӕдтӕ» (Матф. 12:35а). Уӕдӕ нӕ разы ахӕм нысан сӕвӕрӕм, цӕмӕй ацы ног зарджытӕ сахуыр кӕнӕм ӕмӕ сӕ Йегъовӕйы кадӕн ӕппӕт зӕрдӕйӕ зарӕм! (Пс. 147:1).