Фидарӕй дӕ уырнӕд, ӕгас зӕххы фӕлмӕнзӕрдӕ Тӕрхонгӕнӕг рӕстӕй кӕй архайы!

1. Йегъовӕ Авраамӕн цы ахсджиаг хъуыды бамбарын кодта, уымӕй дзы ныфс куыд бауагъта?

АВРААМ уыцы хабар, ӕвӕццӕгӕн, цӕрӕнбонтӕм дӕр нӕ ферох кодта. Йегъовӕ йын йӕ зӕды уылты загъта, горӕттӕ Содом ӕмӕ Гоморрӕ фесафынмӕ кӕй хъавы. Авраам мӕты бафтыд. Ӕмӕ Йегъовӕйы бафарста: «Ау, рӕстгӕнӕджы фыдгӕнӕгимӕ фесафдзынӕ? [...] Ау, ӕгас зӕххы Тӕрхонгӕнӕг раст тӕрхон нӕ рахӕсдзӕн?» Йегъовӕ йӕ зынаргъ хӕларӕн сабырӕй ӕмӕ фӕразонӕй бамбарын кодта иу ахсджиаг хъуыды: рӕстгӕнджыты никуы фесафдзӕн! (Райд. 18:23, 25–33). Ӕмӕ уыцы хъуыды абон мах дӕр ныфс уадзы.

2. Йегъовӕ фӕлмӕнзӕрдӕ кӕй у ӕмӕ алкӕддӕр раст тӕрхон кӕй рахӕссы, уый нӕ фидарӕй цӕмӕн уырны?

² Фидарӕй нӕ цӕмӕн уырны, Йегъовӕ фӕлмӕнзӕрдӕ кӕй у ӕмӕ алкӕддӕр раст тӕрхон кӕй рахӕссы, уый? Мах зонӕм, «Йегъовӕ... [кӕй] кӕсы зӕрдӕмӕ» (1 Сам. 16:7). Уый зоны, «алы адӕймаджы зӕрдӕйы дӕр цы ис, уый» (1 Пад. 8:39; 1 Аз. 28:9). Уый тынг диссаг у. Кӕй зӕгъын ӕй хъӕуы, Йегъовӕ цы тӕрхӕттӕ рахӕссы, уыдонӕй алкӕцы нӕ бон бамбарын нӕ вӕййы. Апостол Павел Йегъовӕйы тыххӕй дзӕгъӕлы нӕ загъта афтӕ: «Кӕй зонд аххӕсдзӕн йӕ тӕрхӕттыл!» (Ром. 11:33).

3, 4. Иуӕй-иу хатт нӕм цавӕр фарстатӕ фӕзыны ӕмӕ ацы статьяйы дзырд цӕуыл цӕудзӕн? (Иоанны 5:28, 29).

³ Фӕлӕ нӕм уӕддӕр иуӕй-иу хатт фӕзыны, Аврааммӕ цы фарстатӕ фӕзынд, ахӕм фарстатӕ, зӕгъӕм: «Йегъовӕ кӕй фесӕфта, уыцы адӕмӕн ӕппындӕр ницыуал ныфс ис? Зӕгъӕм, Содом ӕмӕ Гоморрӕйы цӕрджытӕй никӕй райгас кӕндзӕн, „фыдгӕнджыты“ куы ӕгас кӕна, уӕд?» (Хъуыд. 24:15).

⁴ Ӕрхъуыды-ма кӕнӕм, райгасдзинады тыххӕй цы зонӕм, уый. Ӕрӕджы хуыздӕр бамбӕрстам, чидӕртӕ «цӕрынӕн», чидӕртӕ та «тӕрхон баййафынӕн» кӕй райгас уыдзысты, уый куыд ӕмбаргӕ у. (Бакӕс Иоанны 5:28, 29.)a Уый хуыздӕр кӕй бамбӕрстам, уый фӕрцы ма ноджыдӕр цыдӕртӕ растдӕр бамбӕрстам. Ӕмӕ уыцы ивындзинӕдтыл дзырд цӕудзӕн ацы статьяйы ӕмӕ иннӕйы. Фыццаг уал аныхас кӕндзыстӕм, Йегъовӕйы раст тӕрхӕтты тыххӕй цы нӕ зонӕм, уый фӕстӕ та, цы зонӕм, ууыл.

ЦЫ НӔ ЗОНӔМ

5. Раздӕр нӕ публикациты куыд ӕмбарын кодтам, Содом ӕмӕ Гоморрӕйы чи фесӕфт, уыцы адӕмы хабар?

⁵ Раздӕр нӕ публикациты афтӕ ӕмбарын кодтам, ӕмӕ, Йегъовӕ йӕхӕдӕг кӕй фесӕфта, уыцы фыдгӕнджытӕ, зӕгъӕм, Содом ӕмӕ Гоморрӕйы цӕрджытӕ, нӕ райгас уыдзысты. Фӕлӕ ӕууӕнкджын цагъар ацы фарстайыл ноджы лӕмбынӕгдӕр ахъуыды кодта ӕмӕ Хуыцаумӕ дӕр уый тыххӕй фӕкуывта. Ӕмӕ ӕрцыдысты ахӕм хъуыдымӕ, зӕгъгӕ, уый нӕ бон бӕлвырдӕй зӕгъын нӕу. Цӕуылнӕ?

6. Йегъовӕ ма ноджыдӕр фыдгӕнджытӕй кӕй фесӕфта ӕмӕ уыцы хабӕртты тыххӕй цы нӕ зонӕм?

⁶ Ӕрхӕссӕм ӕндӕр цӕвиттонтӕ дӕр, Йегъовӕ-иу фыдгӕнджыты кӕй фесӕфта, уымӕн. Зӕгъӕм, Ной ӕмӕ йӕ бинонты йеддӕмӕ адӕмы се ’ппӕты дӕр фесӕфта Доны хъаймӕты. Стӕй израилӕгтӕн бафӕдзӕхста, цӕмӕй ныццагътаиккой, Зӕрдӕвӕрд зӕххыл чи цард, уыцы 7 адӕмыхатты. Науӕд райсӕм, Йегъовӕйы зӕд иу ӕхсӕвмӕ кӕй ныццагъта, уыцы 185 мин ассириаг ӕфсӕддоны (Райд. 7:23; Дык. з. 7:1–3; Ис. 37:36, 37). Мыййаг, ацы хабӕртты тыххӕй нӕ бон у Библийӕ алцыдӕр базонын ӕмӕ бӕлвырдӕй зӕгъын, Йегъовӕ уыцы адӕмы се ’ппӕты дӕр ӕнустӕм кӕй фесӕфта ӕмӕ сын райгасдзинады ныфс кӕй нӕй? Библимӕ гӕсгӕ уый бӕлвырдӕй зӕгъӕн нӕй. Афтӕ цӕмӕн зӕгъӕм?

7. Доны хъаймӕты чи амард, уыцы адӕмы ӕмӕ, израилӕгтӕ кӕй ныццагътой, уыцы ханаайнӕгты тыххӕй цы нӕ зонӕм? (Кӕс нывмӕ.)

⁷ Мах ӕй нӕ зонӕм, Йегъовӕ уыцы адӕмӕй алкӕмӕн дӕр хицӕнӕй цавӕр тӕрхон рахаста. Стӕй нӕ зонӕм, фадат сын уыди ӕви нӕ, цӕмӕй Йегъовӕйы базыдтаиккой ӕмӕ сӕ тӕригъӕдтыл ӕрфӕсмон кодтаиккой. Библи Нойы «рӕстдзинад хъусынгӕнӕг» кӕй хоны, уый зонӕм (2 Пет. 2:5). Фӕлӕ дзы афтӕ нӕй фыст, ӕмӕ ӕнахуыр стыр нау аразгӕйӕ архайдта, цӕмӕй зӕххыл цӕрӕг адӕмӕй алкӕмӕн дӕр фехъусын кодтаид, Доны хъаймӕт кӕй уыдзӕн. Уӕдӕ Ханааны цӕрджыты тыххӕй дӕр нӕ зонӕм, алкӕмӕн дӕр дзы фадат уыди ӕви нӕ, цӕмӕй Йегъовӕйы базыдтаид ӕмӕ йӕ цард аивтаид.

8. Содом ӕмӕ Гоморрӕйы цӕрджыты тыххӕй цы нӕ зонӕм?

⁸ Цы зӕгъӕн ис Содом ӕмӕ Гоморрӕйы цӕрджытӕй та? Рӕстгӕнӕг Лот се ’хсӕн цард. Фӕлӕ дзы цымӕ алкӕмӕн дӕр хъусын кодта? Уый тыххӕй исты зонӕм? Нӕ зонӕм. О, тынг сӕфт адӕм уыдысты. Фӕлӕ цымӕ се ’ппӕт дӕр ӕмбӕрстой, цы арӕзтой, уый ӕвзӕр кӕй уыд? Гӕнӕн ис, ӕмӕ нӕ. Хъуыды йӕ кӕнӕм, Содомы нӕлгоймӕгтӕ Лоты уазджытӕн тыхми бакӕнынмӕ кӕй хъавыдысты. Библийы фыст ис, «Содомы нӕлгоймӕгтӕ иууылдӕр, гыццылӕй-стырӕй», йӕ хӕдзары алыварс кӕй ӕрӕмбырд сты (Райд. 19:4; 2 Пет. 2:7). Фӕлӕ цымӕ фӕлмӕнзӕрдӕ Хуыцау Йегъовӕ ахӕм тӕрхон рахаста, зӕгъгӕ дзы иу дӕр нӕ райгас уыдзӕн? Уый нӕ бон нӕу зӕгъын. Йегъовӕ Авраамӕн загъта, уыцы горӕты 10 рӕстгӕнӕджы дӕр кӕй нӕ уыд (Райд. 18:32). Уыдысты фыдгӕнджытӕ, ӕмӕ сӕ Йегъовӕ сӕ хъуыддӕгты тыххӕй дзуапп ӕрдомдта. Фӕлӕ цымӕ нӕ бон у фидарӕй зӕгъын, «фыдгӕнджыты» куы ӕгас кӕна, уӕд уыдонӕй иуы дӕр фӕстӕмӕ цардмӕ кӕй нӕ раздахдзӕн? Уый нӕ бон фидарӕй зӕгъын нӕу.

9. Соломоны тыххӕй цы нӕ зонӕм?

⁹ Библийы ма бакӕсӕн ис, рӕстгӕнӕг чи уыд, фӕлӕ Хуыцауы цӕсты фыдгӕнӕг чи сси, ахӕм адӕймӕгты тыххӕй дӕр. Зӕгъӕм, паддзах Соломон. Уый Йегъовӕйы дӕр ӕмӕ йын йӕ закъӕттӕ дӕр хорз зыдта, стӕй йӕ Йегъовӕ йӕ арфӕдзинӕдты бын фӕкодта. Фӕлӕ фӕстӕдӕр Соломон райдыдта мӕнг хуыцӕуттӕн кувын. Уый тыххӕй йӕм Йегъовӕйы маст ссыгъд. Ӕмӕ йӕ тӕригъӕдты тыххӕй Израилы адӕм уый фӕстӕ ӕнусты дӕргъы тухӕнӕй мардысты (1 Пад. 11:5–9; 2 Пад. 23:13). Бирӕ азты дӕргъы афтӕ хъуыды кодтам, ӕмӕ Соломон райгас уыдзӕн, уымӕн ӕмӕ Библийы фыст ис, «йӕ фыдӕлтӕм баиу», зӕгъгӕ (1 Пад. 11:43). Афтӕ дзы фыст ис паддзах Давиды хуызӕн иузӕрдион лӕггадгӕнджыты тыххӕй дӕр. Фӕлӕ цымӕ уыцы ныхӕстӕ ууыл дзурӕг сты, ӕмӕ Соломон ӕнӕмӕнг райгас уыдзӕн? Библийы афтӕ фыст нӕй. Фӕлӕ, чи зоны, исчи ахъуыды кӕна: «Библийы афтӕ куы ис фыст, „чи амард, уый йӕ тӕригъӕды хӕсӕй ссӕрибар“, зӕгъгӕ. Ӕмӕ уый Соломонмӕ дӕр нӕ хауы?» (Ром. 6:7). О, фӕлӕ уый ууыл дзурӕг нӕу, ӕмӕ, чи амард, уыдонӕй алкӕмӕн дӕр фӕзынд бар, цӕмӕй та ногӕй цӕра. Мӕрдтӕ кӕй райгас уыдзысты, уый нӕ уарзӕгой Хуыцауы лӕвар у. Ӕмӕ йӕ ӕрцӕттӕ кодта, ахӕм фадат кӕмӕн ратдзӕн, цӕмӕй йын ӕнустӕм лӕггад кӕной, уыдонӕн (Иов 14:13, 14; Иоан. 6:44). Ӕмӕ Соломонӕн дӕр ратдзӕн уыцы лӕвар? Йегъовӕ зоны дзуапп, мах – нӕ. Фӕлӕ зонӕм, Йегъовӕ раст тӕрхон кӕй рахӕсдзӕн.

ЦЫ ЗОНӔМ

10. Йегъовӕйы куы бахъӕуы искӕмӕн фесафыны тӕрхон рахӕссын, уӕд цы фенкъары? (Йезекил 33:11). (Кӕс нывмӕ дӕр.)

¹⁰ Бакӕс Йезекилы 33:11. Йегъовӕ нын ӕргом кӕны, искӕмӕн тӕрхон куы рахӕссы, уӕд цы фенкъары, уый. Апостол Петр дӕр загъта, пехуымпар Йезекил кӕй загъта, ахӕм хъуыды, зӕгъгӕ, дам, Йегъовӕйы «нӕ фӕнды, цӕмӕй исчи фесӕфа» (2 Пет. 3:9). Ацы ныхӕстӕ нын ныфсы хос сты. Мах зонӕм, Йегъовӕ тагъд кӕй нӕ кӕны адӕмы ӕнустӕм фесафынмӕ, ӕмӕ искӕмӕн ахӕм тӕрхон куы рахӕссы, уӕд уый хуымӕтӕджы кӕй нӕ вӕййы. Йегъовӕ у тынг фӕлмӕнзӕрдӕ, ӕмӕ алы хатт дӕр равдисы фӕлмӕнзӕрдӕдзинад, уый растыл куы фӕнымайы, уӕд.

11. Чи нӕ райгас уыдзӕн ӕмӕ уый кӕцӕй зонӕм?

¹¹ Нӕ бон у искӕмӕй зӕгъын, нӕ райгас уыдзӕн, зӕгъгӕ? Библийӕ ӕрмӕстдӕр цалдӕр цӕвиттоны ис ӕрхӕссӕнb. Йесо бамбарын кодта, Иудӕ Искариот кӕй нӕ райгас уыдзӕн (Мар. 14:21; ноджыдӕр кӕс Иоанны 17:12c). Иудӕ зонгӕ-зонын рацыд Хуыцау Йегъовӕйы ӕмӕ йӕ Фырты ныхмӕ. Цы арӕзта, уый ӕмбӕрста. (Кӕс Марчы 3:29 ӕмӕ уӕлӕмхасӕн ӕрмӕг ацы стихмӕ «Учебная Библия»-йы.) Йесо ма загъта, йӕ ныхмӕ чи цыд, уыцы дины разамонджытӕй дӕр чидӕртӕ кӕй нӕ райгас уыдзысты (Матф. 23:33). Апостол Павел та ныффыста, раст дин чи ныууагъта ӕмӕ раст дины ныхмӕ чи цыд, фӕлӕ чи не ’рфӕсмон кодта, уыдон кӕй нӕ райгас уыдзысты (Дзут. 6:4–8; 10:29).

12. Йегъовӕйы фӕлмӕнзӕрдӕдзинады тыххӕй цы зонӕм? Ӕрхӕсс цӕвиттонтӕ.

¹² Фӕлӕ куыд загътам, афтӕмӕй Йегъовӕ у тынг фӕлмӕнзӕрдӕ ӕмӕ йӕ «нӕ фӕнды, цӕмӕй исчи фесӕфа». Ӕрхъуыды-ма кӕнӕм, уӕззау тӕригъӕдтӕ чи сарӕзта, уыдонӕй кӕмӕдӕрты фӕлмӕнзӕрдӕдзинад куыд равдыста. Паддзах Давид цалдӕр стыр тӕригъӕды сарӕзта, зӕгъӕм, кӕйдӕр усимӕ ӕмуат ӕрцыд ӕмӕ йын йӕ лӕджы амарын кодта. Фӕлӕ йӕ тӕригъӕдтыл ӕрфӕсмон кодта, ӕмӕ йын Йегъовӕ ныххатыр кодта (2 Сам. 12:1–13). Паддзах Манасси йӕ царды фылдӕр хай амӕй-ай ӕвзӕрдӕр хъуыддӕгтӕ арӕзта. Фӕлӕ ахӕм адӕймагмӕ дӕр Йегъовӕ равдыста фӕлмӕнзӕрдӕдзинад, уый куы ’рфӕсмон кодта, уӕд, ӕмӕ йын ныххатыр кодта (2 Аз. 33:9–16). Ацы цӕвиттонтӕй бӕрӕг у: Йегъовӕ равдисы фӕлмӕнзӕрдӕдзинад, уый растыл куы фӕнымайы ӕмӕ уымӕн гӕнӕн кӕддӕриддӕр вӕййы, уӕд. Уый райгас кӕндзӕн ахӕм адӕмы, уымӕн ӕмӕ уыдон бамбӕрстой, ӕвзӕр хъуыддӕгтӕ кӕй арӕзтой, ӕмӕ сӕ тӕригъӕдтыл ӕрфӕсмон кодтой.

13. а) Йегъовӕ Ниневийы цӕрджытӕм фӕлмӕнзӕрдӕдзинад цӕмӕн равдыста? б) Фӕстӕдӕр Йесо ниневиӕгты тыххӕй цы загъта?

¹³ Йегъовӕ ма фӕлмӕнзӕрдӕдзинад равдыста Ниневийы цӕрджытӕм дӕр. Хуыцау Ионӕйӕн загъта: «Сӕ фыдхъуыддӕгтӕ мӕм... схӕццӕ сты». Фӕлӕ сӕ тӕригъӕдтыл куы ’рфӕсмон кодтой, уӕд сын фӕтӕригъӕд кодта ӕмӕ сын ныххатыр кодта. Йегъовӕ Ионӕйӕ фӕлмӕнзӕрдӕдӕр уыд. Ионӕ куы смӕсты, уӕд ын йӕ зӕрдыл ӕрлӕууын кодта, уыцы ниневиӕгтӕ, дам, «рахиз къух галиу къухӕй [кӕнӕ хорз ӕвзӕрӕй] куы нӕ хицӕн кӕнынц» (Ионӕ 1:1, 2; 3:10; 4:9–11). Фӕстӕдӕр Йесо уыцы хабар цӕвиттонӕн ӕрхаста, цӕмӕй равдыстаид, Йегъовӕ алкӕддӕр рӕстӕй кӕй фӕархайы ӕмӕ фӕлмӕнзӕрдӕ кӕй у. Уый загъта, зӕгъгӕ, чи ’рфӕсмон кодта, уыцы ниневиӕгтӕ «тӕрхоны бон... мӕрдтӕй сыстдзысты» (Матф. 12:41).

14. Ниневиӕгтӕ «тӕрхон баййафынӕн» кӕй райгас уыдзысты, уый куыд ӕмбаргӕ у?

¹⁴ Цавӕр тӕрхоны бон райгас уыдзысты ниневиӕгтӕ? Йесо дзырдта, фидӕны чидӕртӕ «тӕрхон баййафынӕн» кӕй райгас уыдзысты (Иоан. 5:29). Уый кодта йӕ Миназон хицаудзинады кой. Уыцы рӕстӕг райгас уыдзысты «рӕстгӕнджытӕ дӕр ӕмӕ фыдгӕнджытӕ дӕр» (Хъуыд. 24:15). «Фыдгӕнджытӕ» райгас уыдзысты «тӕрхон баййафынӕн». Ома куы райгас уой, уӕд сӕм Йегъовӕ ӕмӕ Йесо сӕ хъус дардзысты ӕмӕ кӕсдзысты, цы базыдтой, уымӕ гӕсгӕ архайынц ӕви нӕ. Чи райгас уыдзӕн, уыцы ниневиӕгтӕй искӕй куы нӕ бафӕнда Йегъовӕйӕн лӕггад кӕнын, уӕд ын хаст ӕрцӕудзӕн тӕрхон, дарддӕр цӕрыны аккаг кӕй нӕу (Ис. 65:20). Фӕлӕ Йегъовӕйӕн иузӕрдионӕй лӕггад кӕнын кӕй бафӕнда, уыдонӕй алкӕмӕн дӕр фӕзындзӕн ӕнустӕм цӕрыны фадат! (Дан. 12:2).

15. а) Афтӕ цӕуылнӕ хъуамӕ дзурӕм, зӕгъгӕ, Хуыцау Содом ӕмӕ Гоморрӕйы кӕй фесӕфта, уыдонӕй ничи райгас уыдзӕн? б) Иудӕйы 7-ӕм стихы фыст ныхӕстӕ куыд ӕмбаргӕ сты? (Кӕс рамкӕ «Иудӕйы цы зӕгъын фӕндыд?».)

¹⁵ Йесо загъта, «Тӕрхоны бон» Содом ӕмӕ Гоморрӕйы цӕрджытӕн, чи йыл нӕ баууӕндыд ӕмӕ йын йӕ ныхӕстӕ чи ницӕмӕ ӕрдардта, уыцы адӕмӕй ӕнцондӕр кӕй уыдзӕн (Матф. 10:14, 15; 11:23, 24; Лук. 10:12). Уымӕй йӕ цы зӕгъын фӕндыд? Мыййаг, ацы ран гиперболӕйӕ спайда кодта, цӕмӕй равдыстаид, йӕ рӕстӕджы цӕрӕг адӕм Содом ӕмӕ Гоморрӕйы цӕрджытӕй фыддӕр кӕй уыдысты? Куыд зыны, афтӕмӕй уый гиперболӕ нӕуd. Зӕгъӕм, Ниневийы цӕрджыты тыххӕй цы загъта, «тӕрхоны бон... мӕрдтӕй сыстдзысты», зӕгъгӕ, уый комкоммӕ ӕмбарын хъӕуы. Ӕмӕ, куыд зыны, афтӕмӕй, Содом ӕмӕ Гоморрӕйы цӕрджыты тыххӕй цы загъта, уый дӕр комкоммӕ ӕмбарын хъӕуы. Уыцы дыууӕ хатты цы тӕрхоны боны кой кодта, уый иу рӕстӕгмӕ амоны. Ниневиӕгтау Содом ӕмӕ Гоморрӕйы цӕрджытӕ дӕр ӕвзӕр хъуыддӕгтӕ арӕзтой. Ӕмӕ Йесо та загъта, зӕгъгӕ, «фыдхъуыддӕгтӕ чи кодта, уыдон» райгас уыдзысты «тӕрхон баййафынӕн» (Иоан. 5:29). Фӕлӕ ниневиӕгтӕн уыд ӕрфӕсмон кӕныны фадат, Содом ӕмӕ Гоморрӕйы адӕмӕн та – нӕ. Уымӕ гӕсгӕ зӕгъӕн ис, ӕмӕ Содом ӕмӕ Гоморрӕйы цӕрджытӕй ӕппынкъаддӕр чидӕртӕ уӕддӕр райгас уыдзысты ӕмӕ сын фӕзындзӕн ӕрфӕсмон кӕныны фадат. Махӕн та, чи зоны, уыдзӕн фадат, цӕмӕй сӕ ахуыр кӕнӕм. Афтӕмӕй базондзысты Йегъовӕйы ӕмӕ Йесо Чырыстийы.

16. Йегъовӕ куыд скъуыддзаг кӕндзӕн, кӕй райгас кӕна, уый? (Йереми 17:10).

¹⁶ Бакӕс Йеремийы 17:10. Ацы стих ӕвдисы, Йегъовӕ тӕрхон куыд рахӕссы, уый тыххӕй цы зонӕм: уый «сгары зӕрдӕ, кӕсы уыргтӕм [кӕнӕ арфӕмбӕхст хъуыдытӕм]». Ӕмӕ, кӕй райгас кӕна, уый куы скъуыддзаг кӕна, уӕд алкӕмӕн дӕр ратдзӕн, «йӕ фӕндӕгтӕм гӕсгӕ... йын цы ’мбӕлы, уый». Кӕм хъӕуы, уым Йегъовӕ уыдзӕн фидар, гӕнӕн кӕм уа, уым та равдисдзӕн фӕлмӕнзӕрдӕдзинад. Уӕдӕ хъуамӕ макуы дзурӕм, уыцы адӕймаг нӕ райгас уыдзӕн, зӕгъгӕ, Библийы уый тыххӕй комкоммӕ фыст куы нӕ уа, уӕд!

«ӔГАС ЗӔХХЫ ТӔРХОНГӔНӔГ» РАХӔСДЗӔН РАСТ ТӔРХОН

17. Чи амард, уыдонмӕ фидӕны цы ӕнхъӕлмӕ кӕсы?

¹⁷ Хӕйрӕг, Адам ӕмӕ Евӕ Йегъовӕйы ныхмӕ куы рацыдысты, уӕдӕй нырмӕ амард миллиардгай адӕм. Мӕлӕт у «знаг», ӕмӕ никӕуыл ауӕрды (1 Кор. 15:26). Ӕппӕт уыцы адӕммӕ цы ’нхъӕлмӕ кӕсы? Чырыстийы иузӕрдион фӕдылдзӕуджытӕй 144 минмӕ сӕ райгасдзинады фӕстӕ уӕлӕрвты ӕнхъӕлмӕ кӕсы ӕнӕмӕлгӕ цард (Рарг. 14:1). Йегъовӕйы иузӕрдион лӕггадгӕнджытӕй та бирӕтӕ райгас уыдзысты зӕххыл, «рӕстгӕнджытӕ» куы ӕгас кӕной, уӕд. Чырыстийы миназон хицаудзинады рӕстӕг ӕмӕ фӕстаг фӕлварӕны иузӕрдионӕй куы баззайой, уӕд зӕххыл цӕрдзысты ӕнустӕм (Дан. 12:13; Дзут. 12:1). Миназон хицаудзинады рӕстӕг ма райгас уыдзысты «фыдгӕнджытӕ» дӕр – Йегъовӕйӕн чи никуы лӕггад кодта, уыдон, стӕй суанг фыдхъуыддӕгтӕ чи арӕзта, уыдон. Уыцы адӕмӕн лӕвӕрд ӕрцӕудзӕн фадат, цӕмӕй аивой ӕмӕ Йегъовӕйы иузӕрдион лӕггадгӕнджытӕ суой (Лук. 23:42, 43). Фӕлӕ чидӕртӕ афтӕ цъаммар уыдысты ӕмӕ Йегъовӕйы ныхмӕ афтӕ тынг цыдысты, ӕмӕ аскъуыддзаг кодта, кӕй нӕ райгас уыдзысты (Лук. 12:4, 5).

18, 19. а) Чи амард, уыдонӕн Йегъовӕ раст тӕрхон кӕй рахӕсдзӕн, уый нӕ фидарӕй цӕмӕн хъуамӕ уырна? (Исай 55:8, 9). б) Иннӕ статьяйы дзырд цӕуыл цӕудзӕн?

¹⁸ Нӕ бон у фидарӕй зӕгъын, Йегъовӕ алкӕддӕр раст тӕрхон кӕй рахӕссы? Бӕгуыдӕр. Авраамау мах дӕр зонӕм, «ӕгас зӕххы Тӕрхонгӕнӕг» кӕй у стыр зонды хицау, уый у ӕххӕст ӕмӕ фӕлмӕнзӕрдӕ. Уый йӕ Фырты дӕр сахуыр кодта ӕмӕ йын тӕрхоны бартӕ иууылдӕр йӕ къухмӕ радта (Иоан. 5:22). Фыд дӕр ӕмӕ Фырт дӕр зонынц, алы адӕймаджы зӕрдӕйы дӕр цы ис, уый (Матф. 9:4). Ӕмӕ алкӕмӕн дӕр рахӕсдзысты «раст тӕрхон»!

¹⁹ Уӕдӕ макуы фӕдызӕрдыг уӕм, Йегъовӕ алкӕддӕр рӕстӕй кӕй фӕархайы, ууыл. Мах ӕй ӕмбарӕм, алкӕмӕн дӕр тӕрхонгӕнӕг уый кӕй у. Мах тӕрхонгӕнджытӕн нӕ бӕззӕм. (Бакӕс Исайы 55:8, 9.) Уымӕ гӕсгӕ нӕ уырны, Йегъовӕ ӕмӕ йӕ Фырт алкӕддӕр раст тӕрхон кӕй рахӕссынц. Йегъовӕ Йесойы сӕвӕрдта Паддзахӕй, ӕмӕ уый дӕр у йӕ Фыды хуызӕн фӕлмӕнзӕрдӕ ӕмӕ алкӕддӕр фӕархайы рӕстӕй (Ис. 11:3, 4). Цы зӕгъӕн ис, стыр бӕллӕхы рӕстӕг адӕмӕн куыд тӕрхон кӕндзысты, уый тыххӕй та? Уый тыххӕй цы нӕ зонӕм ӕмӕ цы зонӕм? Ацы фарстатыл дзырд цӕудзӕн иннӕ статьяйы.