Рӕстдзинад кӕмӕн амонӕм, уыдоны зӕрдӕтӕм фӕндаг куыд ссарӕм
1. Йесо Чырысти адӕмӕн цы амыдта, уый-иу сын сӕ зӕрдӕ куыд бацагайдта?
1 Йесо Чырысти, чи йӕм хъуыста, уыдоны зӕрдӕтӕм-иу фӕндаг ссардта. Зӕгъӕм, иухатт йӕ ахуыргӕнинӕгтӕн Фыстад бӕлвырд куы бамбарын кодта, уӕд сӕ зӕрдӕтӕ «ссыгъдысты» (Лук. 24:32). Хуыцаумӕ ӕппӕт зӕрдӕйӕ хъусын кӕй хъӕуы, уымӕ гӕсгӕ нӕ бон куыд у, рӕстдзинад кӕмӕн амонӕм, уыдоны зӕрдӕтӕ бацагайын, цӕмӕй сӕ сӕ цард фӕивын бафӕнда? (Ром. 6:17).
2. Уӕздан ӕмӕ ӕмбаргӕ куы уӕм, уӕд уый фӕрцы адӕймаджы зӕрдӕмӕ фӕндаг куыд ссардзыстӕм?
2 Уӕздан ӕмӕ ӕмбаргӕ у. Бирӕтӕн, раст цы у ӕмӕ цы нӕу, ӕрмӕст уый куы зӕгъай, уӕд сӕ уый ницӕмӕ баразӕнгард кӕндзӕн. Библийӕ сын бирӕ стихтӕ куы бакӕсӕм ӕмӕ сын афтӕмӕй сӕ дины ахуырӕдтӕм фаутӕ куы хӕссӕм, уӕд сӕ, чи зоны, немӕ ӕппындӕр мауал фӕнда ныхас кӕнын. Цӕмӕй адӕймаджы истӕмӕ баразӕнгард кӕнӕм, уый тыххӕй уал фыццаг хъӕуы бамбарын, цӕуылдӕр цӕмӕн ӕууӕнды ӕмӕ цавӕрдӕр хъуыддӕгтӕ цӕмӕн аразы, уый. Уӕзданӕй йӕм фарстатӕ куы дӕттӕм, зӕгъӕм, «куыд хъуыды кӕныс» кӕнӕ «куыд дӕм кӕсы», зӕгъгӕ, уӕд нын, чи зоны, йӕ зӕрдӕйы цы ис, уый радзура (Ӕмб. 20:5). Ӕмӕ йын уый фӕстӕ нӕ бон уыдзӕн, йӕ зӕрдӕ йын чи бацагайа, ахӕм стихтӕ бакӕсын. Уымӕ гӕсгӕ хъуамӕ адӕмыл тыхсӕм ӕмӕ фӕразон уӕм (Ӕмб. 25:15). Рох нӕ ма уӕд, рӕстдзинады фӕндагыл иутӕ къахдзӕфтӕ тагъддӕр кӕй фӕкӕнынц, иннӕтӕ та – сындӕгдӕр. Хъӕуы рӕстӕг, цӕмӕй сын Йегъовӕйы сыгъдӕг тых сӕ зондахаст ӕмӕ сӕ хъуыддӕгтыл хорзырдӕм фӕзына (Мар. 4:26–29).
3. Нӕ бон куыд у адӕймагӕн баххуыс кӕнын, цӕмӕй хорз миниуджытӕ йӕ удыхъӕды фидар кӕна?
3 Ӕххуыс сын кӕн хорз миниуджытӕ сӕ удыхъӕды фидар кӕнынӕн. Йегъовӕйы хорздзинад ӕмӕ уарзондзинады кой Библийы цы стихты ис, уыдоны фӕрцы нӕ бон у, рӕстдзинад кӕмӕн амонӕм, уымӕн баххуыс кӕнын хорз миниуджытӕ йӕ удыхъӕды фидар кӕнынӕн. Нӕ бон ын у Псаломы 139:1–4 ӕмӕ Лукайы 12:6, 7 стихты фӕрцы бамбарын кӕнын, Хуыцау нӕ алкӕуыл дӕр кӕй тыхсы. Адӕймаг Йегъовӕйы стыр хорзӕхӕн ӕппӕт зӕрдӕйӕ аргъ кӕнын куы сахуыр уа, уӕд Хуыцауы ноджы тынгдӕр уарздзӕн ӕмӕ йыл ноджы иузӕрдиондӕр уыдзӕн (Ром. 5:6–8; 1 Иоан. 4:19). Стӕй ма йӕ куы зона, ӕмӕ йӕ хъуыддӕгтӕй Йегъовӕйы зӕрдӕ йе рухс кӕндзӕн йе та йын ӕй риссын кӕндзӕн, уӕд ӕй, чи зоны, бафӕнда, Хуыцауы зӕрдӕ кӕмӕй барухс кӕндзӕн ӕмӕ йын кад кӕмӕй хӕсдзӕн, ахӕм хъуыддӕгтӕ аразын (Пс. 78:40, 41; Ӕмб. 23:15).
4. Адӕймагӕн уынаффӕтӕ хӕссыны бар кӕй ис, уымӕн кӕй аргъ кӕнӕм, уый нӕ бон куыд у уацамынды ӕвдисын?
4 Йегъовӕ йӕ фӕдзӕхстытӕ тыхӕй никӕмӕн ӕххӕст кӕнын кӕны. Уый адӕмӕн ӕмбарын кӕны, йӕ уынаффӕтӕм хъусын цы пайда у, уый, ӕмӕ сын афтӕмӕй сӕ зӕрдӕтӕм фӕндаг ссары (Ис. 48:17, 18). Мах дӕр иннӕтӕн куы феххуыс кӕнӕм, цӕмӕй-иу сӕхӕдӕг цавӕрдӕр хъуыдымӕ ӕрцӕуой, уӕд афтӕмӕй Йегъовӕйы бафӕзмӕм. Адӕймаг йӕхӕдӕг куы бамбары, цавӕрдӕр ивындзинӕдтӕ скӕнын ӕй кӕй хъӕуы, уый, уӕд йӕ цард цӕхгӕр фӕивы, ӕмӕ йын уый бирӕ рӕстӕгмӕ пайда ӕрхӕссы (Ром. 12:2). Стӕй ма афтӕмӕй ноджы тынгдӕр баввахс вӕййы Йегъовӕмӕ, зӕрдӕтӕм чи кӕсы, уымӕ (Ӕмб. 17:3).