Кӕсджыты фарстатӕ

Галатӕгтӕм 5:22, 23 стихты цы миниуджыты кой ис, ӕрмӕстдӕр уыдон хауынц, «Хуыцауы сыгъдӕг тых цы дыргъ дӕтты», уымӕ?

Ацы стихты ис фараст миниуӕджы кой. Фыст дзы ис: «Хуыцауы сыгъдӕг тых цы дыргъ дӕтты, уый та у уарзондзинад, цин, фарн, бирӕфӕразондзинад, хӕларзӕрдӕдзинад, хорздзинад, уырнындзинад, фӕлмӕн удыхъӕд, хиуыл хӕцын». Фӕлӕ хъуамӕ афтӕ ма хъуыды кӕнӕм, ӕмӕ нын сыгъдӕг тых нӕ удыхъӕды ӕрмӕстдӕр ацы миниуджытӕ фидар кӕнынӕн ӕххуыс кӕны.

Дӕ хъус-ма ӕрдар, апостол Павел 19–21 стихты цы ныффыста, уымӕ: «Тӕригъӕдджын буары хъуыддӕгтӕ... сты: хӕтын, чъизи хъуыддӕгтӕ, хӕлд митӕ кӕнын, мӕнгхуыцӕуттӕн кувын, хинтӕ-кӕлӕнтӕ кӕнын, искӕмӕ знаджы цӕстӕй кӕсын, хыл кӕнын, ӕнӕууӕнк кӕнын, мӕстӕй рафыцын, загъд кӕнын, къордтыл, сектӕтыл дихтӕ кӕнын, хӕлӕг кӕнын, фыднозт кӕнын, ӕнӕуаг цӕл-минас кӕнын ӕмӕ ӕндӕр ахӕм хъуыддӕгтӕ» (Гал. 5:19–21). Бӕрӕг у, Павел цы «буары хъуыддӕгты» кой кодта, уыдонмӕ ма ӕндӕр хъуыддӕгтӕ дӕр кӕй хауынц, зӕгъӕм, Колоссӕгтӕм 3:5 стихы цы хъуыддӕгты кой ис, уыдон. Ӕмӕ фараст хорз миниуӕджы куы ранымадта, уӕд дӕр загъта: «Ахӕм миниуджыты ныхмӕ закъон нӕй». Уӕдӕ нӕм Хуыцауы сыгъдӕг тыхы фӕрцы цы хорз миниуджытӕ фӕзыны, Павел уыдон се ’ппӕт нӕ ранымадта.

Павел Тимофейы разӕнгард кодта: «Тырн рӕстдзинадмӕ, Хуыцауыл иузӕрдион уай, уымӕ, уырнындзинадмӕ, уарзондзинадмӕ, фидардзинадмӕ ӕмӕ, фӕлмӕн удыхъӕды хицау уай, уымӕ» (1 Тим. 6:11). Ацы ӕхсӕз миниуӕгӕй ӕрмӕстдӕр ӕртӕ ранымадта, Хуыцауы сыгъдӕг тых цы дыргъ дӕтты, уый кой кӕнгӕйӕ – уырнындзинад, уарзондзинад ӕмӕ фӕлмӕн удыхъӕд. Фӕлӕ Тимофейы хъуыди сыгъдӕг тыхы ӕххуыс, цӕмӕй йӕ удыхъӕды сфидар кодтаид иннӕ миниуджытӕ дӕр: рӕстдзинад, иузӕрдиондзинад ӕмӕ фидардзинад. (Абар Колоссӕгтӕм 3:12; 2 Петры 1:5–7.)

Уӕдӕ Галатӕгтӕм 5:22, 23 стихты, чырыстӕтты чи хъӕуы, ӕппӕт уыцы миниуджыты кой нӕй. Сыгъдӕг тых нын ӕххуыс кӕны, цӕмӕй нӕ удыхъӕды фидар кӕнӕм, «Хуыцауы сыгъдӕг тых цы дыргъ дӕтты», уымӕ цы фараст миниуӕджы хауы, уыдон. Фӕлӕ ма хъуамӕ тырнӕм ӕндӕр хорз миниуджытӕм дӕр, цӕмӕй суӕм фӕлтӕрд чырыстӕттӕ ӕмӕ цӕмӕй нӕ «удыхъӕд ногмӕ раивӕм – уыцы удыхъӕд конд у Хуыцауы фӕндонмӕ гӕсгӕ ӕмӕ ӕцӕг рӕстдзинад ӕмӕ иузӕрдиондзинадмӕ гӕсгӕ» (Еф. 4:24).