Ӕрымысӕн изӕрмӕ дӕхи цӕттӕ кӕныс?

Йесо фӕстаг хатт цы Куадзӕн сбӕрӕг кодта, уымӕн тынг ахсджиаг нысаниуӕг уыд. Йесойӕн йӕ мӕлӕт хӕстӕг кӕй уыд, уымӕ гӕсгӕ йӕ фӕндыд Куадзӕн йӕ апостолтимӕ сбӕрӕг кӕнын ӕмӕ бындур ӕрӕвӕрын ног бӕрӕгбонӕн, Хицауы ӕхсӕвӕрӕн. Йӕ ахуыргӕнинӕгтӕ йӕ хъуамӕ бӕрӕг кодтаиккой алы аз дӕр. Гъемӕ Петр ӕмӕ Иоанны арвыста, цӕмӕй уат бацӕттӕ кодтаиккой (Лк 22:7–13; кӕс нывмӕ ӕддаг цъарыл). Уый нын нӕ зӕрдыл лӕууын кӕны, мах дӕр кӕй хъӕуы нӕхи Ӕрымысӕн изӕрмӕ бацӕттӕ кӕнын, уыдзӕн 27 мартъийы. Хистӕр нӕлгоймӕгтӕ, ӕвӕццӕгӕн, алцыдӕр бацӕттӕ кӕндзысты: равзардзысты, раныхас чи дзурдзӕн, ахӕм ӕфсымӕры, бацӕттӕ кӕндзысты дзул ӕмӕ сӕн ӕмӕ афтӕ дарддӕр. Фӕлӕ нӕ алкӕмӕн дӕр йӕ бон цы у аразын, цӕмӕй йӕхи Ӕрымысӕн изӕрмӕ бацӕттӕ кӕна?

Дӕ зӕрдӕ бацӕттӕ кӕн. Ӕрымысӕн изӕры рӕстӕг Библийӕ цы скъуыддзӕгтӕ уыдзӕн кӕсинаг, уыдон-иу бакӕс ӕмӕ-иу сыл ахъуыды кӕн. Дӕ бон у уыцы скъуыддзӕгтӕ бакӕсын, брошюрӕйы «Алы бон дӕр Фыстад иртас» цы график ис, уымӕ гӕсгӕ. Брошюрӕйы «Ӕрмӕг Библи иртасынӕн» 16 сӕргонды та ис бӕлвырддӕр график. (Ноджыдӕр кӕс 2020 азы апрелы «Кусӕн тетрад».) Бинонтӕн стыр ӕххуыс фӕуыдзысты «Индекс публикаций Сторожевой Башни» кӕнӕ «Йегъовӕйы Ӕвдисӕнтӕн ӕрмӕг агурынӕн ӕххуыс». Уым сӕ бон у, Чырыстийы нывонд куыд ахсджиаг у, уый фӕдыл ӕрмӕг ссарын ӕмӕ йӕ сӕ бинонты ахуыры рӕстӕг равзарын.

Иннӕты фӕхон. Ӕрымысӕн изӕрмӕ адӕмы зӕрдиагӕй хон. Ахъуыды кӕн, дӕ бон кӕй у фӕхонын. Зӕгъӕм, дӕ бон у фӕхонын, ӕдзух кӕй бабӕрӕг кӕныс, уыдоны, раздӕр Библи кӕимӕ ахуыр кодтай, уыдоны, дӕ зонгӕты ӕмӕ дӕ хиуӕтты. Хистӕр нӕлгоймӕгтӕ хъуамӕ фӕхоной, иуцасдӕр ӕмбырдтӕм ӕмӕ хъусын кӕнынмӕ чи нал цӕуы, уыдоны. Фӕхонын дӕ кӕй фӕнды, уыдонӕй кӕд исчи ӕндӕр ран цӕры, уӕд дӕ бон у бацӕуын сайтмӕ jw.org, цӕмӕй базонай, уыцы ран Ӕрымысӕн изӕр кӕд ӕмӕ кӕм уыдзӕн, уый. Уый тыххӕй сайты сӕйраг фарсыл равзар вкладкӕ «МАХ ТЫХХӔЙ», хай «Ӕрымысӕн изӕр».

Ноджыдӕр ма дӕ бон куыд у дӕхи бацӕттӕ кӕнын?