Библи кӕимӕ ахуыр кӕныс, уыдонӕн ӕххуыс кӕн рӕстдзинады фӕндагыл слӕууынӕн

1, 2. а) Библи кӕимӕ фӕахуыр кӕнӕм, уыдонӕй чидӕртӕ сӕ ныфс цӕуылнӕ фӕхӕссынц рӕстдзинады фӕндагыл слӕууынмӕ? б) Ацы статьяйы цӕуыл аныхас кӕндзыстӕм?

ДӔХӔДӔГ Библи куы ахуыр кодтай, уыцы рӕстӕг-ма ӕрхъуыды кӕн. Йегъовӕйы Ӕвдисӕн кӕй суыдзынӕ, уый уайтагъд аскъуыддзаг кодтай? Ӕви дӕ исты къуылымпы кодта? Чи зоны, тарстӕ, де ’мкусджытӕ, де ’мбӕлттӕ кӕнӕ дӕ бинонтӕ дӕ ныхмӕ кӕй суыдзысты, уымӕй. Кӕнӕ дӕм, гӕнӕн ис, афтӕ каст, ӕмӕ дӕ бон нӕ бауыдзӕн Хуыцауы закъӕттӕм гӕсгӕ цӕрын. Кӕд афтӕ уыд, уӕд бамбардзынӕ, Библи чи ахуыр кӕны, уыдонӕй чидӕртӕ сӕ ныфс цӕуылнӕ фӕхӕссынц рӕстдзинады фӕндагыл слӕууынмӕ.

² Йесо дӕр зыдта, ахӕм цыдӕртӕ иуӕй-иуты кӕй хъыгдардзысты, цӕмӕй Йегъовӕйы лӕггадгӕнджытӕ суой (Матф. 13:20–22). Фӕлӕ-иу уӕддӕр ахӕм адӕймӕгтыл йӕ къух нӕ ауыгъта. Уый сын ӕххуыс кодта, цӕмӕй: 1) бамбӕрстаиккой, цы сӕ хъыгдары, уый; 2) Йегъовӕйы тынгдӕр бауарзтаиккой; 3) ӕппӕты сӕйраг сын суыдаид Йегъовӕйӕн лӕггад кӕнын ӕмӕ 4) бамбӕрстаиккой, сӕ ныхмӕ куы цӕуой, уӕд сӕхи куыд хъуамӕ дарой. Цӕй ӕмӕ базонӕм, нӕ бон куыд у чиныгӕй «Амондджынӕй цӕр ӕнустӕм!» пайда кӕнгӕйӕ Йесойы бафӕзмын ӕмӕ, кӕимӕ ахуыр кӕнӕм, уыцы адӕймагӕн рӕстдзинады фӕндагыл слӕууынӕн баххуыс кӕнын.

БАХХУЫС ЫН КӔН, ЦЫ ЙӔ ХЪЫГДАРЫ, УЫЙ БАМБАРЫНӔН

3. Никодимы цы хъыгдардтаид, цӕмӕй Йесойы ахуыргӕнинаг суыдаид?

³ Йесо зӕххыл лӕггад кӕнын куы райдыдта, уымӕй рацыд афӕдзы ’рдӕг. Ӕмӕ дзырддзӕугӕ дзуттаг разамонӕг Никодимӕн уыцы рӕстӕг дӕр фаг уыд, цӕмӕй бамбӕрстаид, Йесо Хуыцауы ӕрвыст кӕй уыд, уый (Иоан. 3:1, 2). Фӕлӕ, дзуттӕгтӕй кӕй тарст, уый тыххӕй Йесоимӕ сусӕгӕй фембӕлд (Иоан. 7:13; 12:42). Цыдӕр ӕй хъыгдардта, цӕмӕй йӕ фӕдылдзӕуӕг суыдаид. Чи зоны, тарсти, йӕ кадджын бынатӕй ӕмӕ йӕ хъӕздыгдзинӕдтӕй ӕнӕхай кӕй фӕуыдзӕнa.

4. Никодим цы не ’мбӕрста ӕмӕ йын Йесо куыд баххуыс кодта?

⁴ Никодим хорз зыдта Моисейы закъон. Фӕлӕ не ’мбӕрста, цы йӕ хъуыд саразын, цӕмӕй дзы Йегъовӕ райгонд уыдаид. Йесо йын куыд баххуыс кодта? Йӕ рӕстӕг ын нӕ бавгъау кодта ӕмӕ йемӕ аныхас кодта, кӕд ӕм Никодим ӕхсӕвыгон ӕрбацыд, уӕддӕр. Ӕмӕ йын бӕлвырд загъта, цы йӕ хъуыд саразын, цӕмӕй йӕ ахуыргӕнинаг суыдаид. Хъуамӕ йӕ тӕригъӕдтыл ӕрфӕсмон кодтаид, донаргъуыд райстаид ӕмӕ, Хуыцауы Фыртыл кӕй баууӕндыд, уый хъуыддагӕй ӕвдыстаид (Иоан. 3:5, 14–21).

5. Кӕимӕ ахуыр кӕнӕм, уымӕн куыд ис баххуыс кӕнӕн, цы йӕ хъыгдары, уый бамбарынӕн?

⁵ Библи кӕимӕ ахуыр кӕныс, уый, гӕнӕн ис, Библи хорз зоны, фӕлӕ йӕ цыдӕр хъыгдары, цӕмӕй Йегъовӕйӕн лӕггад кӕнын райдайа. Чи зоны йын йӕ куыстыл ӕгӕр бирӕ рӕстӕг цӕуы кӕнӕ йӕ бинонты нӕ фӕнды, цӕмӕй Йегъовӕйы Ӕвдисӕн суа. Уымӕ гӕсгӕ йемӕ фылдӕр рӕстӕг ӕрвит. Дӕ бон ӕй у иумӕ къофи бацымынмӕ кӕнӕ атезгъо кӕнынмӕ фӕхонын. Афтӕмӕй йын, чи зоны, ӕнцондӕр уа, йӕ зӕрдӕйы цы ис ӕмӕ цавӕр зындзинӕдтыл ӕмбӕлы, уый тыххӕй радзурын. Уый фӕстӕ йын баххуыс кӕн, фӕивын ӕй цы хъӕуы, уый бамбарынӕн. Ӕмӕ уый хъуамӕ дӕ зӕрдӕ балхӕныны тыххӕй ма араза, фӕлӕ Йегъовӕйы зӕрдӕ барухс кӕныны тыххӕй.

6. Библи кӕимӕ ахуыр кӕныс, уымӕн куыд ис баххуыс кӕнӕн, цӕмӕй йӕм фаг хъӕбатырдзинад уа рӕстдзинады фӕндагыл слӕууынӕн? (1 Коринфӕгтӕм 16:13).

⁶ Ахсджиаг у, цӕмӕй, Библи чи ахуыр кӕны, уый ма дызӕрдыг кӕна, Йегъовӕ йын йӕ закъӕттӕм гӕсгӕ цӕрынӕн кӕй ӕххуыс кӕндзӕн. Уӕд ӕм фаг хъӕбатырдзинад уыдзӕн, цӕмӕй, цы базоны, уымӕ гӕсгӕ архайа. (Бакӕс 1 Коринфӕгтӕм 16:13.) Ӕмӕ дӕуӕй та цы кӕнгӕ у? Скъолайы куы ахуыр кодтай, уӕд, ӕвӕццӕгӕн, дӕ ахуыргӕнджытӕй кӕйдӕр фылдӕр уарзтай. Чи зоны, уый тыххӕй, ӕмӕ дын дӕ ныфсыл ныфс ӕфтыдта, дзырдта дын, алцыдӕр дын кӕй рауайдзӕн. Мах дӕр, зӕгъӕн ис, стӕм ахуыргӕнджытӕ. Хорз ахуыргӕнӕг та адӕймагӕн, Хуыцау ӕм цӕмӕ ӕнхъӕлмӕ кӕсы, ӕрмӕст уый нӕ фӕамоны. Уый ма йын феххуыс кӕны, цӕмӕй ма дызӕрдыг кӕна, Йегъовӕ йын кӕй баххуыс кӕндзӕн йӕ цард фӕивынӕн. Ахӕм хорз ахуыргӕнӕг цӕй фӕрцы уыдзынӕ?

ӔХХУЫС ЫН КӔН, ЦӔМӔЙ ЙЕГЪОВӔЙЫ ТЫНГДӔР БАУАРЗА

7. Йесо адӕмӕн куыд ӕххуыс кодта, цӕмӕй Йегъовӕйы тынгдӕр бауарзтаиккой?

⁷ Йесо зыдта: йӕ ахуыргӕнинӕгтӕ Хуыцауы куы уарзой, уӕд сӕ фӕнддзӕн, цы-иу базоной, уымӕ гӕсгӕ архайын. Ӕмӕ сын ӕххуыс кодта сӕ уӕларвон Фыды тынгдӕр бауарзынӕн. Зӕгъӕм, абарста йӕ, йӕ сывӕллӕттӕн хорзӕй бирӕ цыдӕртӕ чи аразы, ахӕм адӕймагимӕ (Матф. 7:9–11). Чи йӕм хъуыста, уыцы адӕмӕй фыды уарзт алчи нӕ бавзӕрстаид. Ӕмӕ уымӕ тынг бӕллыдаиккой. Иухатт та сын радзырдта фӕсномыг ныхас фӕлмӕнзӕрдӕ фыды тыххӕй. Йӕ фырт хӕдзарӕй ацыд ӕмӕ бирӕ ӕвзӕр митӕ фӕкодта. Фӕлӕ фӕстӕмӕ куы ӕрыздӕхт, уӕд ыл фыд тынг бацин кодта. Адӕмӕн уыцы фӕсномыг ныхас сӕ зӕрдӕтӕ куыннӕ бацагайдтаид. Йесо сын бамбарын кодта, Йегъовӕ йӕ зӕххон сывӕллӕтты тынг кӕй уарзы ӕмӕ сын кӕй тӕригъӕд кӕны (Лук. 15:20–24).

8. Библи кӕимӕ ахуыр кӕныс, уымӕн дӕ бон куыд у ӕххуыс кӕнын, цӕмӕй Йегъовӕйы тынгдӕр бауарза?

⁸ Дӕуӕн дӕр дӕ бон у, Библи кӕимӕ ахуыр кӕныс, уымӕн ӕххуыс кӕнын, цӕмӕй Йегъовӕйы тынгдӕр бауарза. Куыд? Йемӕ арӕх дзур Хуыцауы рӕсугъд миниуджыты тыххӕй. Алы ахуыры рӕстӕг дӕр-иу ын йӕ хъус ӕрдар, урокӕй Йегъовӕйы уарзондзинады тыххӕй цы базонӕн ис, уымӕ. Зӕгъӕм, Чырыстийы нывонды тыххӕй куы ныхас кӕнат, уӕд ын бамбарын кӕн, уыцы нывонд алкӕй тыххӕй дӕр кӕй ӕрцыд хаст, уыимӕ уый тыххӕй дӕр (Ром. 5:8; 1 Иоан. 4:10). Йегъовӕ йӕ куыд тынг уарзы, уый куы бамбара, уӕд ӕй йӕхӕдӕг дӕр тынгдӕр бауарздзӕн (Гал. 2:20).

9. Майклӕн цы баххуыс кодта йӕ цард аивынӕн?

⁹ Ӕркӕсӕм-ма Майклы хабармӕ (у Индонезийӕ). Йӕ ныййарджытӕ йӕ йӕ гыццылӕй фӕстӕмӕ ӕвӕрдтой рӕстдзинады фӕндагыл. Фӕлӕ донаргъуыд нӕ райста. 18 азы йыл куы цыд, уӕд кусынмӕ ацыд ӕндӕр бӕстӕмӕ. Куыста уӕзласӕн машинӕйыл. Фӕстӕдӕр Индонезимӕ ӕрыздӕхт ӕмӕ бинонтӕ ӕрхаста. Цасдӕры фӕстӕ та ногӕй ӕндӕр бӕстӕмӕ кусынмӕ ацыд. Уӕдмӕ йӕ бинойнаг ӕмӕ йӕ чызг райдыдтой Библи ахуыр кӕнын. Ӕмӕ Библимӕ гӕсгӕ сӕ цард ивтой. Майклӕн йӕ мад куы амард, уӕд сфӕнд кодта фӕстӕмӕ хӕдзармӕ ӕрыздӕхын, цӕмӕй йӕ фыдмӕ кастаид. Ӕмӕ йӕхӕдӕг дӕр райдыдта Библи ахуыр кӕнын. 27-ӕм урок чиныгӕй «Амондджынӕй цӕр ӕнустӕм!» куы ӕвзӕрстой, уӕд ын йӕ зӕрдӕ тынг бацагайдтой, рубрикӕйы «Фылдӕр базон» цы хъуыдытӕ ис, уыдон. Йегъовӕйӕн йӕ Фырты хъизӕмӕрттӕм кӕсын куыд зын уыд, ууыл куы хъуыды кодта, уӕд йӕ зӕрдӕ суынгӕг ӕмӕ йӕ цӕссыг нӕ баурӕдта. Майкл бамбӕрста, Йегъовӕ ӕмӕ йӕ Йесо куыд тынг уарзынц, уый. Ӕмӕ сӕ Чырыстийы нывонды тыххӕй куыд бузныг у, уый йӕ бафӕндыд хъуыддагӕй равдисын. Гъемӕ йӕ цард аивта ӕмӕ донаргъуыд райста.

ӔХХУЫС ЫН КӔН, ЦӔМӔЙ ЙЫН ӔППӔТЫ СӔЙРАГ СУА ЙЕГЪОВӔЙӔН ЛӔГГАД КӔНЫН

10. Йесо йӕ фыццаг ахуыргӕнинӕгтӕн куыд баххуыс кодта, цӕмӕй сын Йегъовӕйӕн лӕггад кӕнын ӕппӕты сӕйраг суыдаид? (Лукайы 5:5–11). (Кӕс нывмӕ дӕр.)

¹⁰ Йесойы фыццаг ахуыргӕнинӕгтӕй чидӕртӕ уайтагъд бамбӕрстой, Йесо Месси́йӕ кӕй у, уый. Фӕлӕ сын хъуыд баххуыс кӕнын, цӕмӕй сын Йегъовӕйӕн лӕггад кӕнын ӕппӕты сӕйраг суыдаид ӕмӕ хорз хабар зынгзӕрдӕйӕ хъусын кодтаиккой. Иухатт Йесо Петр ӕмӕ Андрейӕн загъта, цӕмӕй ӕппынӕдзух йӕ фӕдыл цыдаиккой. Фӕлӕ уыдон уӕдмӕ дӕр иуцасдӕр йӕ ахуыргӕнинӕгтӕ уыдысты (Матф. 4:18, 19). Иаков ӕмӕ Иоаннимӕ иумӕ кодтой кӕсагахсыны куыст, ӕмӕ сӕ куыст хорз цыд (Мар. 1:16–20). Петр ӕмӕ Андрей «уайтагъд сӕ хызтӕ ныууагътой». Фӕлӕ Йесоимӕ лӕггад кӕнгӕйӕ сӕ бинонты куыд дардзысты, ууыл дӕр, ӕвӕццӕгӕн, ахъуыды кодтой. Цымӕ сӕ цӕмӕн бафӕндыд сӕ куыст ныууадзын ӕмӕ сӕ тыхтӕ хорз хабар хъусын кӕнынмӕ саразын? Лукайы Евангелийӕ базонӕн ис, Йесо кӕй сарӕзта диссаг. Афтӕмӕй сын бамбарын кодта, сӕ зӕрдӕ ӕгасӕй дӕр Йегъовӕйыл кӕй хъуамӕ дарой. Хъуамӕ ма дызӕрдыг кодтаиккой, сӕ лӕггад фыццаг бынаты куы ӕвӕрой, уӕд сын цыфӕнды уавӕры дӕр кӕй дӕтдзӕн, ӕнӕмӕнг цы хъӕуы, уыдӕттӕ. (Бакӕс Лукайы 5:5–11.)

11. Библи кӕимӕ ахуыр кӕнӕм, уымӕн нӕ бон цавӕр хабӕрттӕ у радзурын, цӕмӕй йӕ уырнындзинад фидар кӕна?

¹¹ Йесойау нӕ бон нӕу диссӕгтӕ аразын. Фӕлӕ, Библи кӕимӕ ахуыр кӕнӕм, уымӕн нӕ бон у радзурын, Йегъовӕ куыд баххуыс кӕны, йӕ царды йӕ фыццаг бынаты чи сӕвӕры, уыдонӕн. Зӕгъӕм, хъуыды йӕ кӕныс, ӕмбырдтӕм цӕуын куы райдыдтай, уӕд дын Йегъовӕ куыд ӕххуыс кодта? Чи зоны, кӕмдӕр куыстай, ӕмӕ-иу дӕ хъуыди фӕскуыст дӕр бакусын. Фӕлӕ дӕ уый хъыгдардта ӕмбырдтӕм цӕуын. Ӕмӕ дӕ бахъуыд дӕ хицауӕн зӕгъын, уыцы бонты дӕ бон кӕй нӕ уыдзӕн фӕскуыст кусын. Йегъовӕйӕн лӕггад кӕнын дын ӕппӕты сӕйраг кӕй сси, уый тыххӕй дын Йегъовӕ ӕххуыс кодта. Ӕмӕ-иу уый уынгӕйӕ дӕ уырнындзинад бафидар. Гъемӕ-иу ахӕм хабӕрттӕ радзур, кӕимӕ ахуыр кӕныс, уымӕн.

12. а) Библийы ахуырмӕ алыхуызон хъусынгӕнджыты цӕмӕн хъӕуы хонын? б) Дӕ бон куыд у видероликтӕй пайда кӕнын? Ӕрхӕсс цӕвиттон.

¹² Иннӕ хотӕ ӕмӕ ’фсымӕртӕн дӕр ис, Библи кӕимӕ ахуыр кӕныс, уымӕн цы радзурой, уый. Уӕдӕ-иу Библийы ахуырмӕ алыхуызон хъусынгӕнджыты фӕхон. Уадз ӕмӕ-иу радзурой, рӕстдзинад куыд базыдтой ӕмӕ сӕ царды цы фӕивтой, цӕмӕй сын Йегъовӕйӕн лӕггад кӕнын ӕппӕты сӕйраг суыдаид. Уымӕй уӕлдай ма йын стыр ӕххуыс фӕуыдзысты, чиныджы «Амондджынӕй цӕр ӕнустӕм!» чи ис, уыцы видеороликтӕ. Рӕстӕг-иу рахицӕн кӕн, цӕмӕй-иу иумӕ бакӕсат видеороликтӕм рубрикӕйӕ «Фылдӕр базон». Куы хъӕуа, уӕд ма-иу бакӕсут искӕцы видеороликтӕм рубрикӕйӕ «Фылдӕр ӕрмӕг». Зӕгъӕм, 37-ӕм урокыл куы ныхас кӕнат, уӕд-иу бакӕсут видеороликмӕ «Йегъовӕ нӕ, цы хъуаг стӕм, уымӕй цух нӕ ныууадздзӕн». Ӕмӕ-иу стӕй йемӕ аныхас кӕн, цы йын баххуыс кӕндзӕн, цӕмӕй Йегъовӕйы фыццаг бынаты сӕвӕра.

ӔХХУЫС ЫН КӔН, ЙӔ НЫХМӔ КУЫ ЦӔУОЙ, УӔД ЙӔХИ КУЫД ХЪУАМӔ ДАРА, УЫЙ БАМБАРЫНӔН

13. Йесо йӕ ахуыргӕнинӕгты куыд бацӕттӕ кодта, сӕ ныхмӕ кӕй цӕудзысты, уымӕ?

¹³ Йесо йӕ фӕдылдзӕуджытӕн иу ӕмӕ дыууӕ хатты нӕ загъта, бирӕтӕ сӕ ныхмӕ кӕй цӕудзысты, суанг ма сӕ бинонтӕ ӕмӕ сӕ хиуӕттӕ дӕр (Матф. 5:11; 10:22, 36). Йӕ мӕлӕтмӕ бирӕ нал хъуыд, афтӕ сӕ бафӕдзӕхста, кӕйдӕрты дзы маргӕ дӕр кӕй акӕндзысты (Матф. 24:9; Иоан. 15:20; 16:2). Ӕмӕ сын загъта, цӕмӕй хорз хабар хъусын кӕнгӕйӕ сӕхи хъахъхъӕной ӕмӕ уой ӕмбаргӕ. Бамбарын сын кодта, цы дзурынц ӕмӕ цы аразынц, ууыл кӕй хъуамӕ хъуыды кӕной ӕмӕ, сӕ ныхмӕ чи дзура, уыдонимӕ быцӕу кӕнын кӕй нӕ хъӕуы. Уыдоны хъуыди уыцы уынаффӕтӕм гӕсгӕ архайын, цӕмӕй дарддӕр дӕр сӕ бон уыдаид хорз хабар хъусын кӕнын.

14. Библи кӕимӕ ахуыр кӕнӕм, уый нӕ бон куыд у бацӕттӕ кӕнын, йӕ ныхмӕ кӕй цӕудзысты, уымӕ? (2 Тимофеймӕ 3:12).

¹⁴ Махӕн та нӕ бон куыд у, Библи кӕимӕ ахуыр кӕнӕм, уый бацӕттӕ кӕнын, йӕ ныхмӕ кӕй цӕудзысты, уымӕ? Ис ын зӕгъӕн, ахуыр кӕнын чи райдайы, уыдонӕн се ’мкусджытӕ, се ’мбӕлттӕ кӕнӕ сӕ хиуӕттӕ арӕхдӕр цы фӕдзурынц. (Бакӕс 2 Тимофеймӕ 3:12.) Куысты дзы, гӕнӕн ис, хынджылӕг кӕной, суырнон мын и, зӕгъгӕ. Чидӕртӕ та йын, суанг йӕ бинонтӕ дӕр, гӕнӕн ис, дзурой, цытӕ дӕ уырны, зӕгъгӕ. Ӕппӕт уыдӕттӕм ӕй цас раздӕр бацӕттӕ кӕнӕм, уыйас хуыздӕр. Ӕмӕ стӕй йӕ ныхмӕ исчи куы цӕуа, уӕд зондзӕн, цы дзура ӕмӕ йӕхи куыд дара, уый.

15. Библи кӕимӕ ахуыр кӕнӕм, уымӕн йӕ бинонтӕ йӕ ныхмӕ куы цӕуой, уӕд ын цы баххуыс кӕндзӕн?

¹⁵ Библи кӕимӕ ахуыр кӕнӕм, уымӕн йӕ бинонтӕ кӕнӕ йӕ хиуӕттӕ йӕ ныхмӕ куы цӕуой, уӕд ын куыд ис баххуыс кӕнӕн? Зӕгъ ын, цӕмӕй ахъуыды кӕна, уый сӕ зӕрдӕмӕ цӕуылнӕ цӕуы, ууыл. Чи зоны сӕм афтӕ кӕсы, ӕмӕ йӕ Йегъовӕйы Ӕвдисӕнтӕ сайгӕ кӕнынц. Кӕнӕ та, чи зоны, Йегъовӕйы Ӕвдисӕнты ӕнӕуи нӕ уарзынц. Йесойӕн дӕр йӕ бинонтӕй кӕйдӕрты зӕрдӕмӕ нӕ цыд, цы арӕзта, уый (Мар. 3:21; Иоан. 7:5). Уӕдӕ, кӕимӕ ахуыр кӕныс, уымӕн амон, йӕхиуыл хӕцын кӕй хъуамӕ зона ӕмӕ алкӕимӕ дӕр, уыимӕ йӕ бинонтимӕ дӕр, фӕлмӕнӕй кӕй хъуамӕ ныхас кӕна.

16. Библи кӕимӕ ахуыр кӕнӕм, уымӕн нӕ бон куыд у ӕххуыс кӕнын, цӕмӕй, цӕуыл ӕууӕнды, уыдӕттыл иннӕтимӕ фӕлмӕнӕй ныхас кӕна?

¹⁶ Кӕимӕ ахуыр кӕныс, уымӕн йӕ бинонты Библийы тыххӕй фылдӕр базонын куы фӕнда, уӕд та? Уӕд хорз уаид, цы базыдта, уыдӕттӕ сыл иууылдӕр куы нӕ ныккалид. Кӕннод ӕй иннӕ хатт Библийы кой скӕнын уадзгӕ дӕр нал бакӕндзысты. Уӕдӕ йӕ ахуыр кӕн, цӕуыл ӕууӕнды, уый тыххӕй цыбыртӕй дзурын. Ӕмӕ-иу ӕм уӕд иннӕ хатт дӕр байхъусдзысты (Кол. 4:6). Чи зоны, йӕ бон у йӕ бинонтӕн равдисын сайт jw.org. Ӕмӕ, кӕй фӕнда, уымӕн йӕ бон уыдзӕн сайтмӕ кӕцыфӕнды афон дӕр бацӕуын ӕмӕ Йегъовӕйы Ӕвдисӕнты тыххӕй фылдӕр базонын. Уым йӕ бон уыдзӕн бакӕсын, цы йӕ фӕнды, уый ӕмӕ йӕ цас фӕнды, уыйбӕрц.

17. Адӕймаджы куыд ис ахуыр кӕнӕн, Йегъовӕйы Ӕвдисӕнты тыххӕй адӕм арӕхдӕр цы фарстатӕ фӕдӕттынц, уыдонӕн дзуапп дӕттын? (Кӕс нывмӕ дӕр.)

¹⁷ Сайты jw.org ис рубрикӕ «Арӕхдӕр кӕй фӕдӕттынц, уыцы фарстатӕ». Уыцы статьяты фӕрцы дӕ бон у, кӕимӕ ахуыр кӕныс, уымӕн ӕххуыс кӕнын, цӕмӕй-иу хуымӕтӕг дзуаппытӕ бацӕттӕ кӕна (2 Тим. 2:24, 25). Чиныджы «Амондджынӕй цӕр ӕнустӕм!» алы урочы кӕрон дӕр ис рубрикӕ «Иуӕй-иутӕ фӕзӕгъынц» кӕнӕ «Исчи дӕ куы бафӕрса». Ӕмӕ-иу дӕ ма ферох уӕд йемӕ уыцы рубрикӕйыл аныхас кӕнын. Иумӕ-иу афӕлварут, цӕуыл ӕууӕнды, уый иннӕтӕн йӕхи ныхӕстӕй куыд ӕмбарын кӕндзӕн. Кӕд хъӕуа, уӕд-иу ын зӕгъ, йӕ бон цы у фӕхуыздӕр кӕнын. Адӕмимӕ куыд ныхас кӕндзӕн, уый-иу афтӕ куы афӕлварат, уӕд ын стӕй ӕнцондӕр уыдзӕн йе ’мкусджытӕн кӕнӕ йӕ хиуӕттӕн ӕмбарын кӕнын, цӕуылдӕр цӕмӕн кӕнӕ цӕуылнӕ ӕууӕнды, уый.

18. Библи кӕимӕ ахуыр кӕныс, уымӕн дӕ бон куыд у баххуыс кӕнын, цӕмӕй ӕнӕаргъуыд хъусынгӕнӕг суа? (Матфейы 10:27).

¹⁸ Йесо йӕ ахуыргӕнинӕгтӕн бафӕдзӕхста, цӕмӕй адӕмӕн хорз хабар хъусын кодтаиккой. (Бакӕс Матфейы 10:27.) Библи чи ахуыр кӕны, уый куы райдайа хӕдзарӕй-хӕдзармӕ хъусын кӕнын, уӕд йӕхиуыл банкъардзӕн, Йегъовӕ йын куыд ӕххуыс кӕны, уый. Ӕмӕ афтӕмӕй сахуыр уыдзӕн йӕ ныфс Йегъовӕйыл дарын. Дӕ бон ын куыд у баххуыс кӕнын, цӕмӕй йӕ разы ахӕм нысан сӕвӕра? Зӕгъӕм, ӕмбырды зиуы тыххӕй куы фехъусын кӕной, уӕд йемӕ аныхас кӕн, цы саразын ӕй хъӕуы, цӕмӕй ӕнӕаргъуыд хъусынгӕнӕг суа. Бамбарын ын кӕн, зиуы рӕстӕг хъусын кӕнын райдайын ӕнцондӕр цӕмӕн у, уый. Иннӕ хорз нысан – «Нӕ чырыстон цард ӕмӕ нӕ лӕггад» чи хуыйны, уыцы фембӕлды йын хӕслӕвӕрдтӕ уа. Уый фӕрцы сахуыр уыдзӕн, цӕуыл ӕууӕнды, уыдӕттӕ иннӕтӕн хуыздӕр ӕмбарын кӕнын.

МА-ИУ ДЫЗӔРДЫГ КӔН, ЙЕГЪОВӔЙЫ ЗӔРДӔ РУХС КӔНЫН ӔЙ КӔЙ ФӔНДЫ, УУЫЛ

19. Цӕмӕй бӕрӕг у, Йесо кӕй нӕ дызӕрдыг кодта, йӕ ахуыргӕнинӕгты Йегъовӕйы зӕрдӕ рухс кӕнын кӕй фӕндыд, ууыл? Нӕ бон ӕй куыд у бафӕзмын?

¹⁹ Йесо цалынмӕ уӕлӕрвтӕм нӕ аздӕхт, уӕдмӕ йӕ ахуыргӕнинӕгтӕн загъта, ахӕм бон кӕй ралӕудзӕн, ӕмӕ та уыдзысты иумӕ. Йесо сын кодта, уыдон дӕр уӕлӕрвтӕм кӕй ацӕудзысты, уый кой. Фӕлӕ йӕ уыдон нӕ бамбӕрстой. Ӕмӕ кӕд алцы не ’мбӕрстой, уӕддӕр Йесо нӕ дызӕрдыг кодта, Йегъовӕйы зӕрдӕ рухс кӕнын сӕ кӕй фӕндыд, ууыл (Иоан. 14:1–5, 8). Уый зыдта, цыдӕртӕ бамбарынӕн сӕ рӕстӕг кӕй хъуыди, зӕгъӕм, уӕлӕрвты кӕй цӕрдзысты, уый бамбарынӕн (Иоан. 16:12). Нӕ бон куыд у Йесойы бафӕзмын? Библи кӕимӕ ахуыр кӕнӕм, уый хъуамӕ уына, кӕй нӕ дызӕрдыг кӕнӕм, Йегъовӕйы зӕрдӕ рухс кӕнын ӕй кӕй фӕнды, ууыл.

20. Иу малавиаг хо куыд равдыста, ныфс ӕй кӕй уыди, Библи кӕимӕ ахуыр кодта, уый иу бон раст хъуыдымӕ кӕй ӕрцӕудзӕн?

²⁰ Хъуамӕ ма дызӕрдыг кӕнӕм, Библи кӕимӕ ахуыр кӕнӕм, уый кӕй фӕнды, раст цы у, уый аразын. Иу малавиаг хо, Чифу́ндо, Библи ахуыр кӕнын райдыдта иу ӕрыгон сылгоймагимӕ, Алина́феимӕ. Уый уыд католик. Чиныгӕй «Амондджынӕй цӕр ӕнустӕм!» 14-ӕм урок куы равзӕрстой, уӕд ӕй Чифундо бафарста, Хуыцаумӕ нывтӕ ӕмӕ гуымирыты уылты кувыны тыххӕй цы хъуыды кӕны, уымӕй. Алинафемӕ уыцы фарста хъыг фӕкаст, ӕмӕ афтӕ бакодта: «Уый алкӕмӕн дӕр йӕхи бар у!» Чифундо ӕнхъӕлдта, ӕмӕ Алинафе зӕгъдзӕн, Библи ахуыр кӕнын мӕ нал фӕнды, зӕгъгӕ. Фӕлӕ Алинафе ницы дзырдта. Ӕмӕ Чифундо дӕр йемӕ дарддӕр ахуыр кодта. Ныфс ӕй уыди, искуы раст хъуыдымӕ кӕй ӕрцӕудзӕн. Цалдӕр мӕйы фӕстӕ, 34-ӕм урокыл куы ныхас кодтой, уӕд, Чифундо Алинафемӕ радта, 6-ӕм дӕлсӕргонды чи ис, уыцы фарста: «Библи ахуыр кӕнын кӕй райдыдтай ӕмӕ Йегъовӕйы хуыздӕр кӕй базыдтай, уый дын ныридӕгӕн цы пайда ӕрхаста?» Цымӕ Алинафе цавӕр дзуапп радта? Чифундо радзырдта: «Уыйбӕрц цыдӕртӕ ранымадта, ӕмӕ диссаг! Афтӕ дӕр ма загъта, зӕгъгӕ, дам, Йегъовӕйы Ӕвдисӕнтӕ, Библимӕ гӕсгӕ раст цы нӕу, уыдӕттӕ нӕ аразынц». Уымӕй бирӕ нӕ рацыд, афтӕ Алинафе гуымирытӕн ӕмӕ нывтӕн нал куывта ӕмӕ донаргъуыд райста.

21. Библи кӕимӕ ахуыр кӕнӕм, уымӕн нӕ бон куыд у баххуыс кӕнын, цӕмӕй йӕ бафӕнда рӕстдзинады фӕндагыл слӕууын?

²¹ Рӕстдзинады мыггаг адӕймаджы зӕрдӕйы Йегъовӕ «рӕзын кӕны». Фӕлӕ, Библи чи ахуыр кӕны, уымӕн мах дӕр ӕххуыс кӕнӕм, цӕмӕй йӕ уырнындзинад фидар кӕна (1 Кор. 3:7). Йегъовӕ йӕм цӕмӕ ӕнхъӕлмӕ кӕсы, ӕрмӕст уыдӕттӕ йын нӕ амонӕм, фӕлӕ ма йын ӕххуыс кӕнӕм, цӕмӕй Йегъовӕйы ноджы тынгдӕр бауарза. Ӕххуыс ма йын кӕнӕм, цӕмӕй йӕ бафӕнда Йегъовӕйы йӕ царды фыццаг бынаты сӕвӕрын. Стӕй йӕ ахуыр кӕнӕм йӕ ныфс Йегъовӕйыл дарын, йӕ ныхмӕ куы цӕуой, уӕд. Уымӕй уӕлдай, хъуамӕ уына, кӕй нӕ дызӕрдыг кӕнӕм, Йегъовӕйы зӕрдӕ рухс кӕнын ӕй кӕй фӕнды, ууыл. Ӕмӕ уӕд йӕхӕдӕг дӕр нӕ дызӕрдыг кӕндзӕн, йӕ бон кӕй бауыдзӕн Йегъовӕйы закъӕттӕм гӕсгӕ цӕрын ӕмӕ рӕстдзинады фӕндагыл слӕууын.