Цӕстӕй чи нӕ уыны, уыдонӕн ӕххуыс кӕнӕм Йегъовӕйы базонынӕн
1. Цӕстӕй чи нӕ уыны, уыдонӕн Йесо сӕ зын кӕй ӕмбӕрста, уый куыд равдыста?
1 Йесойы мӕлӕтмӕ цалдӕр боны йеддӕмӕ нал хъуыд. Иерихонӕй рацӕугӕйӕ фембӕлд дыууӕ куырм лӕгыл, мӕгуыргуртыл. Уыдон ӕм хъӕр кӕнын райдыдтой: «Хицау... батӕригъӕд нын кӕн!» Йесо зыдта, цы хъизӕмӕрттӕ йӕм ӕнхъӕлмӕ каст, уый, ӕмӕ йын кӕд уыцы хъуыдытӕ ӕнцой нӕ лӕвӕрдтой, уӕддӕр ӕрлӕууыд, уыцы дыууӕ нӕлгоймагмӕ фӕдзырдта ӕмӕ сӕ сдзӕбӕх кодта (Матф. 20:29–34). Цӕстӕй чи нӕ уыны, уыдонӕн Йесойау сӕ зын кӕй ӕмбарӕм, уый нӕ бон куыд у равдисын?
2. а) Цӕстӕй чи нӕ уыны, ахӕм адӕймагыл куы сӕмбӕлӕм, уӕд ын нӕ бон куыд у хорз хабар радзурын? б) Цӕстӕй чи нӕ уыны, ахӕм адӕймагӕн куы ӕххуыс кӕнӕм, уӕд нӕ зӕрдыл цы хъуамӕ дарӕм?
2 Ӕххуыс сын кӕн. Цӕстӕй чи нӕ уыны, ахӕм адӕймагыл, зӕгъӕм, уынджы куы сӕмбӕлай, уӕд-иу ын салам ратт, дӕхи йын бацамон ӕмӕ-иу ӕй бафӕрс, мыййаг дӕ ницы ӕххуыс хъӕуы, зӕгъгӕ. Ахӕм адӕмы арӕх кӕй асайынц, уымӕ гӕсгӕ дыл, чи зоны, фыццаг ма баууӕнда. Фӕлӕ йыл зӕрдиагӕй куы тыхсай ӕмӕ хӕларзӕрдӕ куы уай, уӕд дыл ӕнцондӕрӕй баууӕнддзӕн. Стӕй дӕ рох ма уӕд, сӕ иутӕ цӕстӕй гыццыл цыдӕртӕ кӕй уынынц, иннӕтӕ-та бынтондӕр кӕй нӕ уынынц, ӕмӕ ууыл баст вӕййы, цавӕр ӕххуыс сӕ фӕхъӕуы, уый. Куы йын баххуыс кӕнай, уӕд-иу ын зӕгъ, адӕмӕн Библи ӕмбарынӕн кӕй ӕххуыс кӕныс. Стӕй-иу ӕй бафӕрс, Библийӕ дын иу стих бакӕсон, зӕгъгӕ, ӕмӕ-иу ын Псалом 146:8 кӕнӕ Исайы 35:5, 6 бакӕс. Кӕд йӕ бон Брайлы шрифтыл кӕсын у, уӕд-иу ӕй бафӕрс, нӕ йӕ фӕндид, цӕмӕй йын уыцы шрифтыл публикацитӕ ӕрбахӕссай, ӕмӕ Библийы тыххӕй фылдӕр базона. Стӕй ма йын дӕ бон у нӕ сайтӕй аудиозаписьтӕ дӕр ӕрбахӕссын. Кӕд йӕ компьютеры ахӕм программӕ ис, цӕмӕй йын экранӕй текст кӕса, уӕд ӕй, чи зоны, бафӕнда уыцы программӕйы фӕрцы нӕ сайты мыхуыргонд статьятӕ бакӕсын кӕнӕ та дзы RTF форматы цы публикацитӕ ис, уыдон бакӕсын. (Кӕс рамкӕ «Цӕстӕй чи нӕ уыны, уыдонӕн куыд ӕххуыс кӕнӕм».)
3. Нӕ бон куыд у нӕ территорийы, цӕстӕй чи нӕ уыны, ахӕм адӕмы ссарын?
3 Цӕстӕй чи нӕ уыны, ахӕм адӕмы агурӕм. Хӕдзарӕй-хӕдзармӕ куы фӕхъусын кӕнӕм, уӕд, цӕстӕй чи нӕ уыны, ахӕм адӕмыл арӕх нӕ фембӕлӕм, уымӕн ӕмӕ ӕнӕзонгӕтӕн дуар гом кӕнын нӕ фӕуӕндынц. Уымӕ гӕсгӕ ахӕм адӕмы «ссарыныл» бафыдӕбон кӕнын фӕхъӕуы, цӕмӕй-иу сын хорз хабар радзурӕм (Матф. 10:11). Мыййаг, кӕимӕ кусыс кӕнӕ кӕимӕ ахуыр кӕныс, уыдонӕй исчи ахӕм ис, ӕмӕ цӕстӕй нӕ уыны? Уӕд-иу фадат ссар йемӕ аныхас кӕнынӕн. Кӕд уӕ территорийы ахӕм адӕмӕн скъола ис, уӕд-иу директорӕн зӕгъ, дӕ бон кӕй у сӕ библиотекӕйӕн Брайлы шрифтыл публикацитӕ ӕрбахӕссын. Мыййаг, дӕ зонгӕтӕн, цӕстӕй чи нӕ уыны, ахӕм хӕстӕджытӕ ис? Кӕнӕ уӕ территорийы ахӕм организацитӕ ис, ӕмӕ, цӕстӕй чи нӕ уыны, уыдонӕн ӕххуыс кӕнынц? Йе та уӕм, ахӕм адӕм кӕм цӕрынц, ахӕм хӕдзӕрттӕ ис? Кӕд о, уӕд-иу уыцы хӕстӕджытӕй искӕмӕн, секретарӕн кӕнӕ директорӕн бамбарын кӕн, Йегъовӕйы Ӕвдисӕнты тынг кӕй фӕнды ахӕм адӕмӕн баххуыс кӕнын ӕмӕ сын дӕ бон кӕй у ӕрбахӕссын литературӕ Брайлы шрифтыл ӕмӕ аудиозаписьтӕ. Библийы йын равдис, тагъд Хуыцау куырмыты цӕстӕй кӕй ракӕсын кӕндзӕн, уый кӕм ис фыст, ахӕм стих. Стӕй ма йын дӕ бон у равдисын видеоролик «Ӕнӕ уымӕй цы кодтаин, уый нӕ зонын». Уыцы видеоролик у, иу нӕлгоймаг Библи Брайлы шрифтыл кӕй кӕсы ӕмӕ йын уый стыр ӕххуыс кӕй у, уый тыххӕй. Цӕмӕн ӕрбацыдтӕ, уый куы бамбарын кӕнай, уӕд дын уый фӕстӕ, чи зоны, бантыса ахӕм адӕмимӕ аныхас кӕнын.
4. Джанеты цӕвиттонӕй цӕуыл ахуыр кӕнӕм?
4 Цӕстӕй чи нӕ уыны, иу ахӕм хо, Джанет, иухатт ацыд, куырм адӕм кӕм цӕры, ахӕм хӕдзармӕ. Уым иу ӕрыгон сылгоймагимӕ ныхас кӕнын райдыдта. Джанет ын загъта: «Йесо-иу куырмыты сдзӕбӕх кодта, ӕмӕ-иу афтӕмӕй равдыста, цӕстӕй чи нӕ уыны, уыдоны тыххӕй фидӕны цы сараздзӕн, уый». Стӕй аныхас кодтой Раргомады 21:3, 4 стихтыл ӕмӕ йын Джанет бамбарын кодта, ацы ныхӕстӕ Хуыцауы Паддзахады фӕрцы куыд сӕххӕст уыдзысты, уый. Сылгоймаг иуцасдӕр ницы сдзырдта, стӕй афтӕ бакодта: «Ахӕм ныхӕстӕ куырм адӕймагӕй фыццаг хатт хъусын. Цӕстӕй чи уыны, уыдонӕн сӕ фылдӕр афтӕ хъуыды кӕнынц, ӕмӕ адӕймаг куырм уый тыххӕй вӕййы, ӕмӕ йӕхӕдӕг кӕнӕ та йӕ фыдӕлтӕ цыдӕр тӕригъӕд сарӕзтой». Уый фӕстӕ йын Джанет Интернеты уылты, Библи кӕй фӕрцы фӕахуыр кӕнӕм, уыцы публикацийӕн ссылкӕ арвыста, цӕмӕй йӕ нӕ сайты ссардтаид. Ӕмӕ ныр къуыри дыууӕ хатты Библи фӕахуыр кӕнынц.
5. Кӕд махӕн Йесойау куырмыты дзӕбӕх кӕнын нӕ бон нӕу, уӕддӕр ахӕм адӕмыл куы тыхсӕм, уӕд уый цавӕр арфӕдзинӕдтӕ ӕрхӕсдзӕн?
5 Кӕй зӕгъын ӕй хъӕуы, махӕн Йесойау нӕ бон нӕу куырмыты дзӕбӕх кӕнын. Фӕлӕ нӕ бон у, ацы цардӕвӕрды хуыцау сӕ сӕрызонд кӕмӕн бакуырм кодта, уыдонӕн дӕр ӕмӕ, цӕстӕй чи нӕ уыны, уыдонӕн дӕр баххуыс кӕнын Хуыцауы Ныхас бамбарынӕн (2 Кор. 4:4). Йесо, Иерихоны раз чи уыд, уыцы дыууӕ куырм лӕгӕн кӕй «фӕтӕригъӕд кодта», уый тыххӕй сӕ сдзӕбӕх кодта (Матф. 20:34). Цӕстӕй чи нӕ уыны, уыдонмӕ мах дӕр ахӕм зӕрдӕ куы дарӕм, уӕд сын баххуыс кӕндзыстӕм, ног дунейы ахӕм адӕмы цӕстӕй чи ракӕсын кӕндзӕн, уыцы Хуыцау Йегъовӕйы базонынӕн.